Au Uianga a te Aronga Tatau

Kua tarevake ainei a Iakoba kia karanga e ko Esau aia, mei tei rekotiia i roto ia Genese 27:18, 19?

Penei kua matau ua koe i teia papaanga. I tona ruaineanga kua akakite a Isaaka kia Esau kia aere e kimi mai i tetai manu, i te na ko anga e: “Kia kai au; kia akameitaki atu au iakoe, ka mate atu ei au.” I te rongo anga i te tuatua a tana tane, kua akapapa a Rebeka i tetai kai kakara e kua ikuiku atura kia Iakoba e: “E naau e apai [i te kai] ki to metua ra, kia kai aia, e kai [kia] akameitaki mai aia ia koe, ka mate atu ei aia.” I reira kua aao a Iakoba, i te kakau o Esau ma te kiri puakanio ki runga i tona kaki e nga rima, e kua aere atura ki tona metua tane ma te kai kakara. I te ui anga a Isaaka kiaia e, “Koai koe, e taku tamaiti?” Kua pau atura a Iakoba e: “Ko au ko taau tama mua ra ko Esau.” Kua irinaki a Isaaka iaia e kua tuku atura i te akameitakianga ki runga iaia.​—Genese 27:1-29.

Kare te Pipiria i akakite mai i te au mea ravarai no runga i te tumu i akapera ai a Rebeka raua ko Iakoba, inara te akakite maira te reira e i tupu poitirere ua mai taua turanga ra. E akara katoa tatou e kare te Tuatua a te Atua i akatika ana e kare i akaapa ana i ta Rebeka raua ko Iakoba i rave, no reira kare teia e akanoo ra i tetai akaraanga no te pikipikikaa e te akavare. Te oronga maira ra te Pipiria i te akakiteanga no runga i teia turanga.

Te mea mua, te akataka meitaki maira te papaanga e e tikaanga rai to Iakoba ki te akameitakianga a tona metua; kare o Esau tikaanga. I muao, kua oko mai a Iakoba kia tau i te ture i te taoonga mataiapo mei tona tuakana maanga tu auau, e tei oko i te reira no te kai ua nei ei akamerengo i tona pongi. Kua ‘akavaavaa a Esau i tona taoonga mataiapo.’ (Genese 25:29-34) No reira i te aere anga ki tona metua, te umuumu ra a Iakoba i tetai akameitakianga e tikaanga tikai tona ki te reira.

Te rua, i te kite anga a Isaaka e ko Iakoba tana i oronga i te akameitakianga, kare aia i umuumu ana kia taui i tana i rave. Penei te maara ra iaia ta Iehova i akakite kia Rebeka i mua ake ka anau ei nga maanga e: “E tavini te tuakana ki te teina.” (Genese 25:23) E mea meitaki katoa kia kite e i te vaitata anga a Iakoba i te aere ki Harana, kua akamaata atu a Isaaka i te akameitakianga tana i oronga ana i muao.​—Genese 28:1-4.

Te mea openga, e mea tau kia akamaaraia e kua kite rai a Iehova e te manako katoa maira rai aia i te au mea katoatoa e tupu ra. Ko te akameitakianga ta Isaaka i oronga, e pirianga to te reira ki ta te Atua taputou kia Aberahama. (Genese 12:2, 3) Naringa te Atua kare i inangaro i te akameitakianga kia aere kia Iakoba, kua akakite ke mai ana aia. Inara, kua akapapu mai a Iehova i taua mea ra kia Iakoba, i te na ko anga e: “Ei toou ra uanga, e meitaki ei te au kopu-tangata ravarai o te ao nei.”​—Genese 28:10-15.