Bann pwen enteresan dan liv Obadya, Yona, ek Mika
Parol Zeova i vivan
Bann pwen enteresan dan liv
Obadya, Yona, ek Mika
“VIZYON Obadya.” (Obadya 1) Liv Obadya i konmans par sa bann parol. Dan son liv ki i ti konpoze an 607 A.N.L., sa profet pa revel nanryen lo li menm eksepte son non. De syek pli boner, profet Yona ti rakont sa ki i ti eksperyanse personnelman an rapor avek son travay misyonner. Sa 60 an ki Mika ti profetize ti tonm apepre an 777 A.N.L. ziska 717 A.N.L. ti avan Obadya e apre Yona. Sa ki Mika i rakonte lo son lekor se ki i ti “sorti [dan vilaz] Moreset” e ki i ti konmans ganny parol Zeova “pandan letan Yotam, Aaz, Izkiya, ki ti bann lerwa Zida.” (Mika 1:1) I evidan ki sa profet ti familye avek lavi dan lakanpanny atraver son bann kalite ilistrasyon ki i ti servi pour met lanfaz lo bann pwen enportan dan son mesaz.
EDOM “POU BEZWEN GANNY DETRIR POUR EN LETAN ENDEFINI”
Konsernan Edom, Obadya ti dir: “Akoz vyolans ki ou’n fer kont ou frer Zakob, ou pou ganny kouver avek laont, e ou pou bezwen ganny detrir pour en letan endefini.” Dan son lespri sa profet ti ankor pe mazin sa bann aksyon vyolan ki sa bann Edomit ti’n fer anver bann garson Zakob setadir bann Izraelit. An 607 A.N.L., kan bann Babilonnyen ti detrir Zerizalenm, bann Edomit “ti debout akote” e ralye ansanm avek sa bann anvaiser “etranze.”—Obadya 10, 11.
Parkont, bann Izraelit ti pou ganny restore. Profesi Obadya ti dir: “Lo Montanny Siyon i landrwa kot sa bann ki pe sove pou ete, e i pou bezwen vin en keksoz sen.”—Obadya 17.
Larepons pour bann kestyon lo Labib:
5-8—Ki diferans i annan ant destriksyon Edom ek bann devaster ki vin aswar oubyen bann ramaser rezen? Si bann voler ti vin Edom, zot ti pou pran zis sa ki zot ti oule. Si bann dimoun ki ti anmas rekolt ti vin kot li, zot pa ti pou anmas tou rekolt. Toudmenm, kan Edom ti tonbe, son bann trezor ti ganny serse e i ti konpletman ganny detrir par “sa bann menm zonm ki ti dan menm lalyans avek li” setadir son bann alye Babilonnyen.—Zeremi 49:9, 10.
10—Ki mannyer Edom ti ganny “detrir pour en letan endefini”? Parey ti’n ganny predir, nasyon Edom, avek son gouvernman ek son pep dan en rezyon spesifik lo later ti nepli egziste. Lerwa bann Babilonnyen, Nabonid, ti konkerir Edom apepre dan milye sizyenm syek A.N.L. Ver katriyenm syek A.N.L., teritwar Edom ti ganny okipe par bann Nabateen, e bann Edomit ti bezwen al reste Negeb ki bor dan sid Zide, ki ti plitar ganny apele Idime. Apre ki bann Romen ti detrir Zerizalenm an 70 N.L. bann Edomit ti nepli egziste.
Leson pour nou:
3, 4. Akoz zot ti viv dan en rezyon lo montanny kot ti annan bokou ros e bann ranpar ki ti ofer serten lavantaz kont latak zot bann lennmi, bann Edomit ti’n tronp zot lekor e vin tro konfidan an krwayan ki zot ti sen e sof e an sekirite. Me pour sov zizman Zeova, sa pa en keksoz fasil.
8, 9, 15. Lasazes ek pouvwar imen pa pou prodwir okenn proteksyon pandan “zour Zeova.”—Zeremi 49:7, 22.
12-14. Sa bann Edomit ti servi konman en legzanp lavertisman pour bann ki rezwir lo difikilte ki bann serviter Bondye i rankontre. Zeova i pran vreman oserye bann move tretman ki son bann serviter i sibir.
17-20. Sa profesi lo restorasyon konsernan bann garson Zakob ti konmans ganny akonplir kan en pti group ti retourn Zerizalenm sorti an egzil Babilonn an 537 A.N.L. Parol Zeova i touzour vin vre. Nou kapab annan san poursan konfyans dan son bann promes.
“NINIV POU GANNY RANVERSE”
Olye obeir komann ki Bondye ti donn li pour “al kot sa gran lavil Niniv e anons kont li” en mesaz zizman, Yona ti sov dan lot direksyon. Par anvoy “en gro divan lo lanmer”e par servi “en gro pwason,” Zeova ti rediriz Yona e redemann li en dezyenm fwa pour al dan kapital Lasiri.—Yona 1:2, 4, 17; 3:1, 2.
Yona ti antre Niniv e konmans proklanm sa mesaz kler e direk an dizan: “Zis ankor karant zour e Niniv pour ganny ranverse.” (Yona 3:4) Rezilta san ekspekte konsernan son travay predikasyon ti fer Yona vin “vreman ankoler.” Zeova ti servi “en pye kalbas” pour ansenny Yona en leson lo mizerikord.—Yona 4:1, 6.
Larepons pour bann kestyon lo Labib:
3:3—Eski grander lavil Niniv ti vreman ariv “en zistans marse apepre trwa zour”? Wi. Dan letan lontan, lavil Niniv ti osi enkli lezot vilaz toultour ki ti aparaman konmans depi Korsabad dan nor ziska Nimroud dan sid. Tou sa bann vilaz ki ti enkli dan distrik Niniv ti form en kare later ki ti mezir apepre 100 kilomet toultour.
3:4—Eski Yona ti bezwen aprann langaz bann Asiryen pour li kapab pres avek sa bann zabitan Niniv? I kapab ki Yona ti deza konn langaz bann Asiryen, ouswa par mirak i ti ganny sa abilite pour koz sa langaz. En lot posibilite i ki i kapab ki son mesaz direk ti ganny delivre an Ebre avek led en dimoun ki ti pe enterpret pour li. Si sa ti leka, son bann parol ti pou’n lev pli bokou kiryozite konsernan son mesaz.
Leson pour nou:
1:1-3. Fer plan davans pour lezot aktivite pour ou evite donn ou sipor konplet pour partaz sa bon nouvel Rwayonm e osi pour partisip dan sa travay pour fer disip i demontre en move motivasyon. En dimoun ki fer sa, dan en sans i sov sa travay ki Bondye in donn li pour fer.
1:1, 2; 3:10. Mizerikord Zeova i pa pour zis en kalite nasyon, ras oubyen en group dimoun spesyal. “Zeova i bon avek tou dimoun, e son mizerikord i dan tou sa ki i fer.”—Psonm 145:9.
1:17; 2:10. Dan en sans profetik, sa trwa zour ek sa trwa lannwit ki Yona ti pase dan vant sa gro pwason ti pe anons lanmor ek rezireksyon Zezi.—Matye 12:39, 40; 16:21.
1:17; 2:10; 4:6. Zeova ti delivre Yona dan sa lanmer azite. Bondye ti osi “servi en pye kalbas, pour kouver Yona, e vin konman en lonbraz pour son latet, e delivre li dan son maler.” Bann adorater Zeova ozordi osi i annan konfyans dan zot Bondye, e dan son labonte leker, pour protez e delivre zot.—Psonm 13:5; 40:11.
2:1, 2, 9, 10. Zeova i ekout lapriyer son bann serviter e i ekout zot ler zot sipliy li.—Psonm 120:1; 130:1, 2.
3:8, 10. Sa vre Bondye “ti regrete” ouswa nou kapab dir, ti sanz son nide konsernan maler ki i ti’n dir pour arive lo Niniv e i ‘pa ti fer li arive.’ Akoz? Akoz bann zabitan Niniv “ti rezet zot move semen.” Pareyman ozordi, en peser i kapab eparnyen zizman Bondye si i demontre vre repantans.
4:1-4. Napa en zonm ki kapab fer Bondye met en limit avek Son mizerikord. Nou bezwen fer sir ki nou pa kritik Zeova lo lafason ki i demontre son mizerikord anver bann imen.
4:11. Avek pasyans Zeova pe les sa mesaz lo Rwayonm ganny anonse lo later antye parey i ti fer avek sa 120,000 zonm dan Niniv kot i ti pran pitye pour zot akoz “zot pa ti konn diferans ant zot kote drwat ek zot kote gos.” Eski pa nou osi nou devret santi pitye anver bann dimoun dan nou teritwar e avek devouman partisip dan sa travay pour pres lo Rwayonm e fer disip?—2 Pyer 3:9.
‘ZOT POU VIN PLI SOV’
Mika ti ekspoz pese Izrael ek Zida, i ti osi predir konsernan zot kapital ki ti pou ganny abandonnen, e promet restorasyon. Samari ti pou vin “en ta debri.” Vi ki zot ti pe ador bann zidol, Izrael ek Zida ti merit “vin sov” oubyen onte. Kan zot ti ganny anvoye an egzil ti sa moman ki zot ti konmans vin pli sov ankor. Sa degre sov ki zot ti ete ti pou agrandi “parey pour en leg.” Sa leg limenm i en kalite votour ki annan zis detrwa pti plim lo latet. Zeova ti promet zot: “Mon pou sertennman rasanble Zakob.” (Mika 1:6, 16; 2:12) Akoz bann lider koronpi ek bann move profet, Zerizalenm osi ti “pou vin en ta debri.” Me Zeova ti pou “rasanble [son pep] ansanm.” “Sa enn ki ti pou vin dirizan lo Izrael” ti pou sorti “Betleenm Efrata.”—Mika 3:12; 4:12; 5:2.
Eski Zeova ti enzis avek Izrael? Eski son bann demann ti tro sever? Non. Sa ki Zeova ti demande ti ki son bann adorater i “demontre lazistis, kontan labonte, e mars dan en fason modes” avek zot Bondye. (Mika 6:8) Bann ki ti pe viv pandan letan Mika ti telman move ki “sa enn pli bon i en touf pikan, e sa enn ki pli drwat ti pli move ki en baraz pikan,” ki koz soufrans ek douler pou nenport ki ki i ti apros obor. Me sa profet ti demande: “Lekel ki en Bondye parey [Zeova]?” Ankor enn fwa Bondye ti pou demontre mizerikord anver son pep e “zet zot pese dan fon lanmer.”—Mika 7:4, 18, 19.
Larepons pour bann kestyon lo Labib:
2:12—Kan sa profesi konsernan ‘rasanble bann [Zwif] ki reste’ ti ganny akonplir? Son premye lakonplisman ti arive an 537 A.N.L. kan bann Zwif ti sorti an egzil Babilonn e retourn dan zot pei natal. Dan letan modern, sa profesi ti trouv son lakonplisman avek “Izrael Bondye.” (Galat 6:16, NW) Depi 1919, bann Kretyen swazir ti ganny rasanble ansanm ‘parey bann mouton dan berkay.’ Sa “gran lafoul” “lezot mouton” ti osi zwenn ansanm avek Izrael Bondye depi 1935, zot pe fer “bokou tapaz akoz sa kantite zonm.” (Revelasyon 7:9; Zan 10:16, NW) Ansanm, zot devoue pour zot promot vre ladorasyon.
4:1-4—“Dan peryod final bann zour,” ki mannyer Zeova pou “pas zizman parmi plizyer pep e i pou remet bann keksoz drwat konsernan bann nasyon pwisan”? Sa lekspresyon “bokou pep” ek “nasyon pwisan” pa pe refer avek bann group nasyonal oubyen politik. Plito, sa lekspresyon i refer avek bann endividi sorti dan tou bann nasyon ki’n vin bann adorater Zeova. Zeova pou rann zizman e met tou keksoz drwat an rapor avek zot relasyon avek li.
Leson pour nou:
1:6, 9; 3:12; 5:2. Samari ti ganny detrir par bann Asiryen an 740 A.N.L. pandan letan ki Mika ti ankor vivan. (2 Lerwa 17:5, 6) Bann Asiryen ti vin ziska Zerizalenm pandan ki lerwa Izkiya ti pe dirize. (2 Lerwa 18:13) Zerizalenm ti ganny detrir par bann Babilonnyen an 607 A.N.L. (2 Kronik 36:19) Parey i ti’n ganny profetize, Mesi ti ne an “Betleenm Efrata.” (Matye 2:3-6) Parol profetik Zeova i touzour vin vre.
2:1, 2. I vreman danzere pou en dimoun dir ki i servi Bondye me ki rod larises materyel premye plito ki rod “Rwayonm Bondye ek son lazistis.”—Matye 6:33; 1 Timote 6:9, 10.
3:1-3, 5. Zeova i ekspekte bann ki annan responsabilite parmi son pep i azir avek lazistis.
3:4. Si nou anvi ki Zeova i reponn nou lapriyer, nou pa devre pratik pese oubyen annan de kalite lavi.
3:8. Nou misyon pour pres sa bon nouvel i enkli anons sa mesaz zizman, nou selman kapab akonplir li atraver lafors ki Zeova i donn nou par son lespri sen.
5:5. Sa profesi konsernan Mesi i asir nou ki kan pep Bondye pou ganny atake par son bann lennmi, “set [ki reprezant en sif konplet] berze” e “wit dik” ki reprezant en gran kantite zonm kapab ki pou ganny apwente pour diriz pep Zeova.
5:7, 8. Pour bokou dimoun, bann Kretyen swazir ozordi i “parey laroze sorti kot Zeova” ouswa en benediksyon sorti kot Bondye. Sa i leka akoz i servi sa bann Kretyen swazir pour proklanm mesaz Rwayonm. “Lezot mouton” i ed lezot annan en bon relasyon avek Bondye par siport aktivman bann Kretyen swazir dan sa travay predikasyon. (Zan 10:16, NW) Pa sa i en privilez ki nou annan pour partisip dan sa travay ki anmenn soulazman pour lezot!
6:3, 4. Nou devret imit Zeova e vin zenere e annan konpasyon anver menm bann ki difisil oubyen bann ki feb spirityelman.
7:7. Kan nou fer fas avek bann problenm dan sa letan lafen ki nou pe viv, nou pa devret perdi lespwar. Plito, parey Mika, nou devret “kontinyen esper [nou] Bondye.”
7:18, 19. Parey Zeova i volonterman pardonn nou bann fot, nou devret pare pour pardonn bann ki ofans nou.
Kontinyen ‘mars onon Zeova’
Bann ki lager kont Bondye ek son pep “pou ganny detrir pour en letan endefini.” (Obadya 10) Me lakoler Zeova i kapab pa ariv lo nou si nou ekout sa lavertisman sorti kot Bondye pour ‘aret fer sa ki mal.’ (Yona 3:10) “Dan letan final bann zour” setadir pandan “bann dernyen zour,” vre ladorasyon i ganny met parlao tou bann fo larelizyon e bann ki obeisan i zwenn ansanm pour vre ladorasyon. (Mika 4:1; 2 Timote 3:1) Fotespere ki nou kontinyen reste determinen pour “mars onon Zeova nou Bondye pour en letan endefini, wi pour leternite.”—Mika 4:5.
Pa nou vreman retir bokou leson atraver sa ki liv Obadya, Yona, ek Mika i ansenny nou! Menm si zot ti ganny ekrir apepre 2,500-z-an pase, zot mesaz “i vivan e i annan pisans,” menm lo nou ozordi.—Ebre 4:12.
[Portre lo paz 9]
Obadya ti profetize: “[Edom] pou bezwen ganny detrir pour en letan endefini”
[Portre lo paz 11]
Mika ‘ti montre ki i kontinyen esper Zeova’ e nou kapab fer parey