Akaoraanga mei te Au Ereere a te Kimi Manu

“[Na Iehova] tika rai koe e akaora i te ereere a te kimi manu ra.”​—SALAMO 91:3.

1. Koai “te kimi manu,” e eaa aia i kino ei?

TE ARO atura te au Kerititiano mou katoatoa i tetai ta tangata, ma te kite pakari e te tu kikite atu i to te tangata. Te taikuia ra aia i roto ia Salamo 91:3 e ko “te kimi manu.” Koai teia enemi? Mei te itiu o Tiunu 1, 1883, kua akataka mai teia makatini iaia e kare atu mari ra ko Satani te Tiaporo. Koia te enemi ririnui maata rava atu tei tauta ma te kikite i te arataki ke e te ereere katoa i te iti tangata o Iehova mei tetai kimi manu rai e tauta ra i te ereere i tetai manu.

2. Eaa a Satani i akaaiteia ai ki tetai kimi manu?

² I te au tuatau taito, e opuia ana te au manu no ta ratou imene reka, no to ratou uru karakara, e pera katoa ei kai e ei atinga. Inara, tei matauia e te tu natura o te au manu, e matakite ua e te viviki ua ratou i te tapoitirereia, e te ngata i te ereere. No reira, i te au tuatau Pipiria, e apii meitaki ana tetai kimi manu na mua i te au tu e te au peu o te tu manu tana e inangaro ra i te opu. E oti, kua maani aia i te au ravenga kikite i te ereere ia ratou. I te akaaite atu anga ia Satani ki tetai kimi manu, te tauturu maira te Pipiria ia tatou i te marama i tana au ravenga. Te apii matatio ra te Tiaporo ia tatou tataki tai. Te akarakara maira aia i ta tatou au peu e to tatou au tu e ka akanoo i te au ereere muna i te tautaanga i te opu ora ua ia tatou. (2 Timoteo 2:26) Me mou iaia tatou, ko te aiteanga koia oki kua akakinoia to tatou turanga pae vaerua e te taki atura ki to tatou takoreangaia. No reira, ei paruruanga no tatou, ka anoanoia tatou i te akataka i te au tu ravenga a “te kimi manu.”

3, 4. Akapeea te au ravenga a Satani i te akaaiteia anga ki ta te riona? ki ta te atepi?

³ I te taangaanga anga i tetai au akatutuanga taka meitaki, kua akaaite katoa te tata taramo i te au ravenga a Satani ki te au ravenga a tetai riona ou me kore ki tetai atepi. (Salamo 91:13) Mei te riona rai, i tetai au taime e tamaki pu mai ana a Satani ia tatou na roto i te takinokinoanga me kore tetai raveanga a te ture i te patoianga i te iti tangata o Iehova. (Salamo 94:20) Penei ka akatupu te reira tu tamakianga mei ta te riona rai i tetai pae kia inga. Inara, i te maataanga o te taime, kare teia au tamakianga pu ua e puapinga ana e ka akatupu i te taokotaianga i te iti tangata o te Atua. Akapeea ra ta Satani au tu tamakianga kikite atu mei ta te atepi rai?

⁴ E taangaanga ana te Tiaporo i tona kite pakari atu i to te tangata kia akamata i te au tamakianga kikite e te mate mei ta tetai ovi poitini no roto i tetai ngai e pipini ra. Na roto i teia mataara, kua autu aia i te poitini anga i te manako o tetai pae o te iti tangata o te Atua, i te akavareanga ia ratou kia rave i tona anoano e kare i to Iehova, ma te tupuanga tumatetenga. Ma te mataora ra, kare tatou e kite kore ana i te au ravenga a te Tiaporo. (2 Korinetia 2:11) E akamanako tatou i teianei i te au ereere e a e taangaangaia ana e “te kimi manu.”

Mataku i te Tangata

5. Eaa te ereere no te “mataku i te tangata” i puapinga ai?

⁵ E marama ana “te kimi manu” i te tu inangaro ua o te tangata kia arikiia ratou e kia marekaia e tetai ke. Kare te au Kerititiano e manako kore ana i te au manako e te au manako ngakau o te aronga takapini ia ratou. I te kite anga i teia, ka inangaro te Tiaporo i te taangaanga tau kore i to ratou manamanata anga e eaa to te tangata manako ia ratou. Ei akaraanga, e taruri ke ana aia i tetai au tangata o te Atua na te taangaanga anga i te ereere no te “mataku i te tangata.” (Maseli 29:25) Me no te mataku i te tangata, e kua piri atu te au tavini o te Atua ki etai ke i te rave anga i ta te Atua e ture ra me kore te tapu ra ia ratou mei te raveanga i ta te Tuatua a te Atua e akaue maira ia ratou, kua ereereia ratou e “te kimi manu.”​—Ezekiela 33:8; Iakobo 4:17.

6. Eaa te akaraanga te akatutu maira e akapeea tetai mapu i te ereereia anga e “te kimi manu”?

 ⁶ Ei akaraanga, penei ka tuku ua atu tetai mapu ki te taomianga mei te au oa apii e kua kai i te avaava. Penei kare rava aia i manako ana e ka kai aia i te avaava i tona akarukeanga no te apii i tera ra. Inara, kare i roaia ana, te rave ra aia i tetai apinga te akakino ra i tona oraanga kopapa e te akamareka kore ra i te Atua. (2 Korinetia 7:1) Akapeea aia i te akavareia anga? Penei kua piri atu aia ki te au pupu tamariki tau kore e kua mataku e ka aviri mai ratou iaia. E te au mapu, auraka e tuku i “te kimi manu” i te akavare e kia ereere ia koe! Kia kore koe e opu ora ia e patoi pakari i te au tukutuku anga rikiriki ua. E akarongo ki te akamatakiteanga a te Pipiria kia kopae i te kapiti anga kikino.​—1 Korinetia 15:33.

7. Akapeea a Satani i te akakeuanga i tetai au metua kia akaturori ke i to ratou tu tau meitaki i te pae vaerua?

⁷ Te akamanako meitaki ra te au metua Kerititiano i ta ratou apainga Tuatua Tapu kia oronga i te au apinga materia no to ratou au pamiri. (1 Timoteo 5:8) Inara, ko ta Satani akakoroanga koia oki kia akaturori ke i te au Kerititiano i roto i teia turanga. Penei e akatau ana ratou i te au uipaanga no te mea kua tuku ua atu ratou ki te maroanga a to ratou au pu kia angaanga roa atu . Penei e mataku ana ratou i te pati atu i tetai orote kia rauka i te aere atu ki te au tuanga katoatoa o tetai uruoaanga tapere i te akamorianga ia Iehova ma to ratou au taeake. Te paruruanga i te patoi atu i teia ereere koia oki kia “irinaki kia Iehova.” (Maseli 3:5, 6) Kapiti katoa atu, i te akamaaraanga e e mema pouroa tatou no te ngutuare o Iehova e kua iki mai aia e nana rai e akono ia tatou, ka tauturu ia tatou i te akono tamou i to tatou tu tau meitaki. E te au metua, e irinaki ainei toou e, na roto i tetai ravenga, ka akono a Iehova ia koe e toou pamiri me rave koe i tona anoano? Me ka opu ora ua ainei te Tiaporo ia koe e ka maani ia koe kia rave i tona anoano no te mataku i te tangata? Te pati akatenga atu nei matou ia kotou kia akamanako i teia au uianga na roto i te pure.

Te Ereere o te Anoano i te Au Mea Materia

8. Na roto i teea mataara e taangaanga ana a Satani i te maunu no te anoano i te au apinga materia?

⁸ E taangaanga katoa ana a Satani i te maunu no te anoano i te au apinga materia kia opu ia tatou. E akamaroiroi putuputu ana te akatereanga okooko o teia ao i te au ravenga kia ona vave, te ka akavare katoa i tetai o te iti tangata o te Atua. I tetai au taime, penei e aruaruia ana tetai au tangata e: “E angaanga pakari koe. Me tae koe ki tetai turanga tau meitaki ua, ka rauka ia koe i te akangaroi i reira e kia mataora i toou oraanga. Ka rauka katoa ia koe i te painia.” Penei ka riro te reira au tuatua ei akamanakoanga tau kore mei tetai aronga tei taangaanga tau kore i to ratou au taeake i roto i te putuputuanga Kerititiano ei kimianga puapinga na ratou. E akamanako meitaki tikai i te reira akakoroanga. Kare ainei e te akaata maira te reira i te manakoanga o te tangata apinga nui “neneva” o ta Iesu parapore?​—Luka 12:16-21.

9. Eaa tetai au Kerititiano e ereereia ai e te inangaro i te au apinga?

⁹ E taangaanga ana a Satani i tana akatereanga kino i roto i tetai tu e akakeu ra te reira i te au tangata kia inangaro i te au apinga. Ka akakino te reira anoano i te oraanga o tetai Kerititiano, na te pokia anga i te tuatua, e kare atura i “ua” mai. (Mareko 4:19) Te akamaroiroi maira te Pipiria ia tatou kia mareka ua tatou i te kai e te kakau. (1 Timoteo 6:8) Inara, e manganui tei ereereia e  “te kimi manu” no te mea kare ratou e akono ana i te akoanga kia ratou uaorai. Te akatupu ra ainei te tu ngakau parau ia ratou kia manako e ka anoanoia ratou kia aru i tetai atu tu oraanga tikai? Akapeea tatou uaorai? Te akatupu ra ainei to tatou inangaro kia rauka te au apinga, kia opara i te au inangaro no te akamori mou ki te tuanga rua? (Hagai 1:2-8) Ma te tangi, i roto i te au tuatau ngata i te pae moni, kua akaatinga tetai pae i to ratou turanga pae vaerua kia rauka i te akono tamou i tetai tu oraanga ta ratou i matau. E rekareka ana “te kimi manu” i te reira tu anoano i te au mea materia!

Te Ereere o te Tamataoraanga Tau Kore

10. Eaa te akamanako matatioanga uaorai ka tau te Kerititiano kia rave?

¹⁰ Tetai ravenga ke atu a “te kimi manu” koia oki kia akakino i te tu natura o te au tangata kia kite e eaa te mea meitaki e eaa te mea kino. Te aerenga manako tei aite atu ki tei kiteaia i Sodoma e Gomora, kua akakeu katoa i te maataanga o te au tuanga o te tamataoraanga. E akaari mai ana te au ripoti nuti i runga i te tivi e i roto i te au makatini i te kino e te oronga maira i te au inangaro viivii o te pirianga ainga. Te maataanga o te au tamataoraanga i runga i te nuti e akaaveave ana i te tu kite o te tangata kia “kite i te meitaki e te kino.” (Ebera 5:14) Inara, e akamaara ana i ta Iehova au tuatua na roto i te peroveta ko Isaia e: “E ae oki ia ratou, to tei tuatua i te kino ra e meitaki, e te meitaki ra e kino.” (Isaia 5:20) Kua rauka ainei i “te kimi manu” i te akakeu kikite i toou manako no te reira tamataoraanga tau kore? Te umuumuia ra te akamanako matatioanga uaorai.​—2 Korinetia 13:5.

11. Eaa te akamatakite anga no runga i te au soap opera i runga i te tivi tei orongaia mai i roto i teia makatini?

¹¹ Vaitata rai e e 25 mataiti i topa akenei, kua akamatakite aroa mai The Watchtower i te ngutuare tangata akarongo no runga i te au porokaramu e akaari putuputuia ana i runga i te tivi. * Te tuatua ra teia no runga i te akanauruanga kikite a te au soap opera e rekaia ana e te au tangata: “Kua taangaangaia te kimi anga i te inangaro ei kotoeanga no tetai ua atu tu akonoanga. Ei akatauanga, kua karanga tetai mapu nui kare i akaipoipo ake, ki tetai taeake e: ‘E aka inangaro tikai toku ia Victor. Koai tei kite atu. . . . Kia anau ua au i tana pepe, ko te mea puapinga roa atuia kiaku!’ No te maru ua i te tangi i te akatangianga imene, e aka angaanga i te akamanako atu e e tarevake tona aerenga. E reka katoa ana rai koe ia Victor. Ka tangi koe i te tamaine. Kua ‘marama ua’ koe. ‘E umere tikai koe e akapeea koe i te kotoeanga,’ i karanga ai tetai vaine akarakara tei rako tangata mai i muri ake. ‘Kua kite tatou e e kino te pirianga ainga tau kore. . . . Inara kua kite mai au e i roto i toku manako te ariki ra au i te reira.’”

12. Eaa te au tikaanga te akakite maira i te au tu tau meitaki o te akamatakiteanga no runga i tetai au porokaramu tivi tikai?

¹² Mei te taime mai i neneiia ai te reira au atikara, kua maata takiri mai teia au tu porokaramu nei e akakino ra i te ngakau. I roto i te au ngai e manganui, e akaariia ana te reira au porokaramu e 24 ora i te ra. Te au tane, te au vaine, e te au  mapu e manganui, te angai putuputu ra i to ratou au manako e te ngakau ki runga i te reira tamataoraanga. Inara, auraka roa tatou e akavare ia tatou uaorai ma te akamanakoanga pikikaa. E mea tarevake i te akamanako e kare te tamataoraanga viivii tikai e tuke ana i te kino tei kiteaia i roto i te ao tikai. Ka rauka ainei tikai i tetai Kerititiano i te kotoe i te ikianga e kia tarekarekaia e te au tu tangata kare rava aia e manako atu i te pati kia aere mai ki tona kainga?

13, 14. Akapeea tetai aronga i te akakiteanga mai i te puapinga tei rauka ia ratou mei te au akamatakiteanga no runga i te tivi?

¹³ E manganui tei puapinga i to ratou akarongo anga ki te reira akamatakiteanga tei orongaia mai e “te tavini akono meitaki e te pakari.” (Mataio 24:45-47) I muri ake i te tatauanga i te akoanga taka meitaki tei akatumuia ki runga i te Pipiria, kua tata mai tetai pae i te akakiteanga mai e akapeea te au atikara i te akakeu anga ia ratou uaorai. * Kua karanga tetai e: “No tetai 13 mataiti kua varenga ua au i te akarakara i te soap opera. Kua manako mai au e te meitaki ua nei au i te aere ua anga ki te au uipaanga Kerititiano e te aere atu anga ki runga i te angaanga tutu anga i tetai au taime. Inara kua akono au i te tu o te soap opera o te ao nei, e me takinga kinoia koe e taau tane, me kore kare koe e inangaroia, te tano ua ra te akaturi​—nona rai te apa. E no reira i toku manakoanga e kua ‘tano’ rai, kua aru au i teia aerenga kino e kua ara au ia Iehova e toku tokorua.” Kua akaateaia teia vaine. I te openga iora, kua rako tangata mai aia, kua tataraara, e kua akaoki akaouia mai ki roto i te putuputuanga. Te au atikara tei akamatakite mai i te au soap opera i runga i te tivi, kua oronga mai i te maroiroi kiaia kia kopae i te tarekarekaia anga e ta Iehova e rikarika ra.​—Amosa 5:14, 15.

¹⁴ Kua karanga tetai atu tangata tatau e kua akakeuia tona oraanga e: “Kua aue au i te tatauanga i te au atikara, no te mea kua kite mai au e kare au e akamori akaou ana ia Iehova ma toku ngakau katoa. Kua taputou au ki toku Atua e kare au e riro akaou mai ei tavini ki teia au porokaramu nei.” I muri ake i te akakiteanga i tona rekareka no te au atikara, kua akakite tetai vaine Kerititiano i tona inangaro tau kore e kua tata e: “E akamanako ana au . . . me te akakeuia ra toku pirianga kia Iehova. Akapeea au i te akariroanga ia ‘ratou’ ei oa noku e kia riro katoa au ei oa no Iehova?” Me kua akakino teia au teata nei i runga i te tivi i te au ngakau aere e 25 mataiti i topa akenei, eaa to te reira akakeuanga i teia tuatau nei? (2 Timoteo 3:13) Kia matakite tatou i te ereere a Satani no te au tu tamataoraanga tau kore katoatoa, me ko te au soap opera i runga i te tivi, te au vitio kangakanga kino, me kore te au vitio akatangianga imene tau kore.

Te Ereere no te Au Manamanata o Tetai ki Tetai

15. Akapeea tetai aronga e ora ra rai i te opuangaia e te Tiaporo?

¹⁵ E taangaanga ana a Satani i te au manamanata i rotopu i tetai e tetai ei ereere kia akatupu i te au ke i rotopu i to Iehova iti tangata. Ka ereere katoaia tatou noatu ta tatou au tuanga meitaki no te tavinianga. E opuia ana tetai aronga e ora ra e te Tiaporo no te mea kua tuku ratou i te au manamanata i rotopu i tetai e tetai kia tamanamanata i te au e te taokotaianga e te puapinga  manea tikai i te pae vaerua ta Iehova i akatupu.​—Salamo 133:1-3.

16. Akapeea a Satani i te tautaanga i te tamanamanata i to tatou taokotaianga ma te kikite?

¹⁶ I te tuatau o te Tamaki I o te Ao, kua tauta a Satani i te takore i te tuanga o ta Iehova akaaerenga i te enua nei na te tamaki tika atu anga, inara kare aia i puapinga ana. (Apokalupo 11:7-13) Mei te reira taime mai, kua angaanga kikite aia i te tamanamanata i to tatou tu taokotaianga. Me tuku tatou i te au manamanata i rotopu i tetai e tetai kia akatupu i te tu taokotaianga kore, te oronga ra tatou ki “te kimi manu” i tetai atianga kia o mai. Te tapu ra tatou i reira i te vaerua tapu i te aere ua mai anga ki roto i to tatou uaorai oraanga e pera katoa ki roto i te putuputuanga. Me ka tupu ake te reira, ka rekareka a Satani no te mea ko tetai ua atu tamanamanataanga o te au e te taokotaianga o te putuputuanga, te tamanamanata ra i te angaanga tutu anga.​—Ephesia 4:27, 30-32.

17. Eaa te ka tauturu i te aronga e manamanata to ratou ki tetai e tetai kia akatikatika i te reira?

¹⁷ Eaa taau ka rave me e manamanata toou uaorai ki tetai taeake Kerititiano? E tika, e tuke rava te au turanga ravarai. Inara, i te mea e e au tumu aere tetai i tupu ei te au manamanata, kare e tumu e kore ei te reira au manamanata ki tetai e tetai e rauka i te akatikatikaia. (Mataio 5:23, 24; 18:15-17) Te akoanga i roto i te Tuatua a te Atua, e mea akauruia e te apa kore. Me akonoia te reira, kare rava te au kaveinga Pipiria e puapinga kore ana. E puapinga ua ana rai te reira!

18. Eaa ra te aruanga ia Iehova ka tauturu ei ia tatou kia akatikatika i to tatou au manamanata i rotopu i tetai e tetai?

¹⁸ Kua papa ua a Iehova i te “akakore,” e e oronga mai ana aia i te ‘akakoreanga ara’ mou. (Salamo 86:5; 130:4) E akaari ana tatou e e au tamariki akaperepere tatou na Iehova me aru tatou iaia. (Ephesia 5:1) E aronga ara pouroa tatou e te anoano tikai ra i ta Iehova akakore mai anga i te ara. No reira, kia matakite tatou me te akakeuia ra tatou kia kore e akakore i te ara a tetai. Ka riro mai tatou mei te tavini i roto i te parapore a Iesu tei patoi i te akaaroa atu i tona taeake tavini no tetai kaiou, e e manga tuanga ua o te kaiou ta tona pu i oti ke ana i te akakore iaia. I te akakiteia atu anga ki te pu, kua titiri aia i te tavini aroa kore ki roto i te are auri. Kua taopenga a Iesu i te parapore i te na ko anga e: “E akapera katoa mai taku Metua i te ao ra ia kotou katoa, kia kore kotou e akakore ma te ngakau katoa i te apa a tona taeake.” (Mataio 18:21-35) I te akamanako oonu anga ki runga i te reira akatutuanga e te akamanako anga i te au taime aere i akakore mai ei a Iehova i ta tatou ara, papu e ka tauturu ia tatou i to tatou tautaanga i te akatikatika i te au manamanata ki to tatou taeake!​—Salamo 19:14.

Meitaki ua “i Raro ake i te Tapoki o Tei Teitei”

19, 20. Akapeea tatou i te akamanakoanga i te “tapoki” e te “marumaru” i roto i teia au tuatau kino?

¹⁹ Te noo nei tatou i roto i te au tuatau kino. Papu ei kua takore ke ana a Satani ia tatou pouroa naringa kare to Iehova paruruanga takinga meitaki. No reira, kia kopae i te ereereia anga e “te kimi manu,” ka anoanoia tatou kia noo ua ki roto i te ngai paruruanga akatutu ua, “ko tei noo i raro ake i te tapoki o Tei Teitei,” “ka moe aia i raro ake i te [“marumaru o te,” NW] Mana katoatoa ra.”​—Salamo 91:1.

²⁰ Kia akamanako ua rai tatou i te au akamaaraanga e te au aratakianga a Iehova ei paruruanga, auraka rava ei kotingaanga. Te aro atura tatou katoatoa i tetai ta tangata ma te kite pakari atu i to te tangata. Me kore ta Iehova tauturu takinga meitaki, kare e tangata e ora mai i te ereereia anga. (Salamo 124:7, 8) E no reira ka pure tatou kia akaora mai a Iehova ia tatou mei te au ereere a “te kimi manu”!​—Mataio 6:13.

[Au Tataanga Rikiriki i Raro]

Maara Ainei ia Koe?

• Eaa te “mataku i te tangata” i riro ei ei ereere no te mate?

• Akapeea te Tiaporo i te taangaanga anga i te ereere no te anoano i te au mea materia?

• Akapeea a Satani i te ereereanga i tetai aronga ki roto i te ereere o te tamataoraanga tau kore?

• Eaa te ereere ta te Tiaporo e taangaanga ra kia tamanamanata i to tatou taokotaianga?

[Au Uianga Apii]

[Tutu i te kapi 27]

Kua ereereia tetai aronga e te “mataku i te tangata”

[Tutu i te kapi 28]

Te tamataoraia ra ainei koe e te au mea e rikarika ra a Iehova?

[Tutu i te kapi 29]

Ka akapeea koe me e manamanata toou ki tetai taeake Kerititiano?