Ikalenu Nayililu Yikuyikwasha Kwilisha Atumbanji

“Yenu mwakelishi atumbanji munyuza yejima.”—MATEWU 28:19.

1. Indi ambuña aNzambi akunyima akeñekeleña kudiza nikwikala nayililu yamuchidinyi?

 AMBUÑA aYehova mpinji yikwawu atela kudiza nikwikala nayililu yikuyikwasha kwila nkeñelu yindi. Chakutalilahu, Abarahama naSara chayilejeluwu kudi Nzambi ashiyili musumba wamaheta waUri nawa mukuhita kwampinji akeñekeleña kwikala nayililu nikwiluka kwekala nawantu ashakamaña mumatenti. (Aheberu 11:8, 9, 15) Hakwila nawu yeñiji aIsarela Mwituña daChikaninu, Yoshuwa wateleleli kumika, kukuhwelela Yehova, nikwiluka Nshimbi jindi. (Yoshuwa 1:7-9) Hela chakwila Bezeleli niOholiyabi atela adiña eluka nyidimu, spiritu yaNzambi yawejeleluhu hayuma yelukiluwu kulonda awa amayala akalakali chachiwahi nikulombola mudimu wakutuña tabanaka ninyidimu yikwawu.—Kwidika 31:1-11.

2. Malwihwinyi yitukuhanjekahu anatalishi kumudimu wakwilisha atumbanji?

² Chimwahitili yaaka yayivulu, Yesu Kristu wayinkeli atumbanji twindi iwu mudimu nindi: “Yenu mwakelishi atumbanji munyuza yejima, . . . mwakayileji kuhemba yuma yejima yinayilejenu.” (Matewu 28:19, 20) Antu kanda ayinkeñahu dehi mudimu wudi neyi iwu. Yililwinyi yakeñekaña mumudimu wakwilisha atumbanji? Tunateli kwikala ñahi naniyi yililu?

Mwekeshenu Nenu Mwamukeña Nzambi Chikupu

3. Indi lushimbi lwakwilisha atumbanji lwatwinkaña kukooleka kwamuchidinyi?

³ Kuhosha nawantu nikufwila kuyishika hanyichima kulonda adifukuleña kudi Nzambi walala, chakeñekaña kumukeña Yehova chikupu. A Isarela amwekeshili nawu amukeña Nzambi kuhitila mukwovwahila nshimbi jindi namuchima wejima, kuhana nyilambu yayiwahi, nikumushimeka mukamina. (Kuhituluka 10:12, 13; 30:19, 20; Masamu 21:13; 96:1, 2; 138:5) Hamu neyi akakwilisha atumbanji, ninetu twatiyililaña nshimbi jaNzambi, cheñi nawa twamwekeshaña chitwamukeña Yehova kuhitila mukulejaku amakwawu hadi yena ninkeñelu yindi. Twatela kuhosha nachikuhwelelu,  kuzatisha mazu amawahi kulonda kushimuna chikupu chitwatiyaña hakuchiñeja kwatwinkayi Nzambi.—1 Atesalonika 1:5; 1 Petulu 3:15.

4. Muloñadi Yesu chatiyilileñayi kuwaha kuleja antu hadi Yehova?

⁴ Hamuloña wakusweja kumukeña Yehova, Yesu wadiña namuzañalu chikupu hakushimuna nkeñelu yaNzambi, Wanta, nikudifukula kwalala. (Luka 8:1; Yowanu 4:23, 24, 31) Dihafumini Yesu kuhosha nindi: “Kudya kwami yowu kwila muchima wayena wantemesheli, nakamanishi mudimu windi.” (Yowanu 4:34) Awa mazu añimbi yamasamu niwena atalisha kudi Yesu akwila nawu: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami. Nashimuni nsañu yayiwahi yakuloña muchipompelu cheneni; tala, hinukumwenesha nyivumbu yamuku, eyi Yehova, wuneluki.”—Masamu 40:8, 9; Aheberu 10:7-10.

5, 6. Chililwinyi chacheni chakeñekaña kudi akwakwilisha atumbanji?

⁵ Kumukeña Nzambi kwasañumunaña amaha anadizi chalala chaBayibolu kushimuna hadi Yehova niWanta windi nachikuhwelelu nawa ashikaña hanyichima yawantu chikupu kulonda atalataleña muNsona. (Yowanu 1:41) Kumukeña Nzambi dichililu chacheni chatwisañumunaña kuzata mudimu wakwilisha atumbanji. Komana tutwalekenuhu kwikala nakukeña kwamuchidiwu kuhitila mukutaña mpinji yejima nikutoñojoka Hezu dindi.—1 Timotewu 4:6, 15; Chimwekeshu 2:4.

⁶ Chakubula nikujinooka kumukeña Yehova kwamukwashili Yesu Kristu kwikala ntañishi wadikita. Ilaña iwu hidiwu muloña hohu wamuleñeleli kusoña nyikabu yayiwahi neyi mukwakushimwina waWantaku. Hanu dinu chililwinyi chikwawu chamuleñesheli Yesu kutwesha kwilisha atumbanji?

Mwekeshenu Nenu Mwakamena Antu

7, 8. Indi Yesu wadiña nakuyakamena ñahi antu?

⁷ Yesu wadiña nakwakamena antu nawa wayikeñeli chikupu. Hela tuhu hampinji yadiñayi mwiwulu hamu neyi ‘mukalawenu,’ waNzambi wakeñeli yuma yakundama kudi antu. (Yishimu 8:30, 31) Yesu watiyilileña antu luwi nawa wayikwashileña antu enjileña kudi yena. (Matewu 11:28-30) Yesu wamwekesheleña kukeña kwaYehova niluwi, nawa ichi chaletesheli antu kudifukula kudi Nzambi walala hohu. Antu amboka-mboka amutiyilileña Yesu muloña wayakameneneña nikuyikwasha.—Luka 7:36-50; 18:15-17; 19:1-10.

⁸ Iyala wumu chehwiliyi chuma chatela kwilayi kulonda yakaswani wumi wahaya nyaka, “Yesu hakumushinshika, hakumukeña.” (Maku 10:17-21) Kutalisha hadi antu amakwawu alejeliyi Yesu kuBetani twatañaña netu: “Yesu wakeñeli Mata nimana kwindi wamumbanda niLazaru.” (Yowanu 11:1, 5) Yesu wakameneneña antu chikupu chakwila wazatishili mpinji yakunooka kulonda yayitañishi. (Maku 6:30-34) Kukeña kwamuchidiwu nikwakamena akwawu antu kwamuleñeleli Yesu kukokola antu chikupu kukudifukula kwalala kubadika muntu wudi wejima.

9. Indi Pawulu wadiña nayililu yamuchidinyi hamu neyi mukwakwilisha atumbanji?

⁹ Kapostolu Pawulu niyena wadiña nakwakamena chikupu antu adiña nakushimwinayi. Chakutalilahu, walejeli antu ekalili eniKristu muTesalonika nindi: “Chitwaswejeli kuyikunda, hitwakuminini dakutiya kuwaha kuyishimwina nsañu yayiwahi [yaNzambi] hohuku, ilaña twatiyili kuwaha kuyinka niwumi wetwetu aweni nawa, muloña twaswejeli kuyikeña.” Hamuloña wakukeña kwaPawulu kwakuzata nañovu, antu amakwawu muTesalonika ‘abalumukili nakutala kudi Nzambi nakuleka akishi.’ (1 Atesalonika 1:9; 2:8) Neyi twakamenaña antu chikupu, neyi chelili Yesu niPawulu, ninetu tukwikala namuzañalu wakumona nsañu yayiwahi chiyikushika hanyichima yawantu “afuukwilawu dehi kumona wumi wahaya nyaka.”—Yililu 13:48.

Mwekeshenu Spiritu Yakudihana

10, 11. Muloñadi spiritu yakudihana chiyakeñekelaña hakwilisha atumbanji?

¹⁰ Antu atweshaña kwilisha atumbanji akweti spiritu yakudihana. Mwalala hiyamonaña kukeña maheta neyi dichuma chasweja kulemaku.  Dichi, Yesu walejeli atumbanji twindi nindi: “Akwamaheta, o chamonañawu kukala kwiñila muwanta waNzambi!” Atumbanji ahayamini hakutiya mwenimu, ilaña Yesu watwalekeluhu nindi: “Anyikenu, akuhwelelaña maheta, o chamonañawu kukala kwiñila muwanta waNzambi! Ngameli kuhanuka mudisu dandoñu chaswayi, kwinza mukwamaheta kwiñila muwanta waNzambi chakala.” (Maku 10:23-25) Yesu wayilejeli atumbanji twindi kupelesha chihandilu chawu kulonda kusha kashinshi hakwilisha atumbanji. (Matewu 6:22-24, 33) Muloñadi spiritu yakudihana chiyatwikwashaña kwilisha atumbanji?

¹¹ Chakeñekaña kuzata nañovu hakushimuna yuma yejima yatwilejeliyi Yesu. Mukwakwilisha atumbanji wafwilaña kulombola kudiza kwaBayibolu namuntu wunakukeña kudiza mulungu nimulungu. Akwakushimwina aWanta amakwawu analeki kuzata mudimu wakumujimba wampinji yejima nakutachika mudimu wakapinji kantesha kulonda ekali nampinji yakuwana antu ashinshika. EniKristu amavulu anadizi idimi dikwawu kulonda ashimwini mazanvu awantu amuchidi wacheñi adi mwiluña dawu. Akwakwilisha atumbanji amakwawu ashiya matala awu nakutuntukila kwiluña dacheni hela ituña kulonda kuzata chikupu mumudimu wakwañula. (Matewu 9:37, 38) Yuma yejimiyi yakeñekaña spiritu yakudihana. Ilaña kudi yuma yayivulu yakeñekaña hakwikala mukwakwilisha atumbanji wamuwahi.

Diwunjikenu Ilaña Bayi Mumba Mpinjiku

12, 13. Muloñadi kudiwunjika chikwalemena chikupu hakwilisha atumbanji?

¹² Kudiwunjika hichililu chikwawu chatwikwashaña kwilisha atumbanji. Nsañu yetu yaweniKristu yakeñekaña kuzata mukunyakala, ilaña kwilisha atumbanji kakavulu kwasendaña mpinji nawa kwakeñekaña kudiwunjika. (1 Akorinda 7:29) Yesu wadiwunjikili namana kwindi Yakoba. Hela chakwila Yakoba welukili chikupu nyidimu yaYesu yakushimwina, kudi chuma chamukañesheli hadi mpinji yayilehi kwikala kambanji. (Yowanu 7:5) Hela chochu mukampinji kantesha hakachi kakufwa kwaKristu nihaPentekosta 33 C.E., Yakoba wekalili kambanji, muloña Nsona yahoshaña nawu walombeleña hamu namama yindi, ana kwindi niapostolu. (Yililu 1:13, 14) Yakoba wakulili lwakuspiritu chikupu, chimwahitili mafuku watachikili kukalakala nyidimu yamaneni muchipompelu chawiniKristu.—Yililu 15:13; 1 Akorinda 15:7.

¹³ Kufwana andimi, eniKristu anakudima yuma yakulaña chovu—kutiyisha Izu daNzambi, kumukeña Yehova, nikwikala naspiritu neyi yaKristu. Kudiwunjika kwakeñekaña. Yakoba wasonekeli nindi: “Enu ana kwetu, diwunjikenu nichakenzayi Mwanta. Toñojokenu ndimi chatalilañayi nyikabu yayiwahi yahamaseki, wadiwunjikaña nichiyakayinokela kudi nvula yatachi niyakukuminina. Dichi ninenu diwunjikenu, dikoleshenu munyichima yenu, muloña kwinza kwaMwanta kudi kwakwihi.” (Yakoba 5:7, 8) Yakoba wakolesheleña akwawu akakwitiya ‘kudiwunjika nichakenzayi Mwanta.’ Atumbanji chiyabula kutiyishisha chuma chidi chejima, Yesu mukudiwunjika walumbulwileña hela kuhana chakutalilahu. (Matewu 13:10-23; Luka 19:11; 21:7; Yililu 1:6-8) Chineli  Mwanta namwekani dehi, ninetu twatela kudiwunjika hampinji yitunakufwila kwilisha atumbanji. Twatela kudiwunjika hakuleja antu anakwikala atumbanji twaYesu munanu mafuku.—Yowanu 14:9.

14. Hela chakwila twadiwunjika, twatela kuzatisha ñahi mpinji yetu chachiwahi neyi akwakwilisha atumbanji?

¹⁴ Hela chakwila twadiwunjika, izu hidasoñaña nyikabu mudi antu amavulu yitwatachikaña kudiza nawu Bayiboluku. (Matewu 13:18-23) Hanyima yakuzata nañovu chikupu kulonda tuyikwashi, hitwanataña mpinji nawantu amuchidiwuku, twayaña nakukeña antu atela kulemesha chalala chaBayibolu. (Mukwakutaŋisha 3:1, 6) Hela antu alemesha chalala twatela kutwalekahu kuyikwasha kulonda ahimpi yitoñojoka yawu, yililu, niyuma yalemeshawu chikupu muchihandilu. Dikwila nawu twadiwunjika, neyi chadiwunjikiliyi Yesu nawatumbanji adiña nakukala kwakwikala nayililu yayiwahi.—Maku 9:33-37; 10:35-45.

Ilukenu Mwakutañishila

15, 16. Muloñadi kupelesha nikuloñesha chachiwahi chikwalemena hakwilisha atumbanji?

¹⁵ Kumukeña Nzambi, kwakamena antu, spiritu yakudihana, nikudiwunjika hiyuma yalema yakeñekaña hakutwesha kwilisha atumbanji. Kwiluka mwakutañishila nikwena kwakeñekaña, muloña kwatwikwashaña kulumbulula nsañu munjila yatiyakana, nawa yapela. Chakutalilahu, mazu amavulu ahosheleñayi Ntañishi Muneni, Yesu Kristu, ashikileña antu hanyichima muloña adiña apela. Hadaha mukwanuka mazu ahosheli Yesu adi neyi: ‘Dilumbikilenu maheta mwiwulu.’ “Bayi mwinka atuwa yuma yajilaku.” “Maana alumbulukaña nanyidimu yawu.” “Yuma yaKesari inkenu Kesari; yuma yaNzambi inkenu Nzambi.” (Matewu 6:20; 7:6; 11:19; 22:21) Ilaña, Yesu hahosheli hohu nyikuku yamazu yayihiku. Wadizishileña chatiyakana nawa walumbulwileña yuma yakeñekeleña kulumbulula. Mwatela kwimbujola ñahi ntañishilu yaYesu?

¹⁶ Kuloñesha chachiwahi dichuma cheneni chakeñekaña hakwila nawu tutañishi munjila yapela nawa yatiyakana. Mukwakushimwina wunabuli kudiloñesha wahoshaña nankashi. Mukusweja kuhosha-hosha nateli kuluwañesha yikuma yamaneni, nakushimuna yuma yejima yelukayi hanoyu nsañu. Kwambukaku, mukwakushimwina wunaloñeshi chiwahi watoñojokaña hadi muntu wunakudizishayi, watoñojokaña hansañu, nawa watañishaña hohu hayuma yinakukeñeka. (Yishimu 15:28; 1 Akorinda 2:1, 2) Welukaña nsañu yelukayi kadizi niyikuma yatela kukonkomwenayi hakudiza. Mukwakushimwina nateli kwiluka yikuma yayivulu yayiwahi hanoyu nsañu, ilaña kulumbulula chiwahi hikwakeñekaña kuhosha nsañu yinakubula kukeñekaku.

17. Twatela kukwasha ñahi antu kutoñojoka haNsona?

¹⁷ Yesu cheñi wakwashileña antu kutoñojoka, chatela yayilejeña hohu yikuma. Mpinji yimu, Yesu wehwili nindi: “Eyi Shimona, indi eyi wunatoñojokidi? Anyanta ahanu hamaseki atambulaña musonku hela mulambu kudanyi? Kudi anyanawu tahindi kudi antu acheñi?” (Matewu 17:25) Tunateli kudiluñisha nankashi kulumbulula nsañu yamuBayibolu chakwila twatela kwiluka hakukumina kulonda kadizi yadihosheli yomweni hela yalumbululi nsañu yimunakuhanjika hakudiza kwaBayibolu. Dichi, bayi tuswejaña kuyihula antu malwihu amavuluku. Ilaña, mukubabala, twatela kuyikwasha  kutiyishisha yikuma yamuNsona yidi mumukanda wetu washindamena haBayibolu kuzatisha yakutalilahu yayiwahi, nimalwihu amawahi.

18. Indi ‘kwiluka kutañisha’ mwabombela chumanyi?

¹⁸ Nsona jahoshaña ‘hakwiluka mwakutañishila.’ (2 Timotewu 4:2; Titusa 1:9) Kwiluka mwakutañishila kwabombelamu yuma yayivulu chatela kukwasha muntu kuhembela yikuma kumutu. Twatela kweseka kukwasha kadizi waBayibolu kulonda yeluki chaambu chidi hawalala nikutwamba, chachiwahi nachatama, maana niwusupi. Chitukwilaña mwenimu nikufwila kukwasha muntu yamukeñi Yehova, nateli kumona chatelela kumwovwahilayi Yehova.

Kalakalenu Chikupu Mukwilisha Atumbanji

19. Indi eniKristu ejima akwashanaña ñahi kwilisha atumbanji?

¹⁹ Chipompelu chawiniKristu hikuloñesha kwelishaña atumbanji. Muntu wamuha chekalayi kambanji, Chinsahu chaYehova wamuwanini nakumukwasha kudiza chuma chatañishaña Bayibolu hidiyi wazañalalaña kankawinduku. Neyi antu adikuñulula hamu nakukeña mwana wunajimbali, hakachi kenzanvu muntu wumu hohu diyi wamuwanaña mwana. Ilaña neyi mwana anamuleti kudi anvwali jindi, antu ejima amukeñaña azañalalaña. (Luka 15:6, 7) Chochimu, mudimu wakwilisha atumbanji wabombelamu chipompelu chejima. EniKristu ejima ayaña nakukeñakeña antu atela kwikala atumbanji twaYesu. Muntu wamuha chatachikayi kuwanika kukupompa Hetala daWanta, mwiniKristu wejima wunawaniki kukupompa wamukwashaña kulemesha kudifukula kwalala. (1 Akorinda 14:24, 25) Dichi, eniKristu ejima atela kuzañalala muloña atumbanji amaha amavulu anakuyilisha chaaka nichaaka.

20. Chumanyi chimwatela kwila neyi munakukeña kudizisha amakwawu chalala chamuBayibolu?

²⁰ EniKristu amavulu ashinshika anateli kuzañalala kudizisha muntu hadi Yehova nikudifukula kwalala. Hela chakwila azataña nañovu, hadaha hiyanakutwesha kwila mwenimuku. Neyi mudi nakukala kokumu, swejenu kumukeña Yehova, yakamenenuña antu, dihanenu, diwunjikenu, nawa fwilenu kwilukisha kutañisha. Sweje-e dinu, shenu mpwila yenu yakutañisha chalala mukulomba. (Mukwakutaŋisha 11:1) Zañalalenu hakwiluka nenu yuma yejima yimwakalakalaña mumudimu waYehova yakwashaña mudimu wakwilisha atumbanji wamulemeshaña Nzambi.

Mukulumbulula Nenudi?

• Muloñadi kwilisha atumbanji chikwesekaña kukeña kwetu kutwamukeña Nzambi?

• Yililunyi yakeñekaña kudi akakwilisha atumbanji?

• Indi ‘kwiluka kutañisha’ mwabombela chumanyi?

[Malwihu aKuzatisha haKudiza]

[Mwevulu wudi hefu 20]

EniKristu amwekeshaña nawu amukeña Nzambi chikupu, kuhitila mukwilisha atumbanji

[Mwevulu wudi hefu 22]

Muloñadi akwakwilisha atumbanji chiyatela kukeñawu antu?

[Mwevulu wudi hefu 23]

Indi akwakwilisha atumbanji atela kwikala nayililwinyi?

[Mwevulu wudi hefu 24]

EniKristu ejima azañalalaña hakumona yuma yayiwahi yafumaña mukwilisha atumbanji