Laveaʻiina Mai le Mailei a Lē Fai Manu

“Auā o [Ieova] na te laveaʻiina oe i le mailei a lē fai manu.”—SALAMO 91:3.

1. O ai “lē fai manu,” ma aiseā e mataʻutia ai o ia?

O LOO fesagaʻi uma Kerisiano ma sē e pei o se manufeʻai, ma e matuā atamai ma faitogafiti o ia e sili mamao i lo tagata. O loo taʻua o ia i le Salamo 91:3 o “lē fai manu,” po o lē fai mailei. O ai lenei fili? Talu mai le lomiga o Iuni 1, 1883, o loo faaalia e lenei mekasini o ia o Satani le Tiapolo. O lenei fili malosi, e faatogafiti ona ia faasesē ma maileia tagata o Ieova, e pei ona taumafai lē fai manu e maileia se manulele.

2. Aiseā ua faatusa ai Satani i se fai manu?

² I aso anamua, sa puʻeina manulele ona o a latou pesega malie, o fulu felanulanuaʻi, aemaise foʻi mo meaʻai ma taulaga. Peitaʻi, o le natura o manulele e mataalia, e ʻaloʻalo mamao, toe faigatā ona maileia. O lea la, o se fai manu i vaitaimi o le Tusi Paia, e muamua ona ia vaavaai i uiga ma masaniga a se manulele, lea na te manaʻo e puʻeina. Ona ia fuafua lea o se togafiti e maileia ai. I le faatusaina o Satani i se fai manu, o loo fesoasoani mai le Tusi Paia iā i tatou e mateʻia ana auala. O loo suʻesuʻe taʻitasi e le Tiapolo i tatou. Na te mātauina a tatou masaniga ma uiga, ona ia faia lea o ni mailei e lē iloa atu e taumafai ai e maua i tatou. (2 Timoteo 2:26) O le mauaina o i tatou i ana mailei o lona uiga, o le a faaleagaina ai lo tatou itu faaleagaga ma oo atu ai i lo tatou faaumatiaga. Mo lo tatou puipuiga, e manaʻomia ona malamalama i togafiti eseese a “lē fai manu.”

3, 4. O ā taimi e pei ai gaoioiga a Satani o se leona? se gata?

³ I le faaaogāina o ni faatusatusaga manino, na faatusa ai e le faisalamo ia metotia a Satani i se leona taanoa po o se asipi (gata). (Salamo 91:13) E pei o se leona, e tuusaʻo mai osofaʻiga a Satani e ala mai sauāga po o tulafono faalemalo e faasaga i tagata o Ieova. (Salamo 94:20) O na osofaʻiga faaleona ua tausuai ai nisi. Peitaʻi, o nisi o taimi e lē iʻu lelei nei osofaʻiga, ae atili ai ona autasia tagata o le Atua. Ae faapefea auala iloagatā a Satani, e pei o osofaʻiga a se asipi?

⁴ E faaaogā e le Tiapolo lona atamai e sili mamao atu i lo le tagata, e amata ai ana osofaʻiga taufaasesē ma mataʻutia e pei o se gata ū ogo mai se nofoaga lilo. I le faaaogāina o lenei auala, ua ia taulau ai i le faasesēina o mafaufau o nisi o tagata o le Atua, i le faasesē o i latou i le faia o lona manaʻo na i lo le finagalo o Ieova, ma aumaia ai ni āuga matuiā. Tatou te olioli auā tatou te lē vālea i ana togafiti. (2 Korinito 2:11) Seʻi o tatou iloiloina nei ana mailei e fā e pei ona faaaogā e se fai manu.

O le Fefe i Tagata

5. Aiseā ua taulau ai le mailei o le “fefe i tagata”?

⁵ E iloa e “lē fai manu” le faanaunauga masani o tagata ina ia talilelei, ma ia fiafia mai isi. E manatu mamafa Kerisiano i manatu ma faalogona o ē o loo latou miomiō faatasi. I le iloa o lenei mea, o loo taumafai le Tiapolo e faaaogā sesē o latou mafaufauga i le vaaiga a tagata iā te i latou. Mo se faaaʻoaʻoga, e na te aveesea le paleni o nisi o tagata o le Atua e ala i le maileia o i latou i le “fefe i tagata.” (Faataoto 29:25) Afai o le fefe i tagata e faapogaia ai auauna a le Atua e auai ma isi i le faia o mea e faasā e Ieova, po o le lē faia o mea o loo faatonu mai e le Tusi Paia, ua maileia la i latou e “lē fai manu.”—Esekielu 33:8; Iakopo 4:17.

6. O ā faaaʻoaʻoga o loo faaalia ai le auala e maileia ai e “lē fai manu” se talavou?

 ⁶ Mo se faataʻitaʻiga, ua lolo atu se talavou i ana aumea i le aʻoga ma ia ulaina ai se sikareti. Atonu na mamao mai lona manatu le ulaina o se sikareti a o alu atu o ia i le aʻoga. O lea, ua ia faia se mea e leaga ai lona soifua mālōlōina ma lē fiafia ai le Atua. (2 Korinito 7:1) Na faapefea ona faaosoosoina o ia? Atonu na sesē ana aumea, ma ua fefe ina neʻi lē fiafia mai i latou. Talavou e, aua neʻi faatagaina lē fai manu, e faasesē ma maileia oe! Ina ia alo ese mai le mauaina o i tatou, ia puipuimalu i le lologofie, e oo lava i nai mea laiti! Ia utagia le lapataʻiga a le Tusi Paia e ʻalofia le feoaʻi ma ē amio leaga.—1 Korinito 15:33.

7. E faapefea ona faapogaia e Satani nisi mātua ia leai se paleni faaleagaga?

⁷ E faatāua e mātua Kerisiano loto faamaoni le latou tiute faale-Tusi Paia, o le tausiga faaletino o o latou aiga. (1 Timoteo 5:8) Peitaʻi, o le faanaunauga a Satani ia lē paleni Kerisiano i le tausiga o le aiga. Atonu ua fai ma masani le latou misia o sauniga, ona o le lolo atu i pule o galuega e faia nisi galuega. Atonu latou te fefefe e faanoi mo se taimi, e auai atu i aso uma o se tauaofiaga itumalo e tapuaʻi ai iā Ieova faatasi ma o latou uso. O le puipuiga mai lenei mailei, o le “faatuatua iā Ieova.” (Faataoto 3:5, 6) O le iloaina o i tatou uma o se vaega o le ʻauaiga o Ieova, ma ua ia lagona o lona tiute o le vaavaaia o i tatou, o le a fesoasoani lea e faatumauina ai lo tatou paleni. Mātua e, pe tou te faatuatua o le a tausia e Ieova oe ma lou aiga pe a e faia lona finagalo? Po o le a maua oe e Satani ma e faia ai lona manaʻoga ona o lou fefe i tagata? Ia e manatunatu i nei fesili e ala i le tatalo.

Le Mailei o le Matapeʻapeʻa

8. O ā auala e faaaogā ai e Satani le mailei o le matapeʻapeʻa?

⁸ E faaaogā foʻi e Satani i lana mailei le uunaʻiga o le matapeʻapeʻa e maileia ai i tatou. O faiga faapisinisi o lenei lalolagi, e faalauiloa mai ai faiga e vave ona e mauʻoa ai e aunoa ma le tele o ni galuega, ma ua faasesēina ai nisi o tagata o le Atua. O nisi taimi, e uunaʻia ai tagata taʻitoʻatasi: “E galulue mamafa. Pe a e ausia ni tulaga lelei tau tamaoaiga, o le a mafai loa ona faifailemū ma olioli i le olaga. E mafai foʻi ona e paeonia.” Atonu e lē paleni na māfuaaga i ē e faaaogā tagata o le faapotopotoga Kerisiano e maua ai a latou tupe. Ia mafaufau lelei i na manatu. Pe e lē o atagia ai manatunatuga o le tagata mauʻoa ‘valea’ i le faataoto a Iesu?—Luka 12:16-21.

9. Aiseā e ono faatogafitia ai nisi o Kerisiano i le manaʻo mea?

⁹ E faagaoioi e Satani lana faiga o mea amioleaga e faatosina ai tagata e tuʻinanau i nisi mea. E mafai ona aafia ai le olaga o se Kerisiano, ma fetinaʻiina ai le upu ma “lē fua” mai ai lava. (Mareko 4:19) O loo faalaeiauina i tatou e le Tusi Paia ina ia gata le tatou manaʻo i mea e ʻai ma mea e oofu ai. (1 Timoteo 6:8) Peitaʻi, e toʻatele e maileia e “lē fai manu” ona o le lē faatatauina o lenei fautuaga iā i latou lava. Pe ona o le faamaualuga ua  latou faapea ai, e tatau ona tausisi i sea ituaiga o olaga? Ae faapefea i tatou? Po o punitia e mea e tatou te tuʻinanau i ai le faamuamuaina o manaʻoga o le tapuaʻiga moni? (Hakai 1:2-8) E faanoanoa, ona e iai nisi ua faataulagaina mea faaleagaga, ina ia faaauau ona maua pea le ituaiga o olaga ua masani ai, e ui i taimi ua faigatā ai le tulaga tau tamaoaiga. O na uiga matapeʻapeʻa e fiafia tele i ai “lē fai manu”!

Le Mailei o Faafiafiaga Lē Mamā

10. O ā iloiloga totino e ao ona fai e Kerisiano taʻitasi?

¹⁰ O le isi metotia a “lē fai manu” o le faaleagaina lea o lagona masani e iloa ai le lelei ma le leaga. O manatu ia sa iai i Sotoma ma Komoro, lea ua aafia ai le ʻau fai ata tifaga. E faapena foʻi tala fou i le televise ma mekasini o loo atagia mai ai faiga sauā, ma faanaunauga malolosi mo feusuaʻiga. O le tele o mea e foliga mai o ni faafiafiaga i faasalalauga eseese, e faanenefu ai le tomai “e iloa ai le lelei ma le leaga.” (Eperu 5:14) Peitaʻi, seʻi tomānatu i upu a Ieova e ala mai i le perofeta o Isaia: “Oi talofa iā te i latou o ē fai mai, ua lelei le mea leaga, a e leaga le mea lelei!” (Isaia 5:20) Po ua faatogafitia ou manatunatuga i faafiafiaga lē mamā a “lē fai manu?” E tatau ona tofotofo le tagata iā te ia lava.—2 Korinito 13:5.

11. O ā lapataʻiga o loo aumaia i lenei mekasini, e faatatau i ata faasolo o le televise ia e atagia ai amioga lē mamā?

¹¹ I le toetoe 25 tausaga ua mavae, na lapataʻia ai ma le alofa e Le Olomatamata ia tagata tapuaʻi o le Atua e faatatau i ata faasolo o le televise. * Sa patino nei lapataʻiga i aafiaga iloagatā o tagata taʻutaʻua o loo faatinoina ata faasolo i le televise: “O le saʻilia o le alofa ua avea ma māfuaaga e talia ai so o se amioga. Mo se faaaʻoaʻoga, na faapea atu se talavou o loo maʻitō, i sana uō teine: ‘Ae ou te alofa iā Vito. Ou te lē popole i ai. . . . Na o le pau le mea ou te manaʻo i ai o le maua o se ma pepe!’ Ua lē iloa le leaga o mea o loo ia faia ona o musika mālū o loo ia faalogoina. O loo mafai foʻi ona tosina atu le tagata matamata iā Vito. O loo e tigāalofa mo le teine. O loo e ‘malamalama’ i lenā tulaga. Na faapea mai se tagata matamata ua iloa le lē talafeagai o nei ata, ‘E mataʻutia le vave ona e talia o na ata lē mamā. Tatou te iloa e leaga amioga lē mamā. . . . Ae ua ou iloa sa ou auai i na faiga i oʻu mafaufauga.’”

12. O ā faamatalaga o loo faaalia ai le talafeagai o lapataʻiga e faatatau i nisi polokalame o le televise?

¹² I le māeʻa lomia o na lomiga, ua matuā taatele ai ia ituaiga o polokalame e faaleagaina ai mafaufauga. I le tele o vaipanoa, e faasalalauina nei polokalame i le aso atoa. E masani ona fafagaina mafaufau o tamāloloa, o fafine, ma talavou i nei ituaiga o faafiafiaga. E  lē tatau ona faasesēina i tatou i nei ituaiga o mafaufauga sesē. E lē tatau ona manatu faapea e leai se eseesega o nei faafiafiaga ma le tulaga moni o loo iai i le lalolagi. Pe mafai ona taʻusaʻoina se Kerisiano i lona filifili, e faafiafiaina o ia e se tagata e lē taitai ona ia manatu e valaaulia i totonu o lona fale?

13, 14. Na faapefea ona faaalia mai e nisi aogā na latou maua mai lapataʻiga e faatatau i televise?

¹³ E toʻatele na maua ni aogā ina ua latou utagia lapataʻiga mai le “auauna faamaoni ma le mafaufau.” (Mataio 24:45-47) I le māeʻa o le faitauina o lenei fautuaga manino faale-Tusi Paia, na tusi atu nisi e faaali le auala ua latou aafia ai. * Na faapea mai se tasi tagata: “E 13 tausaga o fai ma aʻu masani le matamata i ata faasolo o amioga lē mamā. Sa ou manatu e lelei pea loʻu tulaga faaleagaga i le tau ina auai i sauniga faa-Kerisiano, ma fai ma alu i le talaʻiga. Sa ou aafia i mafaufauga o le lalolagi e faatatau i ata o amioga lē mamā, lea a faileagaina oe e lau tane pe e te lagona e lē lava lona alofa mo oe, ua iai māfuaaga tatau e te mulilua ai, ae tuuaʻia lava le tane. Ina ua ou iloa e iai ‘māfuaaga tatau,’ na faia loa le mulilua ma agasala ai iā Ieova ma laʻu paaga.” Sa faateʻaina lenā fafine. Mulimuli ane, ua iloa lana mea sesē na faia ma salamō ai, ma toe faaaʻe ai o ia. O lomiga na lapataʻi mai e faatatau i ata faasolo o amioga lē mamā i le televise, na ou maua ai le malosi e tetee atu ai i faafiafiaga e inosia e Ieova.—Amosa 5:14, 15.

¹⁴ Na faapea mai se tasi na faitau ma aafia ai lona olaga: “Sa ou tagi ina ua ou faitauina nei mataupu, ona ua ou iloa e lē o atoatoa loʻu loto iā Ieova. Na ou tautō i loʻu Atua o le a lē toe avea aʻu ma pologa i nei polokalame o ata faasolo.” Na tusi mai se tuafafine Kerisiano e faaalia lona talisapaia mo nei mataupu, ma taʻu mai ana masaniga, na ia faapea mai: “Sa ou taumānatu . . pe na aafia laʻu faiā ma Ieova. E faapefea ona ou faauō i nei tagata mulilulua i ata faasolo, ma avea ma uō a Ieova i le taimi e tasi?” Afai na faaleagaina e nei ata o le televise loto o tagata i le 25 tausaga ua mavae, o ā la aafiaga o iai i aso nei? (2 Timoteo 3:13) E tatau ona tatou mataala i mailei a Satani i so o se ituaiga o faafiafiaga po ata o amioga lē mamā, taaloga vitiō e iai faiga sauā, po o ata pese e iai amioga lē mamā.

Le Mailei o Feeseeseaʻiga i Va o Tagata

15. E faapefea ona maua e le tiapolo tagata?

¹⁵ E faaaogā e Satani feeseeseaʻiga e maileia ma faatupu ai fevaevaeaʻiga i tagata o Ieova. E mafai ona maileia i tatou, e tusa lava po o ā o tatou faaeaga o loo iai i le auaunaga. Ua maua e le Tiapolo nisi e faia lona manaʻo, ona ua latou faatagaina feeseeseaʻiga totino e lepetia ai le filemu, ma le autasi matagofie faaleagaga lea e māfua mai iā Ieova.—Salamo 133:1-3.

16. E faapefea ona faatogafitia e Satani le faalavelaveina o lo tatou filemu?

 ¹⁶ A o faagasolo le Taua Muamua a le Lalolagi, na taumafai Satani e faaumatia le vaega i le lalolagi a le faalapotopotoga a Ieova e ala i osofaʻiga tuusaʻo, ae leʻi taulau ai. (Faaaliga 11:7-13) Talu mai lenā taimi, ua ia faatogafiti ona taumafai e lepetia lo tatou autasi. Pe a tatou faatagaina feeseeseaʻiga e tupu ai le lē autasi, ua tatou tuuina atu se mea e mautū ai “lē fai manu.” E mafai ai foʻi ona tatou faalavelaveina le mauaina o le agaga paia i o tatou lava olaga, po o le faapotopotoga. Afai e tupu lenā mea, o le a fiafia Satani ona o so o se taimi e aafia ai le filemu ma le autasi o le faapotopotoga, o le a aafia ai foʻi le talaʻiga.—Efeso 4:27, 30-32.

17. O le ā e ao ona fai e i latou o loo iai ni feeseeseaʻiga ina ia foʻia ai?

¹⁷ O le ā le mea e mafai ona e fai pe a iai ni feeseeseaʻiga iā te oe ma sou uso Kerisiano? E ui e eseese uma nei tulaga. Peitaʻi, e ui e tele māfuaaga e tutupu ai faafitauli, ae leai se māfuaaga e ao ai ona faaauau pea nei feeseeseaʻiga e aunoa ma le foʻiaina. (Mataio 5:23, 24; 18:15-17) O fautuaga a le Tusi Paia ua faagaeeina, toe atoatoa ona lelei. A faatatauina nei fautuaga, e tumau pea ona aogā mataupu silisili o loo iai.

18. Aiseā e foʻia ai faafitauli pe a tatou faaaʻoaʻo iā Ieova?

¹⁸ E nofo sauni Ieova e “faamagalo sala,” ma e na te tuuina mai le “faamagaloina [moni] o sala.” (Salamo 86:5; 130:4) E atagia i tagata o i tatou o le fanau faapelepele a Ieova, pe a tatou faaaʻoaʻo iā te ia. (Efeso 5:1) O tatou uma o tagata agasala ma e matuā manaʻomia le faamagaloga a Ieova. E tatau ona tatou faaeteete pe afai tatou te faatalatū e faamagalo isi. E ono pei ai i tatou o le auauna i le faataoto a Iesu, lea na musu e faamagalo le aitalafu a le isi uso a auauna, lea e telē mamao atu lana aitalafu na faamagalo e lona matai. Ina ua iloa e le matai, na ia tuuina loa lenei auauna lē loto faamagalo i le falepuipui. Na faaiʻu e Iesu lenā faataoto i lona faapea mai: “E faapea foʻi ona faia iā te outou e loʻu Tamā o i le lagi, pe afai tou te lē taʻitasi ma faamagalo ma o outou loto atoa i o outou uso.” (Mataio 18:21-35) O le mafaufau loloto i lenā tala faatusa ma manatunatu i le tele o taimi e faamagaloina ai e Ieova i tatou, e mautinoa o le a fesoasoani iā i tatou pe afai e fai ni taumafaiga e foʻia ai feeseeseaʻiga ma o tatou uso!—Salamo 19:14.

Saogalemu “i le Mea Lilo o i ai Lē Silisili Ese”

19, 20. O le ā le vaaiga e tatau ona iā i tatou e faatatau i le “mea lilo” ma le “paolo” o Ieova i nei taimi mataʻutia?

¹⁹ O loo tatou ola i aso faigatā. Ana lē seanoa le puipuiga alofa a Ieova, semanū e faaumatia i tatou uma e Satani. Ina ia ʻalofia le maileia e “lē fai manu,” e tatau ona tatou tutumau i le nofoaga faafaatusa o puipuiga, o le “nofo i le mea lilo o i ai lē Silisili ese,” ma maua le mea ‘e mau ai i le paolo o Lē e ona le malosi uma lava.’—Salamo 91:1.

²⁰ Ia tatou manatunatu i faamanatuga ma taʻiala a Ieova o ni puipuiga, ae lē o ni faasāsāga. O loo tatou fesagaʻi ma sē e pei o se manufeʻai e sili atu lona atamai i tagata. A aunoa ma le fesoasoani alofa a Ieova, e lē mafai ona sao mai se tasi i ana mailei. (Salamo 124:7, 8) O lea, ia tatou tatalo atu iā Ieova e laveaʻiina i tatou i mailei a “lē fai manu”!—Mataio 6:13.

[Faaopoopoga i lalo]

Pe E te Manatua?

• Aiseā e matuiā ai le mailei o le “fefe i tagata”?

• E faapefea ona faaaogā e le Tiapolo le mailei o le matapeʻapeʻa?

• E faapefea ona maileia e Satani nisi i le mailei o faafiafiaga lē mamā?

• O le ā le mailei e faaaogā e le Tiapolo e lepetia ai lo tatou autasi?

[Fesili mo le Suʻesuʻega]

[Ata i le itulau 27]

Ua maileia nisi i le “fefe i tagata”

[Ata i le itulau 28]

Po o e fiafia i mea e inosia e Ieova?

[Ata i le itulau 29]

O le ā le mea e mafai ona e fai pe afai e iai se lua feeseeseaʻiga ma sou uso Kerisiano?