Pataluboon an mga Kualidad na Makakatabang sa Saindo sa Paggibo nin mga Disipulo
Pataluboon an mga Kualidad na Makakatabang sa Saindo sa Paggibo nin mga Disipulo
“Paduman kamo asin gumibo kamo nin mga disipulo sa mga tawo kan gabos na nasyon.”—MATEO 28:19.
1. Anong mga abilidad asin saboot an kinaipuhan kan nagkapirang lingkod nin Dios kan nakaagi?
KUN beses, an mga lingkod ni Jehova kaipuhan na pataluboon an mga abilidad asin saboot na makakatabang sa sainda sa paggibo kan saiyang kabotan. Halimbawa, huli sa pagboot nin Dios, binayaan ni Abraham asin Sara an asensadong siudad nin Ur asin pag-abot nin panahon kinaipuhan ninda an mga kualidad asin abilidad na kahagadan sa mga nag-eerok sa tolda. (Hebreo 11:8, 9, 15) An pangengenot sa mga Israelita sa paglaog sa Dagang Panuga nangaipo na si Josue may kosog nin boot, pagsarig ki Jehova, asin kaaraman manongod sa saiyang Ley. (Josue 1:7-9) Asin an ano man na abilidad na tibaad yaon na ki Bezalel asin Oholiab siertong napaoswag o orog pang napatalubo kan espiritu nin Dios tanganing an mga lalaking idto mapangganang makikabtang patin magdirehir sa pagtogdok kan tabernakulo saka konektadong gibohon.—Exodo 31:1-11.
2. Anong mga hapot an pag-oolayan niato may koneksion sa paggibo nin disipulo?
2 Pakalihis nin mga siglo, itinao ni Jesu-Cristo sa saiyang mga parasunod an sugong ini: “Paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Nungka pang tinawan an mga tawo nin pribilehio na gibohon an arog kaini. Anong mga kualidad an kaipuhan sa paggibo nin disipulo? Paano niato mapapatalubo an siring na mga kualidad?
Magpaheling nin Hararom na Pagkamoot sa Dios
3. Anong oportunidad an itinatao sa sato kan pagboot na gumibo nin mga disipulo?
3 An pakikipag-olay sa mga tawo asin paghihingoang kombensiron sinda na sumamba sa tunay na Dios nagkakaipo na magkaigwa kita nin hararom na pagkamoot ki Jehova. Mapapatunayan kan mga Israelita an saindang pagkamoot sa Dios paagi sa bilog na pusong pagkuyog sa saiyang mga togon, pagdolot nin mga atang na inaako, asin pag-omaw sa saiya paagi sa awit. (Deuteronomio 10:12, 13; 30:19, 20; Salmo 21:13; 96:1, 2; 138:5) Bilang mga paragibo nin disipulo, kinukuyog man niato an mga ley nin Dios, alagad ipinapahayag man niato an satong pagkamoot ki Jehova paagi sa pagsabi sa iba manongod sa saiya asin sa saiyang mga katuyohan. Kaipuhan na magtaram kita na may marigon na pagtubod, na pinipili an tamang mga tataramon tanganing ipahayag an satong odok sa pusong mga saboot manongod sa satong paglaom na tao nin Dios.—1 Tesalonica 1:5; 1 Pedro 3:15.
4. Taano ta ikinaogma ni Jesus an pagtotokdo sa mga tawo manongod ki Jehova?
4 Huling si Jesus may hararom na pagkamoot ki Jehova, nagkaigwa sia nin dakulang kaogmahan na ipakipag-olay an manongod sa mga katuyohan nin Dios, sa Kahadean, asin sa tunay na pagsamba. (Lucas 8:1; Juan 4:23, 24, 31) Sa katunayan, si Jesus nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:34) Minaaplikar ki Jesus an mga tataramon na ini kan salmista: “An paggibo kan boot mo, O Dios ko, iyo an ikinakaogma kong marhay, asin an saimong ley nasa kairaroman kan sakong nasa laog na mga kabtang. Isinabi ko an maogmang bareta nin katanosan sa dakulang kongregasyon. Uya! Dai ko pinupugolan an sakong mga ngabil. O Jehova, ika mismo nakakaaram na gayo kaiyan.”—Salmo 40:8, 9; Hebreo 10:7-10.
5, 6. Anong pangenot na kualidad an kaipuhan kan mga paragibo nin disipulo?
5 Huling minomotibar nin pagkamoot sa Dios, an mga bagohan na bago pa sanang makanood kan katotoohan sa Biblia kun beses nagtataram manongod ki Jehova asin sa Kahadean na may marigon na pagtubod kaya epektibo nanggad sinda sa pagkombensir sa iba na magsiyasat sa Kasuratan. (Juan 1:41) An pagkamoot sa Dios iyo an pangenot na dahelan na nagmomotibar sa sato na makikabtang sa paggibo nin disipulo. Kun siring, papagdanayon niatong buhay an pagkamoot na iyan paagi sa regular na pagbasa asin paghorophorop sa saiyang Tataramon.—1 Timoteo 4:6, 15; Kapahayagan 2:4.
6 Daing duda na an pagkamoot ki Jehova nakatabang ki Jesu-Cristo na magin maigot na paratokdo. Alagad bako sanang iyan an dahelan kan pagigin epektibo nia bilang parabalangibog kan Kahadean. Kun siring, ano an saro pang kualidad na nagpangyari ki Jesus na magin mapangganang paragibo nin disipulo?
Magpaheling nin Mamomoton na Pagmakolog sa mga Tawo
7, 8. Paano minansay ni Jesus an mga tawo?
7 Si Jesus may pagmakolog sa mga tawo asin nagpaheling nin makosog na interes sa sainda. Dawa durante kan saiyang buhay bago sia nagin tawo bilang “pangenot na trabahador” nin Dios, ikinaogma nia an mga bagay na may koneksion sa katawohan. (Talinhaga 8:30, 31) Bilang tawo digdi sa daga, si Jesus may pagmalasakit sa mga tawo, na pinapaginhawa an mga minadolok sa saiya. (Mateo 11:28-30) Ipinabanaag ni Jesus an mismong pagkamoot asin pagmalasakit ni Jehova, saka nakaakit ini sa mga tawo na sumamba sa iyo sanang tunay na Dios. An gabos na klase nin tawo naghinanyog ki Jesus huling nagpaheling sia nin mamomoton na pagmakolog sa sainda asin sa saindang kamugtakan.—Lucas 7:36-50; 18:15-17; 19:1-10.
8 Kan an sarong lalaki maghapot kun ano an kaipuhan niang gibohon tanganing magmana nin buhay na daing katapusan, “si Jesus nagheling sa saiya asin nakamate nin pagkamoot para sa saiya.” (Marcos 10:17-21) Mapadapit sa nagkapirang indibiduwal na tinokdoan ni Jesus sa Betania, mababasa niato: “Namotan ni Jesus si Marta asin an saiyang tugang na babae patin si Lazaro.” (Juan 11:1, 5) Dakula nanggad an pagmakolog ni Jesus sa mga tawo kaya isinakripisyo nia nguna an kaipuhan niang pahingalo tanganing tokdoan sinda. (Marcos 6:30-34) An siring na hararom asin mamomoton na pagmakolog para sa mga kapwa tawo an nagpangyari na si Jesus nagin mas epektibo kisa sa siisay pa man sa paggiya sa mga indibiduwal pasiring sa tunay na pagsamba.
9. Ano an saboot ni Pablo bilang paragibo nin disipulo?
9 Odok man an pagmakolog ni apostol Pablo sa mga tawo na hinulitan nia. Halimbawa, sinabihan nia an mga nagin Kristiano sa Tesalonica: “Huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta namotan mi kamong marhay.” Bilang resulta kan mamomoton na mga paghihingoa ni Pablo, an nagkapira sa Tesalonica ‘nagbaya sa saindang mga idolo tanganing magpaoripon sa sarong nabubuhay na Dios.’ (1 Tesalonica 1:9; 2:8) Kun igwa kita nin tunay na pagmakolog sa mga tawo, arog kan ipinaheling ni Jesus asin Pablo, puede man niatong maeksperyensiahan an kagayagayahan na maheling an maogmang bareta na nakakataros sa puso kan mga “may tamang tendensia sa buhay na daing katapusan.”—Gibo 13:48.
Magpaheling nin Mapagsakripisyong Espiritu
10, 11. Taano ta kaipuhan an mapagsakripisyong espiritu kun nagmamaigot kitang gumibo nin mga disipulo?
10 An epektibong mga paragibo nin disipulo igwa nin mapagsakripisyong espiritu. Siertong dai ninda ibinibilang na pinakaimportante an pagkaigwa nin kayamanan. Sa katunayan, sinabihan ni Jesus an saiyang mga disipulo: “Magigin mapawot nanggad para sa mga may kuarta na lumaog sa kahadean nin Dios!” Nabigla an mga disipulo kan madangog ini, alagad sinabi pa ni Jesus: “Mga aki, masakit nanggad na lumaog sa kahadean nin Dios! Mas pasil para sa sarong kamelyo na lumusot sa labot nin sarong dagom kisa sa sarong mayaman na lumaog sa kahadean nin Dios.” (Marcos 10:23-25) Irinekomendar ni Jesus sa saiyang mga parasunod an simpleng pamumuhay tanganing makakonsentrar sinda sa paggibo nin mga disipulo. (Mateo 6:22-24, 33) Taano ta an mapagsakripisyong espiritu nakakatabang sa sato na gumibo nin mga disipulo?
11 Nangangaipo nin dakulang paghihingoa an pagtotokdo kan gabos na ipinagboot ni Jesus. An sarong paragibo nin disipulo sa pangkagabsan nagmamaigot na makapagkondukta nin pag-adal sa Biblia sa sarong interesadong tawo kada semana. Tanganing madagdagan an saindang oportunidad na makanompong nin sinserong mga tawo, may mga parabalangibog kan Kahadean na nagtatrabaho nin por ora na sana imbes na bilog na panahon. Rinibong Kristiano an nag-adal nin ibang lenguahe tanganing mahulitan an nagkapirang grupong etniko sa saindang lugar. An ibang paragibo nin disipulo naghale sa sadiri nindang lugar asin nagbalyo sa ibang lugar o nasyon tanganing mas lubos na makikabtang sa pag-ani. (Mateo 9:37, 38) An gabos na ini nangangaipo nin mapagsakripisyong espiritu. Alagad orog pa an kaipuhan tanganing magin epektibong paragibo nin disipulo.
Magin Mapasensia Alagad Dai Nagsasayang nin Panahon
12, 13. Taano ta mahalagang marhay an pasensia sa paggibo nin mga disipulo?
12 An pasensia saro pang kualidad na nakakatabang sa sato sa paggibo nin mga disipulo. An Kristianong mensahe niato nagkakaipo nin apretadong paghiro, alagad an paggibo nin mga disipulo parateng nagkakaipo nin darudakulang panahon asin pasensia. (1 Corinto 7:29) Si Jesus dai nawaran nin pasensia sa saiyang tugang sa ina na si Santiago. Minsan ngani minalataw na pamilyar na marhay si Santiago sa mga paghuhulit ni Jesus, sa laog nin sarong peryodo nin panahon may nakapugol sa saiya sa pagigin sarong disipulo. (Juan 7:5) Minsan siring, sa halipot na panahon sa pag-oltanan kan pagkagadan ni Jesus asin kan Pentecostes 33 C.E., minalataw na nagin disipulo si Santiago, huling isinusuherir kan Kasuratan na nakiiba sia sa saiyang ina, sa saiyang mga tugang, asin sa mga apostol para sa pagpamibi. (Gibo 1:13, 14) Nagin marahay an espirituwal na pag-oswag ni Santiago, na kan huri nagkaigwa nin magabat na mga paninimbagan sa Kristianong kongregasyon.—Gibo 15:13; 1 Corinto 15:7.
13 Siring sa mga paraoma, pinapatalubo kan mga Kristiano an mga bagay na sa parate maluway an pagtalubo—an pakasabot sa Tataramon nin Dios, pagkamoot ki Jehova, asin arog-Cristong kaisipan. Nangangaipo ini nin pasensia. Si Santiago nagsurat: “Magin mapasensia kamo, mga tugang, sagkod sa presensia kan Kagurangnan. Uya! An paraoma padagos na naghahalat kan mahalagang marhay na bunga kan daga, na nagpapasensia dian sagkod na maako nia an amay na oran asin an huring oran. Kamo man magin mapasensia; parigona an saindong puso, huli ta an presensia kan Kagurangnan harani na.” (Santiago 5:7, 8) Sinasadol ni Santiago an mga kapagtubod nia na ‘magin mapasensia sagkod sa presensia kan Kagurangnan.’ Kun may dai nasasabotan an mga disipulo, mapasensiang ipinapaliwanag o iniilustrar ni Jesus an mga bagay-bagay. (Mateo 13:10-23; Lucas 19:11; 21:7; Gibo 1:6-8) Ngonyan na yaon an presensia kan Kagurangnan, may parehong pangangaipo para sa pasensia mantang naghihingoa kita na gumibo nin mga disipulo. An nagigin mga parasunod ni Jesus sa satong panahon nangangaipo nin mapasensiang pagtotokdo.—Juan 14:9.
14. Dawa ngani kita mapasensia, paano niato may kadonongan na magagamit an satong panahon bilang mga paragibo nin disipulo?
14 Minsan ngani kita mapasensia, an tataramon dai nagbubunga sa kadaklan na tawo na napoponan niatong adalan sa Biblia. (Mateo 13:18-23) Kun siring, pagkatapos na gumibo nin rasonableng mga paghihingoa tanganing tabangan sinda, may kadonongan niatong ipinopondo na an pagtotokdo sa siring na mga indibiduwal asin hinihingoa niatong hanapon an mga mas posibleng marhay na magpahalaga sa katotoohan sa Biblia. (Eclesiastes 3:1, 6) Siempre, dawa an mga tawong may pag-apresyar tibaad mangaipo nin dugang na tabang tanganing bagohon an saindang mga pagmansay, saboot, asin prioridad sa buhay. Kaya nagigin mapasensia kita, kun paanong si Jesus nagin mapasensia sa mga disipulo na nasakitan sa pagpatalubo nin tamang saboot.—Marcos 9:33-37; 10:35-45.
Pataluboon an Abilidad sa Pagtotokdo
15, 16. Taano ta importante an pagigin simple asin marahay na pag-andam kun naggigibo kita nin mga disipulo?
15 An pagkamoot sa Dios, pagmakolog sa mga tawo, mapagsakripisyong espiritu, asin pasensia mahahalagang bagay sa mapangganang paggibo nin disipulo. Kaipuhan na pataluboon man an mga abilidad sa pagtotokdo, huling nagpapangyari iyan sa sato na ikapaliwanag an mga bagay sa malinaw asin simpleng paagi. Halimbawa, an dakol na sinabi kan Dakulang Paratokdo, si Jesu-Cristo, nangorognang mapuersa huli sa pagigin simple kaiyan. Posibleng marhay na nagigirumdoman nindo an mga tataramon ni Jesus na siring kaini: “Magtipon kamo nin mga kayamanan sa langit.” “Dai nindo ipagtao an banal sa mga ayam.” “An kadonongan napapatunayan na matanos paagi sa mga gibo kaiyan.” “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Mateo 6:20; 7:6; 11:19; 22:21) Siempre, bako sanang arog kaiyan kaharalipot na tataramon an sinabi ni Jesus. Sia nagtokdo nin malinaw asin ipinaliwanag an mga bagay-bagay kun iyan angay na gibohon. Paano nindo maaarog an estilo ni Jesus sa pagtotokdo?
16 An maingat na pag-andam an pinakaimportante sa pagigin simple asin pagigin malinaw. An bakong andam na parahayag may tendensia na magparataram nin sobra. Tibaad haros matahoban na nia an pangenot na mga punto huli sa pagparataram nin sobra, na sinasabi an gabos na aram nia manongod sa pinag-oolayan na tema. Sa kabaliktaran, an andam na marhay na parahayag nag-iisip manongod sa tawo na saiyang tinotokdoan, naghohorophorop manongod sa topiko, asin malinaw na ipinepresentar kun ano sana an kaipuhan. (Talinhaga 15:28; 1 Corinto 2:1, 2) Kinokonsiderar nia kun gurano na kadakol an aram kan inaadalan sa Biblia asin kun anong mga punto an maninigo niang idoon sa panahon kan pag-adal. Tibaad dakol na interesanteng detalye an aram kan parahayag manongod sa pinag-oolayan, alagad an pagigin malinaw naggigikan sa dai pagsambit kan dai kaipuhan na impormasyon.
17. Paano niato matatabangan an mga tawo na mangatanosan basado sa Kasuratan?
17 Tinabangan man ni Jesus an mga tawo na mangatanosan, imbes na tawan sana sinda nin mga impormasyon. Halimbawa, sa sarong pangyayari, sia naghapot: “Ano sa paghona mo, Simon? Kiisay nag-aako an mga hade kan daga nin mga impuesto o buhis sa kada payo? Sa saindang mga aki o sa mga dayo?” (Mateo 17:25) Puedeng ikinakaogma niatong marhay an pagpaliwanag manongod sa Biblia kaya kaipuhan niatong pugolan an satong sadiri tanganing togotan an inaadalan sa Biblia na ipahayag an nasa boot nia o ipaliwanag an manongod sa pinag-oolayan sa panahon nin pag-adal sa Biblia. Natural sana na dai niato maninigong pagparahapoton an mga tawo. Imbes, paagi sa pagkamataktika, marahay na mga ilustrasyon, asin pinag-isipan na mga hapot, matatabangan niato sinda na masabotan an mga punto sa Kasuratan na iprinesentar sa satong basado sa Biblia na mga publikasyon.
18. Ano an kalabot sa pagpatalubo nin “abilidad sa pagtotokdo”?
18 An Kasuratan nagtataram manongod sa “abilidad sa pagtotokdo.” (2 Timoteo 4:2; Tito 1:9) An kalabot sa siring na abilidad sa pagtotokdo bako sanang pagtabang sa saro na magtuom nin mga impormasyon. Maninigo niatong pagmaigotan na tabangan an inaadalan sa Biblia na masabotan an pagkakalaen kan katotoohan asin kaputikan, kan karahayan asin karatan, kan kadonongan asin kalolongan. (Mateo 6:5, 6) Mantang ginigibo niato ini asin hinihingoa na pataluboon sa puso nin saro an pagkamoot ki Jehova, puedeng masabotan nia kun taano ta maninigo niang kuyogon an Dios.
Maigot na Makikabtang sa Paggibo nin Disipulo
19. Paano an gabos na Kristiano nagkokontribwir sa paggibo nin mga disipulo?
19 An Kristianong kongregasyon sarong organisasyon na paragibo nin disipulo. Kun nagigin disipulo an sarong bagohan, bako sanang an Saksi ni Jehova na nakanompong sa saiya asin nagtabang sa saiya na manodan an itinotokdo kan Biblia an may dahelan na maggayagaya. Kun an mga tawo nag-oorganisar nin sarong grupo na mahanap sa sarong nawawarang aki, saro sanang miembro kan grupong iyan an tibaad aktuwal na makanompong sa aki. Alagad kun an aki ikabalik na sa saiyang mga magurang, an gabos na imbuelto sa paghanap naggagayagaya. (Lucas 15:6, 7) Kaagid kaiyan, an paggibo nin disipulo pagtitinarabangan kan bilog na kongregasyon. An gabos na Kristiano nakikikabtang sa paghanap sa mga puedeng magin mga disipulo ni Jesus. Asin kun an sarong bagohan nagpopoon nang mag-atender sa mga pagtiripon sa Kingdom Hall, an gabos na Kristiano na presente nakakakontribwir sa pagpakosog sa saiyang pagpahalaga para sa tunay na pagsamba. (1 Corinto 14:24, 25) Sa siring, an gabos na Kristiano makakapaggayagaya huli ta ginatos na ribo an nagigin bagong disipulo kada taon.
20. Ano an maninigo nindong gibohon kun gusto nindong itokdo sa iba an katotoohan sa Biblia?
20 Dakol na maimbod na Kristiano an maoogmang marhay na tokdoan an saro manongod ki Jehova asin sa tunay na pagsamba. Pero, sa ibong kan gabos nindang paghihingoa, tibaad dai ninda nagigibo iyan. Kun arog kaiyan an saindong kamugtakan, padagos na pakosogon an saindong pagkamoot ki Jehova, magin mapagmakolog sa mga tawo, magin mapagsakripisyo, magin mapasensia, asin maghingoang umoswag sa saindong mga abilidad sa pagtotokdo. Orog sa gabos, ipamibi an saindong kamawotan na itokdo an katotoohan. (Eclesiastes 11:1) Magkaigwa nin karangahan sa pakaaram na an gabos na ginigibo nindo sa paglilingkod ki Jehova nakakakontribwir sa paggibo nin disipulo na nagpapamuraway sa Dios.
Ikakapaliwanag daw Nindo?
• Taano ta nakakabalo sa satong pagkamoot sa Dios an paggibo nin disipulo?
• Anong mga kualidad an kaipuhan kan mga paragibo nin disipulo?
• Ano an kalabot sa “abilidad sa pagtotokdo”?
[Mga Hapot Para sa Pag-adal]
[Ritrato sa pahina 21]
Paagi sa paggibo nin mga disipulo, ipinapaheling kan mga Kristiano an saindang hararom na pagkamoot sa Dios
[Ritrato sa pahina 23]
Taano ta dapat na magin interesado sa iba an mga paragibo nin disipulo?
[Ritrato sa pahina 24]
Ano an nagkapira sa mga kualidad na kaipuhan kan mga paragibo nin disipulo?
[Ritrato sa pahina 25]
An gabos na Kristiano naoogma nanggad na maheling an marahay na mga resulta sa paggibo nin disipulo