Posible an Sarong Makahulogan na Buhay!

DAKOL na tawo an nabubuhay tanganing maghanap nin kuarta asin makamtan an kayang bakalon kaiyan. An nagkapira nabubuhay tanganing magin bantog sa kinaban. An iba nabubuhay tanganing gibohon na perpekto an saindang artistikong mga abilidad. May mga tawo man na nabubuhay tanganing magtabang sa iba. Alagad dakol an dai nakakaaram kun ano an gusto nindang magibo sa buhay o kun taano ta nabubuhay sinda.

Kumusta man kamo? Seryoso na daw nindong napag-isip-isip kun taano ta nabubuhay kamo? Taano ta dai pag-isipan an nagkapirang bagay na pinagmamaigotan na magibo nin tawo tanganing maheling kun talagang nagtatao iyan sa sainda nin pakamate na may nagibo asin pakamate nin pagkakontento? Ano an nagpapagin posible na magkaigwa nin sarong makahulogan na buhay?

May Tamang Lugar an Kuarta Asin Pag-oroogma

Sa Eclesiastes 7:12, sinasabi kan Biblia: “An kadonongan para sa proteksion kun paanong an kuarta para sa proteksion; alagad an bentaha nin kaaraman iyo na iniingatan na buhay kan kadonongan an mga igwa kaiyan.” Iyo, mahalaga an kuarta. Kaipuhan nindo nin kuarta tanganing mabuhay, nangorogna kun may paninimbagan kamong sustentohan an saindong pamilya.—1 Timoteo 5:8.

Paano daw an buhay kun mayo kan nagkapira sa nakakapaogmang mga bagay na puedeng bakalon nin kuarta? Minsan ngani inadmitir ni Jesu-Cristo, an Kagtugdas kan Kristianismo, na mayo man lamang sia nin mahihigdaan, kun minsan ikinaogma nanggad nia an masiramon na kakanon asin arak. Dugang pa, nagsulot man sia nin mamahalon na gubing.—Mateo 8:20; Juan 2:1-11; 19:23, 24.

 Pero, si Jesus dai nabuhay tanganing magparaoroogma na sana. Igwa sia nin malinaw asin tamang mga prioridad. Si Jesus nagsabi: “Dawa kun an sarong tawo abunda, an saiyang buhay dai minagikan sa mga bagay na sadiri nia.” Dangan isinaysay nia an sarong ilustrasyon manongod sa sarong tawong mayaman na may mga oma na nagkaigwa nin abundang ani asin nangatanosan sa saiya man sana: “Ano daw an gigibohon ko, ngonyan na mayo na ako nin matitiponan kan sakong mga inani? . . . Gagabaon ko an sakong mga tambobong asin magtotogdok ako nin orog pa kadarakula, asin dian titiponon ko an gabos kong tipasi asin an gabos kong marahay na bagay; asin masabi ako sa sakong kalag: ‘Kalag, dakol ka nang marahay na bagay na narimpos para sa dakol na taon; magpaginhawa ka na sana, magkakan ka, uminom ka, magpasiramsiram ka.’” Ano an sala sa kaisipan kan tawong ini? An ilustrasyon nagsasabi pa: “An Dios nagsabi sa [tawong mayaman], ‘Ika na bakong makatanosan, ngonyan na banggi hahagadon ninda sa saimo an saimong kalag. Kun siring, siisay an magkakamit kan mga bagay na saimong tinipon?’” Dawa kun tinipon kan tawong iyan an saiyang inani, kun sia magadan dai na nia mapapakinabangan an kayamanan na natipon nia. Bilang kongklusyon, itinao ni Jesus an leksion na ini sa mga nagdadangog sa saiya: “Siring an nangyayari sa tawo na nagririmpos nin kayamanan para sa saiya man sana alagad bakong mayaman sa pagheling nin Dios.”—Lucas 12:13-21.

Iyo, kaipuhan niato nin kuarta, asin may tamang lugar an pagpasiramsiram. Minsan siring, bakong an kuarta ni an pag-oroogma an pinakaimportante sa buhay. An pagigin mayaman sa pagheling nin Dios, an boot sabihon, an pamumuhay na nagreresulta sa pag-oyon nin Dios, iyo nanggad an pinakaimportanteng bagay na maninigo niatong pagmaigotan na magibo.

Importante daw an Pagigin Bantog?

Dakol na tawo an nabubuhay tanganing magin bantog. An pagmawot na magin bantog, na gustong magirumdoman nin iba, bako man pirmeng sala. “An ngaran mas marahay kisa sa marahay na lana,” an sabi kan Biblia, “asin an aldaw nin pagkagadan kisa sa aldaw nin pagkamundag.”—Eclesiastes 7:1.

Sa aldaw nin pagkagadan, an rekord kan bilog na buhay nin sarong tawo, sabi ngani, nakasurat na. Kun nakagibo sia nin kaomaw-omaw na mga bagay, an aldaw nin pagkagadan kan tawong iyan mas marahay nanggad kisa sa aldaw kan saiyang pagkamundag na dian mayo pa siang nagigibong rekord.

An kagsurat kan libro sa Biblia na Eclesiastes iyo si Hadeng Salomon. An mas matuang tugang sa ama ni Salomon na si Absalon gustong magin bantog. Minsan siring, minalataw na hoben pang nagadan an tolong aking lalaki ni Absalon, na paagi sa sainda ikakapasa nia kutana an saiyang ngaran sa masurunod na henerasyon. Kaya, ano an ginibo ni Absalon? An Kasuratan nagsasabi: “Si Absalon . . . nagpoon na magpatindog nin sarong harigi para sa saiyang sadiri, na yaon sa Hababang Kaplanodohan kan Hade, huli ta sia nagsabi: ‘Mayo ako nin aking lalaki na mag-iingat kan sakong ngaran bilang girumdoman.’ Kaya inapod nia an harigi oyon sa saiyang sadiring ngaran.” (2 Samuel 14:27; 18:18) Dai na nakua an mga tada kan hariging ini. Kun dapit ki Absalon, namidbid sia kan mga estudyante sa Biblia bilang bantog na rebelde na nakipagkasapakat tanganing agawon an trono kan saiyang ama, si David.

Dakol ngonyan an nagmamaigot na magirumdoman paagi sa nagigibo ninda. Naghihingoa sindang magin bantog sa pagheling kan mga tawo na pabarobago an gusto sa pag-agi nin panahon. Pero, ano an nangyayari sa siring na kabantogan? Sa librong The Culture of Narcissism, nagsurat si Christopher Lasch: “Sa satong panahon, na an kapangganahan sa pangenot sinosokol sa pagigin hoben,  kaakit-akit, asin bago, an kabantogan mas madaling mawara kisa kasuarin man, saka an mga nakakakua kan atension kan publiko daing ontok na naghahadit na mawara iyan.” Bilang resulta, an dakol na bantog na tawo naggagamit nin droga asin inomon na de alkohol, na sa parate nagpapahalipot kan saindang buhay. Tunay nanggad, daing kamanungdanan an paghihingoang magin bantog.

Kun siring, sa pagheling niisay na maninigo kitang magkaigwa nin marahay na reputasyon? Sa pagtaram manongod sa nagkapira na nag-otob kan saiyang Ley, si Jehova nagsabi paagi sa saiyang propeta na si Isaias: “Tatawan ko ngani sinda sa sakong harong asin sa laog kan sakong mga lanob nin girumdoman asin ngaran . . . Ngaran sagkod sa panahon na daing talaan an itatao ko sainda, saro na dai mapapara.” (Isaias 56:4, 5) Huli sa saindang pagkuyog sa Dios, an mga inooyonan nia magkakaigwa nin “girumdoman asin ngaran.” Gigirumdomon nin Dios an saindang ngaran “sagkod sa panahon na daing talaan” tanganing dai iyan mapara. Iyan an klase nin ngaran na dinadagka kan Biblia na gibohon niato—an marahay na reputasyon sa pagheling ni Jehova, an satong Kaglalang.

Naghuhula kaidto si Isaias manongod sa panahon na an maimbod na mga indibiduwal maako nin buhay na daing katapusan sa Paraiso sa daga. An “buhay na daing katapusan” sa Paraisong iyan iyo an “tunay na buhay”—an klase nin buhay na iyo an katuyohan nin Dios para sa mga tawo kan lalangon nia sinda. (1 Timoteo 6:12, 19) Imbes na magkaigwa nin buhay na madaling mawara asin dai nakakakontento, bako daw na maninigo kitang maghingoang kamtan an buhay na daing katapusan?

Bakong Igo an Artistikong mga Okupasyon o Pilantropikong mga Aktibidad

An dakol na artistikong tawo may pagmawot na paoswagon an saindang ginigibo tanganing magin perpekto iyan sa pagmansay ninda. Halipoton an buhay sa presente para dian. Kan labi nang 90 anyos si Hideo, an pintor na nasambitan sa naenot na artikulo, naghingoa siang paoswagon an saiyang mga abilidad bilang pintor. Dawa kun an sarong artistikong tawo makaabot sa punto na kontento na sia sa saiya mismong nagibo, sa panahon na iyan tibaad dai na nia kayang gumibo nin siring kadakol kan nagigibo nia kan sia hoben pa. Alagad paano kun igwa sia nin buhay na daing katapusan? Isip-isipa na sana an gabos na posibilidad na mahimo niang magin perpekto an saiyang mga ginigibo!

Ano an masasabi manongod sa pilantropikong mga aktibidad sa buhay? Kaomaw-omaw na an sarong tawo magtao nin atension sa mga dukha asin gamiton an saiyang kayamanan tanganing tumabang sa mga daing sukat. Sinasabi kan Biblia: “Igwang orog na kaogmahan sa pagtao kisa sa pag-ako.” (Gibo 20:35) An pagmalasakit sa kapakanan kan iba tibaad nakakakontento nanggad. Pero, gurano kadakol an magigibo nin sarong tawo, dawa kun idusay nia an saiyang bilog na buhay sa aktibidad na ini? Bilang mga tawo, limitado an magigibo niato sa pagpaginhawa sa kasakitan nin iba. Dawa an dakulaon na materyal na regalo dai mapapanigoan an sarong pangenot na pangangaipo na dai iniintindi nin kadaklan na tawo asin dai noarin man napapanigoan sa saindang buhay. Ano an pangangaipong iyan?

Kaipuhan na Panigoan an Sarong Natural na Pangangaipo

Sa saiyang Sermon sa Bukid, sinambit ni Jesus an sarong natural asin pangenot na pangangaipo kan sia magsabi: “Maogma an mga nakakamate kan saindang espirituwal na pangangaipo, huli ta sainda an kahadean kan kalangitan.” (Mateo 5:3) Kun siring, oyon sa Biblia, an tunay na kaogmahan dai nakadepende sa kayamanan, kabantogan, artistikong mga nagibo, o pilantropikong mga aktibidad. Imbes, nakadepende iyan sa pagpanigo sa satong espirituwal na pangangaipo—an pangangaipo na sumamba sa Dios.

Dinagka ni apostol Pablo an mga dai nakakamidbid sa Kaglalang na hanapon sia. Si Pablo nagsabi: “Ginibo [nin Dios] hale sa sarong tawo an gabos na nasyon kan mga tawo, tanganing mag-erok sa ibabaw kan bilog na daga, asin saiyang dineterminaran an itinalaan na mga panahon asin an mga kasagkodan kan erokan nin mga tawo, tanganing hanapon ninda an Dios, kun mahahanap nanggad sia ninda asin talagang makua sia ninda, minsan ngani, sa katunayan, sia bakong harayo sa lambang saro sa sato. Huli ta paagi sa saiya kita igwa nin buhay asin naghihiro patin nag-eeksister.”—Gibo 17:26-28.

An pagpanigo sa pangangaipong sumamba sa tunay na Dios importanteng marhay sa pagkamit nin  tunay na kaogmahan sa buhay. An pagpanigo sa satong espirituwal na pangangaipo nagtatao man sa sato nin paglaom na makamtan an “tunay na buhay.” Helingon niato an halimbawa ni Teresa, na nakagibo nin kasaysayan sa telebisyon sa saiyang nasyon kan sia magin an enot na artistang Aprikana asin Amerikana na bida sa sadiri niang sarong oras na serye nin drama. Minsan siring, dai nahaloy, binayaan nia iyan gabos. Taano? Sia nagsabi: “Kombensido ako na an paghimate sa hatol kan Tataramon nin Dios iyo an pinakamarahay na paagi nin pamumuhay.” Habo ni Teresa na isapeligro an saiyang relasyon sa Dios paagi sa pagkaigwa nin kabtang sa sarong teleserye na nagtatampok nin sekso asin kadahasan. Binayaan nia an pagigin artista alagad pinonan an sarong totoo nanggad na nakakakontentong buhay, huling sia naglingkod bilang bilog na panahon na parahulit kan maogmang bareta kan Kahadean nin Dios, na nagmamaigot na tabangan an iba na magkaigwa nin marahay na relasyon sa Dios.

Mapadapit sa desisyon ni Teresa na pumondo sa pagigin artista, an saro sa dati niang mga kaibaiba kinotar na nagsabi: “Namondo ako nin grabe huli ta habo kong maheling na bayaan nia an sa paghona ko mapanggana niang karera. Alagad malinaw na nakakua sia nin sarong bagay na mas mahalaga asin mas nakakakontento.” Kan huri nagadan si Teresa. Pero, pagkagadan nia, nagkomento an iyo man sanang dating kaibaiba: “Sia maogma, asin iyan man talaga an gusto niato sa buhay. Pira sa sato an makakasabi na maogma man kita?” Para sa mga tawong ineenot sa saindang buhay an relasyon ninda sa Dios alagad sinda nagadan, igwa kan makangangalas na paglaom na pagkabuhay liwat sa pamamahala kan Kahadean.—Juan 5:28, 29.

An Kaglalang may katuyohan para sa daga asin para sa katawohan na yaon dian. Gusto nia na masabotan nindo an katuyohan na ini asin makamtan an buhay na daing katapusan sa Paraiso sa daga. (Salmo 37:10, 11, 29) Ngonyan na an panahon na makanood nin orog pa manongod ki Jehova, an Kaglalang kan kalangitan asin daga, saka kun ano an katuyohan nia para sa saindo. An mga Saksi ni Jehova sa saindong lugar maoogmang tabangan kamo na magkaigwa kan kaaraman na iyan. Tabi kontakon sinda, o sumurat sa kagpublikar kan magasin na ini.

[Ritrato sa pahina 5]

Ano an sala sa pangangatanosan kan tawong mayaman sa ilustrasyon ni Jesus?

[Ritrato sa pahina 7]

Gusto daw nindong makamtan an buhay na daing katapusan sa Paraiso sa daga?