Napaliisan Tayo Iray Patit na Manangalot!

“Iliktar to ka [nen Jehova] ed patit na manangalot.”​—SALMO 91:3.

1. Siopa so “manangalot,” tan akin a sikatoy mapeligro?

 AMIN a tuan Kristiano so nipapaarap ed sakey a managbiktima, a mas matudio tan mas masilib nen say too. Diad Salmo 91:3 et sikatoy atawag a “manangalot.” Siopa iyan kabusol? Manlapu la’d isyu na Hunyo 1, 1883 na sayan magasin, anggapo la so arum ya atukoy noag si Satanas a Diablo. Sayan mabiskeg a kabusol so masilib a mangibabalang tan mamapatit ed saray totoo nen Jehova a singa ed gagawaen na managpatit na manok.

2. Akin a niyaliling si Satanas ed sakey a manangalot?

² Nensaman, saray manok so eerelen lapud balibalin uni ra, makolor iran payak da, tan saraya met so kakanen tan ibabagat. Balet, saratan so mairap a patitan lapud malikas tan maatap ira. Kanian diad panaon na Biblia, aaralen nin unona na sakey a managpatit iray kalareker na saray manok a labay ton erelen. Insan la’d satan mannonot na masilib iran paraan pian napatitan ira. Naamtaan tayo iray paraan nen Satanas diad impangiyaliling na Biblia ed sikato bilang sakey a manangalot. Balang sakey ed sikatayo et aaralen na Diablo. Oobserbaan to iray ugali tan kakikiwas tayo insan mamapawala na masilib iran patit pian nakalotan to itayo. (2 Timoteo 2:26) No naerel to itayo, naderal so relasyon tayo ed Dios tan diad kaunoran et naderal itayon mismo. Kanian, kaukolan tayon amtaen so nanduruman pakana na “manangalot” pian naprotektaan itayo.

3, 4. Panon a mipara iray taktika nen Satanas ed saray taktika na leon tan kobra?

³ Inusar na salmista so malinlinew a panangikompara sanen inyaliling to iray taktika nen Satanas ed saray taktika na leon tan kobra. (Salmo 91:13) Singa sakey a leon, no maminsan et uusaren nen Satanas so direkta tan parungtalan a panangataki panamegley na panamasegsegang odino pananebel na gobierno sumpad saray totoo nen Jehova. (Salmo 94:20) Kanian, arum so nayarin agla manlingkor ed si Jehova lapud ontan a singa-leon a panangataki. Balet, mabetbet a mamapawala itan na positibo iran resulta tan mankakasakey la ingen iray totoo na Dios. Komusta met iray mas masilib, singa-kobran panangataki nen Satanas?

⁴ Uusaren na Diablo so nikadkaduman kasiliban to pian say iyataki to et makapalikdo tan makapatey, a singa iyaataki na maditan uleg a walad maamot a pasen. Diad sayan paraan to et nasasamalan toy isip na arum ed totoo na Dios, a napapalikdo to iran manggaway linawa to imbes a say linawa nen Jehova, ingen ta makapasinagem so pansusumpalan na satan. Maong labat ta amta tayo iray masilib a paraan to. (2 Corinto 2:11) Konsideraen tayo pa sirin so apatira ed saray makapatey a patit ya uusaren na “manangalot.”

Takot ed Too

5. Akin a talagan makapatit so ‘takot ed too’?

⁵ Amta na “manangalot” so nisipor a pilalek na too, salanti, say pangawat tan panangabobon na arum. Tua, ikokonsidera na saray Kristiano so kanonotan tan nalilikna na saramay walad kaliberliber da. Lapud amta iya na Diablo, aanamoten to so pampapaga ra ed no antoy isipen na arum a too ed sikara. Singa bilang, papatitan to iray totoo na Dios panamegley na ‘takot ed too.’ (Uliran 29:25) No saray lingkor nen Jehova et ontakot ed too tan aligen da laray arum a manggagawa ed isesebel To odino agda la uunoren so ganggan na Biblia a nepeg dan gawaen, sikara so napapatitan la na “manangalot.”​—Ezequiel 33:8; Santiago 4:17.

6. Iyilustra no panon a napatitan na “manangalot” so sakey a kalangweran.

 ⁶ Alimbawa, sakey a kalangweran so napilitan a mansigarilyo lapud pananesdes na saray kaeskuela to. Nayarin agbalot sinmebang ed nonot to so pansigarilyo sakbay ya onloob ed eskuelaan diad saman ya agew. Balet kabebekta et gagawaen to la so sakey a bengatlan makapuy ed bunigas to tan makapaermen ed Dios. (2 Corinto 7:1) Akin kasi et sikatoy atangguyor? Nayarin makapuy iray akiulopan to tan agto labay a sikatoy ipuera da. Sikayoran kalangweran, agyo aabuloyan a sikayoy natangguyor tan napatitan na “manangalot”! Ta pian agnapatitan, agkayo mikokompromiso ed anggan angkelag labat iran pamaakaran. Tumbok yo so pasakbay na Biblia a paliisan iray mauges a kaulop.​—1 Corinto 15:33.

7. Panon a naimpluensyaan nen Satanas so arum ya atateng pian agda la niyuna so espiritual iran bengatla?

⁷ Saray Kristianon ateng so seryoson manusumpal ed Makasulatan a responsabilidad dan legpeten so pamilya ra. (1 Timoteo 5:8) Balet ta getma nen Satanas ya agla iya nabalanse na saray Kristiano. Ompano mabetbet laran agmakapiaral lapud desdes na amo ra a mangisumpal ed kaaruman nin ipapatrabaho ed sikara. Nayarin antakot iran onkerew na bakasyon ya usaren da komon ya onatendi ed amin ya agew na distriton kombension pian nakaiba iray agagi ra a mangidayew ed si Jehova. Say proteksion manlapud sayan patit et say ‘panmatalek ed si Jehova.’ (Uliran 3:5, 6) Niarum ni, napansiansia tayo so inkasimbang tayo no lawas tayon nodnonoten a kabiangan itayo na sankaabungan nen Jehova tan ipapaseguro to so pananulong to ed sikatayo. Sikayoran atateng, manmamatalek kayo kasi ed si Jehova ya asikasoen to kayon sankapamilyaan no gawaen yo so linawa to? Odino pakalotan kayo ed Diablo, a gawaen yo so panlabayan to lapud antakot kayo ed too? Pasesegen mi kayo a masimoon yon nodnonoten irayan tepet.

Say Patit na Materyalismo

8. Panon ya uusaren nen Satanas so materyalismo bilang patit?

⁸ Uusaren met nen Satanas so materyalismo pian napatitan tayo. Mabetbet ya iyiingganyo na sistema na komersyo na sayan mundo iray pakanan biglan-iyaman, a mamapalikdo ed anggan arum ed totoo na Dios. No maminsan et onia so ipapaseseg da ed agagi: “Mankuli ka, ta no dakel lay atipon mon kuarta et makapanrelaks ka la tan panliketan mo lay manbilay. Makapanpayunir ka ni ingen.” Onia so materyalistikon panagkatunongan na saramay mangaanamot ed saray agagi diad Kristianon kongregasyon. Nonot yo nin maong itan a singano maabig ya opresi. Agta mipara itan ed samay panagnonot na “makulangkulang” a mayaman a laki ed parabolo nen Jesus?​—Lucas 12:16-21.

9. Akin a nayarin napatitan so arum a Kristiano no manpilalek ira’d materyal a bengabengatla?

⁹ Kokontrolen nen Satanas so mauges a sistema to diad pangiingganyo to ed totoo a manpilalek ed materyal a bengabengatla. Diad saginonor et apektaen na satan a pilalek so panagbilay na sakey a Kristiano, a naamper so epekto na salita ed puso to tan “agmanbunga.”(Marcos 4:19) Papasesegen itayo na Biblia a mankontento la ed tagano tan kawesen. (1 Timoteo 6:8) Anggaman ontan, dakel so napapatitan na “manangalot” lapud  agda iyaaplika itan a simbawa. Kasin iisipen da a parad sikara et agda nayarian ya umanen so labalabay dan estilo na kabibilay? Komusta met so kada sakey ed sikatayo? Kasin onkokomadua labat so intereses na tuan panagdayew lapud manuna lan pilalek tayo so pakawalaan na materyal a bengabengatla? (Aggeo 1:2-8) Makapaermen ta legan na panaon na gawat et insakripisyo na arum so espiritualidad da pian napansiansia da labat so apasalan da lan estandarte na kabibilay. Panliketan na “manangalot” so ontan a materyalistikon awawey!

Say Patit na Mabanday a Panagligliwaan

10. Anton panangusisa ed dili so nepeg a gawaen na balang Kristiano?

¹⁰ Say sakey nin taktika na “manangalot” et say pamipikewet to ed nisipor ya abilidad na totoo a mangibiig ed maong tan mauges. Say mentalidad a mipadpara ed Sodoma tan Gomorra so mangokontrol la ed dakel ya industriya na panagligliwaan. Anggan saray balita ed telebisyon tan dyaryo et mangipapabitar ed karawalan tan pamepenek ed mauge-uges a pantindek ed sekso. Dakel ed saray ipapasen a panagligliwaan ed media et mamuburagas ed abilidad na too a ‘mangibiig ed maong tan mauges.’ (Hebreos 5:14) Nonoten ya onia so imbaga nen Jehova panamegley nen propeta Isaias: “Abagey la so saray manawag na mauges ed maong, tan maong so mauges!” (Isaias 5:20) Kasin napapatitan la na “manangalot” so panag-isip yo diad ontan iran mabanday a panagligliwaan? Kaukolan sirin ya usisaen tayo so dili tayo.​—2 Corinto 13:5.

11. Anton pasakbay nipaakar ed panagbantay na telenobela so impalapag ed sayan magasin?

¹¹ Ngalngali 25 taon lay apalabas, maaron amasakbay so Say Panag-Bantayan ed amin a tuan managdayew ed Dios nipaakar ed saray telenobela. * Onia so komento nipaakar ed agnaliklikas ya epekto na maslak iran telenobela: “Say pampipilalek ed aro so uusaren pian ikatunongan so antokaman a kondukta. Singa bilang, oniay imbaga na sakey ya agni kasal a malukon a kalangweran ed sakey a kaaro to: ‘Balet ta inararok si Victor. Anggapoy pibabalik. . . . Anggapo lay mas importante ed siak nen sayay lukon ko!’ Insan bansagan na balibalin musika a mangisuawi la ed belat na ginawa to. Nayarin paboran yo si Victor. Nakasian yo so bii. ‘Natalosan’ yo ra. ‘Makapabigla no akin ya ikatunongan moy iisipen mo,’ so inkuan na sakey a manbabantay ya agnambayag et amoria toy lingo to. ‘Amta tayo a mauges so imoralidad. . . . Balet ta diad isip ko et miaabobon ak la ed sikara manaya.’”

12. Antoran impormasyon so mamapaneknek a matukotukoy so pasakbay nipaakar ed panagbantay ed pigaran programa ed telebisyon?

¹² Nanlapula’d inkipalapag na saraman ya artikulo, mas dinmakel so oniaran mabanday a palabas. Diad dakel a pasen et saratan so nipapalabas ed 24 oras kada agew. Ontan so naynay a babantayan na lalaki, bibii, tan dakel iran tin-edyer. Balet,  agtayo nepeg a palikdoen so dili tayo ed pikewet a panagkatunongan. Nalilingo itayo no ikatunongan tayo a saray mauges a babantayan et agmakaapekto ed sikatayo, a singa say epekto na peteg a nagagawa ed mundo. Talaga kasin nikatunongan na sakey a Kristiano so panlabay ton manbantay na programa ed telebisyon a saray klase na totoon nipapanengneng ditan et agto anggan labay a palooben ed abung to?

13, 14. Antoy inkuan na arum nipaakar ed impakagunggonaan da ed saray pasakbay nipaakar ed panagbantay na TV?

¹³ Dakel so agunggonaan sanen impapuso ran tinumbok so pasakbay ya intarya na “matoor tan makabat ya aripen.” (Mateo 24:45-47) Arum so nansulat kayari ran abasa so prangkan simbawa na Biblia, ya imbalikas da so maabig ya impakatulong ed sikara na saraman ya artikulo. * Onia so inamin na sakey ed sikara: Naadik ak ed telenobela diad loob na 13 taon. Inisip kon agak naapektoan lapud miaaral ak met tan anggan panon et makapampupulong ak met. Balet ta naalig koy minumundon awawey a nipapanengneng ed telenobela a sano mamaltratoen ka na asawam odino liknaen mon agka aaroen, makatunongan labat so pikalugoran, tan sikato so natetel. Kanian lapud liknaen kon “makatunongan” labat iya, akikalugoran ak tan nankasalanan ak ed si Jehova tan ed asawak.” Adispelosip iyan bii. Agnambayag, amoria to so kasalanan to, nagbabawi, tan akapawil lamet. Saray artikulon mamapasakbay sumpad panagbantay na saray telenobela so amabiskeg ed sikato pian agto panliketan a bantayan so bubusolen nen Jehova.​—Amos 5:14, 15.

¹⁴ Onia met so inkuan na sakey nin akabasa a naapektoay bilay to: “Manakis ak nen abasak iray artikulo ta amoriak ya aliwa la manayan nagnap so pusok ed si Jehova. Insipan ko’d sikato ya agak lan balot manbantay na sarayan telenobela.” Kayarin imbalikas na sakey a Kristianon bii so pisasalamat to ed saray artikulo, inamin toy impakaadik to ed telenobela tan oniay insulat to: “Nanumamengan ko . . . no kasin naapektoan so pisisiglaotan ko ed si Jehova. Akin et agko naisip a tampol ya imbansag ko la manaya so impikaarok ed ‘sikara’ diad pikakaarok ed si Jehova?” No saratan a palabas ed TV et akaimpluensya na mauges diad apalabas a 25 taon, anto met kasi so epekto na saratan natan? (2 Timoteo 3:13) Nepeg itayon manalwar ed nanduruman klase na mabanday a panagligliwaan ya ipapatit nen Satanas, balanglan saray telenobela, marawal iran video game, odino imoral iran MTV.

Saray Personal ya Agpantatalosan Bilang Patit

15. Panon a saray arum et akalotan na Diablo?

¹⁵ Uusaren nen Satanas iray personal ya agpantatalosan bilang patit pian naapag-apag so totoo nen Jehova. Nakalotan itayo ed saya antokaman so pribilehyo tayo ed panaglingkor. Arum so akalotan na Diablo lapud inabuloyan dan nabuyak so kareenan tan pankakasakey, tan say maal-aligwas a kipapasen da ed espiritual a pinawala nen Jehova.​—Salmo 133:1-3.

16. Anto so masilib a gagawaen nen Satanas pian buyaken so pankakasakey tayo, tan anto so pansumpalan na satan?

 ¹⁶ Legan na Guerra Mundial I, sinali nen Satanas a buyaken so kabiangan na organisasyon nen Jehova diad dalin panamegley na parungtalan a panangataki, balet ta agtinmalona. (Apocalipsis 11:7-13) Nanlapu la’d saman, masilib ton panggugunaetan a buyaken so pankakasakey tayo. No abuloyan tayon mamuyak ed pankakasakey tayo iray personal ya agpantatalosan, sirin et papalongkitan tayo so “manangalot.” Naamper la ingen so mabulos ya iyagus na masanton espiritu ed bilay tayo ontan met ed kongregasyon. No ontan so nagawa, manliket si Satanas lapud bektaman a nagulo so kareenan tan pankakasakey na kongregasyon et naamper so panagpulong a kimey.​—Efeso 4:27, 30-32.

17. Anto so makatulong ed saramay walaan na personal ya agpantatalosan pian naresolbe iratan?

¹⁷ Antoy nagawaan mo no sika tan say sakey nin agi et walay personal ya agpantatalosan? Tua, nanduruma so kada kipapasen. Balet, anggano dakel so rason no akin ya onlelesa iray agpantatalosan, anggapoy rason pian ag-iratan naresolbe. (Mateo 5:23, 24; 18:15-17) Say simbawa ed Salita na Dios et apuyanan tan naspot. Agbalot onsaew iray prinsipyo na Biblia no iyaplika iratan. Lawas ya epektibo iratan!

18. Akin a say pangalig ed si Jehova et makatulong ed sikatayo pian naresolbe iray personal ya agpantatalosan?

¹⁸ Si Jehova so peteg ya ‘akaparaan a mamerdona ed sikatayo.’ (Salmo 86:5; 130:4) Papaneknekan tayon sikatayoray anak nen Jehova ya inararo to no sikatoy aligen tayo. (Efeso 5:1) Makasalanan itayon amin tan kakkaukolan tayo so panamerdona nen Jehova. Kanian, manalwar itayo no walay tendensia tayon agperdonaen so sakey. Ompan magmaliw itayon singa samay aripen ed parabolo nen Jesus ya ag-amerdona ed melmelag ya utang na kapara ton aripen no ikompara ed balbaleg ya utang to ya agla impabayaran na katawan to. Sanen naamtaan itan na katawan, impaipriso to so aripen ya ag-amerdona. Sinampotan nen Jesus so parabolo ed impangibaga ton: “Ontan met naani gawaen nen Amak a mangatatawen ed sikayo, no sakey tan sakey ed sikayo agto perdonaen so agi to a manlapu ed puso yo.” (Mateo 18:21-35) Seguradon say pandalepdep tayo ed satan ya ilustrasyon ontan met ed aminpigapiga lan impamerdona nen Jehova ed sikatayo so makatulong ed sikatayo sano sosolbaren tayo iray personal ya agpakapitalosan ed agi tayo!​—Salmo 19:14.

Maligen ed “Maamot a Pasen na Sankatageyan”

19, 20. Panon tayon moriaen so “maamot a pasen” tan “sirum” nen Jehova legan na sarayan mapeligron panaon?

¹⁹ Mauges laran panaon so pambibilayan tayo. Aderal itayo lan amin komon nen Satanas no anggapoy maaron pananalimbeng nen Jehova. Ta pian ag-itayo sirin napatitan na “manangalot,” nepeg a mansiansia itayo ed piguratibon pasen a salimbengan, a ‘manayam itayo ed maamot a pasen na Sankatageyan,’ tan “mansiansia ed silong na sirum na Makapanyarin-amin.”​—Salmo 91:1.

²⁰ Komon ta naynay a saray panonot tan panangigiya nen Jehova et ipasen tayon proteksion, aliwan panameget. Amin tayo so nipapaarap ed sakey a managbiktima a mas matudio nen sikatayo. No anggapoy tulong nen Jehova, agtayo napaliisan iray patit to. (Salmo 124:7, 8) Kanian manpikasi tayo’d si Jehova a tulongan to itayon makapaliis ed saray patit na “manangalot”!​—Mateo 6:13.

[Saray paimano ed leksab]

Kasin Nanonotan Yo?

• Akin a mapeligron maong so ‘itakot ed too’?

• Panon ya uusaren nen Satanas so materyalismo bilang patit?

• Panon a say arum et akalotan nen Satanas panamegley na mabanday a panagligliwaan?

• Anton patit so uusaren nen Satanas pian buyaken so pankakasakey tayo?

[Tepetepet Parad Panagaral]

[Litrato ed pahina 27]

Arum so apatitan na ‘takot ed too’

[Litrato ed pahina 28]

Kasin panliliketan yon bantayan so bubusolen nen Jehova?

[Litrato ed pahina 29]

Anto so gawaen mo sano sika tan say sakey ya agi et walaay personal ya agpantatalosan?