B fãagda tõnd ne tãoog ned sẽn bẽte
B fãagda tõnd ne tãoog ned sẽn bẽte
“[A Zeova] fãagda foo ne tãoog ned sẽn bẽta.”—YƖƖL SÕAMYÃ 91:3.
1. Sẽn bẽt-a nebã yaa ãnda, la bõe yĩng t’a sek zoeese?
KIRIS-NEB hakɩkã fãa tara bɛ sẽn tar yam la sɩlem sẽn yɩɩd ninsaal dẽndã. Yɩɩl Sõamyã 91:3 pʋgẽ, b yeelame t’a bẽta nebã wa ned sẽn bẽt tãoog n na n yõk liuula. La bɛ-kãngã yaa ãnda? Yʋʋmd 1883 tɛka, Gũusg Gasgã wilgdame tɩ bɛ-kãng pa ned a to n zʋʋg a Sʋɩtãan ye. Bɛ kãngã sẽn tar pãng wʋsg la sɩlmã maanda a sẽn tõe fãa n na n bẽd a Zeova nin-buiidã n yõk wa ned sẽn bẽt liuul n na n yõkã.
2. Bõe yĩng tɩ b mak a Sʋɩtãan ne liu-n-bẽta?
2 Pĩnd wẽndẽ wã, b ra yõgda liuuli wã n kʋʋd n wãbdẽ la b kʋʋd n maand maando. Kẽer me ra yõgd-b-la b yɩɩn-noodã la b neermã yĩng bala. La yɩl n bẽd liuuli n yõk yaa toogo, bala b gũusda wʋsgo. B rabeemdã yĩng me kɩtame tɩ b sã n wʋm bʋrg bilf bal la b sẽn yɩkde. Yaa rẽ n so tɩ pĩnd wẽndẽ wã, liu-n-bẽt da rengd n bao n bãnga liuul ning buud a sẽn dat n yõkã sõma. Wala makre, liuulã zʋgo, a sẽn nong bũmb ninga, la b sẽn tõe n paam-a wakat ninga. Rẽ poore, a tõe n bãnga a sẽn na n bẽd-a to-to n yõke. B sẽn mak a sʋɩtãan ne liu-n-bẽt Biiblã pʋgẽ wã sõngda tõnd tɩ d bãng a sẽn maand to-to n bẽt nebã. A Sʋɩtãan me rengd n bao n bãnga tõnd ned kam fãa sẽn yaa a soaba. A gũusdame n get tõnd zʋgã sẽn yaa to-to, la tõnd sẽn nong bũmb ninsã, tɩ rẽ poor masã bɩ a bãng n bẽd tõnd n yõke. (2 Tɩmote 2:26) La a Sʋɩtãan sã n tõog n bẽd tõnd n yõke, tõnd zoodã ne Wẽnnaam sãamdame, tɩ rẽ tõe n wa baas ne tõnd mengã sãoongo. Dẽnd sẽn na yɩl t’a ra paam-do, d segd n bao n bãnga a sẽn maand to-to n paamd nebã.
3, 4. Wãn to la a Sʋɩtãan maand wa gɩgemde, la wãn to la a maand wa ruruugu?
3 Yɩɩl gʋlsdã yeelame me t’a Sʋɩtãan maanda wa gɩgem-poll la ruruug sẽn maand to-to n yõgd rũmsã. (Yɩɩl Sõamyã 91:13) Wakat ninga, a Sʋɩtãan maanda wa gɩgemd n zabd ne a Zeova nin-buiidã vẽeneg-vẽenega, n kɩtdẽ tɩ b nams-b bɩ n yiisd noy n gɩdgd b tʋʋmdã. (Yɩɩl Sõamyã 94:20) Namsgã bɩ gɩdgrã tõe n kɩtame tɩ neb kẽer bas n pa le tũud a Zeova ye. La naoor wʋsgo, pʋd n kɩtdame tɩ Wẽnnaam nin-buiidã maneg n nong taab n paase. La wãn to la a Sʋɩtãan maand wa ruruugu?
4 A Sʋɩtãan tũnugda ne a yamã sẽn yaa wʋsgã n solgd n bẽt nebã n paamd-ba, wa ruruug sẽn solgd n kɛɛd to-to wã. A maana woto n tõog n belg Wẽnnaam neb kẽer tɩ b bas Wẽnnaam daabã maaneg n maan yẽ raabã, tɩ rẽ kɩt tɩ yel-beed paam-ba. La zu-noogã, tõnd mii a Sʋɩtãan sẽn maand to-to n belgd nebã n paamdẽ wã. (2 Korẽnt dãmba 2:11) Bɩ d gom a Sʋɩtãan bẽds a naas yelle.
Ninsaal zoeese
5. Bõe yĩng tɩ “ninsaal zoeesã” yaa bẽdg sẽn paamd neb wʋsgo?
5 A Sʋɩtãan miime tɩ ninsaal fãa ratame t’a sã n be a taab sʋk bɩ b nong-a la b waoogd-a. Kiris-nebã me yaa woto. A Sʋɩtãan sẽn mi rẽ wã yĩnga, a tũnugda ne rẽ n bẽt-ba. Wala makre, a kɩtame tɩ Wẽnnaam neb kẽer kɩɩs Wẽnnaam noy ninsaal zoees yĩnga. (Yelbũna 29:25) La ninsaal zoees sã n kɩt tɩ Wẽnnaam ned naag neb a taab n maan Wẽnnaam sẽn kisi, ka rẽ bɩ a pa maan Biiblã sẽn yet tɩ b maan bũmb ningã, wakat kãnga yaa a Sʋɩtãan bẽdgã pʋgẽ la a lʋɩyã.—Ezekɩɛll 33:8; Zak 4:17.
6. Rɩk-y makr n wilg bi-bɩɩg sẽn tõe n lʋɩ a Sʋɩtãan bẽdg pʋgẽ to-to?
6 Wala makre, bi-bɩɩg tõeeme n zoe a karen-bi-taas nif n sak n yũ sɩgaare. Tõe t’a sẽn da rabd lekollã baraarã, a ra pa tagsd meng t’a na n wa sak n yũu sɩgaar ye. La a tũud-n-taasã pẽdgr yĩng kɩtame t’a maand bũmb sẽn na n kõ-a bãas la sãam Wẽnnaam sũuri. (2 Korẽnt dãmba 7:1) La sɩnga wãn t’a wa sak n maand woto? Tõe t’a sẽn yãk zo-rãmb ninsã yaa zo-wẽnse, la a ra yaeesdame t’a sã n pa sak n yũ sɩgaarã, b na n wa yaal-a lame. Kom-bɩɩse, ra tol-y n bas-y t’a Sʋɩtãan sẽn wõnd liu-n-bẽtã bẽd-y n yõk ye! Sẽn na yɩl t’a ra paam-y n yõke, bɩ y ra wa sak n kɩɩs Wẽnnaam noyã baa yaa bilf ye. Tũ-y Biiblã sẽn yet tɩ y lak y mens ne tũud-n-ta-wẽnsã.—1 Korẽnt dãmba 15:33.
7. Wãn to la a Sʋɩtãan tõe n kɩt tɩ roagdb kẽer pa tũ Biiblã noya?
7 Roagdb nins sẽn yaa kiris-nebã geta b zakã rãmb yell neer wa Biiblã sẽn yet tɩ b maanã. (1 Tɩmote 5:8) La a Sʋɩtãan ratame n kɩt tɩ kiris-nebã wa getẽ tɩ b zakã rãmb yell gesg n tar yõod n yɩɩd bũmb fãa. Wala makre, tõe tɩ kiris-neb kẽer nong n vaanda tigissã, bala b tʋʋm taoor dãmb n pẽdg-b tɩ b tʋm n paas tʋʋmã sigb poore. Tigis-kãseng me sã n wa kolgdẽ, b zoetame n pa rat n kos sor tʋʋmã zĩigẽ, n tõog n naag b saam-biisã n pẽg a Zeova tigisg-kãsengã fãa sasa ye. D sã n ‘teeg a Zeova,’ d pa na n lʋɩ a Sʋɩtãan bẽd-kãngã pʋgẽ ye. (Yelbũna 3:5, 6) Sẽn paase, d sã n ning d yamẽ wã tɩ tõnd fãa yaa a Zeova zakã neba, la t’a pa tõe n pa ges tõnd yelle, rẽ na n sõng-d lame tɩ d ra wa bas t’a Sʋɩtãan paam-d ye. Roagdba, rẽ yĩnga yãmb kɩsa sɩd tɩ yãmb sã n maan a Zeova raabã, a pa tõe n pa ges yãmb ne y zakã rãmb yell bɩ? Bɩ y na n basame t’a Sʋɩtãan tũnug ne ninsaal zoeesã n tõog n kɩt tɩ yãmb maan a sẽn datã? Yɩta sõma tɩ y pʋʋs a Zeova la y tags sogs-kãensã zug neere.
Arzɛkã baoobo
8. Wãn to la a Sʋɩtãan tũnugd ne arzɛkã n bẽt nebã?
8 A Sʋɩtãan tũnugda ne arzɛkã baoob me n dat n bẽd tõndo. Rũndã-rũndã, bãnk rãmb la ligd-baoor sigls a taab n wilgd nebã tɩ bãmb tõe n sõng-b lame tɩ b paam arzɛk tao-tao n pa namse. Kiris-neb kẽer meng tõe n wa basame tɩ rẽ belg-ba. Sasa ninga, ned tõe n yeela kiris-ned yaa: “Wɩsg f meng n tʋm n paam ligdi. F sã n wa paam ligdã wʋsgo, yaa f zĩ n dɩtẽ masã. Rẽ masã fo tõeeme meng n wa lebg so-pakda.” Wakat ning menga, yaa saam-biis sẽn baood n na n tũnug ne saam-biis a taab n paam ligdã n nong n gomd woto. La tags-y neer n gese: Rẽ yĩnga pa arzɛk soab ning yell a Zezi sẽn gomã tagsgã buud la woto sɩda?—Luk 12:16-21.
9. Bõe n tõe n kɩt tɩ kiris-neb kẽer wa baood teed wʋsgo?
9 A Sʋɩtãan soo dũni wẽn-kãngã n maand a sẽn tõe fãa sẽn na yɩl tɩ nebã baood teed wʋsgo. Kiris-ned me sã n baood teed wʋsgo, rẽ tõe n dɩɩ Wẽnnaam koɛɛgã sẽn be a sũurẽ wã tɩ ‘ka womd biis ye.’ (Mark 4:19) Biiblã yet-d lame tɩ d sã n tar dɩɩb ne futu, bɩ d kɩt tɩ woto sek-do. (1 Tɩmote 6:8) La neb wʋsg lʋɩta a Sʋɩtãan bẽdgã pʋgẽ, b sẽn pa tũud sagl-kãnga wã yĩnga. Tõe tɩ yaa wuk-m-meng n kɩt tɩ b tagsdẽ tɩ yaa tɩlae tɩ b paam teed kẽerã. La tõnd mengã yẽ? Rẽ yĩnga tõnd rata teed wʋsgo, tɩ rẽ kɩt tɩ Wẽnnaam tʋʋmdã pa le pak tõnd wʋsg bɩ? (Aze 1:2-8) Zu-bʋko, ligd zu-loees sẽn wa n paam kẽere, b basa Wẽnnaam tʋʋmdã n na n tʋm wʋsg n paas n tõog n kell n vɩɩmd wa bãmb sẽn minim n vɩ to-to wã. La woto nooma a Sʋɩtãana.
Filim dãmbã la mizik yoodã
10. Sok-bʋg la kiris-ned fãa segd n sok a menga?
10 A Sʋɩtãan leb n sãamda nebã yam n kɩtdẽ tɩ b getẽ tɩ bũmb nins sẽn pa sõma wã yaa sõma. Sodom ne Gomoor nebã sẽn da tar manesem ningã n be filim dãmb wʋsg la reem a taab pʋsẽ rũndã-rũndã. Baa kibayã b sẽn kõt televiziõ wã pʋgẽ la zʋrno rãmbã pʋsẽ wã nong n gomda bi-beelmã la raglmã yelle. Filim dãmbã la mizigsã wʋsg sẽn yaa to-to wã kɩtame tɩ nebã pa mi ‘sõma ne wẽng n bak ye.’ (Hebre dãmba 5:14) La yaa d ra yĩm a Zeova sẽn kɩt tɩ no-rɛɛs a Ezai togs goam ninsã ye. A yeela woto: “Toog bee neb nins sẽn boond wẽng tɩ sõma la b boond sõma tɩ wẽnga zutu.” (Ezai 5:20) Rẽ yĩnga a Sʋɩtãan tõog n kɩtame tɩ filim dãmb la mizik yoodã sãam yãmb yamã tɩ y pa miẽ bɩ? Tara yõod wʋsg tɩ y fees y mens n gese.—2 Korẽnt dãmba 13:5.
11. Gũusg Gasgã ra yeela bõe feyetõ rãmbã wɛɛngẽ?
11 Sẽn kolg yʋʋm 25 masã, Gũusg Gasgã ra keooga a Zeova nin-buiidã ne filim nins b sẽn yiisd televiziõ wã pʋgẽ tɩ b boond tɩ feyetõ rãmbã. * B wilga filim kãensã sẽn tõe n sãam ned yam to-to t’a pa bãnge. Ad Gũusg Gasgã sẽn yeel bũmb ninga: “Filim kãensã pʋsẽ, b wilgdame tɩ f tõe n maana bũmbã fãa sẽn na yɩl tɩ ned nong-fo. Wala makre filim a ye pʋga, pʋg-sad sẽn dɩk pʋg yeela a zoa yaa: ‘Mam nonga a Victor wɛ. Pʋgã pa yell ye. . . . Mam sẽn paam n na n dog a biigã sẽn noom maam to-to ka!’ Filmã maandb kɩtame tɩ pʋg-sadã sẽn wa n yet woto wã tɩ mizik noog naage. Rẽ fãa kɩtame tɩ yãmb sẽn zĩ n getẽ wã, y pa le ne tɩ pʋg-sadã sẽn maan bũmb ningã yaa wẽng ye. Y pʋd n nonga a Victor masã. Sẽn paas menga, y getame tɩ pʋg-sadã tara bʋʋm.” Gũusg Gasgã paasa woto: “Pag a ye sẽn da nong n get filim kãensã pĩndã wilgame tɩ bilf-bilfã, f pa wat n bãng la f baood bʋʋm n na n wilg tɩ nebã sẽn maan bũmb ning filmã pʋgẽ wã segdame ye. A paasa woto: ‘D miime tɩ yoobã yaa wẽnga. . . . La mam wa n mikame tɩ m kõta sẽn maand-b rẽ filmã pʋgẽ wã bʋʋm.’”
12. Bõe n wilgd tɩ zemsame tɩ b keoog-d ne filim kẽer sẽn yit televiziõ rãmbã pʋsẽ rũndã-rũndã?
12 Filim yood a woto buudã lebga wʋsg rũndã-rũndã n yɩɩd wakat ning Gũusg Gasgã sẽn wa n kõt sagl-kãensã wã. Tẽns wʋsg pʋsẽ, b yiisd-b-la televiziõ rãmbã pʋsẽ wĩntoog la yʋngo. Pagba, rap la kom-bɩɩs wʋsg nong n geta filim kãensã. La d pa segd n belg d mens ye. D sã n tagsdẽ tɩ bũmb nins tõnd sẽn get filim kãensã pʋsẽ wã wẽnem pa ta bũmb nins sẽn sɩd maand vɩɩmã pʋgẽ wã, d belgda d menga. Rẽ yĩnga kiris-ned tara bʋʋm n na n sak n ges filim dãmb sẽn wilgd neb a sẽn pa na n tol n sak n bool a zakẽ bɩ?
13, 14. Bõe la neb kẽer yeel n wilg sagls nins b sẽn kõ feyetõ rãmbã wɛɛngẽ wã sẽn naf-b to-to?
13 Neb wʋsg sak n deega sagls nins “tʋm-tʋmd sẽn tũud sɩd la sẽn tar yamã” sẽn kõ wã tɩ naf-b wʋsgo. (Matɩe 24:45-47) Kẽer sẽn karem Gũusg Gasgã sẽn kõ sagls sẽn yit Biiblã pʋgẽ la sẽn yaa vẽenesã poore, b gʋlsame n wilg rẽ sẽn sõng-b to-to. * Pag a yembr yeela woto: “Mam gesa feyetõ rãmbã yʋʋm 13. Mam da tagsdame tɩ m sẽn da ket n kẽnd tigissã la m yit koe-moonegã wakat ninga, rẽ pa tõe n maan maam bũmb ye. La mam wa n tagsda wa sẽn be-b filim kãensã pʋsẽ wã sẽn tagsdã, tɩ f sɩd sã n namsd-f bɩ a sã n pa nong-fo, f tõe n baoa rao a to tɩ yell kaẽ, bala yaa yẽ n bao. Woto kɩtame tɩ mam beeg a Zeova la m sɩdã, bala m baoa rao a to.” B yiisa pʋg-kãngã tigingã pʋgẽ. La a wa n teka yam n kos sugr tɩ b lebg n deeg-a. Sagls nins Gũusg Gasgã sẽn kõ feyetõ rãmbã zugã sõng-a-la wʋsg t’a tõog n bas n pa le get bũmb nins a Zeova sẽn kisã ye.—Amos 5:14, 15.
14 Ned a to me yeela woto: “Mam sẽn karem saglsã m yãbame, bala m bãngame tɩ m da pa le tũud a Zeova ne m sũurã fãa ye. M pʋlma m Wẽnnaamã tɩ m pa na n le ges filim kãensã ye.” Saam-bi-poak a yembr n gʋls n pʋʋs barka, la a sak n deeg t’a ra nonga filim kãensã buud gesg hal wʋsgo. A yeela woto: “Mam da sokda m meng n get rẽ sã n pa sãam maam ne a Zeova zoodã. Wãn to la m tõe n yɩ neb nins sẽn be feyetõ rãmbã pʋsẽ wã zoa la m ye yɩ a Zeova me zoa?” Feyetõ rãmbã sã n sãama neb yam hal yʋʋm 25 sẽn looge, rũndã-rũndã n yɩɩde! (2 Tɩmote 3:13) D segd n gũusa ne reem yoodã buud fãa, wala makre feyetõ rãmbã, ze-video nins sẽn wilgd neb sẽn maand b taab pãngã, la kasɛt video nins sẽn wilgd mizik rãmb sẽn tar gom-dẽgd la sao-yoodã, bala yaa a Sʋɩtãan bẽdgo.
Mo-yõsã
15. Wãn to la Sʋɩtãanã paam neb kẽere?
15 A Sʋɩtãan tũnugda ne mo-yõsã n dat n welg a Zeova nin-buiidã ne taabã. Baa tõnd sẽn yaa a soab tigingã pʋgẽ me, d tõe n lʋɩɩ bẽd-kãngã pʋgẽ. Kẽer basame tɩ Sʋɩtãanã tõog-ba, bala b basame tɩ mo-yõsã sãam zems-n-taar la sũ-noog ning sẽn be bãmb ne taab sʋkã, la kɩt tɩ b kong bark nins a Zeova sẽn ningd a nin-buiidã.—Yɩɩl Sõamyã 133:1-3.
16. Wãn to la a Sʋɩtãan maand sɩlem n na n welg tõnd ne taaba?
16 Dũni gill pipi zabrã sasa, a Sʋɩtãan maka vẽeneg-vẽeneg n na n menems a Zeova nin-buiidã tẽngã zugu, la a pa tõog ye. (Wilgri 11:7-13) Rẽ tɛka, a maanda sɩlem n na n sãam zems-n-taar ning sẽn be tõnd sʋkã. Tõnd sã n bas tɩ mo-yõsã welg-do, d kõta a Sʋɩtãan pãnga. Tõeeme n wa kɩt tɩ vʋʋsem sõngã pa le sõngd tõnd la tigingã ye. La sã n wa lebg woto, a Sʋɩtãan sũurã n noome, bala tigingã neb sã n welg taaba, kɩtdame tɩ b pa le tõe n moon koɛɛgã sõma ye.—Efɛɛz rãmba 4:27, 30-32.
17. Yell sã n wa be yãmb ne y saam-biig sʋka, bõe la y tõe n maane?
17 Yell sã n wa be yãmb ne y saam-biig sʋka, bõe la y tõe n maane? Yaa sɩd tɩ yɛlã pa wõnd taab ye. La bũmb wʋsg sã n tõe n kɩt tɩ neb a yiib pa zems taab me, bʋʋm pa be sẽn segd n kɩt tɩ b pa welg yellã ye. (Matɩe 5:23, 24; 18:15-17) Sagls nins sẽn be Biiblã pʋgẽ wã yaa Wẽnnaam n kõ tõndo. B zemsa zãnga. Tõnd sã n tũud-ba, pa tõe n pa sõng-d ye!
18. D sã n dɩk a Zeova togs-n-taare, bõe yĩng tɩ na n sõng-d tɩ d tõog n welg mo-yõsa?
18 A Zeova “kõta sugri.” (Yɩɩl Sõamyã 86:5; 130:4) Tõnd me sã n dɩk a togs-n-taare, d wilgdame tɩ d yaa a kom-nongdse. (Efɛɛz rãmba 5:1) Tõnd fãa maanda yel-wẽna, la d fãa baoodame t’a Zeova kõ-d sugri. Dẽnd tõnd sã n pa nong n kõt sugri, bɩ d gũus n da wa lebg wa rao ning yell a Zezi sẽn gom a kibar a ye pʋgẽ wã ye. Ra-kãngã zãgsame t’a kõn bas a tʋmd-n-taag samd sẽn pa zem fʋɩ taale, tɩ yẽ meng yaool n da tar a zu-soab samd sẽn yɩɩd rẽ t’a zu-soabã sak n bas taale. A zu-soabã sẽn wʋm a sẽn maan bũmb ningã, a kɩtame tɩ b pag-a roogo. A Zezi baasa kibarã woto: “Mam [saasẽ] Ba wã na n maana yãmb woto, yãmb ned kam fãa sã n ka kõ a ba-biis sugr ne a sũur fãa.” (Matɩe 18:21-35) Tõnd sã n tags kiba-kãngã zug neer la d bʋgs n ges a Zeova sẽn kõt tõnd sugr naoor wʋsgã, na n sõng-d lame tɩ d modg n welg yell sẽn be tõnd ne d saam-biig sʋka.—Yɩɩl Sõamyã 19:15.
D zĩnd “Sẽn-ka-to zĩ-soalgdgã pʋgẽ”
19, 20. Bõe yĩng tɩ d segd n zĩnd a Zeova “zĩ-soalgdgã” la a “maasmẽ” wã?
19 Tõnd wakatã yaa yelle. A Zeova sã n da pa kogend tõndo, woto t’a Sʋɩtãan sãama tõnd zãnga. Dẽnd sẽn na yɩl t’a Sʋɩtãan sẽn wõnd liu-n-bẽtã ra bẽd tõnd n paame, d segd n paa “Sẽn-ka-to zĩ-soalgdgã pʋgẽ,” la d zĩnd “Sẽn-tõeyã-fãa wã maasmẽ” n paam koglgo.—Yɩɩl Sõamyã 91:1.
20 Bɩ d ra wa tags abada t’a Zeova noyã tũub kɩtdame tɩ d pa tõe n maan d yam ye. B kogenda tõndo. Tõnd fãa tara bɛ t’a yamã yɩɩd ninsaal rẽndã. A Zeova sã n pa sõng tõndo, bɛ wã na n bẽda tõnd fãa n yõke. (Yɩɩl Sõamyã 124:7, 8) Woto yĩnga, bɩ d pʋʋs n kos t’a Zeova fãag-d ne a Sʋɩtãan bẽdsã!—Matɩe 6:13.
[Tẽngr not rãmbã]
^ sull 11 Yʋʋmd 1983, tʋʋlg kiuug pipi daar Gũusg Gasgã, seb-neng a 3-7.
^ sull 13 Yʋʋmd 1984, tʋʋlg kiuug pipi daar Gũusg Gasgã, seb-neng 23.
Yãmb ket n tẽrame bɩ?
• Bõe yĩng tɩ “ninsaal zoeesã” yaa bẽdg menga?
• Wãn to la a Sʋɩtãan tũnugd ne arzɛkã n bẽt nebã?
• Wãn to la a Sʋɩtãan tũnug ne filim la mizik yoodã n bẽd neb kẽere?
• A Sʋɩtãan tũnugda ne bõe n na n welg tõnd ne taaba?
[Zãmsgã sogsgã]
[Foto, seb-neng 29]
“Ninsaal zoeesã” sẽn yaa bẽdgã yõka kẽere
[Foto, seb-neng 30]
Yãmb geta bũmb nins a Zeova sẽn kisã bɩ?
[Foto, seb-neng 31]
Mo-yõs sã n be yãmb ne y saam-biig sʋka, bõe la y tõe n maane?