Paaligwasen Iray Kalidad a Makatulong ed Panggawa Yo na Babangatan

‘Onla kayo . . . tan manggawa na saray babangatan ed amin a nasyones.’​—MATEO 28:19.

1. Antoran dunong tan kalidad so kinaukolan na pigaran lingkor na Dios nensaman?

 SARAY lingkor nen Jehova so nepeg a mamaaligwas no maminsan ed saray dunong tan kalidad ya ontulong ed panggawa ra na linawa to. Singa bilang, lapud impangiganggan na Dios, tinaynan di Abraham tan Sara so maaligwas a syudad na Ur tan diad inlabas na panaon et kinaukolan day nawalaan na saray kalidad tan abilidad a nausar da diad panayam da ed tolda. (Hebreos 11:8, 9, 15) Diad pangidadaulo ed saray Israelita ed Insipan a Dalin, kinaukolan nen Josue so pakpel, talek ed si Jehova, tan pikakabat ed Ganggan to. (Josue 1:7-9) Antokaman iran dunong a wala la’d si Besaleel tan Oholiab et seguradon pinaaligwas na espiritu na Dios ta pian matalona iran makapibiang tan mangimaton ed pangipaalagey ed tabernakulo tan ed arum niran misiglaotan a kimey.​—Exodo 31:1-11.

2. Antoran tepet so singbaten tayo nipaakar ed panaggaway babangatan?

² Nilasus taon so apalabas, onia so ingganggan nen Jesu-Kristo ed saray patumbok to: ‘Onla kayo . . . tan manggawa na saray babangatan ed amin a nasyones, . . . ibangat yo ran mangunor na amin a bengabengatla ya ingganggan ko ed sikayo.’ (Mateo 28:19, 20) Agnin balot naikdan nensaman iray totoo na pribilehyo a manggawa na ontan a baleg a kimey. Antoran kalidad so nakakaukolan parad panaggaway babangatan? Panon tayon napaaligwas iratan a kalidad?

Ipatnag so Aralem a Panangaro ed Dios

3. Say ganggan a manggawa na saray babangatan so mangiiter ed sikatayo na anton pankanawnawa?

³ Say aralem a panangaro ed si Jehova so managdag ed sikatayon mitongtong ed totoo tan panggunaetan iran tangguyoren a mandayew ed tuan Dios. Napaneknekan na saray Israelita so panangaro ra ed Dios diad interon puso ya itulok da ed saray ganggan to, pangiyapay da na makapaliket iran bagat, tan pankanta na saray panangidayew ed sikato. (Deuteronomio 10:12, 13; 30:19, 20; Salmo 21:13; 96:1, 2; 138:5) Diad panggagawa tayo na babangatan, tutumboken tayo met iray ganggan na Dios, balet nipatnag tayo met so panangaro tayo ed si Jehova diad pangipaamta ed arum na nipaakar ed sikato tan ed saray gagala to.  Kaukolan a positibo so pansalita tayo, tan dugan termino so usaren tayo pian nibalikas so impapuson liknaan tayo nipaakar ed inter na Dios ya ilalo.​—1 Tesalonica 1:5; 1 Pedro 3:15.

4. Akin a nanliketan nen Jesus so pangibangat ed totoo nipaakar ed si Jehova?

⁴ Lapud aralem so panangaro nen Jesus ed si Jehova, nanliketan ton maong so impangitongtong ed saray gagala na Dios, say Panarian to, tan say tuan panagdayew. (Lucas 8:1; Juan 4:23, 24, 31) Diad tua, inkuan nen Jesus: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Onaaplika ed si Jesus irayan salita na salmista: “[Maliket] ak a mangunor na linawam, O Dios ko; on, say ganggan mo wala ed dalem na pusok. Impulong ko so maligan balbalita na inkatunong ed pegley na balbaleg a muyongan; nia, agko pokpokan so saray bibil ko, O Jehova, sikakabat ka.”​—Salmo 40:8, 9; Hebreos 10:7-10.

5, 6. Anto so manunan kalidad a kaukolan na saray manggagaway babangatan?

⁵ Lapud napapakiwas na panangaro ed Dios, no maminsan et saray balo nin akaaral ed katuaan na Biblia so maligligsan mangitongtong nipaakar ed si Jehova tan say Panarian to kanian epektibo iran mangombinse ed arum a mangusisa ed Kasulatan. (Juan 1:41) Say manunan kalidad a mamapakiwas ed sikatayon mibiang ed panaggaway babangatan et say aro ed Dios. Pansiansiaen tayo sirin a mabilay itan ya aro panamegley na regular a pambasa tan pandalepdep ed Salita to.​—1 Timoteo 4:6, 15; Apocalipsis 2:4.

⁶ Seguradon tinmulong ed si Jesu-Kristo so panangaro to ed si Jehova pian magmaliw a maseseg a managbangat. Balet aliwan satan labat so rason ed inkaepektibo to bilang manangiyabawag na Panarian. Anto, sirin, so sananey nin kalidad a tinmulong ed sikato ed panaggaway babangatan?

Ipatnag so Maaron Panangiyansakit ed Totoo

7, 8. Panon a minoria nen Jesus iray totoo?

⁷ Inyansakit nen Jesus iray totoo tan sikatoy interesadon maong ed sikara. Anggan sanen sikatoy agni linma diad dalin, bilang “uloen a komikimey” na Dios et nanliketan to lan maong iray bengatlan misiglaotan ed katooan. (Uliran 8:30, 31) Sanen linma dia ed dalin bilang too, walaan na panangabagey si Jesus ed totoo, kanian nainawaan iramay inmasingger ed sikato. (Mateo 11:28-30) Impatnag nen Jesus so mismon panangaro tan panangabagey nen Jehova, tan saya so akasagyatan na totoo pian mandayew ed saksakey a tuan Dios. Tinmalineng ed si Jesus iray totoo antokaman so kipapasen da ed bilay, lapud impatnag toy maaron panangiyansakit ed sikara tan ed saray situasyon da.​—Lucas 7:36-50; 18:15-17; 19:1-10.

⁸ Sanen tinmepet so sakey a laki no antoy nakaukolan ton gawaen pian natawir toy andi-anggaan a bilay, “sikatoy ninengneng nen Jesus [tan] sikato so inaro to.” (Marcos 10:17-21) Nipaakar ed pigaran indibidual ya imbangat nen Jesus diad Betania, onia so nabasa tayo: “Si Jesus inaro to si Marta, tan say agi to, tan si Lazaro.” (Juan 11:1, 5) Inyansakit a maong nen Jesus iray totoo ya insakripisyo toy pampainawa to la komon pian bangatan ira. (Marcos 6:30-34) Lapud satan ya aralem tan maaron panangiyansakit ed totoo, lalon epektibo si Jesus nen say arum diad impanangguyor ed saray totoo ed tuan panagdayew.

9. Bilang managgaway babangatan, anto so awawey ya impatnag nen Pablo?

⁹ Si apostol Pablo so walaan met na agaylan panangiyansakit ed totoo a pinulongan to. Singa bilang, inkuan to ed saramay nagmaliw a Kristiano ed Tesalonica: “Maibibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” Bilang resulta na maaro iran sagpot nen Pablo, pigaran taga Tesalonica so ‘binmeneg ed saray talintao [tan] inmarap ed Dios a mabilay.’ (1  Tesalonica 1:9; 2:8) No talagan iyaansakit tayo iray totoo, a singa ginawa nen Jesus tan si Pablo, naeksperiensya tayo met so gayaga diad pakakanengneng ed maong a balita a makakasabi ed kapusoan na saramay mangawat ed katuaan a mangitonton ed “bilay ya andi-anggaan.”​—Gawa 13:48.

Mabulos ya Isakripisyo so Dili

10, 11. Akin a nakaukolan so mabulos a panagsakripisyo sano panggugunaetan tayoy manggawa na saray babangatan?

¹⁰ Mabulos a mansakripisyo iray epektibon  manggagaway babangatan. Seguradon agda ipapasen a sankaimportantian so pakawalaan na kayamanan. Diad tua, inkuan nen Jesus ed saray babangatan to: “Agaylay irap na saray walaan na kayamanan ya onloob ed panariay Dios!” Nikelawan iray babangatan ed impakadngel ed saya, balet intuloy nin inkuan nen Jesus: “Ugugaw, agaylay kairapan na saray manmatalek ed saray kayamanan ya onloob ed panariay Dios! Magmainomay ni sakey a kamelyo ya onlabot ed abot na sakey a dagum, nen say sakey a too a mayaman ya onloob ed panariay Dios.” (Marcos 10:23-25) Impaseseg nen Jesus so simplin bilay ed saray papatumbok to ta pian niyapasakey day panggawa na saray babangatan. (Mateo 6:22-24, 33) Akin ya ontulong ed sikatayo so inkamabulos a mansakripisyo diad panggawa na saray babangatan?

¹¹ Mankaukolan na baleg a sagpot so pangibangat ed amin ya ingganggan nen Jesus. Say sakey a Kristiano a malabay a manggawa na babangatan so kaslakan lan manggugunaet a mangikondukta na panangiyaral na Biblia ed interesadon too kada simba. Walaray pigaran manangiyabawag na Panarian, a diad pirawat dan mas malaglaem so panaon da ed pananap na masimoon a totoo et sinalatan da na part-time so datin sigpot-panaon a trabaho ra. Nilibon Kristiano so nanaral na sananey a lenguahe ta pian napulongan iray grupo na dayon totoo ed lugar da. Arum a manangipalapag so anaynan ed kaabungan da tan linma ed sananey a lugar odino bansa pian nagkalalon sigpot a makapibiang ed panag-ani. (Mateo 9:37, 38) Amin na saya so mankaukolan na mabulos a panagsakripisyo. Balet dakel ni so nakaukolan pian magmaliw ya epektibo ed panaggaway babangatan.

Magmaliw a Maanos Balet Agpipirdien so Panaon

12, 13. Akin ya importantin maong so inkaanos ed panggawa na saray babangatan?

¹² Say anos et sakey nin kalidad ya ontulong ed sikatayon manggawa na saray babangatan. Mankaukolan na maganat ya ikikiwas so mensahe tayo bilang Kristiano, balet say panggawa na babangatan so mabetbet lan mankaukolan na baleg a panaon tan anos. (1 Corinto 7:29) Maanos si Jesus ed agi to ed ina a si Santiago. Anggaman kabkabat la nen Santiago so nipaakar ed panagpulong a kimey nen Jesus, sikatoy agnin tampol kinmiwas a magmaliw a babangatan. (Juan 7:5) Anggaman ontan, diad antikey a panaon ed baetan na impatey nen Kristo tan Pentecostes 33 C.E., nagmaliw a babangatan si Santiago, lapud ipapabitar na Kasulatan a sikatoy akitipon parad pikakasi a kaibay ina to, saray agagi to, tan saray apostol. (Gawa 1:13, 14) Inmaligwas ed espiritual si Santiago, a diad saginonor et sikatoy anakbat na ambelat iran responsabilidad diad Kristianon kongregasyon.​—Gawa 15:13; 1 Corinto 15:7.

¹³ Singa saray dumaralos, babayuboan na saray Kristiano iray kaslakan lan matantan a napabulaslas, a singa say pakatalos ed Salita na Dios, panangaro ed si Jehova, tan say panangalig ed saray awawey nen Kristo. Mankaukolan iya na inkaanos. Insulat nen Santiago: “Mantepel [odino mananos] kayo . . . , agagi, angga ed isabi Katawan. Nia, say tomatalon alagden to so mablin bunga na dalin, ya anosan to ya alagden, angga ed panggawa’to na masakbay tan unor ya uran. Maanos kayo met komon; iteen yo ray puspuso yo: ta say isasabi Katawan manasingger.” (Santiago 5:7, 8) Papasesegen nen Santiago iray kapananisiaan to a ‘mantepel [odino mananos] angga ed isabi [odino kiwawala] na Katawan.’ No walay agnatalosan na saray babangatan, maanos itan ya ipaliwawa odino iyilustra  nen Jesus. (Mateo 13:10-23; Lucas 19:11; 21:7; Gawa 1:6-8) Natan ta wala la’d kiwawala so Katawan, kaukolan tayo met so mananos legan tayon panggugunaetan so manggawa na saray babangatan. Mankaukolan na maanos a panangibangat iramay magmaliw a papatumbok nen Jesus ed panaon tayo.​—Juan 14:9.

14. Anggaman maanos itayo, panon tayon nausar ed makabat a paraan so panaon tayo ed panaggaway babangatan?

¹⁴ Anggaman ed inkaanos tayo, say salita so ag-ombunga ed kaslakan a totoo ya inggapo tayon iyaralan na Biblia. (Mateo 13:18-23) Kanian, kayari na magenap met lan impansagpot pian tulongan ira, maabig no itunda tayo laran iganaan na panaon tan anapen iramay mas posiblin pablien day katuaan na Biblia. (Eclesiastes 3:1, 6) Siempre, anggan saray totoo a maapresya ed katuaan na Biblia so mankaukolan ni na tulong pian nauman day panmoria, awawey, tan saray prayuridad da ed bilay. Kanian maanos itayo, a singa si Jesus a maanos ed saray babangatan to a matantan a mamayubo ed manepeg ya awawey.​—Marcos 9:33-37; 10:35-45.

Paaligwasen so Dunong a Manbangat

15, 16. Akin ya importante so inkasimpli tan maabig a preparasyon sano manggagawa itayo na saray babangatan?

¹⁵ Say aro ed Dios, panangiyansakit ed totoo, mabulos a panagsakripisyo, tan inkaanos et importante iran kalidad pian ontalona ed panaggaway babangatan. Kaukolan met a bayuboan so dunong ed panagbangat, lapud ontulong itan ed sikatayon ipaliwawa iray pamaakaran ed malinew tan simplin paraan. Singa bilang, dakel iran balikas na Sankamaongan a Managbangat, si Jesu-Kristo, so nagkalalo lan epektibo lapud simpli iratan. Nayarin nanonotan yo iray balikas nen Jesus a singa saraya: “Mantipon kayo a nipaakar ed sikayo na kaykayamanan ed tawen.” “Agyo iter so bengatlan sagrado ed saray aso.” “Say kakabatan napatnagan la ed saray gawa to.” “Bayaran . . . ed Cesar so kien nen Cesar; tan ed Dios so kien na Dios.” (Mateo 6:20; 7:6; 11:19; 22:21) Siempre, wala met iray andurukey a balikas nen Jesus. Malinew so panagbangat to tan no nakaukolan et impaliwawa to iray bengatla. Panon yon naalig so paraan nen Jesus ed panagbangat?

¹⁶ Importante so preparasyon pian simpli tan malinew so pambangat. Say ag-akaparaan a manangipalapag et walay tendensia ton mansalita lan mansalita, ya agto la laingen nipabitar iray manunan punto lapud iyupot to lan amin so amta to nipaakar ed sakey a tema. Balet, say akaparaan a maong a manangipalapag et ikokonsidera to so toon babangatan to, dalepdepen toy tema, tan malinew ton ipresenta labat iray nakaukolan. (Uliran 15:28; 1 Corinto 2:1, 2) Nononoten to no kaunongan so amta la na estudyante tan antoran punto so nepeg ton idanet legan na pangiyaaral to. Nayarin dakel so amta na manangipalapag a makapainteres a detalye nipaakar ed sakey a tema, balet say inkalinew et agmandependi ed dakerakel ya impormasyon ya agmet nakaukolan.

17. Panon tayon natulongan iray totoo a manrason ed Kasulatan?

¹⁷ Tinulongan met nen Jesus iray totoo a manrason, imbes a basta to labat ibaga ed sikara iray katuaan. Singa bilang, diad sakey ya inkagawa et intepet to: “Anto so isisip mo, Simon? Saray arari dalin siopa so pansingilan da na impuesto ono buis? Ed saray anak da, ono ed saray sankaili?” (Mateo 17:25) Nayarin labalabay tayon ipaliwawa so Biblia, balet kaukolan tayon pugeran so inkasikatayo ta pian nibalikas na iyaaralan tayo na Biblia so inkasikato odino nipaliwawa toy pamaakaran a nasisingbat. Siempre, agtayo tetepetan iray totoo na agda nasabaan. Imbes, tekep na inkataktika,  matukoy iran ilustrasyon, tan ninonot a maong iran tepet, natulongan tayo ira a natalosan iray Makasulatan a punto a niparungtal ed saray nibase ed Biblian publikasyon tayo.

18. Anto so nalalanor ed pamaaligwas ed “dunong ed panagbangat”?

¹⁸ Tutukoyen na Kasulatan so “dunong ed panagbangat.” (2 Timoteo 4:2, NW; Tito 1:9) Mas ni so lalanoren na ontan ya abilidad nen say basta panulong labat ed sakey a mangipatlep ed saray katuaan. Kaukolan tayon panggunaetan a tulongan so iyaaralan tayo na Biblia a natalosan to so pandumaan na katuaan tan katilaan, maong tan mauges, kakabatan tan kakulangkulangan. (Mateo 6:5, 6) Legan tayon gagawaen iya tan panggugunaetan a bayuboan ed puso na sakey so panangaro ed si Jehova, nayarin natalosan to no akin a Sikatoy nepeg ton tuloken.

Maseseg a Mibiang ed Panaggaway Babangatan

19. Panon ya amin a Kristiano so mibibiang ed panaggaway babangatan?

¹⁹ Say Kristianon kongregasyon et sakey ya organisasyon a manggagaway babangatan. Sano magmaliw a babangatan so sakey, aliwa labat lan samay Tasin akaromog tan tinmulong ed sikaton makaaral ed saray ibabangat na Biblia so manliket. Singa bilang, sano anapen na grupo na saray boluntaryo so nababalang ya ugaw, sakey labat ed sikara so aktual a makaromog ed sikato. Balet sano nipawil la so ugaw ed atateng to, manliket so interon grupo a nananap. (Lucas 15:6, 7) Ontan met, say panaggaway babangatan et kimey na interon kongregasyon. Amin a Kristiano et kabiangan ed panag-anap ed saramay potensyal a babangatan nen Jesus. Tan sano onggapo lan miaral ed Kingdom Hall so sakey a balo ni, makatulong so amin a Kristianon wadtan diad pamaaralem na apresasyon to ed tuan panagdayew. (1 Corinto 14:24, 25) Kanian, amin a Kristiano so naliketan lapud nilasus libo iray onaarum a balon babangatan kada taon.

20. Anto so gawaen yo no labay yon bangatan so arum nipaakar ed katuaan na Biblia?

²⁰ Dakel a matoor a Kristiano so maliket a mangibangat ed sakey a too nipaakar ed si Jehova tan ed tuan panagdayew. Balet, anggaman ed saray pansasagpot da, nayarin agda ni agawaan itan. No ontan so situasyon yo, itultuloy a paeleten so panangaro yo ed si Jehova, magmaliw a manangiyansakit ed totoo, mabulos a mansakripisyo, maanos, tan panggunaetan a paaligwasen so dunong yo ed panagbangat. Nagkalalo ed amin, ipikasi so pilalek yon ibangat so katuaan. (Eclesiastes 11:1) Makaligliwa so pakaamta ya amin a bengatlan gagawaen yo ed panaglingkor ed si Jehova so ontulong ed panaggaway babangatan a mangiglogloria ed Dios.

Kasin Nipaliwawa Yo?

• Akin a pakasubokan na panangaro tayo ed Dios so panaggaway babangatan?

• Antoran kalidad so nakaukolan na saray manggagaway babangatan?

• Antoy nalalanor ed “dunong ed panagbangat”?

[Tepetepet Parad Panagaral]

[Litrato ed pahina 21]

Nipapatnag na saray Kristiano so aralem a panangaro ed Dios diad panggagawa ra na saray babangatan

[Litrato ed pahina 23]

Akin a nepeg ya interesado ed arum iray manggagawa na babangatan?

[Litrato ed pahina 24]

Antoray pigara ed saray kalidad a nakaukolan na saray manggagaway babangatan?

[Litrato ed pahina 25]

Amin a Kristiano so naliketan ed pakanengneng ed maabig iran resulta na panaggaway babangatan