Go Hlakodišwa Melabeng ya Morei wa Dinonyana

“[Jehofa] o tla go hlakodiša molabeng wa morei wa dinonyana.”—PSALME 91:3, NW.

1. “Morei wa dinonyana” ke mang, le gona ke ka baka la’ng a le kotsi?

BAKRISTE ka moka ba lebeletšana le lenaba leo le nago le bohlale bjo bo phagametšego bja batho le makatika. Psalme 91:3 (NW) e le bitša “morei wa dinonyana.” Lenaba le ke mang? Ga e sa le go tloga tokollong ya June 1, 1883, makasine wo o be o dutše o le hlalosa e se yo mongwe ge e se Sathane Diabolo. Lenaba le le matla le katana ka boradia go timetša le go rea batho ba Jehofa bjalo ka morei wa dinonyana ge a leka go tanya nonyana.

2. Ke ka baka la’ng Sathane a swantšhwa le morei wa dinonyana?

² Mehleng ya bogologolo, dinonyana di be di swarwa ka baka la melotšana ya tšona e bosana, ka baka la mafofa a tšona a mebalabala, gotee le bakeng sa dijo le sehlabelo. Lega go le bjalo, dinonyana ke diphedi tšeo ka tlhago di lego šedi e bile di phelago di tšhogile, tšeo go lego thata go di tanya. Ka baka leo, morei wa dinonyana wa mehleng ya Beibele o be a thoma ka go ithuta ka kelohloko ka dika le mekgwa ya mohuta wa dinonyana tšeo a bego a nyaka go di rea. Ke moka, o be a loga maano a go di tanya. Ge e swantšha Sathane le morei wa dinonyana, Beibele e re thuša go kwešiša mekgwa ya gagwe. Diabolo o ithuta rena re le motho ka o tee ka o tee. O šetša mekgwa ya rena le dika tša rena gomme a bea molaba o sa bonagalego ka maiteko a go re swara re phela. (2 Timotheo 2:26) Ge a ka re swara o tla re senya moyeng gomme seo sa lebiša tshenyegong ya sa ruri. Lega go le bjalo, gore re šireletšege, re swanetše go tseba makatika a fapa-fapanego a “morei wa dinonyana.”

3, 4. Ke neng moo makatika a Sathane a swanago le a tau le a marabe?

³ Go re fa seswantšho se se bonagalago kudu, mopsalme o swantšha makatika a Sathane le a tawana goba a marabe. (Psalme 91:13) Bjalo ka tau, Sathane ka dinako tše dingwe o hlasela ka go lebanya a diriša tlaišo goba mogato wa mmušo kgahlanong le batho ba Jehofa. (Psalme 94:20) Ditlhaselo tše bjalo tše di swanago le tša tau di ka wiša ba mmalwa. Lega go le bjalo, gantši kudu ditlhaselo tše tše di lego molaleng di šoma ka mo go fapanego gomme tša feleletša ka go dira gore batho ba Modimo e be batee. Ka gona, go thwe’ng ka ditlhaselo tša Sathane tša bohwirihwiri tše swanago le tša marabe?

⁴ Diabolo o diriša bohlale bja gagwe bjo bo phagametšego bja batho go loga maano a mabe le a bolayago, go swana le a noga e nago le mpholo yeo e utamego. Ka tsela ye, o atlegile kudu ka go tšhela menagano ya batho ba bangwe ba Modimo mpholo, le go gokeletša batho go dira thato ya gagwe go e na le go dira ya Jehofa, gomme ditla-morago ke tše nyamišago. Seo se kgahlišago ke gore re tseba maano a Sathane. (2 Bakorinthe 2:11) Anke ga bjale re eleng hloko melaba e mene e bolayago yeo e dirišwago ke “morei wa dinonyana.”

Go Boifa Batho

5. Ke ka baka la’ng molaba wa “xo boifa batho” e le o šomago gakaakaa?

⁵ “Morei wa dinonyana” o kwešiša kganyogo e tlwaelegilego ya motho ya go nyaka go amogelwa le go ratwa ke ba bangwe. Bakriste ga ba hlokomologe ka bopelo-thata dikgopolo le maikwelo a bao ba ba dikologilego. Ka go tseba se, Diabolo o diriša go tshwenyega ga bona ka seo batho ba se naganago ka bona. Ka mohlala, o rea batho ba bangwe ba Modimo a diriša molaba wa “xo boifa batho.” (Diema 29:25) Ge e ba ka baka  la go boifa batho, bahlanka ba Modimo ba tlatša ba bangwe ka go dira seo Jehofa a se iletšago goba ba sa dire seo Lentšu la Modimo le ba laelago gore ba se dire, ba tantšwe ke “morei wa dinonyana.”—Hesekiele 33:8; Jakobo 4:17.

6. Ke mohlala ofe wo o bontšhago kamoo mofsa a ka tanywago ke “morei wa dinonyana”?

⁶ Ka mohlala, mofsa a ka ineela kgateletšong ya barutwana-gotee gomme a kgoga motšoko. A ka ba a be a sa ka a nagana ka go kgoga ge a be a tloga gae a e-ya sekolong letšatšing leo. Lega go le bjalo, go se go ye kae o dira selo seo se gobatšago boemo bja gagwe bja tša maphelo le seo se sa kgahlišego Modimo. (2 Bakorinthe 7:1) O gokeditšwe bjang? Mohlomongwe o ile a ba le bagwera ba fošagetšego gomme a tšhaba gore ba ka se mo amogele. Lena bafsa, le se ke la dumelela “morei wa dinonyana” a le goketša le go le tanya! Go phema go tanywa le phela, itšhireletšeng malebana le go kwanantšha mo gonyenyane! Ela hloko keletšo ya Beibele ya go phema ditlwaelano tše mpe.—1 Bakorinthe 15:33.

7. Sathane a ka dira bjang gore batswadi ba bangwe ba se sa ba le teka-tekano ya moya?

⁷ Batswadi ba lego šedi ba Bakriste ba tšeela godimo boikarabelo bja bona bja Mangwalo bja go hlokomela malapa a bona ka dilo tše di bonagalago. (1 Timotheo 5:8) Lega go le bjalo, morero wa Sathane ke go dira gore Bakriste ba hloke teka-tekano tabeng ye. Mohlomongwe ba na le mokgwa wa go se ye dibokeng ka gobane ba ineetše kgateletšong ya beng-mešomo ba bona ya go šoma mošomo o oketšegilego. Ba ka ba ba tšhaba go kgopela go lokollwa mošomong gore ba be gona lenaneong ka moka la kopano ya selete, go rapela Jehofa ba e-na le bana babo bona. Tšhireletšo molabeng wo ke go “bôʹta Modimo.” (Diema 3:5, 6) Go oketša moo, go gopola gore ka moka ga rena re ditho tša ngwako wa Jehofa le gore o itlamile go re hlokomela go tla re thuša go dula re e-na le teka-tekano. Batswadi, na le na le tumelo ya gore Jehofa o tla le hlokomela ka tsela e itšego le malapa a lena ge le phetha thato ya gagwe? Goba, na Diabolo o tla le swara le phela gomme a le dira gore le phethe thato ya gagwe ka baka la go boifa batho? Re le kgothaletša go ela hloko dipotšišo tše ka thapelo.

Molaba wa go Rata Dilo tše di Bonagalago

8. Sathane o diriša molaba wa go rata dilo tše di bonagalago ka tsela efe?

⁸ Sathane gape o diriša kgoketšo ya go rata dilo tše di bonagalago gore a re tanye. Tshepedišo ya tša papatšo ya lefase le gantši e godiša mekgatlo ya go humiša batho ka pela yeo e ka forago gaešita le ba bangwe ba batho ba Modimo. Ka dinako tše dingwe, batho ba ka kgothatšwa ka gore: “Šoma ka thata. Ge o hwetša maemo ao a godišago tšhelete e ntši, o ka iketla gomme wa thabela bophelo. Le gona o ka bula madibogo.” Mantšu ao e ka ba go bea mabaka ka tsela e se nago teka-tekano ga ba bangwe bao ba ikholago ka ditšhelete tša bao ba tlwaelanego le bona ka phuthegong ya Bokriste. Ela tšhušumetšo yeo hloko. Na ga e bonagatše kgopolo ya monna wa mohumi “yo a hlokago tlhaologanyo” wa papišong ya Jesu?—Luka 12:16-21.

9. Bakriste ba bangwe ba ka tanywa bjang ke go kganyoga dilo?

⁹ Sathane o laola tshepedišo ya gagwe e kgopo ka tsela yeo e lego gore e tutueletša batho go kganyoga dilo. Kganyogo yeo e ka feleletša e šwahletše bophelo bja Mokriste, ya bipa lentšu gomme  ya le dira gore le “se be le dienywa.” (Mareka 4:19) Beibele e re kgothaletša gore re kgotsofalele dijo le diaparo. (1 Timotheo 6:8) Lega go le bjalo, ba bantši ba tanywa ke “morei wa dinonyana” ka gobane bona ba sa diriše keletšo yeo. Na e ka ba ka gobane boikgogomošo bo ba dira gore ba bone ba swanetše go kgomarela tsela e itšego ya bophelo? Go thwe’ng ka rena? Na kganyogo ya rena ya go ba le dilo e dira gore re bee dikgahlego tša borapedi bja therešo boemong bja bobedi? (Hagai 1:2-8) Se se nyamišago ke gore dinakong tše thata tša tša boiphedišo, ba bangwe ba ile ba gafa boemo bja bona bja moya e le gore ba dule ba phela ka tsela yeo ba gotšego ba e tlwaetše. Boemo bjo bjalo bja kgopolo bja go rata dilo tše di bonagalago bo thabiša “morei wa dinonyana”!

Molaba wa Boithabišo bjo bo sa Hlwekago

10. Ke boitlhahlobo bofe bjoo Mokriste yo mongwe le yo mongwe a swanetšego go bo dira?

¹⁰ Leano le lengwe la “morei wa dinonyana” ke go senya temogo ya batho ya tlhago ya go lemoga se se lokilego le se sebe. Kgopolo e swanago le yeo e bego e le go Sodoma le Gomora e laola bogolo bja intasteri ya boithabišo. Gaešita le dipego tša ditaba thelebišeneng le dimakasineng di gatelela bošoro gotee le go kgothaletša dikganyogo tše di tšhošago tša tša botona le botshadi. Bogolo bja seo se bonagalago e le boithabišo mekerong ya ditaba bo senya bokgoni bja motho bja go ‘kgethologanya se se nepagetšego le se se fošagetšego.’ (Baheberu 5:14) Lega go le bjalo, gopola mantšu a Jehofa ka moporofeta Jesaya a rego: “Kotsi e tlo wêla ba ba rexo bobe ba re ké botse, ’me botse ba re ké bobe.” (Jesaya 5:20) Na “morei wa dinonyana” o tutueditše kgopolo ya gago ka boithabišo bjo bjalo bjo bo sa hlwekago ka tsela e sa bonagalego? Go itlhahloba go bohlokwa.—2 Bakorinthe 13:5.

11. Ke temošo efe ya mabapi le ditshwantšhetšo-dikgao tša thelebišene yeo makasine wo o ilego wa e nea?

¹¹ Moo e nyakilego go ba nywaga e 25 e fetilego, Morokami ka lerato o ile wa lemoša barapedi ba Modimo mabapi le ditshwantšhetšo-dikgao tša thelebišene (soap operas). * Temošo ye e be e le mabapi le tutuetšo e sa lemogegego ya ditshwantšhetšo-dikgao tše di tlwaelegilego: “Go tsoma lerato go dirišwa go lokafatša boitshwaro le ge e le bofe. Ka mohlala, mosetsana e mongwe e a sa nyalwago e a imilego o re go mogwera wa gagwe: ‘Fela Victor ke a mo rata. Ga ke na taba. . . . Go ba le ngwana wa gagwe ke selo se segolo ka kudu go nna!’ [Molotšana o fodilego] o dira gore go be thata go nagana gore tsela ya mosetsana e tloga e le e mpe kudu. Le wena o [thoma go rata] Victor. O kwela mosetsana bohloko. O a ‘kwešiša.’ Mmogedi e mongwe yeo ka morago a [ilego a hlaphogelwa] o boletše gore: ‘Ke mo go kgotsišago kamoo [le wena o ka itokafatšago] ka gona. Re a tseba gore bootswa bo fošagetše. . . . Fela ke ile ka lemoga gore kgopolong ke be ke tšea karolo.’”

12. Ke ditherešo dife tša morago bjale tšeo di bontšhago gore temošo ya mabapi le mananeo a thelebišene ke e swanetšego?

 ¹² Ga e sa le go tloga ge dihlogo tšeo di gatišwa, mananeo a bjalo ao a senyago pelo a oketšegile. Mafelong a mantši, mananeo a bjalo a bontšhwa diiri tše 24 ka letšatši. Banna, basadi le bafsa ba bantši bao ba lego mahlalagading ba dula ba fepa menagano ya bona le dipelo ka boithabišo bjo bjalo. Lega go le bjalo, ga se ra swanela go iphora ka go bea mabaka mo go fošagetšego. E tla ba mo go fošagetšego go bea mabaka ka gore boithabišo bjo bo gobogilego ga se bjo bobe go feta lefase ka bolona. Na Mokriste ruri o tla lokafatša go kgetha go thabišwa ke mohuta wa batho bao a ka se tsogilego a naganne le go ba laletša gore ba tle ka ga gagwe?

13, 14. Ba bangwe ba hlalositše bjang kamoo ba hotšwego ke ditemošo tša mabapi le thelebišene?

¹³ Ba bantši ba ile ba holwa ke go ela hloko keletšo yeo ye e neilwego ke “mohlanka yo a botegago le wa temogo.” (Mateo 24:45-47) Ka morago ga go bala keletšo e opago kgomo lenaka le e tšwago Beibeleng, ba bangwe ba ngwadile ba hlalosa kamoo dihlogo tše di ba kgomilego ka gona. * Yo mongwe o ipoletše ka gore: “Ke na le nywaga e 13 ke lemaletše ditshwantšhetšo-dikgao. Ke be ke nagana gore ke tla fo šireletšwa ke go ya dibokeng tša Bokriste le go tšea karolo ka sewelo tirelong ya tšhemo. Eupša ke ile ka ba le boemo bja kgopolo bja ditshwantšhetšo-dikgao tša lefase bja gore ge monna wa gago a sa go sware gabotse goba o ikwa o sa ratwe, o ka fo dira bohlotlolo—ke yena a dirilego gore seo se direge. Ke moka ge ke be ke ikwa ke ‘e-na le lebaka’ ke ile ka dira bohlotlolo gomme ka dira sebe kgahlanong le Jehofa le molekane wa-ka.” Mosadi yo o ile a kgaolwa. Mafelelong o ile a hlaphogelwa, a itshola gomme a bušetšwa ka phuthegong. Dihlogo tšeo di lemošago mabapi le ditshwantšhetšo-dikgao tša thelebišene di ile tša mo nea matla a go gana go thabišwa ke seo Jehofa se hloilego.—Amosi 5:14, 15.

¹⁴ Mmadi yo mongwe yoo bophelo bja gagwe bo ile bja kgomega o itše: “Ke ile ka lla ge ke be ke bala dihlogo tšeo, ka gobane ke ile ka lemoga gore pelo ya-ka e be e sa hlwe e le e feletšego go Jehofa. Ke holofeditše Modimo wa-ka gore nka se sa hlwa ke le lekgoba la ditshwantšhetšo-dikgao tše.” Ka morago ga go bontšha go leboga dihlogo tšeo, mosadi yo mongwe wa Mokriste o dumetše temalelo ya gagwe gomme a ngwala gore: “Ke ile ka ipotšiša . . . ge e ba tswalano ya-ka le Jehofa e tla kgomega. Nka ba bjang mogwera wa ‘babapadi ba ditshwantšhetšo-dikgao’ gomme ka mo ka ba mogwera wa Jehofa?” Ge e ba mananeo a bjalo a thelebišene a ile a senya dipelo tša batho nywageng e 25 e fetilego, a ka kgoma batho bjang lehono? (2 Timotheo 3:13) Re swanetše go phafogela molaba wa Sathane wa boithabišo bjo bo sa hlwekago ka mehuta ya bjona ka moka, e ka ba ka ditshwantšhetšo-dikgao tša thelebišene, dipapadi tša bidio tša bošoro goba dibidio tše di gobogilego tša mmino.

Molaba wa go se Kwešišane

15. Diabolo o swere ba bangwe bjang ba phela?

¹⁵ Sathane o diriša go se kwešišane bjalo ka  molaba wa go aroganya batho ba Jehofa. Molaba wo o ka re tanya go sa šetšwe ditokelo tšeo re nago le tšona tša tirelo. Diabolo o swere ba bangwe ba phela ka gobane ba dumelela go se kwešišane go šitiša khutšo le botee gotee le katlego e kgahlišago ya moya yeo Jehofa a dirilego gore e be gona.—Psalme 133:1-3.

16. Sathane o leka go senya botee bja rena bjang ka maano?

¹⁶ Nakong ya Ntwa ya I ya Lefase, Sathane o lekile go fediša karolo ya lefaseng ya mokgatlo wa Jehofa a diriša tlhaselo e lebanyago, eupša a palelwa. (Kutollo 11:7-13) Ga e sa le go tloga ka nako yeo, o be a dutše a leka go senya botee bja rena ka maano. Ge re dumelela go se kwešišane go dira gore go be le go se kwane, re nea “morei wa dinonyana” sebaka. Ka go rialo re tla šitiša moya o mokgethwa go šoma gabotse maphelong a rena gotee le ka phuthegong. Ge seo se ka direga, Sathane o tla thaba ka gobane go šitišwa ga khutšo le botee le ge e le gofe go šitišana le modiro wa boboledi.—Baefeso 4:27, 30-32.

17. Bao ba sa kwešišanego ba ka dira’ng go rarolla bothata bjoo?

¹⁷ Ke’ng seo o tlago go se dira ge e ba o sa kwešišane le Mokriste-gotee? Ke therešo gore boemo bjo bongwe le bjo bongwe ke bja moswana-noši. Lega go le bjalo, gaešita le ge go ka ba le mabaka a mantši a go tsoga ga mathata, ga go na le lebaka la gore go se kwešišane go dule go sa rarollwe. (Mateo 5:23, 24; 18:15-17) Keletšo e lego ka Lentšung la Modimo e buduletšwe e bile e phethagetše. Ge e dirišwa, melao ya motheo ya Beibele ga e palelwe le ka mohla. Ke e šomago ka mehla!

18. Ke ka baka la’ng go ekiša Jehofa go ka re thuša go rarolla go se kwešišane?

¹⁸ Jehofa ke “molebaledi,” gomme o nea ‘tebalelo ya kgonthe.’ (Psalme 86:5; 130:4) Re bontšha gore re bana ba Jehofa ba ba rategago ge re mo ekiša. (Baefeso 5:1) Ka moka re badiradibe e bile re tloga re tsoma tebalelo ya Jehofa. Ka gona, re swanetše go ba šedi ge e ba re ikwa re sa nyake go lebalela yo mongwe. Re ka ba bjalo ka mohlanka wa papišong ya Jesu yoo a ilego a gana go lebalela mohlanka-gotee le yena sekoloto seo e bego e fo ba karolwana ya seo a bego a se kolota mong wa gagwe yoo a bego a šetše a mo lebaletše. Ge mong a be a e-kwa se, o ile a dira gore mohlanka yo yoo a sa lebalelego a lahlelwe kgolegong. Jesu o ile a phetha papišo yeo ka gore: “Tate wa legodimong le yena o tla le swara bjalo, ge e ba yo mongwe le yo mongwe wa lena a sa lebalele ngwanabo go tšwa pelong.” (Mateo 18:21-35) Go naganišiša ka papišo yeo le go nagana gore Jehofa o re lebaletše ka makga a makae ka bolokologi go tla re thuša e le ruri ge re leka go rarolla go se kwešišane le bana babo rena!—Psalme 19:14.

Go Šireletšega ‘Lefelong le le Utegilego la Yo Godimo-dimo’

19, 20. Re swanetše go lebelela “lefelo le le utegilego” le ‘moriti’ wa Jehofa bjang dinakong tše tše kotsi?

¹⁹ Re phela dinakong tše kotsi. Ruri Sathane nkabe a re fedišitše ka moka ge nkabe Jehofa a be a sa re šireletše ka lerato. Ka baka leo, gore re pheme go tanywa ke “morei wa dinonyana,” re swanetše go dula re le lefelong la seswantšhetšo la tšhireletšego, ‘go dula lefelong le le utegilego la Yo godimo-dimo,’ le go “lala moriting wa Yo-matla-ohle.”—Psalme 91:1, bapiša le NW.

²⁰ Anke re duleng re lebelela dikgopotšo le tlhahlo tša Jehofa e le tše di šireletšago, e sego tšeo di thibelago le ka mohla. Ka moka ga rena re lebeletšana le lenaba leo le nago le bohlale bjo bo phagametšego bja batho. Ka ntle le thušo ya Jehofa e lerato, ga go yo a ka se tanywego. (Psalme 124:7, 8) Ka gona anke re rapeleleng gore Jehofa a re hlakodiše melabeng ya “morei wa dinonyana”!—Mateo 6:13.

[Mengwalo ya ka tlase]

Na o a Gopola?

• Ke ka baka la’ng “xo boifa batho” e le molaba o bolayago?

• Diabolo o diriša bjang molaba wa go rata dilo tše di bonagalago?

• Sathane o tantše ba bangwe bjang ka molaba wa boithabišo bjo bo sa hlwekago?

• Diabolo o diriša molaba ofe gore a senye botee bja rena?

[Dipotšišo tša Thuto]

[Seswantšho go letlakala 27]

Ba bangwe ba tantšwe ke “xo boifa batho”

[Seswantšho go letlakala 28]

Na o thabišwa ke seo Jehofa a se hloilego?

[Seswantšho go letlakala 29]

Ke’ng seo o ka se dirago ge e ba o sa kwešišane le Mokriste-gotee?