Muleba ne Mibele Iingamwafwa Ukulenga Abantu Ukuba Abasambi
Muleba ne Mibele Iingamwafwa Ukulenga Abantu Ukuba Abasambi
“Kabiyeni, kalengeni aba nko shonse ukuba abasambi.”—MATEO 28:19.
1. Mibele nshi iyo ababomfi ba kwa Lesa aba ku kale balekabila ukukwata?
LIMO limo ababomfi ba kwa Yehova balakabila ukuba ne mibele iingabafwa ukulacita ukufwaya kwakwe. Ica kumwenako fye, ilyo Lesa aebele Abrahamu na Sara ukufuma mu musumba uukankaala uwa Uri, balyumfwilile kabili mu kuya kwa nshita balingile ukuba ne mibele iyali no kubafwa ukulaikala mu matenti. (AbaHebere 11:8, 9, 15) Pa kuti Yoshua atungulule abena Israele ukuya mu Calo ca Bulayo, alekabila ukwishiba Amafunde ya kwa Yehova, ukumucetekela, kabili alingile ukuba uwashipa. (Yoshua 1:7-9) Na kabili umupashi wa kwa Lesa walengele Besalele na Oholiabu ukuba abacenjela ukucila ifyo bali kale pa kuti bengabomba bwino no kwangalila umulimo wa kupanga ihema na fyonse ifyo bali no kulabomfya pe hema.—Ukufuma 31:1-11.
2. Mepusho nshi twalalandapo ayakumine umulimo wa kulenga abantu ukuba abasambi?
2 Ilyo papitile imyaka iingi nga nshi, Yesu Kristu apeele abasambi bakwe umulimo, abebele ukuti: “Kabiyeni, kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.” (Mateo 28:19, 20) Abantu tabatalile ababeba ukubomba umulimo wakula ifi. Mibele nshi tulingile ukukwata pa kuti tulebomba bwino umulimo wa kulenga abantu ukuba abasambi? Bushe kuti twacita shani pa kuba ne yo mibele?
Muletemwa Sana Lesa
3. Lishuko nshi tukwata ilyo tulebomba umulimo wa kulenga abantu ukuba abasambi?
3 Umwina Kristu afwile ukutemwa sana Yehova pa kuti aleshimikila no kunashanasha abantu ukuti balepepa Lesa wa cine. Abena Israele balelanga ukuti balitemenwe Lesa lintu baleumfwila amafunde yakwe ne mitima yabo yonse, lintu baletuula amalambo ayasuma, na lintu balemulumbanya mu sha malumbo. (Amalango 10:12, 13; 30:19, 20; Amalumbo 21:13; 96:1, 2; 138:5) Apo twalikwata umulimo wa kulenga abantu ukuba abasambi, na ifwe bene tulomfwila amafunde ya kwa Lesa, lelo na kabili tulalanga ukutila twalitemwa sana Yehova lintu tushimikilako abantu bambi pali ena na pa bufwayo bwakwe. Kanshi lintu tulelanda tufwile ukuicetekela ica kuti nabo tulelandako bamona ukuti ili subilo lyalicindama nga nshi kuli ifwe.—1 Abena Tesalonika 1:5; 1 Petro 3:15.
4. Mulandu nshi Yesu aleumfwila bwino ukusambilisha abantu pali Yehova?
4 Apo Yesu alitemenwe Yehova nga nshi, aleumfwa bwino sana ukulaebako bambi pa Bufumu bwa kwa Lesa no kufwaya kwakwe na pa kupepa kwa cine. (Luka 8:1; Yohane 4:23, 24, 31) Na kuba, Yesu atile: “Ica kulya candi kucito kufwaya kwa wantumine no kupwisho mulimo wakwe.” (Yohane 4:34) Kemba wa malumbo asosele amashiwi yalanda pali Yesu, atile: “Nabekelwo kucite co mutemenwe, mwe Lesa wandi; kabili amalango yenu yali mu mutima wandi. Nimbile mbila nsuma ya bulungami mu lukuta lukalamba; moneni, imilomo yandi nshaikaanya, mwe Yehova, imwe mwaliishiba.”—Amalumbo 40:8, 9; AbaHebere 10:7-10.
5, 6. Mibele nshi iyacindama sana iyo ababomba umulimo wa kulenga abantu ukuba abasambi bafwile ukukwata?
5 Ukutemwa Lesa kulalenga na batampile nomba line ukusambilila icine ca mu Baibolo ukulashimikilako bambi pali Yehova na pa Bufumu bwakwe kabili balaicetekela pa kulanda ica kuti balanashanasha bambi ukutendeka ukulasambilila Baibolo. (Yohane 1:41) Ukutemwa Lesa e mibele iyacindama sana iilenga ukuti tulebomba umulimo wa kulenga abantu ukuba abasambi. Nomba pa kuti tutwalilile ukuba no kutemwa kwa musango yu, tufwile ukulabelenga Baibolo lyonse no kulatontonkanya pa fyo tulebelenga.—1 Timote 4:6, 15; Ukusokolola 2:4.
6 Ukutemwa Yehova e kwalengele Yesu Kristu ukuba uwacincila pa kusambilisha abantu. Lelo kwali na fimbi ifyalengele ukuti aleshimikila bwino imbila nsuma ya Bufumu. Mibele nshi imbi iyalengele Yesu ukulapanga sana abasambi?
Muletemwa Abantu Bambi
7, 8. Bushe Yesu alemona shani abantu?
7 Yesu alitemenwe abantu kabili alebasakamana. Na lintu ali “cibinda wa mulimo,” uwa kwa Lesa ku muulu, ilyo ashilaisaba umuntunse, Yesu alitemenwe sana ifintu ifyakumine abantunse. (Amapinda 8:30, 31) Ilyo Yesu aishile pano calo, alelangulukilako abantu kabili abaleya kuli ena alebakoselesha. (Mateo 11:28-30) Yesu alitemenwe abantu kabili alebalangulukilako kwati fye ni filya fine Yehova aba, ne ci calengele abantu ukutendeka ukulapepa Lesa wa cine eka. Abantu abalekanalekana balekutika kuli Yesu pantu alebasakamana kabili alebika amano ku fyo balepitamo.—Luka 7:36-50; 18:15-17; 19:1-10.
8 Lintu umuntu umo aipwishe ifyo engacita pa kukwata umweo wa muyayaya, “Yesu alimuloleshe, kabili alimutemenwe.” (Marko 10:17-21) Ilyo Baibolo ilanda pa bantu bamo aba mu Betani abo Yesu alesambilisha, itila: “Yesu atemenwe Marita na nkashi mbiye na Lasaro.” (Yohane 11:1, 5) Yesu alesakamana sana abantu ica kuti inshita imo ilyo alekabila ukutuusha, tatushishe lelo atampile ukubasambilisha. (Marko 6:30-34) Ukusakamana abantu no kubika amano ku fyo balepitamo kwalengele Yesu ukwafwa abantu abengi nga nshi ukutampa ukupepa Lesa wa cine.
9. Mibele nshi Paulo akwete ilyo alebomba umulimo wa kulenga abantu ukuba abasambi?
9 Umutumwa Paulo na o alitemenwe sana abantu abo aleshimikilako imbila nsuma. Ica kumwenako fye, aebele abaishileba Abena Kristu mu Tesalonika ukuti: “Pa kuba ne citemwishi kuli imwe, twabekelwe ukumupeelapo, te mbila nsuma ya kwa Lesa epela, lelo ne myeo yesu iine, pa kuti mwaishileba abatemwikwa kuli ifwe.” Ukutemwa abantu kwalengele Paulo ukwafwa bamo mu Tesalonika ukuleka ukupepa utulubi no ‘kupilibukila kuli Lesa.’ (1 Abena Tesalonika 1:9; 2:8) Nga tuletemwa abantu nge fyo Yesu na Paulo balecita, na ifwe bene tukalaba ne nsansa ukumona imbila nsuma yafika pa mitima ya bantu ‘abalemenena ku bumi bwa muyayaya.’—Imilimo 13:48.
Muleipeelesha Ukubomba Umulimo
10, 11. Mulandu nshi tulingile ukuipeelesha ilyo tulebomba umulimo wa kulenga abantu ukuba abasambi?
10 Abena Kristu abaipeelesha ukubomba umulimo balalenga abantu abengi ukuba abasambi. Tabatontonkanya ukuti ukukwata ifyuma e kwacindama sana. Na kuba, Yesu aebele abasambi bakwe ukuti: “Ifyo cikabe cayafya ku ba ndalama ukwingila mu bufumu bwa kwa Lesa!” Abasambi balipapile ilyo baumfwile aya mashiwi, lelo Yesu asosele no kuti: “Mwe bana, ifyo cayafya ukwingila mu bufumu bwa kwa Lesa! Cayangukapo ku ngamali ukupula mu linso lya nshindano ukucila uwa fyuma ukwingila mu bufumu bwa kwa Lesa.” (Marko 10:23-25) Yesu akoseleshe abasambi bakwe ukuba ne mikalile iyayanguka pa kuti bengabika amano ku kubomba umulimo wa kulenga abantu ukuba abasambi. (Mateo 6:22-24, 33) Mulandu nshi ukuipeelesha kutwafwila ukulalenga abantu ukuba abasambi?
11 Umwina Kristu afwile ukubombesha pa kusambilisha abantu ukubaka fyonse ifyo Yesu atweba. Umwina Kristu uufwaya ukulalenga abantu ukuba abasambi alesha ukulatungulula isambililo cila mulungu ku muntu uwatemwa ukusambilila. Abena Kristu bamo balileka ukubomba incito ya kuwisha akasuba, lelo babomba fye amaawala ayanono pa kuti bakwate inshita iikalamba iya kulenga abantu ukuba abasambi. Abena Kristu abengi balisambilila ululimi lumbi pa kuti baleshimikila ku bantu bafuma ku fyalo fimbi. Bambi balikuukila ku ncende imbi nelyo ku calo cimbi pantu bafwaya ukulabombesha mu mulimo wa kulobolola. (Mateo 9:37, 38) Icilenga bacite fyonse ifi ni co baliipeelesha. Lelo kwaliba imibele na imbi iyo tulingile ukukwata pa kuti tulelenga abantu abengi ukuba abasambi.
Muleba Abatekanya Lelo Mwilaonaula Inshita
12, 13. Mulandu nshi ukutekanya kwacindamina ilyo tulebomba umulimo wa kulenga abantu ukuba abasambi?
12 Ukutekanya nako kulatwafwa pa kulenga abantu ukuba abasambi. Inshita ya kushimikilamo imbila nsuma naicepa, lelo pa kulenga umo ukuba umusambi tulakabila ukutekanya e lyo no kupoosapo inshita iikalamba. (1 Abena Korinti 7:29) Yesu alitekanishishe ndume nankwe Yakobo. Nangu cingati Yakobo alishibe bwino sana umulimo Yesu alebomba, kwali fimo ifyalemucilikila ukuba umusambi. (Yohane 7:5) Lelo ilyo Kristu afwile kabili ilyo umutebeto wa Pentekoste mu 33 C.E. taulafika, nalimo muli iyi yine inshita iinono e mo Yakobo aishileba umusambi, pantu Amalembo yatila alilongene mu kupepa capamo na banyina, ba ndume nankwe, na batumwa. (Imilimo 1:13, 14) Yakobo alilundulwike kabili alikwete imilimo iingi mu cilonganino ca Bena Kristu.—Imilimo 15:13; 1 Abena Korinti 15:7.
13 Umulimo wa Bena Kristu walipalana no wa balimi pantu palapita inshita pa kuti umuntu eshibe Icebo ca kwa Lesa, atemwe Yehova, no kuba no mutima ngo wa kwa Kristu. Kanshi tukabila ukutekanya. Yakobo alembele ukuti: “Tekanyeni, mwe bamunyinane, ukufika ku kubapo kwa kwa Shikulu. Moneni! Umulimi alalolela ifisabo ifikankaala ifya pano isonde, alafitekanisha mpaka akapokelele imfula ya kubangilila ne ya kupelekesha. Na imwe tekanyeni; ikasheni imitima yenu, pantu ukubapo kwa kwa Shikulu nakupalama.” (Yakobo 5:7, 8) Yakobo alekonkomesha Abena Kristu banankwe ‘ukutekanya ukufika ku kubapo kwa kwa Shikulu.’ Abasambi nga tabomfwikishe fimo, Yesu alebatekanishisha, alelondolola nelyo ukulangilila pa kuti bomfwikishe. (Mateo 13:10-23; Luka 19:11; 21:7; Imilimo 1:6-8) Na pali ino ine nshita ilyo Shikulu aleteka tufwile ukuba abatekanya lintu tulebomba umulimo wa kulenga abantu ukuba abasambi. Ababa abasambi ba kwa Yesu muno nshiku nabo bakabila ukubasambilisha mu mutima nteka.—Yohane 14:9.
14. Nangu cingati tufwile ukuba abatekanya pa kulenga abantu ukuba abasambi, kuti twabomfya shani bwino inshita yesu?
14 Nangu cingati tulateka umutima ilyo tulelenga abantu ukuba abasambi, limo Icebo ca kwa Lesa tacilimba imishila mu mitima ya bantu abengi abo tusambilila nabo Baibolo. (Mateo 13:18-23) Nga ca kuti twaesha apapela amaka yesu ukwafwa umuntu nomba talelunduluka, kuti cawama ukuleka ukupoosa inshita pa muntu wa musango yo pa kuti twingafwayako bambi abengabika amano ku kucita ifyo balesambilila. (Lukala Milandu 3:1, 6) Lelo nangu fye bantu ababika amano ku kucita ifyo balesambilila nabo limo balakabila ukubafwa pa nshita iikalamba pa kuti balule imibele yabo, ifyo batontonkanya, ne fyo babikako amano mu mikalile yabo. Kanshi tufwile ukuba abatekanya nga filya fine Yesu atekanishishe abasambi pantu alishibe ukuti balekabila inshita iikalamba pa kuti babe abaicefya.—Marko 9:33-37; 10:35-45.
Muleba Abalamuka pa Kusambilisha
15, 16. Mulandu nshi cacindamina ukwangusha ifyebo no kupekanya bwino ilyo tulebomba umulimo wa kulenga abantu ukuba abasambi?
15 Imibele iyacindama iingatwafwa ukulenga abantu ukuba abasambi kutemwa Lesa, ukutemwa abantu, ukuipeelesha, no kuba abatekanya. Na kabili, tufwile no kuba abalamuka pa kusambilisha pantu e lyo tukalalondolola bwino icine no kwangusha ifyebo ifyakosa ukumfwa. Ica kumwenako fye, icalengele ukuti Yesu Kristu, Kasambilisha Mukalamba, alesambilisha bwino ni co aleyangusha ifyebo. Mufwile mulebukisha ifyebo fimo ifyo Yesu asosele pamo nga: “Itutileni ifyuma mu muulu.” “Mwipeela ica mushilo ku mbwa.” “Amano yalungamikilwa ku milimo ya yako.” “Peeleni ifya kwa Kaisare kuli Kaisare, ne fya kwa Lesa kuli Lesa.” (Mateo 6:20; 7:6; 11:19; 22:21) Kwena, Yesu taleyangusha fye ifyebo. Lelo, alesambilisha ifya kuti abantu baumfwa kabili alelondolola nga calinga. Bushe kuti mwapashanya shani imisambilishishe ya kwa Yesu?
16 Nga tulefwaya ukulalondolola bwino no kwangusha ifyebo tufwile ukulapekanya bwino. Kasabankanya uushipekanya bwino alafusha sana ifya kulanda ica kuti ne fishinka fyakaana ukumfwika. Alafwaya ukulanda fyonse ifyo aishiba pali ilyo lyashi pa nshita fye imo. Lelo, kasabankanya uupekanya bwino alatontonkanya pa musambi, aletetula pa fyo bakayasambililapo, kabili alalondolola bwino ifyebo ifyo umusambi alingile ukwishiba. (Amapinda 15:28; 1 Abena Korinti 2:1, 2) Alatontonkanya pa fyo umusambi aishiba kale na pa fishinka ifyo alingile ukukomailapo mwi sambililo. Kasabankanya kuti alishiba ifingi pa lyashi balesambililapo, lelo takalande fyonse iyo, akalanda fye ifilekabilwa pa kuti umusambi omfwe.
17. Bushe kuti twacita shani pa kwafwa abantu ukutontonkanya pa fyo Baibolo ilanda?
17 Yesu talelondolola ifishinka fyonse, lelo alelenga abantu ukulatontonkanya. Ica kumwenako fye, inshita imo aipwishe Petro ukuti: “Uletipo shani Simone? Ni kuli bani ishamfumu sha pano isonde shipoka umutuulo nelyo imisonko? Bushe ni ku bana babo nelyo ni kuli bambi bambi?” (Mateo 17:25) Limbi tulomfwa bwino ukulondolola ifyo Baibolo ilanda lelo tufwile ukuisalapula pa kuti tuleleka umusambi alelanda ifyo aletontonkanya nelyo ukulondolola mu mashiwi yakwe ifyo tulesambililapo. Te cisuma ukulaipusha sana abantu amepusho. Lelo pa kubafwa ukumfwa ifishinka fya mu Baibolo ifyaba mu mpapulo shesu, tufwile ukuba abacenjela, ukubomfya ifilangililo, ne fipusho ifingalenga balondolola icishinka Baibolo ilelandapo mu mashiwi yabo.
18. Bushe finshi tufwile ukucita pa kuba ‘abalamuka pa kusambilisha’?
18 Amalembo yalilanda pa “kulamuka kwa kusambilisha.” (2 Timote 4:2; Tito 1:9) Ukuba uwalamuka pa kusambilisha takupelela fye pa kusambilisha kwa kuti umusambi aleibukisha fye ifishinka, lelo kusanshamo ifingi. Tufwile ukwafwa umusambi ukwishiba ubupusano bwaba pa cine no bufi, pa cisuma ne cabipa, na pa mano no buwelewele. Nga tulecita ifi e lyo no kwesha ukwafwa umusambi ukutemwa Yehova, akeluka umulandu alingile ukulacitila ifyo Lesa alanda.
Muleba Abacincila mu Mulimo wa Kulenga Abantu Ukuba Abasambi
19. Bushe Abena Kristu bonse babombela shani pamo pa kulenga abantu ukuba abasambi?
19 Aba mu cilonganino ca Bena Kristu bonse balabomba umulimo wa kulenga abantu ukuba abasambi. Uusambilila Baibolo nga aba kasabankanya, abatishiwa no kubatishiwa, bonse mu cilonganino balasekelela te ulya fye uwamusangile no kumwafwa ukwishiba ifyo Baibolo isambilisha. Natulangilile: Tutile umwana naluba, e lyo baita abantu abengi ukuyabalemufwaya. Nalimo uwingamusanga muntu fye umo pali lilye bumba. Lelo umwana nga bamusanga no kumutwala ku bafyashi bakwe, bonse abo baitile ukuyabalemufwaya balasekelela. (Luka 15:6, 7) Ifi fine e fyo na ba mu cilonganino babombela pamo pa kulenga abantu ukuba abasambi. Abena Kristu bonse balabombako umulimo wa kufwaya abengaba abasambi ba kwa Yesu. Kabili uusambilila Baibolo nga atendeka ukulalongana, Abena Kristu bonse mu cilonganino balamwafwa ukucindamika ukupepa kwa cine. (1 Abena Korinti 14:24, 25) Kanshi Abena Kristu bonse balasekelela pantu abasambilila Baibolo abengi nga nshi balabatishiwa cila mwaka no kuba abasambi ba kwa Yesu.
20. Finshi mufwile ukucita nga mulefwaya ukulasambilisha bambi icine ca mu Baibolo?
20 Abena Kristu ba cishinka abengi kuti batemwa sana ukusambilisha umuntu pali Yehova na pa kupepa kwa cine. Lelo te mulandu ne fyo babombesha, nalimo tabalati bafwepo umuntu ukubatishiwa no kuba umusambi wa kwa Yesu. Nga e fyo caba na kuli imwe, twalilileni ukutemwa sana Yehova, ukutemwa abantu, ukuipeelesha, ukuba abatekanya, kabili mulewamyako imisambilishishe yenu. Ne cacindama sana ca kuti mulepepa kuli Lesa ukuti mulafwaisha ukwafwako bamo ukusambilila icine. (Lukala Milandu 11:1) Muleibukisha ukuti fyonse ifyo mucita ilyo mulebombela Yehova filatungilila umulimo uucindika Lesa uwa kulenga abantu ukuba abasambi.
Kuti Mwalondolola Shani?
• Mulandu nshi ifyo tubomba umulimo wa kulenga abantu ukuba abasambi filangila ifyo twatemwa Lesa?
• Mibele nshi iyo ababomba umulimo wa kulenga abantu ukuba abasambi balingile ukukwata?
• Finshi umuntu ‘uwalamuka pa kusambilisha’ acita?
[Amepusho]
[Icikope pe bula 21]
Abena Kristu balalanga ukuti balitemwa sana Lesa nga balebomba umulimo wa kulenga abantu ukuba abasambi
[Icikope pe bula 23]
Mulandu nshi ababomba umulimo wa kulenga abantu ukuba abasambi balingile ukutemenwa abantu bambi?
[Icikope pe bula 24]
Mibele nshi imo iyo ababomba umulimo wa kulenga abantu ukuba abasambi balingile ukukwata?
[Icikope pe bula 25]
Abena Kristu bonse balasekelela ukumona uwalesambilila Baibolo aba umusambi wa kwa Yesu