Ikala ne ngikadilu yakuambuluisha bua kuvuija bantu bayidi

‘Ndayi bienu, nuvuije ba bisamba bionso bayidi.’​—MATAYO 28:19.

1. Bamue bantu ba Nzambi ba kale bavua dijinga ne dimanya ne ngikadilu kayi?

BASADIDI ba Yehowa badi misangu mikuabu ne bua kuikala ne dimanya ne ngikadilu kampanda bua kukumbaja disua diende. Tshilejilu, Nzambi wakambila Abalahama ne Sala bua kumbuka mu tshimenga tshia Ula tshivua ne bubanji bua bungi. Nunku, bavua ne bua kuikala ne ngikadilu ne bukokeshi bivua bikengedibua bua kusombela mu nteta. (Ebelu 11:8, 9, 15) Yoshua uvua ne bua kuikala ne muoyo mukole, kueyemena Yehowa ne kumanya mikenji yende bua kulombola bena Isalele too ne mu buloba bulaya. (Yoshua 1:7-9) Dimanya divua nadi Besalele ne Oholiaba divua ne bua kuikala divule ku diambuluisha dia nyuma wa Nzambi bua bantu babidi aba bafike ku dienza midimu ya dibaka nteta wa kusambakena ne kuyilombola.​—Ekesode 31:1-11.

2. Netuandamune nkonko kayi idi itangila mudimu wa kuvuija bantu bayidi?

² Bidimu bia bungi panyima, Yezu Kristo wakapesha bayidi bende mudimu wamba ne: ‘Ndayi bienu, nuvuije ba bisamba bionso bayidi, nubayishe mua kuenza malu onso angakanuambila.’ (Matayo 28:19, 20) Ke musangu wa kumpala uvuabu bapesha bantu diakalenge dia kuenza mudimu munene wa nunku. Bua kuvuija bantu bayidi, tudi ne bua kuikala ne ngikadilu kayi? Mmushindu kayi utudi mua kuyipeta?

Tunange Nzambi bikole

3. Dîyi dia kuvuija bantu bayidi didi ditupesha mpunga wa kuenza tshinyi?

³ Bua kuyukila ne bantu ne kubafikisha ku ditendelela Nzambi mulelela Yehowa, tudi ne bua kunanga Nzambi eu bikole. Bena Isalele bavua baleja muvuabu banange Nzambi pavuabu batumikila mikenji yende, bafila milambu mimpe ne bamutumbisha ne misambu. (Dutelonome 10:12, 13; 30:19, 20; Musambu 21:13; 96:1, 2; 138:5) Tuetu badi ne mudimu wa kuvuija bantu bayidi tudi petu tutumikila mikenji ya Nzambi. Kadi tudi kabidi tuleja mutudi banange Nzambi patudi tuambila bakuabu malu ende ne disua diende. Tudi ne bua  kuakula ne dishindika dionso, kusungula miaku idi ileja mutudi tudiumvua bua ditekemena didi Nzambi mutupeshe.​—1 Tesalonike 1:5; 1 Petelo 3:15.

4. Bua tshinyi Yezu uvua usanka pavuaye ulongesha bantu malu a Yehowa?

⁴ Bu muvua Yezu munange Yehowa bikole, uvua ne disanka dia bungi pavuaye wakula bua malu adi Nzambi mulongolole, bua Bukalenge buende ne bua ntendelelu mulelela. (Luka 8:1; Yone 4:23, 24, 31) Ke bualu kayi wakamba ne: ‘Biakudia bianyi bidi kuenza bu mudi wakuntuma musue ne kujikija mudimu wende.’ (Yone 4:34) Mufundi wa Misambu wakamba mêyi adi akumbanyina Yezu a ne: ‘Ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi. Ngakuamba lumu luimpe lua buakane buebe mu disangisha dinene dia bantu, mona, tshiakukanda mishiku yanyi; wewe, Yehowa, udi mumanye bualu ebu.’​—Musambu 40:8, 9; Ebelu 10:7-10.

5, 6. Nngikadilu kayi munene udi bantu badi bavuija bakuabu bayidi nende dijinga?

⁵ Dinanga dia Nzambi ditu disaka bantu bapiabapia badi balonge Bible bua kuakula bua Yehowa ne bua Bukalenge buende ne dishindika dionso, ne batu bafikisha bantu bakuabu bua kulongabu pabu Bible. (Yone 1:41) Dinanga dia Nzambi ke ngikadilu wa kumpala udi utusaka bua kuvuija bantu bayidi. Nunku bua tuetu kulama dinanga edi dikole tudi ne bua kubala Dîyi diende matuku onso ne kuelelapu meji.​—1 Timote 4:6, 15; Buakabuluibua 2:4.

⁶ Kakuyi mpata, dinanga divua nadi Yezu Kristo bua Yehowa diakamuambuluisha bua kulua mulongeshi wa tshisumi. Kadi ki nganu diodi nkayadi divua dimuvuije mumanyishi wa Bukalenge muimpe to. Kadi ngikadilu kayi mukuabu uvua mumuambuluishe bua kuvuija bantu bayidi bimpe?

Tunange bantu

7, 8. Mmunyi muvua Yezu umona bantu?

⁷ Yezu uvua uditatshisha bua bantu ne uvua ubangata ne mushinga. Nansha mu diulu muvuaye “muena mudimu” wa Nzambi, uvua munange malu a bantu. (Nsumuinu 8:30, 31) Pakaluaye pa buloba, uvua umvuila bantu luse ne uvua wambuluisha aba bavua balua kudiye. (Matayo 11:28-30) Yezu uvua widikija dinanga dia Nzambi ne luse luende, ne ngikadilu eyi ivua ikoka bantu bua kutendelela Nzambi umuepele mulelela. Bantu ba mishindu yonso bavua bateleja Yezu bualu uvua uditatshisha buabu bobu ne bua nsombelu wabu.​—Luka 7:36-50; 18:15-17; 19:1-10.

⁸ Dîba divua muntu mukuabu muebeje Yezu tshivuaye ne bua kuenza bua kupeta muoyo wa tshiendelele, ‘Yezu wakamutangila talala, wakamunanga.’ (Mâko 10:17-21) Tudi tubala mu Bible bua bamue bantu bavua Yezu mulongeshe ku Betania ne: ‘Yezu wakasua Mâta, ne muanabu wa bakaji, ne Lazalo.’ (Yone 11:1, 5) Yezu uvua uditatshisha bikole bua bantu, ke bualu kayi uvua ubenga too ne bua kuikisha bua kubalongesha. (Mâko 6:30-34) Dinanga dikole divua nadi Yezu bua bantu diakamuambuluisha bua kukoka bantu ku ntendelelu mulelela kupita muntu mukuabu yonso.

9. Ntshinyi tshivua Paulo wenza bua kuvuija bantu bayidi?

⁹ Mupostolo Paulo pende uvua uditatshisha bikole bua bantu bavuaye uyisha. Tshilejilu, wakambila bantu bavua balue bena Kristo mu Tesalonike ne: ‘Bualu bua tuakatamba kunusua, tuakadi ne disanka dimpe bua kunupa, ki ndumu luimpe lua Nzambi nkayalu, kadi mioyo yetu kabidi, bualu bua nuakalua banangibue kutudi.’ Bua mushindu uvua Paulo uditatshisha bua bena mu Tesalonike, bamue ‘bakalekela mpingu bua kukuatshila Nzambi wa muoyo mudimu.’ (1 Tesalonike 1:9; 2:8) Tuetu tuditatshisha bua bantu anu bu muvua Yezu ne Paulo benza, tuetu petu netuikale ne disanka dia kumona lumu luimpe lulenga mioyo ya bantu ‘badi badilongolole bua kupeta muoyo wa tshiendelele.’​—Bienzedi 13:48, NW.

Tuikale tudipangisha bimue bintu

10, 11. Bua tshinyi mbimpe kudipangisha bimue bimue bintu bua kuvuija bantu bayidi?

¹⁰ Bantu badi bavuija bakuabu bayidi bimpe batu badipangisha bimue bintu. Kabena bateka  bubanji muaba wa kumpala to, bualu Yezu wakambila bayidi bende ne: “Mbikole bua bena biuma kubuela mu Bukalenge bua [Nzambi].” Bayidi bakakema pakumvuabu mêyi aa, kadi Yezu wakamba kabidi ne: “Bana banyi, mbikole bua kubuela mu Bukalenge bua [Nzambi]. Bidi bitekete bua kamelo kubuela mu disu dia kashingi, kumpala kua muena biuma kubueyale mu Bukalenge bua [Nzambi].” (Mâko 10:23-25, MMM) Yezu wakabela bayidi bende bua kabikadi badikebela bintu bia bungi bua bamone mua kuenza bimpe mudimu wa kuvuija bantu bayidi. (Matayo 6:22-24, 33) Bua tshinyi kudipangisha bimue bintu kudi kutuambuluisha bua kuvuija bantu bayidi?

¹¹ Kulongesha malu onso avua Yezu muambe kudi kulomba kudienzeja bikole. Muena Kristo udi musue kuvuija bantu bayidi udi udienzeja bua kulonga Bible ne bantu badi banange ku lumingu luonso. Bamue bamanyishi ba Bukalenge mbakepeshe mêba adibu benza midimu yabu ya bianza bua kuikala ne mushindu wa kupeta bantu ba bungi badi banange bulelela. Bena Kristo ba bungi mbalonge muakulu mukuabu bua kuyisha benyi badi muaba udibu basombele. Bakuabu mbashiye nzubu yabu ne mbaye muaba mukuabu bua kuvudija mudimu wabu wa kunowa. (Matayo 9:37, 38) Bua kuenza malu onso aa, mbimpe kudipangisha bimue bintu. Kadi bua kulua muena Kristo udi uvuija bayidi bimpe, bidi bikengela kuikala ne ngikadilu mikuabu.

Ikala ne lutulu, kadi kujimiji dîba

12, 13. Bua tshinyi lutulu ludi ne mushinga wa bungi mu divuija bantu bayidi?

¹² Lutulu ngikadilu mukuabu udi utuambuluisha bua kuvuija bantu bayidi. Mudimu wetu wa bena Kristo udi utulomba kuenza malu ne mitalu, kadi kuvuija bantu bayidi kutu kulomba misangu ya bungi dîba ne lutulu. (1 Kolinto 7:29) Yezu wakaleja muanabu Yakobo lutulu. Nansha muvua Yakobo mua kuikala mumanye diyisha dia Yezu bimpe, kuvua tshintu tshivua tshimupangishe bua kulua muyidi wende tshikondo kampanda. (Yone 7:5) Kadi bidi bisua kuleja ne: mu matuku makese a panyima pa lufu lua Yezu too ne ku Pentekoste wa mu 33, Yakobo wakalua muyidi, bualu Mukanda wa Nzambi udi bu udi uleja ne: uvua pende mudisangishe ne mamuende ne bana babu ne bapostolo bua kusambila. (Bienzedi 1:13, 14) Pashishe Yakobo wakalua muyidi mushindame, kupetaye too ne majitu manene mu tshisumbu tshia bena Kristo.​—Bienzedi 15:13; 1 Kolinto 15:7.

¹³ Anu bu mutu tshidima ukuna bintu bidi bikola bitekete, bena Kristo badi pabu bambuluisha bantu bua kumvua Bible, kunanga Nzambi ne kuikala ne nsombelu wa bena Kristo. Malu aa atu angata dîba, ne mbimpe kuikala ne lutulu. Yakobo wakafunda ne: ‘Bana betu, nuikale ne lutulu too ne palua Mukalenge. Monayi tshidime udi windila mamuma a mushinga mukole a pa buloba, muikale ne lutulu bua bualu buawu too ne palokelawu mvula ya diambedi ne yalua kunyima. Nuikale ne lutulu kabidi, nujadike mitshima yenu, bualu bua dimueneka dia Mukalenge diakulua pabuipi.’ (Yakobo 5:7, 8) Yakobo uvua wambila bena Kristo nende bua ‘kuikala ne lutulu too ne palua Mukalenge.’ Pavua bayidi kabayi bumvua tshintu kampanda, Yezu uvua ubumvuija natshi ne lutulu anyi ubapesha bilejilu.  (Matayo 13:10-23; Luka 19:11; 21:7; Bienzedi 1:6-8) Mpindieu pakadi Mukalenge mulue, tudi ne bua kuikala ne lutulu lua muomumue patudi tuvuija bantu bayidi. Mbimpe kulongesha bantu badi balua bayidi mu matuku etu ne lutulu lua bungi.​—Yone 14:9.

14. Nansha tuetu ne lutulu, mmunyi mutudi mua kukuata mudimu bimpe ne dîba dietu patudi tuvuija bantu bayidi?

¹⁴ Nansha mutudi ne lutulu, ki mbantu bonso batudi tutuadija kulonga nabu Bible bitaba bua kulua Bantemu ba Yehowa to. (Matayo 13:18-23) Nunku tuetu bamane kuenza muetu muonso bua kubambuluisha, mbimpe tulekele kujimija dîba ne bantu ba nunku ne tukebe bakuabu badi mua kuanyisha bulelela. (Muambi 3:1, 6) Tshia kumanya ntshia se: nansha bantu badi banange bulelela badi mua kuikala dijinga ne diambuluisha dia bungi bua kushintulula lungenyi luabu, ngikadilu ne malu adibu bipatshila mu nsombelu wabu. Nunku tuikalayi ne lutulu anu bu muvua Yezu muikale ne lutulu ne bayidi bende bavua ne lutatu lua kushintulula lungenyi luabu.​—Mâko 9:33-37; 10:35-45.

Tumanye kulongesha

15, 16. Bua tshinyi kulongesha bintu bitoke ne kudilongolola bidi ne mushinga mu divuija bantu bayidi?

¹⁵ Kunanga Nzambi, kuditatshisha bua bantu, kudipangisha bimue bintu ne lutulu ngikadilu idi ne mushinga bua kuvuija bantu bayidi. Tudi kabidi ne bua kumanya kulongesha bua kumvuija malu mu mushindu muimpe ne mupepele. Tshilejilu, malu a bungi avua Mulongeshi munene Yezu Kristo wamba avua alenga bantu nangananga bualu avua mapepele. Udi mua kuikala uvuluka mêyi a Yezu bu mudi aa: “Nubutshile bintu bienu mu diulu.” ‘Kanupi mbua tshintu tshia tshijila.’ “Bienzedi bia lungenyi bidi bilujadika.” ‘Nupe Kaisa bintu bia Kaisa, nupe Nzambi bintu bia Nzambi.’ (Matayo 6:20; 7:6; 11:19; 22:21) Kadi Yezu kavua wakula anu malu mu tshikoso to. Uvua ulongesha malu matoke ne umvuija makuabu pavuabi ne mushinga. Mmunyi mutudi mua kuidikija mushindu uvua Yezu ulongesha?

¹⁶ Kudilongolola kudi ne mushinga bua kulongesha bimpe ne bitoke. Mumanyishi udi kayi mudilongolole udi mua kuikala wakula bikole. Udi mua kupanga mua kushindamena pa malu manene, ukadi wamba malu onso adiye mumanye pa bualu budiye ulongesha. Kadi mumanyishi udi mudilongolole bimpe udi ne muntu udiye ulongesha mu lungenyi, wela meji bua bualu budiye ulongesha ne wakula anu malu matoke adi ne mushinga. (Nsumuinu 15:28; 1 Kolinto 2:1, 2) Mmumanye malu akadi mulongi mumanye ne adiye mua kushindamena mu dilonga. Udi mua kuikala mumanye malu a bungi pa bualu budiye ulongesha, kadi bua kulongeshaye bimpe udi ne bua kumbusha malu adi kaayi ne mushinga.

17. Mmushindu kayi utudi mua kuambuluisha bantu bua kuela meji pa malu adi mu Bible?

¹⁷ Yezu uvua kabidi wambuluisha bantu bua kuela meji pamutu pa kulonda malu patupu. Tshilejilu, dimue dituku wakebeja ne: ‘Simona, udi welangana meji munyi; bamfumu ba pa buloba batu babalambula kudi bana babu balela, anyi kudi bantu ba bende?’ (Matayo 17:25) Tudi mua kuikala banange kumvuija Bible bikole, kadi mbimpe tuikale tudikanda bua kushila mulongi dîba dia kuakula anyi kumvuija malu anudi nulonga. Ki mbimpe kuela bantu nkonko mipitepite bungi to. Tshidibi, tudi mua kubambuluisha bua kumvua malu a mu Bible adi mu mukanda utudi tulonga ne  bukalanga, bilejilu bimpe ne nkonko idi ibeleshisha meji.

18. Kumanya mua kulongesha kudi kulomba kabidi bintu kayi?

¹⁸ Mvese idi yakula bua “diyisha” itu yakula bua kumanya mua kulongesha mu tshiena Greke. (2 Timote 4:2; Tito 1:9) Kumanya kulongesha eku ki kuambuluisha anu muntu bua kukuata malu mu mutu to. Kudi tudi ne bua kuambuluisha mulongi wa Bible bua kumvua dishilangana didi pankatshi pa bulelela ne dishima, tshintu tshimpe ne tshibi, meji ne bupote. Tuetu tuenza nunku ne tudienzeja bua kumufikisha ku dinanga Yehowa, udi mua kudimuena nkayende bua tshinyi udi ne bua kutumikila dîyi diende.

Tuikale ne tshisumi mu divuija bantu bayidi

19. Mmunyi mudi bena Kristo bonso bambuluisha mu divuija bantu bayidi?

¹⁹ Kuvuija bantu bayidi ntshilumbu tshia tshisumbu tshia bena Kristo tshijima. Padi muntu mupiamupia ulua muyidi, ki nganu Ntemu wa Yehowa uvua mumupete ne mulonge nende Bible udi usanka to. Tshilejilu, padi tshisumbu tshia bantu tshikeba muana udi mujimine, anu muntu umue patupu ke udi mua kupeta muana au. Kadi padiye ulua ne muana kudi baledi bende, bantu bonso bavua bamukeba badi basanka. (Luka 15:6, 7) Bia muomumue, tshisumbu tshionso tshidi tshienza bukole bua kuvuija bantu bayidi. Bena Kristo bonso badi bakeba bantu badi mua kulua bayidi ba Yezu. Padi muntu mupiamupia utuadija kudisangisha netu ku Nzubu wa Bukalenge, muena Kristo yonso udimu udi umuambuluisha bua kunanga ntendelelu mulelela. (1 Kolinto 14:24, 25) Nunku, bena Kristo bonso badi basanka padi bantu binunu nkama balua bayidi bapiabapia tshidimu tshionso.

20. Udi ne bua kuenza tshinyi wewe musue kulongesha bakuabu bulelela?

²⁰ Bena Kristo ba bungi batu basue kulongesha bantu malu a Yehowa ne a ntendelelu mulelela. Kadi kabatu banji kulonga ne muntu nansha mudibu benza muabu muonso. Wewe muikale mu nsombelu eu, tungunuka ne kukolesha dinanga diudi munange nadi Yehowa, ikala uditatshisha bua bantu, ikala udipangisha bimue bintu, ikala ne lutulu ne keba mua kulengeja mushindu uudi ulongesha. Kumpala kua malu onso, ikala usambila bua dijinga diebe dia kulongesha bantu bulelela. (Muambi 11:1) Ikala mujadike ne: malu onso audi wenza mu mudimu wa Yehowa adi ambuluisha mu mudimu udi utumbisha Nzambi wa kuvuija bantu bayidi.

Udi mua kumvuija anyi?

• Bua tshinyi mudimu wa kuvuija bantu bayidi udi uteta dinanga dietu bua Nzambi?

• Bantu badi bavuija bakuabu bayidi badi ne bua kuikala ne ngikadilu kayi?

• Kumanya mua kulongesha bimpe kudi kulomba tshinyi?

[Nkonko ya dilonga]

[Tshimfuanyi mu dibeji 21]

Bena Kristo badi baleja mudibu banange Nzambi bikole padibu bavuija bantu bayidi

[Tshimfuanyi mu dibeji 23]

Bua tshinyi bantu badi bavuija bakuabu bayidi badi ne bua kuditatshisha bua bantu aba?

[Tshimfuanyi mu dibeji 24]

Bantu badi bavuija bakuabu bayidi badi ne bua kuikala ne imue ngikadilu kayi?

[Tshimfuanyi mu dibeji 25]

Bena Kristo bonso batu basanka padibu bamona bantu balua bayidi