Kultivá Kualidatnan Ku Por Yuda Bo Hasi Disipel
Kultivá Kualidatnan Ku Por Yuda Bo Hasi Disipel
“Bai anto i hasi e hendenan den tur nashon mi disipel.”—MATEO 28:19, BPK.
1. Ki aktitut i abilidatnan algun di Dios su sirbidónan den pasado tabatin mester?
TIN biaha, sirbidónan di Yehova tin ku kultivá sierto aktitut i abilidatnan ku lo yuda nan hasi su boluntat. Por ehèmpel, ora Abraham ku Sara a kumpli ku Dios su mandamentu pa bandoná e stat próspero Ur, ku tempu nan tabatin mester di kualidat- i abilidatnan di hende ku ta biba den tènt. (Hebreonan 11:8, 9, 15) Pa Josué por a guia e israelitanan i hiba nan e Tera Primintí, e mester tabatin kurashi, konfiansa den Yehova i konosementu di su Lei. (Josué 1:7-9) Den kaso di Bezaleel i Aholiab, sea kual sea e abilidatnan ku nan tabatin, sin duda esakinan a mehorá mediante Dios su spiritu. Asina e hòmbernan ei por a supervisá i tambe partisipá eksitosamente den konstrukshon di e tèmpel i trabounan relashoná ku esaki.—Eksodo 31:1-11.
2. Ki preguntanan relashoná ku e trabou di hasi disipel nos lo konsiderá?
2 Siglonan despues, Hesukristu a duna su siguidónan e enkargo aki: “Bai anto i hasi e hendenan den tur nashon mi disipel . . . siña nan kumpli ku tur loke mi a manda boso.” (Mateo 28:19, 20, BPK) Nunka promé hende a haña e privilegio di hasi un trabou asina grandi. Ki kualidatnan ta nesesario pa kumpli ku e trabou di hasi disipel? Kon nos por kultivá e kualidatnan ei?
Demostrá Amor Profundo pa Dios
3. Ki oportunidat e mandamentu pa hasi disipel ta duna nos?
3 Pa nos aserká hende i hasi esfuerso pa konvensé nan pa adorá e Dios berdadero, nos mester tin amor profundo pa Yehova. E israelitanan por a duna prueba di nan amor pa Dios dor di obedesé su mandamentunan, ofresé sakrifisionan aseptabel i alab’é ku kantika di henter nan kurason. (Deuteronomio 10:12, 13; 30:19, 20; Salmo 21:13; 96:1, 2; 138:5) Komo hasidónan di disipel, nos tambe ta kumpli ku Dios su leinan. Pero ademas di esei, nos ta ekspresá nos amor pa Yehova dor di konta otro hende tokante dje i su propósito. Nos tin ku papia ku konvikshon i skohe e palabranan korekto pa ekspresá nos sintimentunan sinsero tokante e speransa ku Dios a duna nos.—1 Tesalonisensenan 1:5; 1 Pedro 3:15.
4. Dikon Hesus tabatin plaser den siña hende tokante Yehova?
4 Debí na Hesus su amor profundo pa Yehova, e tabatin masha plaser den papia tokante Dios su propósito, e Reino i adorashon berdadero. (Lukas 8:1; Juan 4:23, 24, 31) De echo, Hesus a bisa: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:34) E siguiente palabranan di e salmista a apliká na Hesus: “Pa hasi bo boluntat, o mi Dios, ta un delisia pa mi; bo lei ta den mi kurason. Mi a proklamá bon nobo di hustisia den e kongregashon grandi; ata, lo mi no frena mi lepnan, o SEÑOR, bo sa esei.”—Salmo 40:8, 9; Hebreonan 10:7-10.
5, 6. Ki kualidat klave hasidónan di disipel tin mester?
5 Tin biaha, amor pa Dios ta motivá hende ku resientemente a siña e bèrdat di Beibel pa papia ku asina un konvikshon tokante Yehova i e Reino, ku nan ta logra konvensé otro hende pa analisá e Skritura. (Juan 1:41) Amor pa Dios ta e kualidat klave ku ta motivá nos pa partisipá den e trabou di hasi disipel. P’esei anto, laga nos mantené e amor ei bibu dor di lesa i meditá riba Dios su Palabra regularmente.—1 Timoteo 4:6, 15; Revelashon 2:4.
6 Sin duda, ta amor pa Yehova a yuda Hesukristu bira un maestro ku entusiasmo. Pero esei no tabata e úniko motibu pakiko e tabata un proklamadó di Reino efikas. Kua otro kualidat anto a hasi Hesus un hasidó di disipel eksitoso?
Mustra Interes Amoroso den Hende
7, 8. Kiko Hesus a sinti pa hende?
7 Hesus tabata preokupá pa hende i el a mustra interes sinsero den nan. Asta durante su eksistensia prehumano komo Dios su “trahadó eksperto,” e tabata enkantá ku kosnan ku tin di haber ku humanidat. (Proverbionan 8:30, 31) Komo hende riba tera, Hesus tabatin kompashon pa hende i a refreská esnan ku a bini serka dje. (Mateo 11:28-30) Hesus a reflehá Dios su amor i kompashon, i esaki a atraé hende na e adorashon di e úniko Dios berdadero. Tur klase di hende a skucha Hesus pasobra el a mustra interes amoroso den nan i den nan situashon.—Lukas 7:36-50; 18:15-17; 19:1-10.
8 Ora un sierto hòmber a puntra Hesus kiko e mester hasi pa heredá bida eterno, ‘Hesus a wak é i a stim’é.’ (Marko 10:17-21) Relashoná ku sierto personanan ku Hesus a siña na Betania, nos ta lesa: “Hesus tabata stima Marta i su ruman muhé i Lázaro.” (Juan 11:1, 5) Hesus tabata asina interesá den hende ku el a sakrifiká su sosiegu nesesario pa e por a siña nan. (Marko 6:30-34) E interes profundo i amoroso ei den su próhimo a pone ku Hesus tabatin mas éksito den atraé hende na adorashon berdadero ku kualke otro persona.
9. Ki aktitut Pablo tabatin komo un hasidó di disipel?
9 Apòstel Pablo tambe tabata profundamente interesá den e hendenan ku e tabata prediká na dje. Por ehèmpel, el a bisa esnan ku a bira kristian na Tesalónika: “Teniendo . . . un amor grandi pa boso, a agradá nos pa no solamente kompartí e evangelio di Dios ku boso, ma tambe nos mes bida, pasobra boso a bira masha stimá pa nos.” Komo resultado di Pablo su esfuersonan amoroso, algun hende na Tesalónika a ‘kombertí di e diosnan falsu na Dios, pa sirbi un Dios bibu i berdadero.’ (1 Tesalonisensenan 1:9; 2:8) Si nos tin e mesun interes sinsero den hende ku Hesus i Pablo tabatin, nos tambe por eksperensiá e goso di mira e bon nobo alkansá kurason di esnan ‘ku tin e disposishon korekto pa bida eterno.’—Echonan 13:48, NW.
Desplegá un Aktitut di Sakrifisio Propio
10, 11. Dikon nos tin mester di un aktitut di sakrifisio propio ora nos ta purba hasi disipel?
10 Hasidónan di disipel ku tin éksito tin un aktitut di sakrifisio propio. Definitivamente nan no ta mira hañamentu di rikesa komo e kos di mas importante. De echo, Hesus a bisa su disipelnan: “Ki difísil lo ta pa esnan ku ta riku drenta e reino di Dios!” E disipelnan a keda sorprendí ora nan a tende esaki, pero Hesus a agregá: “Yunan, ki difísil ta pa drenta e reino di Dios! Ta mas fásil pa un kamel pasa dor di wowo di un angua, ku pa un hende riku drenta e reino di Dios.” (Marko 10:23-25) Hesus a rekomendá su disipelnan pa hiba un bida simpel pa asina nan por konsentrá riba e trabou di hasi disipel. (Mateo 6:22-24, NW, 33) Dikon un aktitut di sakrifisio propio ta yuda nos hasi disipel?
11 Pa nos por siña hende tur e kosnan ku Hesus a manda, nos tin ku hasi hopi esfuerso. Generalmente un hasidó di disipel ta hasi esfuerso pa tur siman e kondusí un estudio di Beibel ku un persona interesá. Algun proklamadó di Reino a kambia nan trabou fultaim pa unu partaim pa asina nan por tin mas oportunidat pa haña hende sinsero. Míles di kristian a siña un otro idioma pa nan por alkansá hende di sierto gruponan étniko den nan área. Otro hasidónan di disipel a bandoná nan kas i muda pa otro área òf pais pa partisipá mas plenamente den e kosecha. (Mateo 9:37, 38) Tur e kambionan aki ta eksigí un aktitut di sakrifisio propio. Pero mas ta nesesario pa nos por ta un hasidó di disipel efikas.
Tene Pasenshi, Pero no Pèrdè Tempu
12, 13. Dikon pasenshi ta asina importante den hasimentu di disipel?
12 Pasenshi ta un otro kualidat ku ta yuda nos hasi disipel. Nos mensahe kristian ta rekerí akshon urgente, pero hopi bes e trabou di hasi disipel ta rekerí basta tempu i pasenshi. (1 Korintionan 7:29) Hesus no tabata impasiente ku su mitar ruman Santiago. Ounke Santiago aparentemente tabata bon konosí ku Hesus su aktividatnan di prediká, pa un periodo di tempu tabatin algu ku a strob’é di bira disipel. (Juan 7:5) Sin embargo, ta parse ku Santiago a bira disipel durante e periodo kòrtiku entre Kristu su morto i Pentekòste di aña 33 di nos era; pasobra segun e Skritura probablemente e tambe a reuní huntu ku su mama, su rumannan i e apòstelnan pa hasi orashon. (Echonan 1:13, 14) Santiago a progresá bon den sentido spiritual i despues a asumí responsabilidatnan pisá den e kongregashon kristian.—Echonan 15:13; 1 Korintionan 15:7.
13 Meskos ku kunukeronan, kristiannan ta kultivá kosnan ku hopi bes ta krese pokopoko. Esakinan ta entre otro, komprondementu di e Palabra di Dios, amor pa Yehova i un aktitut manera esun di Kristu. Esaki ta eksigí pasenshi. Santiago a skirbi: “Tene pasenshi, rumannan, te na e binida di Señor. At’e kunukero ta spera e produkto presioso di e tera, teniendo pasenshi kuné, te ora ku e haña e awaserunan trempan i lat. Boso tambe tene pasenshi; fortalesé boso kurason, pasobra e binida di Señor ta serka.” (Santiago 5:7, 8) Asina Santiago tabata urgi su kompañeronan di fe pa ‘tene pasenshi te n’e binida òf presensia di Señor.’ Si e disipelnan no tabata komprondé algu, ku pasenshi Hesus tabata splika e asuntunan òf ilustrá nan. (Mateo 13:10-23; Lukas 19:11; 21:7; Echonan 1:6-8) Awor ku Señor ta presente, nos tin ku manifestá e mesun pasenshi ei segun ku nos ta hasi esfuerso pa hasi disipel. Hende ku ta bira disipel di Hesus den nos tempu mester haña instrukshon ku pasenshi.—Juan 14:9.
14. Ounke nos tin pasenshi, kon nos por usa nos tempu na un manera sabí komo hasidónan di disipel?
14 Ounke nos tin pasenshi, e palabra no ta duna fruta den mayoria di hende ku nos ta kuminsá studia Beibel kuné. (Mateo 13:18-23) P’esei, despues ku nos a hasi tur esfuerso rasonabel pa yuda nan, ta sabí pa nos stòp di dediká tempu na e personanan ei i buska otro hende ku probablemente tin mas apresio pa e bèrdat di Beibel. (Eklesiastés 3:1, 6) Klaru ku asta hende apresiativo por tin mester di yudansa adishonal pa kambia nan punto di bista, aktitut i nan prioridatnan den bida. Pues, nos ta tene pasenshi meskos ku Hesus a tene pasenshi ku su disipelnan ku tabatin problema pa desaroyá e aktitut korekto.—Marko 9:33-37; 10:35-45.
Desaroyá e Arte di Siña
15, 16. Dikon ta importante pa nos hasi un bon preparashon i ser simpel den nos manera di siña ora nos ta hasi disipel?
15 Amor pa Dios, interes den hende, un aktitut di sakrifisio propio i pasenshi ta faktornan importante pa logra éksito den hasimentu di disipel. Pero nos mester desaroyá abilidatnan di siña tambe, pasobra nan lo yuda nos splika kos na un manera kla i no kompliká. Por ehèmpel, hopi di e dichonan di e Gran Maestro, Hesukristu, tabata spesialmente efektivo pa motibu di nan simplesa. Probablemente bo ta kòrda algun di e deklarashonnan di Hesus manera esakinan: “Montoná tesoro pa boso mes den shelu.” “No duna kachó loke ta santu.” “Sabiduria ta wòrdu hustifiká pa medio di su obranan.” “Duna Cesar loke ta di Cesar, i Dios loke ta di Dios.” (Mateo 6:20; 7:6; 11:19; 22:21) Klaru ku no ta deklarashonnan kòrtiku so Hesus a hasi. El a siña hende na un manera kla i a duna splikashon ora esaki tabata apropiá. Kon bo por imitá Hesus su estilo di siña hende?
16 Preparashon ta e klave pa siña hende na un manera simpel i kla. Un minister òf hasidó di disipel ku no ta prepará tin e tendensia di papia di mas. Práktikamente e ta hoga e puntonan prinsipal den un avalancha di palabra, bisando tur loke e sa di un tópiko. Na kontraste, un minister bon prepará ta pensa riba e persona ku e ta instruí, meditá riba e tópiko i na un manera kla ta presentá solamente e informashon nesesario. (Proverbionan 15:28; 1 Korintionan 2:1, 2) E ta tene na mente kuantu informashon e studiante sa kaba i kua puntonan e tin ku enfatisá durante e estudio. Ounke e minister podisé sa hopi detaye interesante tokante e tópiko, pa su manera di siña por ta kla, e tin ku eliminá informashon innesesario.
17. Kon nos por yuda hende rasoná riba e Skritura?
17 Ademas, Hesus a siña hende rasoná en bes di djis duna nan informashon. Por ehèmpel na un okashon, el a puntra: “Kiko bo ta pensa, Simon? Ken e reinan di tera ta kobra tributo òf belasting: nan yu hòmbernan òf stranheronan?” (Mateo 17:25) Podisé nos ta gusta duna splikashon di Beibel asina tantu ku nos tin ku ehersé dominio propio pa laga e studiante ekspresá su mes òf splika un asuntu ku nos ta konsiderando kuné durante un estudio di Beibel. Ta klaru ku nos no tin ku basha hende ku pregunta. Mas bien, ku takto, ku ilustrashon- i preguntanan bon pensá nos por yuda nan komprondé e puntonan bíbliko ku nos publikashonnan basá riba Beibel ta presentá.
18. Kiko desaroyá e “arte di siña” ta enserá?
18 E Skritura ta papia di e “arte di siña.” (2 Timoteo 4:2, NW; Tito 1:9, NW) E abilidat di siña ei ta enserá muchu mas ku yuda un persona memorisá informashon. Nos tin ku yuda un studiante di Beibel komprondé e diferensia entre bèrdat i falsedat, entre bon i malu i entre sabiduria i bobedat. Segun ku nos ta hasi esaki i ta hasi esfuerso pa kultivá amor pa Yehova den kurason di e persona, lo e por komprondé dikon e mester obedesé Yehova.
Partisipá ku Entusiasmo den Hasimentu di Disipel
19. Den ki sentido tur kristian ta yuda den hasimentu di disipel?
19 E kongregashon kristian ta un organisashon ku ta hasi disipel. Ora un persona nobo bira disipel, no ta e Testigu di Yehova ku a hañ’é i a yud’é komprondé loke Beibel ta siña ta e úniko ku tin motibu pa alegrá. Ora hende ta organisá un grupo pa buska un mucha ku a pèrdè, práktikamente ta ún miembro di e grupo so kisas ta haña e mucha. Pero ora e mucha ta serka su mayornan bèk, ta tur hende ku tabata enbolbí den e búskeda ta alegrá. (Lukas 15:6, 7) Asina tambe, e trabou di hasi disipel ta trabou di un tim. Tur kristian ta partisipá den e búskeda di personanan ku lo por bira disipel di Kristu. I ora un persona nobo kuminsá asistí na Salòn di Reino, tur kristian presente ta yuda oumentá su apresio pa adorashon berdadero. (1 Korintionan 14:24, 25) P’esei anto, tur kristian por alegrá ku sientos di míles di persona ta bira disipel tur aña.
20. Kiko bo mester hasi si bo ke siña otro hende e bèrdat di Beibel?
20 Hopi kristian fiel lo ta masha kontentu pa siña un persona tokante Yehova i adorashon berdadero. Sin embargo, apesar di tur nan esfuerso kisas nan no tabatin oportunidat di hasi esei. Si esei ta e kaso ku bo, sigui fortalesé bo amor pa Yehova, mustra interes den hende, manifestá e aktitut di sakrifisio propio, ehersé pasenshi i hasi esfuerso pa mehorá bo abilidatnan di siña. Mas ku tur kos, hasi orashon tokante bo deseo pa siña hende e bèrdat. (Eklesiastés 11:1) Konsolá bo mes ku e pensamentu ku tur loke bo hasi den e sirbishi di Yehova ta kontribuí na e trabou di hasi disipel ku ta glorifiká Dios.
Bo Por Splika?
• Dikon hasimentu di disipel ta un prueba di nos amor pa Dios?
• Ki kualidatnan hasidónan di disipel mester kultivá?
• Kiko e “arte di siña” ta enserá?
[Preguntanan di Estudio]
[Plachi na página 13]
Dor di hasi disipel, kristiannan ta demostrá nan amor profundo pa Dios
[Plachi na página 15]
Dikon hasidónan di disipel mester ta interesá den otro hende?
[Plachi na página 16]
Ki kualidatnan hasidónan di disipel mester kultivá?
[Plachi na página 17]
Tur kristian ta keda emoshoná pa mira e ekselente resultado di e trabou di hasi disipel