HOPI hende ta biba pa plaka i pa loke plaka por kumpra. Algun hende tin meta pa bira famoso, otronan ke perfekshoná nan abilidatnan artístiko i tin hende ta biba pa yuda otro hende. Pero tin hopi hende ku no sa kiko nan ta biba p’e òf pakiko nan ta akí na mundu.

Kiko di abo? Bo a pensa dikon bo ta eksistí? Laga nos ban wak kiko ta algun meta ku hende ke logra den bida i si en realidat nan ta duna un sintimentu di logro i satisfakshon. Kiko ta duna bida berdadero propósito?

Plaka i Plaser Tin Nan Lugá

Na Eklesiastés 7:12, Beibel ta bisa: “Sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” Sí, hende mester di plaka, spesialmente  si nan tin ku kria un famia.—1 Timoteo 5:8.

Bo por imaginá un bida sin algun di e plasernan ku plaka por kumpra? Maske Hesukristu, e Fundador di Kristianismo, a bisa ku e no tabatin kaminda pa pone su kabes, e tabata disfrutá de bes en kuando di un bon kuminda i biña. Es mas, el a yega di bisti paña kostoso tambe.—Mateo 8:20; Juan 2:1-11; 19:23, 24.

Sinembargo, Hesus no tabata biba pa plaser. E tabata sa kiko ta su prioridatnan den bida. Hesus a bisa: “Pasobra bida di hende no ta konsistí di e abundansia di e kosnan ku e tin.” Anto el a kuminsá konta un parábola tokante un hòmber riku ku tabatin un kunuku ku a produsí masha hopi trigu. E hòmber a rasoná: “Kiko lo mi hasi? Pasobra mi no tin lugá pa warda mi kosecha. . . . Lo mi basha mi mangasinanan abou i traha otro mangasinanan mas grandi ainda, i den nan lo mi warda tur mi trigu i mi biennan. I lo mi bisa mi alma: ‘Alma, bo tin hopi biennan montoná pa hopi aña; tuma sosiegu, kome, bebe i fiesta.’” Ki pensamentu robes e hòmber tabatin? Hesus a sigui konta: “Ma Dios a bis’é [e hòmber riku]: ‘Abo, bobo! Awe nochi mes bo alma lo wòrdu eksigí for di bo; i awor ken lo bira doño di loke bo a prepará?’” Maske e hòmber a prepará lugá pa warda su kosecha, ora el a muri lo e no por a disfrutá di tur e rikesa ku el a akumulá. Na konklushon, Hesus a siña su oyentenan e lès akí: “Asina ta e hende ku ta montoná tesoro pa su mes, i no ta riku pa ku Dios.”—Lukas 12:13-21.

En bèrdat, nos tin mester di plaka i plaser tin su lugá. Sinembargo, ni plaka ni plaser ta e kos mas importante den bida. Loke ta hopi mas importante ta pa un hende ta riku pa ku Dios, es desir, pa e biba di tal manera ku e por ta bon mirá den bista di Dios.

Traha un Bon Nòmber Ta Importante?

Hopi hende ta hasi tur kos pa nan bira famoso. E deseo pa traha un bon nòmber, esta pa otro hende kòrda nos, no nesesariamente ta algu malu. Beibel ta bisa: “Un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.”—Eklesiastés 7:1.

Riba e dia ku un hende muri henter su historia di bida, na moda di papia, a ser skirbí. Si el a logra kosnan positivo, e dia ku e hende ei muri ta mihó ku e dia ku el a nase, pasobra e dia ku el a nase no tabatin nada skirbí ainda.

Rei Salomon a skirbi e buki bíbliko di Eklesiastés. Su ruman hòmber mas grandi Absalon kier a traha un nòmber pa su mes. Sinembargo, su tres yu hòmbernan ku por a pasa su nòmber pa e siguiente generashonnan a muri  yòn. Pues, kiko Absalon a hasi? Beibel ta bisa: “Absalon a traha pa su mes un pilá ku ta keda den e Vaye di Rei, pasobra el a bisa: ‘Mi no tin yu hòmber pa preservá mi nòmber.’ P’esei el a duna e pilá su mes nòmber.” (2 Samuel 14:27; 18:18) Te awe no a haña e restunan di e pilá akí. Enkuanto Absalon, esnan ku ta studia Beibel sa ku e tabata bon konosí komo un rebelde ku a trama un kòmplòt pa e logra haña e trono di su tata, David.

Awe hopi hende ta purba traha un nòmber mediante nan logronan. Nan ta buska gloria den bista di hende kende nan gustu ta kambia kontinuamente. Pero kiko ta pasa ku e gloria ei? Den e buki The Culture of Narcissism, Christopher Lasch a skirbi: “Den e tempu akí ku éksito ta dependé prinsipalmente di un persona su aparensia hubenil, beyesa i originalidat, fama ta mas pasahero ku nunka, i esnan ku logra kapta atenshon di públiko ta preokupá pa nan no pèrd’é.” Komo konsekuensia, hopi hende famoso ta kuminsá buska refugio den droga i ­alkohòl, i hopi di nan ta muri yòn. Pues, no ta bale la pena pa buska fama.

Ta den ken su bista anto nos mester tin un bon reputashon? Mediante profeta Isaias, Yehova a bisa di algun hende ku tabata kumpli ku su Lei: “Eseinan lo mi duna un rekuerdo den mi kas i paden di mi murayanan, i un nòmber . . . Un nòmber eterno ku lo no wòrdu kòrtá kitá afó.” (Isaias 56:4, 5) Debí ku nan a obedesé Dios, esnan aseptabel den su bista lo tin “un nòmber.” Ku otro palabra, Dios lo kòrda nan nòmber pa ‘eternidat’ i nan lo no ser kòrtá kitá afó. Esei ta e klase di nòmber ku Beibel ta animá nos pa traha: un bon reputashon den bista di Yehova, nos Kreador.

Isaias tabata profetisando tokante e tempu ora ku hende fiel lo haña bida eterno den Paradeis riba tera. “Bida eterno” den e Paradeis ei ta e “bida berdadero,” e bida ku Dios tabatin na mente ora el a krea hende. (1 Timoteo 6:12, 19) En bes di biba pa un bida pasahero ku no ta duna satisfakshon, no ta mihó pa nos hasi esfuerso pa haña bida eterno?

Metanan Artístiko i Humanitario So Nò Ta Sufisiente

Hopi artista tin deseo di mehorá nan arte pa nan por alkansá loke nan ta konsiderá perfekshon den nan arte. Aktualmente bida ta muchu kòrtiku pa logra esei. Ora e tabatin 90 i piku aña di edat, Hideo, e artista ku nos a menshoná den e artíkulo anterior, ainda tabata sigui hasi esfuerso pa mehorá su abilidatnan artístiko. Asta si un artista yega na e punto ku e ta satisfecho ku su trabou, kisas ya e no por produsí mes hopi mas manera tempu di su tempu. Pero kiko si e tabatin bida eterno? Pensa un ratu riba tur e posibilidatnan ku lo e tin pa perfekshoná su arte.

Kiko nos por bisa di hende ku tin metanan humanitario? Un hende ku ta yuda hende pober i usa su rekursonan pa yuda esnan den nesesidat meresé elogio. Beibel ta bisa: “Ta mas bendishoná pa duna ku pa risibí.” (Echonan 20:35) No tin duda ku ora un hende ta traha pa bienestar di otro hende, esei ta duna satisfakshon. Pero asta si un hende dediká henter su bida na esei, ta kuantu e por logra? Loke nos por hasi pa aliviá sufrimentu di hende ta limitá. I ni maske kuantu yudansa material nos duna, esei no ta satisfasé un nesesidat básiko ku mayoria di hende ta pasa por haltu di dje i ku nan no ta satisfasé. Kiko e nesesidat ei ta?

Un Nesesidat Ku Nos Mester Satisfasé

Den su Sermon Riba Seru, Hesus a menshoná un nesesidat básiko ku hende tin. El a bisa: “Felis [ta] esnan ku ta rekonosé ku nan tin mester di Dios; reino di shelu ta pa nan.” (Mateo 5:3, BPK) Pues, segun Beibel, felisidat no ta dependé di rikesa, fama, logronan artístiko ni ­esfuerso humanitario. Mas bien, e ta dependé di si nos ta satisfasé nos nesesidat spiritual, esta rekonosé ku nos mester adorá Dios.

Apòstel Pablo a animá tur hende ku no tabata konosé e Kreador pa busk’é. El a bisa: “For di ún sanger [Dios] a traha tur nashon di hende pa biba riba henter mundu, i el a fiha nan tempunan stipulá i e límitenan di nan lugánan di biba, pa nan buska Dios, si di algun manera,  fulando, nan por hañ’é, maske e no ta leu di kada un di nos; pasobra den dje nos ta biba i ta move i ta eksistí.”—Echonan 17:26-28.

Nos por haña berdadero felisidat solamente si nos satisfasé nos nesesidat pa adorá e Dios berdadero. Ora nos hasi esei, nos lo por haña e “bida berdadero.” Pensa un ratu riba e ehèmpel di Teresa, kende a hasi furor den su pais ora el a bira e promé aktris afroamerikano ku a hunga e papel prinsipal den su propio seri di televishon. Sinembargo, no a dura hopi ku el a bandoná tur esei. Dikon? El a bisa: “Mi ta konvensí ku no tin nada mihó den bida ku sigui e konseho di e Palabra di Dios.” Teresa tabata sa ku e papel ku e mester a hunga den e seri di televishon ta promové sèks i violensia, i e no kier a pone su relashon ku Dios na peliger. P’esei, el a legumai su bida komo aktris i a kuminsá un bida ku ta duna berdadero satisfakshon, ya ku el a bira un predikadó di tempu kompletu di e bon notisia di e Reino di Dios. El a hasi esei pa e por yuda otro hende haña un bon relashon ku Dios.

Un eks kolega di Teresa a bisa enkuanto Teresa su desishon pa stòp ku su trabou di aktris: “A molestiá mi hopi pa mir’é tira, segun mi opinion, un karera briante afó. Pero ta bisto ku el a haña algu hopi mihó.” Despues di Teresa su morto, e eks kolega a bisa: “E tabata felis, i ta kiko mas bo por pidi den bida. Kuantu di nos lo por bisa esei?” Aunke esnan ku pone nan relashon ku Dios na promé lugá den nan bida muri, nan tin e maravioso speransa di haña resurekshon ora ku Dios su Reino goberná e tera.—Juan 5:28, 29.

E Kreador tin un propósito pa e tera i pa hende ku ta biba riba dje. E ke pa bo komprondé kiko ta su propósito i pa bo haña bida eterno den Paradeis riba tera. (Salmo 37:10, 11, 29) Awor ta e tempu pa siña mas tokante Yehova, Kreador di shelu i tera, i loke e ta deseá pa bo. Testigunan di Yehova den bo área gustosamente lo ke yuda bo haña e konosementu ei. Tuma kontakto ku nan, òf skirbi e editornan di e revista akí.

[Plachi na página 5]

Dikon e pensamentu di e hòmber riku den e parábola di Hesus tabata robes?

[Plachi na página 7]

Bo ke haña bida eterno den Paradeis riba tera?