Komana Mwakoleshaña Amakwawu?

KUNSA yamaMpidi yaLebanoni kukabeta kambwela dikwekalila Mpidi yaHerimoni. Kufuma hansa yaniyi mpidi yalubanji nakushika hakaluñalwiji hadi jimita 2,814. Kakavulu muchaaka, nvula yachishika yitooka yabutaña mpidi yaHerimoni, nawa chikwila wufuku mpepela yitata yasuñununaña nvula yachishika yitooka nakwila wuumi. Wuumi wawilaña kunyitondu yidi kunsa yampidi nikunyitondu yanyikabu ninyivinyu yamwishina. Hampinji yachaaña cheneni muIsarela wakushankulu, wuumi wamuchidiwu diwaleteleña mukekemena wakulishileña nyitondu.

Mumasamu, kunuñañana kwakuwahi hakachi kawakwakudifukula aYehova anakwifwanishi ‘nawuumi wakuHerimoni wawilili hamapidi aZiyona.’ (Masamu 133:1, 3) Neyi chochaletaña Mpidi yaHerimoni wuumi wawuwahi kunyitondu, ninetu tunateli kukolesha antu yitwawanaña. Tunateli kwila ñahi mwenimu?

Chakutalilahu chaYesu chaKukolesha

Yesu Kristu wakolesheleña amakwawu. Hela kudimona nindi kapinji kantesha kunateli kwikala kwakukolesha chikupu. Chakutalilahu, Maku nsoneki waNsañu Yayiwahi walumbulula nindi: “[Yesu] hakuyakata mumakasindi, hakuyikiswila nkisu, hakuyinañika.” (Maku 10:16) Ichi chatela chayizañalesheli anyana anyanya chikupu!

Hawufuku wakukumishaku hanu hamaseki, Yesu wawelesheli nyendu yawatumbanji twindi. Kudizoza kwindi kwatela kwayishikili hanyichima. Yesu wayilejeli nindi: “Ami nayileji chuma chakwimbujola, kulonda ninenu nawa mwilaña neyi munayilenu.” (Yowanu 13:1-17) Mwalala, niwena akeñekeleña kwikala adizoza. Hela chakwila apostolu hiyashikeneni kutiyishisha chikumaku, nawa hawowuna wufuku atachikili kutadika nawu hinyi wateleli kwikala mukulumpi hakachi kawu. Yesu hahililuku. Ilaña, wahosheli nawu mukuwunda. (Luka 22:24-27) Hela “chamutukiluwu, [Yesu] hafuntishili cheñi matukaku.” Nawa, “chamweniyi yihuñu hazuwiluku, ilaña wadikunjikili kudi yena wasompeshaña chaloña.” Twatela kwimbujola chakutalilahu chaYesu chakukolesha.—1 Petulu 2:21, 23.

Yesu wahosheli nindi: “Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu.” (Matewu 11:29) Toñojokenu chimukutiya neyi Yesu nakuyidizisha. Hakutiya chatañishileñayi musinagogi, antu amwiluña dindi ahayamini nawa ahosheli nawu: “Iwu muntu, awa maana niniyi nyidimu yañovu nayiwanihi?” (Matewu 13:54) Kutañaña nsañu yachihandilu chaYesu nimudimu windi wakushimwina kunateli kutwidizisha chitwatela kukolesha amakwawu. Tutalenu chemikili Yesu chakutalilahu chachiwahi kuhitila munhoshelu yakukolesha niyililu yakukwasha.

Hoshenuña Yuma yaKukolesha

Chapela kuhumuna itala kubadika kutuña dadiha. Njila yoyimu yakuhumuna nikutuña yatela kuzatika nikunhoshelu yetu. Hakubula kuwanina, wejima wetu tukweti yiluwa. Mwanta Solomoni wahosheli nindi: “Hamaseki hihekala muntu waloña welaña chachiwahi, wabulaña kuvulumunaku.” (Mukwakutaŋisha  7:20) Chaswayi kumona yiluwa yamuntu mukwawu nikumuhoshola chatama. (Masamu 64:2-4) Cheñi nawa, chakeñekaña kutoñojoka chiwahi nikushaku ñovu kulonda tuhosheña mazu akukolesha.

Yesu wahosheleña mazu akukolesha antu. Wayikolesheleña lwakuspiritu kuhitila mukuyishimwina nsañu yayiwahi yaWanta. (Luka 8:1) Cheñi Yesu wakolesheleña antu ekalili atumbanji twindi kuhitila mukuyimwekeshela Tata yindi wamwiwulu. (Matewu 11:25-27) Dichaletesheli antu kwinza kudi Yesu!

Kwambukaku, ansoneki niAfwarisi hiyashileña maana kuyuma yakeñeleña akwawuku. Yesu wahosheli nindi, “Kuyawija akeña kushakama halema, nimumashikola akeña kushakama hamatanda alema.” (Matewu 23:6) Nawa, adiña nakudiwula antu, nakuhosha nawu: “Antu awa amavulu anabuli kwiluka nshimbi ashiñewa.” (Yowanu 7:49) Mwalala iyi yililu yawu hiyadiña nakukoleshaku!

Nhoshelu yetu kakavulu yamwekeshaña chekala yililu yetu niyitoñojoka chitwamonaña amakwawu. Yesu wahosheli nindi: “Muntu wamuwahi wukwidisha nawa yuma yayiwahi yaswekayi mumuchima windi; muntu watama wukwidisha nawa yoyuma yatama, muloña kanwa kindi kahoshaña yoyuma yalumbama mumuchima.” (Luka 6:45) Hanu dinu, chumanyi chitwatela kwila kulonda nhoshelu yetu yikaleña yakukolesha amakwawu?

Chuma chimu chitwatela kwila, twatela kuhulumana nakutoñojoka henohu kanda tuhoshi. Mukanda waYishimu 15:28 wahosha nawu: “Muchima wamukwakuloña watoñojokaña chachiwahi mwakwakwila.” Kutoñojoka kwamuchidiwu bayi kusenda mpinji yenenuku. Tunateli kwiluka netu mazu yitukuhosha akukolesha antu neyi tutoñojokelahu chadimu hakapinji kantesha. Twatela kudihula netu: ‘Indi mazu yinakukeña kuhosha amawahi? Himazu alala, indi kwiji himbonji hohu? Komana ‘hiizu dakuhoshela hampinji yatelela?’ Komana dikukolesha nikuzañalesha antu yinukuleja?’ (Yishimu 15:23) Neyi twiluka netu mazu yitunakukeña kuhosha atama hela hiyinateleli hanoyu mpinjiku, twatela kumwenahu. Chatela kumwena hohu, chikuwaha neyi tukwikala nanhoshelu yakukolesha nawa yatelela. Mazu akutuboka adi neyi ‘kutapola kwampoku yakabali,’ ilaña nhoshelu yayiwahi ‘yakoleshaña.’—Yishimu 12:18.

Chuma chikwawu chatela kutwikwasha chidi chakushinshika hachuma chaleñelaña akwetu akakwitiya kwikala alema kumesu aNzambi. Yesu wahosheli nindi: “Kwosi muntu natweshi kwinza kudami chakadi kumukoka kudi Tata wantemesheluku.” (Yowanu 6:44) Yehova watalaña hayililu yayiwahi yekala mudi ankoñi jindi ashinshika—nimudantu yitwamonaña netu akalisha. Kuhitila mukushaku kashinshi kakwiluka yililu yawu yayiwahi, tukwikala nahakuyitenena chachiwahi.

Kwashenu Amakwawu

Yesu welukili chikupu kukala kwawantu ayandisheleñawu. Mwalala, “chanamoniyi mazaza awantu, hakuyitiyila wushona, muloña akabakeni, apalañeni neyi nyikoku yakadi kabiña.” (Matewu 9:36) Ilaña Yesu wayikwashili; kubadika kuyitiyila hohu luwi. Wayitambikili nindi: “Inzenu kudami enu ejima  mudi nakukabakana, mwasenda yalema, ami nukuyinookesha.” Cheñi nawa wayilejeli nindi: “Mpanda yami yaswayi, nichisenda chami chapepela.”—Matewu 11:28, 30.

Makonu, tunakushakama ‘munyaka yakala.’ (2 Timotewu 3:1) Antu amavulu adi nakukala ‘kwakwakama kwamakonu.’ (Matewu 13:22) Amakwawu akweti kukala kwamuchihandilu chawu. (1 Atesalonika 5:14) Tunateli kukolesha ñahi antu adi mukukankila? Kufwana Kristu, tunateli kupeleshaku chiteli chawu.

Antu amakwawu afwilaña kukeheshaku kukala kuhitila mukuhosha hakukala kwawu. Neyi antu adi nakukala enza nawu tuyikwashi, komana twayitiyililaña? Kwikala mukwakutiyilila waluwi chakeñekaña kudifumba eyaweni. Chakeñekaña kushinshika hachuma chinakuhosha muntu, kubadika kutoñojoka hachiwatela kwakula hela chakumanisha kukala. Tukumwekesha netu tunamwakameni kuhitila mukutiyilila chikupu, kumutala, neyi chinatwesheki nikutumba chimwemweta hakanwa hampinji yitunakutiyilila.

Muchipompelu chawiniKristu, mwekala jinjila jajivulu jakukoleshelamu akwetu akakwitiya. Chakutalilahu, neyi tunayi nakupompa Hetala daWanta, tunateli kukeñakeña antu anakuyanda nayikatu. Henohu kupompa kanda kutachiki hela hanyima yakupompa twatela kwikala nakapinji kantesha kakuyikolesha. Cheñi twatela kwiluka antu anabuli kwinza kuKudiza kwaMukanda haChipompelu. Hadaha tunateli kuyitemeshela nshiña nakwihula chiyadi hela kuyikwasha.—Afwilipi 2:4.

Aeluda awiniKristu akweti chiteli chalema chanyidimu yamuchipompelu. Tunateli kupeleshaku mudimu wawu kuhitila mukuzatila hamu nikwovwahila nakuzata mudimu wejima wukutwinkawu. Izu daNzambi datwikonkomwenaña nawu: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.” (Aheberu 13:17) Kuhitila mukumwekesha spiritu yakudihana, tunateli kukolesha “ayulaña chachiwahi.”—1 Timotewu 5:17.

Swejenu Kuhosha Mazu aKukolesha niKwila Nyidimu Yakukwashana

Wuumi watutishaña wafumaña kutunyisa twamenji twasotokaña chovu-chovu, nawa twamwekanaña neyi kwosi kutunafumi. Chochimu, kukolesha amakwawu hikwafumaña hohu mukumwilila muntu chuma cheneni nankashiku, ilaña kwenzaña kuhitila mukumwekesha yililu yidi neyi yaKristu mpinji yejima.

Kapostolu Pawulu wasonekeli nindi: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Dichi tuzatishenu kufumba kwaPawulu. Komana tukoleshenu amakwawu chikupu munhoshelu yetu nimuyililu.

[Mwevulu wudi hefu 31]

Muntu watiyililaña nawushona wakoleshaña amakwawu

[Nyevulu yidi hefu 32]

Wuumi wahaMpidi yaHerimoni —diwaletaña mukekemena wakukulisha nyitondu