Malu manene a mu mukanda wa Obadaya, wa Yona ne wa Mika
Dîyi dia Yehowa didi ne muoyo
Malu manene a mu mukanda wa Obadaya, wa Yona ne wa Mika
“TSHIKENA kumona tshia Obadaya.” (Obadaya 1) Mêyi aa ke a mbangilu a mukanda wa mu Bible wa Obadaya. Muprofete Obadaya ki mmuleje bualu bukuabu budi bumutangila mu mukanda eu wakafundaye mu 607 kumpala kua Yezu to, anu dîna diende ke didimu. Kadi mu mukanda wa Yona ukavuabu bajikije kufunda bidimu bipite pa 200 kumpala kua wa Obadaya, muprofete Yona udi wamba bulelela bua bionso biakamufikila mu mudimu uvua Nzambi mumutume bua kuenza. Mika yeye wakenza bidimu 60 mu mudimu wende wa buprofete panyima pa Yona, kadi kumpala kua Obadaya, kubangila mu 777 too ne mu 717 kumpala kua Yezu. Bualu bumuepele budi Mika muambe budi bumutangila mbua ne: uvua “muena [musoko wa] Molesheta” ne dîyi dia Yehowa diakalua kudiye ‘mu matuku a Yotama, Ahaza ne Hezikiya, bakalenge ba Yuda.’ (Mika 1:1) Bilejilu bidi muprofete eu muangate bua kukolesha malu adi mu mukenji udiye mufile bidi bileja muvuaye muibidilangane ne nsombelu wa ku musoko.
EDOME ‘NEABUTUDIBUE TSHIENDELELE’
Obadaya udi wamba bua Edome ne: ‘Bua tshimbambila tshiwakenzela muanenu Yakoba, bundu nebukukuate, ne neubutudibue tshiendelele.’ Muprofete eu uvua muvuluke malu a tshikisu a bena Edome avuabu bafuma ku dienzela bena Isalele bana ba Yakoba. Mu 607 kumpala kua Yezu pavua bena Babulona babutule tshimenga tshia Yelushalema, bena Edome ‘bakimana batangilangane nabu’ pa bule, kudisangabu ne baluishi “ba mu bisamba bia bende” abu.—Obadaya 10, 11.
Kadi bavua ne bua kulua kuasulula nzubu wa Yakoba. Muprofete Obadaya wakamanyisha ne: ‘Mu mukuna wa Siona nemuikale tshisumbu tshia bantu bapanduka, ne wowu newikale wa tshijila.’—Obadaya 17.
Mandamuna a nkonko ya mu Bible:
mvs 5-8—Padibu bafuanyikija dibutuka dia Edome ne dilua dia banyengi butuku ne dia bapodi ba tumuma tua mvinyo bidi biumvuija tshinyi? Bu bivi balue mu Edome, bavua mua kuiba anu bintu bivuabu basue. Bu bapodi ba tumuma balue, bavua mua kushiyaku nansha mpumbuluila. Kadi pavuabu bakuata Edome kudi ‘bonso bakadi bapunge nende tshipungidi,’ tuambe ne: bena diende bena Babulona, bavua mua kukalakasa bintu biende bionso bia mushinga mukole ekumupawulabi bionso nkong.—Yelemiya 49:9, 10.
mvs 10—Mmushindu kayi uvua Edome ‘mubutudibue tshiendelele’? Anu mukavuabi bimanyisha, ditunga dia Edome (divua ne bukalenge buadi ne bantu bikale anu pa buloba apa ne wabu muaba) diakajimina butubutu. Nabonide mukalenge wa Babulona wakakuata Edome pabuipi ne munkatshi mua bidimu bia 500 kumpala kua Yezu. Pabuipi ne mu bidimu bia 300, bena Nabata bakalua kusombela mu buloba bua Edome, kusakabi bena Edome bua kuya kusombela kuinshi kua buloba bua Yudaya. Pakabutulabu Yelushalema kudi bena Lomo mu 70 kunyima kua Yezu mumane kuya mu diulu, bena Edome bakajimina kashidi.
Malongesha adi atutangila:
mvs 3, 4. Bu muvua bena Edome basombele mu buloba bua mikuna ne bibanda buvua ne mikuna mile ne mpongo mile buvua bupangisha baluishi bua kubaluisha bipepele, bavua mua kuikala pamuapa badidinga ne lutambishi luonso pa kuela meji ne: kakuvua muntu uvua mua kubenzela bualu. Kadi kakuena muntu udi mua kunyema dinyoka dia kudi Yehowa to.
mvs 8, 9, 15. Meji a bantu ne bulobo buabu kabiakubakuba palua “dituku dia Yehowa.”—Yelemiya 49:7, 22.
mvs 12-14. Bena Edome badi tshilejilu bua kudimuija bantu badi basanka bua ntatu idi bantu ba Nzambi mua kupeta. Yehowa katu usanka nansha kakese padibu bakengesha bantu bende to.
mvs 17-20. Mulayi wa tshiprofete wa dipingajilula dia bana ba Yakoba kuabu eu wakabanga kukumbana pavua bamue ba kudibu batshivua bashale ne muoyo bumuke mu Babulona ne bapingane ku Yelushalema mu 537 kumpala kua Yezu. Dîyi dia Yehowa ditu anu dikumbana. Mbimpe tutekemene bionso bidiye mutulaye ne muoyo umue.
“NEBABUTULE NINEWE”
Pamutu pa Yona kutumikila dîyi dia Nzambi dia ‘kuya ku Ninewe, musoko au munene, ne kuubela’ bua kumanyisha benamu dinyoka divua Nzambi mulongolole bua kubapesha, wakanyema kuyaye luseke lukuabu. Kadi Yehowa udi utuma ‘tshipepele tshikole pa mâyi manene’ ne ‘munyinyi munene wa mu mâyi’ bua kushintulula njila uvua Yona uya ne pashishe kumutuma tshiakabidi mu tshimenga tshikulu tshia bena Ashû atshi.—Yona 1:2, 4, 17; 3:1, 2.
Ke Yona kubuela mu Ninewe e kubanga kumanyisha bantu kayi udiangana tshibanga ne: ‘Papita matuku makumi anayi, nebabutule Ninewe.’ (Yona 3:4) Kadi Yona “wakakuatshika tshiji” tshikole bualu tshivua diyisha diende dipatule ki ntshivuaye mutekemene to. Ke Yehowa kumenesha “mudiantondo” bua kulongesha Yona luse.—Yona 4:1, 6.
Mandamuna a nkonko ya mu Bible:
3:3—Mu bulelela muntu uvua mua ‘kuenda matuku asatu’ bua kunyunguluka Ninewe anyi? Eyowa. Mu bikondo bia kale, Ninewe uvua pamuapa mudie mikalu ne bitupa bikuabu bia ku nord kua Khorsabad, ne bia ku sud kua Nimroud. Bitupa bionso ebi bivua bivuija Ninewe tshipapu tshia nseka inayi ya bule bumue tshivua ne nyunguluilu wa kilometre 100.
3:4—Yona uvua ne bua kuanji kulonga muakulu wa bena Ashû bua kushisha kuyisha bena Ninewe anyi? Yona ukavua pamuapa mudianjile kumanya muakulu wa bena Ashû anyi pamuapa mupete bukole mu tshishima bua kuwakula. Bidi mua kuikala kabidi ne: uvua mua kuikala mumanyishe mukenji wende au mu tshikoso mu tshiena Ebelu eku muntu mukuabu umukudimuinawu. Bikalabi nanku, mêyi ende avua mua kuikala masake kabidi bantu bikole bua kuteleja mukenji au.
Malongesha adi atutangila:
1:1-3. Kuditekela midimu mikuabu ya kuenza ku bukole bua kubenga kudifila mu mudimu wa diyisha Bukalenge ne divuija bantu bayidi ntshimanyinu tshia mudi muntu ne meji mabi. Muntu udi wenza nanku udi anu bu udi unyema mudimu udi Nzambi mumupe.
1:1, 2; 3:10. Yehowa katu uleja luse luende anu kudi tshisamba tshimue anyi bantu ba mubidi wa mushindu umue peshi tshisumbu kampanda tshia bantu to. ‘Yehowa udi wenzela bantu bonso bimpe; luse luende ludi pa mutu pa bintu bionso biakafukaye.’—Musambu 145:9.
1:17; 2:10. Kushala kua Yona munda mua mushipa munene matuku asatu a munya ne a butuku kuvua kuleja mu tshiprofete lufu lua Yezu ne dibika diende.—Matayo 12:39, 40; 16:21.
1:17; 2:10; 4:6. Yehowa wakasungila Yona mu mâyi a mueji mukole a mbuu. Kabidi Nzambi ‘wakamenesha mudiantondo, wakaulepesha too ne pa mutu pa Yona, bua wikale dileji pa mutu pende bua kumumushila lutatu luende.’ Batendeledi ba Yehowa ba lelu badi mua kueyemena Nzambi wabu ne luse luende lujalame bua kubakuba ne kubasungilaye.—Musambu 13:5; 40:11.
2:1, 2, 9, 10. Yehowa utu umvua masambila a bantu bende ne uteya matshi ku milombu yabu.—Musambu 120:1; 130:1, 2.
3:8, 10. Nzambi mulelela ‘wakakudimuna mutshima wende’ bua muanda mukole uvuaye mulaye, yeye “kakawenza nansha.” Mbua tshinyi? Bualu bena Ninewe ‘bakalekela njila wabu mubi.’ Bia muomumue lelu eu, Nzambi udi mua kumbushila muntu dinyoka dikole divuaye mua kumupa padi muntu au ukudimuka ulekela bubi.
4:1-4. Kakuena muntu udi mua kuelela luse lua Nzambi mikalu to. Tudimuke bua katulu kuikala tuangata mishindu idi Yehowa uleja luse bibi.
4:11. Yehowa udi ne lutulu padiye mulekele bua lumu luimpe luyishibue pa buloba bujima bualu udi umvuila bantu ‘badi kabayi bamanye mua kujingulula tshianza ni ntshia balume ni ntshia bakaji’ luse anu bu muvuaye mumvuile bantu 120 000 ba mu Ninewe luse. Tuikale petu ne luse kudi bantu ba mu teritware wetu ne tuikale ne tshisumi tshia kuyisha Bukalenge bua Nzambi ne kuvuija bantu bayidi.—2 Petelo 3:9.
‘BABEYE DIBALA MU MUTU’
Mika udi wela mibi ya bena Yuda ne bena Isalele patoke, umanyisha dibutuka dia bimenga biabu bikulu, ulaya kabidi dibapingaja mu maloba abu. Samalea uvua ne bua kulua “mushiki wa mabue mu budimi.” Bua ditendelela diabu dia mpingu, Isalele ne Yuda bavua bakumbanyine kuikala ne “dibala” anyi bundu. Pavuabu babatume mu bupika, dibala diabu divua ne bua kualabala anu “bu dia nyunyu wa mukanku,” bimueneka ne: nyunyu eu ngua nkumbikumbi utu anu ne tumasala tukese ku mutu. Yehowa kubalaya ne: “Bulelela, nensangishe bana benu bonso, Yakoba.” (Mika 1:6, 16; 2:12) Bua bubi bua balombodi ne buntomboji bua baprofete, Yelushalema pende uvua ne bua ‘kuikala bu mishiki ya mabue.’ Kadi Yehowa uvua ne bua ‘kukunguija’ anyi kusangisha bantu bende pamue. Kabidi muntu uvua ne bua kupatuka mu “Betelehema Efelata” “bua kuikala mukokeshi wa bena Isalele.”—Mika 3:12; 4:12; 5:2.
Yehowa uvua muleje bena Isalele muoyo mubi anyi? Malu atuye ulomba bantu mmapite bukole anyi? Tòo. Tshidi Yehowa yeye ulomba badi bamutendelela ntshia ‘kuenza malu makane, kunanga kuleja bakuabu luse, ne kuenda ne Nzambi wabu ne mutshima mupuekele.’ (Mika 6:8) Kadi bantu ba tshikondo tshia Mika bavua balue bantu babi batambe, bualu umue wabu ‘uvua upita bakuabu buimpe uvua bu dieba, uvua upita bakuabu kulonda malu makane uvua bu lupangu lua mingonga,’ ukengesha yonso uvua usemena pabuipi nende. Kadi muprofete Mika udi wela lukonko ne: ‘Nnganyi udi Nzambi bu [Yehowa]?’ Nzambi nealeje bantu bende kabidi luse ne ‘neele malu mabi abu onso mu ndondo wa mâyi manene.’—Mika 7:4, 18, 19.
Mandamuna a nkonko ya mu Bible:
2:12—Ndîba kayi diakakumbana dîyi dia buprofete dia ‘kusangisha difuka dia bena Isalele popamue?’ Diakakumbana musangu wa kumpala mu 537 kumpala kua Yezu pavua difuka dia bena Yuda bavua bashale ne muoyo bapatuke mu bupika ku Babulona bapingane kuabu. Mu matuku etu aa, dîyi edi ndikumbanyine ‘bena Isalele wa Nzambi.’ (Galatia 6:16) Mbasangishe bena Kristo bela manyi popamue ‘bu mikoko mivule mu lupangu’ katshia mu 1919. Padi “tshisumbu tshinene tshia bantu” ba mu “mikoko mikuabo” balue kubalamata, nangananga katshia mu 1935, mbalue “ne mutoyi bualu bua bungi buabo.” (Buakabuluibua 7:9; Yone 10:16) Buonso buabu badi batantshisha ntendelelu mulelela ne lukunukunu.
4:1-4—Mmunyi muikala Yehowa mua ‘kulumbulula bilumbu bia munkatshi mua bantu ba bungi ne kukosa bilumbu bia bisamba binene bia bantu’ ‘mu matuku alualua’? Miaku ya ne: “bantu ba bungi” ne “bisamba binene bia bantu” kayena ileja bisumbu bia matunga anyi bia tshididi nansha. Kadi miaku eyi idi ileja bantu ba mu bisamba bionso badi balue batendeledi ba Yehowa. Yehowa udi ulumbulula bilumbu biabu ne ukosa nsambu yabu mu malu adi atangila malanda abu nende.
Malongesha adi atutangila:
1:6, 9; 3:12; 5:2. Bena Ashû bakabutula Samalea mu 740 kumpala kua Yezu patshivua Mika ne muoyo. (2 Bakelenge 17:5, 6) Bena Ashû bakafika too ne ku Yelushalema mu bukokeshi bua Hezikiya. (2 Bakelenge 18:13) Bena Babulona bakosha Yelushalema mu 607 kumpala kua Yezu. (2 Kulondolola 36:19) Anu mukavua baprofete bamanyishe, Masiya wakaledibua mu “Betelehema Efelata.” (Matayo 2:3-6) Yehowa katu muanji kulaya bualu kayi ubukumbaja to.
2:1, 2. Tudi mua kubuela mu njiwu mikole tuetu bikale tuamba mutudi tuenzela Nzambi mudimu petu eku tukeba diambedi biuma bietu pamutu pa ‘bukalenge buende ne buakane buende.’—Matayo 6:33; 1 Timote 6:9, 10.
3:1-3, 5.Yehowa mmutekemene bua badi balombola bantu bende benze malu ne buakane.
3:4. Bituikala basue bua Yehowa andamune masambila etu, katuena ne bua kudifila ku malu mabi anyi kuikala ne nsombelu wa mpala ibidi nansha.
3:8. Bua tuetu kukumbaja mudimu wetu wa kuyisha lumu luimpe udi muikale kabidi wa kumanyisha manyoka a Yehowa Nzambi, bidi bikengela bua nyuma wende atuambuluishe.
5:5. Mulayi eu wa Masiya udi utukolesha ku muoyo bua ne: padibu babunda bantu ba Nzambi kudi baluishi babu, “balami ba mikoko muanda mutekete” [nomba udi uleja dikumbana dia bualu tshishiki] ne “bakokeshi muanda mukulu” [nomba udi uleja bantu ba bukole] badi bajuka bua kulombola bantu ba Yehowa.
5:7, 8. Bua bantu ba bungi, bena Kristo bela manyi mbalue bu ‘dibungi difume kudi Yehowa’ anyi bu dibenesha dia Nzambi. Bidi nanku bualu Nzambi udi wenza nabu mudimu bua kumanyisha mukenji wa Bukalenge buende. Bena mu tshisumbu tshia ‘mikoko mikuabu’ badi bambuluisha bantu bua kudia malanda ne Nzambi mu dikuatshisha bela manyi mu mudimu wa buambi. (Yone 10:16) Tudi ne diakalenga dia kuenza mudimu eu udi upetesha bantu ditalala dilelela.
6:3, 4. Tudi ne bua kuidikija Yehowa Nzambi pa kuikala ne luse nansha kudi bantu badi ne malu makole anyi badi batekete mu dîyi dia Nzambi.
7:7. Katuena ne bua kulenduka patudi tupeta ntatu ku nshikidilu wa ndongoluelu eu mubi wa malu. Kadi anu bu Mika, tudi ne bua ‘kuindila Nzambi [wetu].’
7:18, 19. Anu bu mutu Yehowa musue kutubuikidila bilema bietu, tudi petu ne bua kubuikidila badi batuenzela bibi.
Tungunuke ne ‘kuenda mu dîna dia Yehowa’
Bantu badi baluisha Yehowa ne bantu bende ‘nebabutudibue tshiendelele.’ (Obadaya 10) Kadi tshiji tshia Yehowa tshidi mua kujika tuetu bateye ntema ku didimuija diende ne ‘balekele njila mibi.’ (Yona 3:10) “Mu matuku alualua,” mmumue ne: mu ‘matuku aa a ku nshikidilu,’ tshitendelelu tshilelela tshidi ne bua kuikala ku mutu kua bitendelelu bionso bia dishima ne bantu bena butumike badi babuelamu. (Mika 4:1; 2 Timote 3:1) Ke bualu kayi tudisuikayi bua ‘kuenda mu dîna dia Yehowa Nzambi wetu tshiendelele.’—Mika 4:5.
Tudi bapete malongesha a mushinga mukole mu mukanda wa Obadaya, wa Yona ne wa Mika. Nansha mudiyi mifunda kukadi bidimu bipite pa 2 500, malu adimu ‘adi ne muoyo ne bukole’ too ne lelu.—Ebelu 4:12.
[Tshimfuanyi mu dibeji 13]
Obadaya wakamanyisha ne: ‘[Edome] neabutudibue tshiendelele’
[Tshimfuanyi mu dibeji 15]
Mika ‘wakindila Yehowa,’ wewe pebe udi mua kumuindila
[Tshimfuanyi mu dibeji 16]
Kuyisha mmudimu wa diakalenga utudi ne bua kunanga