Riro ra Ainei Koe ei Akaoraora Anga ki Tetai Ke?

MEI te openga i te tua tonga o te ara maunga maata o te Maunga Amana te tu ra te Maunga Heremona, ma tona take manea e 2,814 mita te teitei ki runga ake i te tai. Te maataanga o te au mataiti, kua tapokiia te take o Heremona ki te kiona, e na teia i akatupu i te kou maana o te po kia aere mai na runga ake i te reira i te akatoka e te akatupu mai i te au. Kua topa mai te au ki runga i te au pu rakau viri e te au ua rakau i te tua akaaka o te maunga e ki runga atu i te au aua vine i raro ake. I te tuatau roa te maro anga i Iseraela i taito ra, kua riro mai taua au au akaoraora ra ei tumuanga maata no te tamauu anga i te rakau rikiriki.

I roto i tetai imene tei akauruia e te Atua, kua akaaiteia te taokotaianga maoraora i rotopu i te aronga akamori o Iehova “ki te au i topa ki runga ia Heremona; tei topa ki runga i te au maunga i Ziona ra.” (Salamo 133:1, 3) Mei te Maunga Heremona e oronga maira rai i te au au akaoraora anga ki te au rakau rikiriki ra, ka rauka ia tatou i te akamaoraora i te aronga ta tatou ka aravei atu. Akapeea tatou i te rave anga i te reira?

To Iesu Akaraanga Akaoraora Anga

Kua riro a Iesu Karaiti ei akakeuanga maata ki tetai ke. Ko tetai aravei poto ua anga iaia, ka riro mai ei akaoraora anga tikai. Ei akaraanga, te akakite maira te tangata tata Evangeria ko Mareko e: “Kua rave atura [Iesu] ia ratou, kua ikiiki iora, kua tuku atura i tona rima ki rungao ia ratou, akaora atura ia ratou.” (Mareko 10:16) E akaoraora anga tikai te reira no te au tamariki ou!

I tona po openga ei tangata ra i te enua nei, kua orei a Iesu i te vaevae o tana au pipi. Papu e kua akakeuia to ratou ngakau no tona tu akaaka. Kua akakite i reira a Iesu kia ratou e: “Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.” (Ioane 13:1-17) Ae, kia akaaka katoa rai ratou. Noatu e kare te au apotetoro i opu viviki mai ana i te manako e i taua po ra rai kua akamata ratou i te tauetono e koai tei maata atu i roto ia ratou, kare ra a Iesu i riri ana. Inara, kua uriuri manako marie aia kia ratou. (Luka 22:24-27) ‘Kia akakinoia mai aia ra, kare [a Iesu] i akakino atu.’ Ko te tika, “e kia mate aia ra, kare aia i tuatua tutaki atu; kua tuku ra iaia uaorai kiaia nona te manako tika ra.” E mea puapinga kia aruia to Iesu akaraanga akaoraora anga.​—1 Petero 2:21, 23.

Kua tuatua a Iesu e: “Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.” (Mataio 11:29) E akamanako ana i te apiiia anga mai tikai e Iesu. I muri ake i te akarongo anga iaia e apii ra i roto i to ratou tunako, poitirere tikai te aronga i tona uaorai enua e kua tuatua iora e: “Noea te pakari e te ravenga mana a teianei tangata?” (Mataio 13:54) E maata atu te ka apiiia mai kia tatou i te tatau anga no runga i to Iesu oraanga e te angaanga orometua ei akaoraora anga ki tetai ke. E akamanako ana tatou e i akapeea a Iesu i te akanoo anga i tetai akaraanga meitaki na roto i te tuatua tau e te rauka anga tetai tu meitaki.

Akono Tamou Anga i te Tuatua Tau

E ngoie ua ake i te takore atu i tetai are i te akatu akaou mai i tetai are ou. Te taangaanga aiteite uaia ra taua kaveinga ra no te akakino anga e te akamaroiroi anga ki ta tatou tuatua. Ei au tangata ara, kua apa katoatoa tatou. Kua karanga te Ariki ko Solomona e: “Kare takiri e tangata tuatua-tika i te enua nei, ko tei rave i te tuatua meitaki, e kare rava e ara.” (Koheleta 7:20) E ngoie ua ake i te kite atu anga i te au apa o tetai tangata e te akakino atu anga iaia ma te au tuatua akakino anga. (Salamo 64:2-4) I tetai tua ra, te umuumuia ra te manako tau e te tautaanga kia vai tau ua ta tatou tuatua.

 Kua taangaanga a Iesu i tona arero ei akamaroiroi atu i te au tangata. Kua oronga aia kia ratou te akaangaroianga i te pae vaerua na te akakitekite anga i te tuatua meitaki o te Patireia kia ratou. (Luka 8:1) Kua akaoraora katoa a Iesu i te aronga tei riro mai ei au pipi nana na te akakite atu anga i tona Metua i te rangi ra kia ratou. (Mataio 11:25-27) No reira rai oki te au tangata i akavaitata atu ei kia Iesu!

Ei tuke anga, kare te au tata tuatua e te au Pharisea i manako atu ana i te au anoano o tetai ke. ‘Te inangaro ra ratou i te ngai teitei i te au kaingakai, e te nooanga memeitaki i te au sunago ra,’ i karanga ai a Iesu. (Mataio 23:6) Ko te tika, kua akavaavaa ratou i te tangata noa ua, i te na ko anga e: “Kareka teianei au tangata tei kore i kite i te ture nei, kua taumaaia ïa.” (Ioane 7:49) Kare ua rai e apinga akaoraora anga tikai no runga i taua tu ra!

Te akaata putuputu maira ta tatou tuatua e eaa tei roto ia tatou e akapeea tatou i te manako anga atu i tetai ke. Kua tuatua a Iesu e: “E tuku mai te tangata meitaki i te mea meitaki no roto i te putunga meitaki i roto i tona ngakau; e tuku mai te tangata kino te mea kino, no roto i te putunga kino i roto i tona ngakau: no te ki oki o te ngakau i tuatuaʼi te vaa.” (Luka 6:45) Eaa i reira, ta tatou ka rave i te akapapu anga e te riro ra ta tatou tuatua ei akaoraora anga ki tetai ke?

Ko tetai mea oki, kia tapu tatou e e akamanako i mua ake ka tuatua ai tatou. Te akakite maira a Maseli 15:28 e: “Te kimi ra te ngakau o te aronga tuatua-tika ra i tana e tuatua atu.” Kare e anoanoia kia kaimoumou taime ki runga i taua manako ra. Na te akamanako anga na mua ake, ka rauka ua ia tatou i te akamanako e akapeea ta tatou au tuatua i te arikiia anga mai. Penei e ui tatou kia tatou uaorai e: ‘Ko taku tuatua ka tuatua atu e meitaki ainei ia? E mea tika tikai ainei, me kore e mea pikikaa ua? E tuatua tei “tuatuaia i te tuatau e tau ra?” Ka akaoraora, ka akamaroiroi ainei te reira i te aronga taku ka tuatua atu?’ (Maseli 15:23) Me taopenga ra tatou e e kino me kore e tau kore te manako, e rave tatou i tetai tauta anga meitaki i te akakore atu i te reira. Inara te mea meitaki roa atu, eaa ka kore ei e tauta i te mono i te reira ki tetai apinga akamaroiroi anga maata e te tau? Mei te “koputaputa koke ra” te au tuatua manako kore, inara ka riro mai te au tuatua tau ra ei “vairakau.”​—Maseli 12:18.

Ko tetai akaou tauturu koia oki kia akamanako e eaa tei akariro i to tatou au taeake irinaki ei aronga akaperepereia i roto i te nga mata o te Atua. Kua tuatua a Iesu e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Te kite maira a Iehova i te au tu tau i roto i tona au tavini tiratiratu tataki tai​—pera katoa te aronga ta tatou e manako ra e e tu ngata to ratou. Na te tauta pakari anga i te akataka i to ratou au tu meitaki, e tumu anga to tatou i te tuatua atu ma te tau no runga ia ratou.

E Tauturu i Tetai Ke

Kua marama pu tikai a Iesu no runga i te manamanata o te aronga tei takinga kinoia. E tika rai, “kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Inara kare a Iesu i akara ua i to ratou turanga tangi; kua tauturu ra aia ia ratou. Kua oronga mai aia i te patianga  e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.” Kua oronga katoa mai aia i teia akapapu anga e: “Te maru nei taku amo, e te māmā nei taku apainga.”​—Mataio 11:28, 30.

I teia tuatau, te noo nei tatou i “te au tuatau kikino tei ngata roa no te akono atu.” (2 Timoteo 3:1, NW) E manganui te au tangata kua akateiaaia e “te anoano maata i to teianei ao.” (Mataio 13:22) Ko tetai papaki kua akateiaaia no to ratou au turanga taitaia. (1 Tesalonia 5:14) Akapeea tatou i te orongaanga i te maroiroi ki te aronga te anoano ra i te tauturu? Mei ia Karaiti rai, ka rauka ia tatou i te tauturu i te akamama mai i ta ratou apainga.

Te kimi ra etai au tangata i te akamama mai i ta ratou uaorai apainga na te tuatua anga no runga i to ratou au manamanata. Me aere mai tetai aronga ngakau taitaia kia tatou i te kimi tauturu, te akarongo meitaki ra ainei tatou? Kia riro ei tangata akarongo ma te tu tangi te umuumuia ra te akakoromaki uaorai. Te kapiti maira te reira e kia akarongo meitaki eaa ta tetai tangata e tuatua maira, kare e manako atu ana e akapeea i te pau atu anga me kore akapeea i te akatikatika anga i te manamanata. Na te akarongo meitaki anga, te akara tika anga kia ratou, ma te mata katakata e e mea tau ia i te rave anga i te reira, te akaari ra tatou e te inangaro ra tatou ia ratou.

I roto i te putuputuanga Kerititiano, e maata te au atianga i te akamaroiroi atu i te au taeake irinaki. Ei akatauanga, me aere tatou ki te au uipaanga i te Are Uipaanga Patireia, e akara aere tatou kia aravei atu i te aronga te taitaia ra no te au manamanata o te oraanga kopapa. Ko tei anoanoia i tetai au taime kia oronga atu i te akamaroiroi anga kia ratou na te au tuatua akamaroiroi anga i nga mea miniti i mua ake me kore i muri ake i te uipaanga. Penei ka rauka katoa ia tatou i te manako atu i te aronga kare e tae mai ana ki te Apii Puka a te Putuputuanga ta tatou e aere ra. Penei ka rauka ia tatou i te ringi atu e te akakite atu kia ratou e te manakonako atura tatou ia ratou me kore kia oronga atu i te tauturu.​—Philipi 2:4.

E aka apainga teiaa ta te aronga pakari Kerititiano e apai ra no te apainga i roto i te putuputuanga. E maata atu te ka rauka ia tatou i te rave i te tauturu anga i te akamama mai i ta ratou apainga na te taokotai anga e na te rave akaaka anga i tetai tukuanga angaanga tei orongaia mai kia tatou. Te raurau maira te Tuatua a te Atua ia tatou e: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebera 13:17) Na te akaari anga i tetai tu puareinga ua, ka rauka ia tatou i te akaoraora i te aronga e “arataki meitaki ra.”​—1 Timoteo 5:17.

Kia Maata te Tuatua Tau e te Au Angaanga Meitaki

Kua tupu mai te au au akaoraora anga mei roto mai i te au topatapata vai rikiriki e tauatini ua atu tei tae maru ua mai, kare i kiteaia e noea mai. Pera katoa, te oronga anga i te akaoraora anga ki tetai ke kare i tupu ua mai e no tetai angaanga meitaki okotai ua mari ra na te akaari putuputu anga tatou i te au tu mei to Karaiti rai i te au taime ravarai.

“Ei kapiti anga aroa mou to kotou ia kotou uaorai,” i tata mai ei te apotetoro ko Paulo. “I te aroa taeake ra; i te akangateitei anga tetai ki tetai.” (Roma 12:10) E akono tatou i ta Paulo akoanga. Na roto i ta tatou tuatua e te au angaanga, kia riro mai tikai tatou ei akaoraora anga ki tetai ke.

[Au Tutu i te kapi 16]

Te au i runga i te Maunga Heremona​—e tumu akaoraora anga no te tamauu anga i te rakau rikiriki

[Tutu i te kapi 17]

E akaoraora anga tetai tangata akarongo ma te tu tangi ki tetai ke