Sundoga ang Dakong Tighimog Tinun-an

“Tagda kon giunsa ninyo pagpatalinghog.”—LUCAS 8:18.

1, 2. Nganong angay mong tagdon ang paagi ni Jesus sa pagpakiglabot sa mga tawo panahon sa iyang ministeryo?

 GITUMAN ni Jesu-Kristo ang iyang buluhaton ingong Dakong Magtutudlo ug Tighimog Tinun-an sa dihang giingnan niya ang iyang mga sumusunod: “Tagda kon giunsa ninyo pagpatalinghog.” (Lucas 8:16-18) Kanang prinsipyoha mapadapat sa imong ministeryo ingong Kristohanon. Kon tagdon nimo ang pagtulon-an bahin sa Diyos ug sa iyang katuyoan, imo kanang ipadapat ug ikaw mahimong usa ka epektibong magmamantala sa Gingharian. Hinuon, dili ka makadungog sa tingog ni Jesus karon, apan makabasa ka sa iyang gisulti ug gibuhat sumala sa gipadayag diha sa Kasulatan. Unsay gipadayag niini bahin sa paagi sa pagpakiglabot ni Jesus sa mga tawo panahon sa iyang ministeryo?

² Si Jesus usa ka maayo kaayong magwawali sa maayong balita ug iladong magtutudlo sa Kasulatan. (Lucas 8:1; Juan 8:28) Ang paghimog mga tinun-an naglangkit sa pagwali ug sa pagpanudlo, apan ang pipila ka Kristohanon nga maayong mowali dili epektibong manudlo. Samtang ang buluhatong pagwali naglangkit lang sa pagmantala sa usa ka mensahe, ang pagpanudlo sa mga tawo bahin kang Jehova ug sa iyang mga katuyoan naglakip sa pag-ugmad gayod ug usa ka relasyon tali sa tighimog tinun-an ug sa gitun-an. (Mateo 28:19, 20) Mahimo kini pinaagi sa pagsundog kang Jesu-Kristo, ang Dakong Magtutudlo ug Tighimog Tinun-an.—Juan 13:13.

3. Unsay mahimong epekto kon imong sundogon si Jesus sa imong paghimog mga tinun-an?

³ Kon imong sundon ang mga pamaagi sa pagpanudlo ni Jesus, imong masunod ang tambag ni apostol Pablo: “Magpadayon sa paglakaw sa kaalam ngadto sa mga tagagawas, nga magpalit sa nahiangay nga panahon alang sa inyong kaugalingon. Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.” (Colosas 4:5, 6) Ang pagsundog kang Jesus sa paghimog mga tinun-an nagkinahanglag paningkamot, apan kini makapaepektibo sa  imong pagpanudlo kay kini motabang nimo sa “pagtubag sa matag usa” sumala sa iyang panginahanglan.

Gidasig ni Jesus ang Uban sa Pagsulti

4. Nganong makaingon kita nga si Jesus usa ka maayong tigpatalinghog?

⁴ Sukad sa pagkabata, naandan ni Jesus ang pagpatalinghog sa mga tawo ug siya nagdasig kanila sa pagpahayag sa ilang mga hunahuna. Pananglitan, sa 12 anyos pa siya, nakaplagan siya sa iyang mga ginikanan taliwala sa mga magtutudlo sa templo, nga “nagpatalinghog kanila ug nangutana kanila.” (Lucas 2:46) Wala moadto sa templo si Jesus aron pakaulawan ang mga magtutudlo tungod sa iyang nahibaloan. Miadto siya didto aron sa pagpatalinghog, bisan tuod siya nangutana usab. Ang iyang pagkamaayong tigpatalinghog lagmit maoy usa ka hiyas nga tungod niana siya giuyonan sa Diyos ug sa mga tawo.—Lucas 2:52.

5, 6. Nganong nahibalo kita nga si Jesus nagpatalinghog sa mga gipahayag sa iyang mga gitudloan?

⁵ Human sa pagbawtismo ug pagdihog kaniya ingong Mesiyas, interesado gihapon si Jesus sa pagpatalinghog sa mga tawo. Siya wala lang maghunahuna sa iyang gitudlo kondili gitagad usab niya ang mga tawo nga miduol kaniya. Kasagaran, siya mohunong kadiyot, mangutana kon unsay ilang hunahuna, ug maminaw sa ilang tubag. (Mateo 16:13-15) Pananglitan, human mamatay ang igsoon ni Marta nga si Lazaro, si Jesus miingon kaniya: “Ang matag usa nga buhi ug magpasundayag ug pagtuo kanako dili na gayod mamatay. Dayon nangutana siya: “Motuo ka ba niini?” Ug dayag nga naminaw si Jesus sa pagtubag ni Marta: “Oo, Ginoo; ako nagatuo nga ikaw mao ang Kristo nga Anak sa Diyos.” (Juan 11:26, 27) Seguradong nalipay gayod si Jesus sa pagkadungog sa mga pulong ni Marta nga nagpahayag sa iyang pagtuo!

⁶ Sa dihang gibiyaan si Jesus sa daghan niyang tinun-an, buot niyang mapatalinghogan ang panghunahuna sa iyang mga apostoles. Mao nga siya nangutana: “Buot ba usab ninyong mobiya?” Mitubag si Simon Pedro: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.” (Juan 6:66-69) Nalipay gayod si Jesus nianang mga pulonga! Ang susamang pahayag sa pagtuo sa usa ka ginatun-an sa Bibliya seguradong makahatag usab kanimog kalipay.

Si Jesus Matinahorong Nagpatalinghog

7. Nganong daghang Samarianhon ang mituo kang Jesus?

⁷ Ang laing rason nga si Jesus maoy epektibong tighimog tinun-an mao nga siya matinagdanon sa mga tawo ug matinahorong nagpatalinghog kanila. Pananglitan, dihay higayon nga gisangyawan ni Jesus ang usa ka babayeng Samarianhon duol sa atabay ni Jacob sa Sikar. Sa ilang panag-estoryahay, dili kay si Jesus ray nagsigeg sulti; siya nagpatalinghog usab sa gisulti sa babaye. Samtang nagpatalinghog kaniya, nasabtan ni Jesus nga siya interesado bahin sa pagsimba ug giingnan siya nga ang gipangita sa Diyos mao kadtong magsimba Kaniya sa espiritu ug sa kamatuoran. Si Jesus nagmatinahoron ug nagmatinagdanon niadtong babayhana, nga human niadto iyang gisultihan ang uban bahin kang Jesus, ug “daghan sa mga Samarianhon sa maong siyudad ang nagbutang ug pagtuo kaniya tungod sa pulong sa babaye.”—Juan 4:5-29, 39-42.

8. Sa unsang paagi ang hilig sa tawo nga mopahayag sa iyang opinyon makatabang kanimo sa pagsugod ug sangyaw?

⁸ Ang mga tawo kasagarang gusto nga mopahayag sa ilang mga opinyon. Pananglitan, ang mga molupyo sa karaang Atenas gustong mopahayag sa ilang mga opinyon ug magpatalinghog ug bag-ong mga impormasyon. Tungod niini, si apostol Pablo nakapakigpulong didto sa Areopago nianang siyudara, ug daghan ang nanuo. (Buhat 17:18-34) Sa dihang mosugod ka sa pagsangyaw sa usa ka tagbalay karon, ikaw mahimong moingon, “Nia ko kay interesado ko sa imong opinyon bahin sa [ulohan].” Paminawa ang iyang opinyon, ug komentohi kini o magpatungha kag usa ka pangutana bahin niana. Dayon malulotong ipakita kaniya kon unsay giingon sa Bibliya bahin nianang ulohana.

 Nahibalo si Jesus Kon Unsaon Pagsugod ang Pagpakig-estorya

9. Unsay gibuhat ni Jesus sa wala pa niya ‘buksi sa bug-os ang Kasulatan’ alang kang Cleopas ug sa iyang kauban?

⁹ Hanas gayod kaayo si Jesus nga mogamit ug mga pulong. Gawas pa sa iyang pagkamaayong tigpatalinghog, kasagarang nahibalo siya kon unsay gihunahuna sa mga tawo, ug nahibalo gayod siya kon unsay iyang isulti. (Mateo 9:4; 12:22-30; Lucas 9:46, 47) Sa pag-ilustrar: Wala madugay human mabanhaw si Jesus, duha sa iyang mga tinun-an naglakaw paingon sa Emmaus gikan sa Jerusalem. Ang asoy sa Ebanghelyo nag-ingon: “Samtang sila nagkokabildohay ug naghisgot, si Jesus miduol ug milakaw kuyog nila; apan ang ilang mga mata napugngan sa pagkaila kaniya. Siya miingon kanila: ‘Unsa kining mga butanga nga inyong gilantugian samtang kamo nanglakaw?’ Ug sila nanghunong nga masulub-on ang mga nawong. Sa pagtubag ang usa nga ginganlag Cleopas miingon kaniya: ‘Nagapuyo ka ba ingon nga usa ka langyaw nga nag-inusara sa Jerusalem ug maong wala mahibalo sa mga butang nga nahitabo niini niining mga adlawa?’ Ug siya miingon kanila: ‘Unsang mga butanga?’” Naminaw ang Dakong Magtutudlo samtang ilang gisaysay nga si Jesus nga Nasaretnon nagtudlo sa mga tawo, naghimog mga milagro, ug gipatay. Ug dihay mga tawong nanag-ingon nga si Jesus nabanhaw gikan sa mga patay. Gipasagdan lang ni Jesus si Cleopas ug ang iyang kauban sa pagsulti. Dayon gipatin-aw ni Jesus kon unsay angay nilang mahibaloan, nga “gibuksan sa bug-os ang mga Kasulatan” alang kanila.—Lucas 24:13-27, 32.

10. Sa unsang paagi imong mahibaloan kon unsay relihiyosong panglantaw sa usa ka tawo nga imong masangyawan?

¹⁰ Tingali wala ka mahibalo kon unsay relihiyosong panglantaw sa usa ka tagbalay. Aron mahibaloan mo kana, makaingon ka nga gusto mong mamati kon unsay hunahuna sa mga tawo bahin sa pag-ampo. Dayon makapangutana ka, “Sa imong hunahuna, may magpatalinghog ba gayod sa atong mga pag-ampo?” Daghan tingali ang ibutyag sa tubag bahin sa panghunahuna ug sa relihiyon nianang tawhana. Kon siya relihiyoso, ikaw dugang makasusi sa iyang panghunahuna pinaagi sa pagpangutana, “Nagtuo ka ba nga dunggon sa Diyos ang tanang pag-ampo, o aduna bay mga pag-ampo nga dili niya dunggon?” Kana mahimong moresulta sa maayong pag-estoryahay. Kon nahiangay ang pagbasag teksto sa Kasulatan, magmataktikanhon sa paghimo niana nga dili sawayon ang iyang gituohan. Kon giganahan siyang naminaw kanimo, lagmit gayod nga malipay siya nga ikaw mobalik. Apan unsa man kon siya may pangutana nga dili nimo matubag? Makapanukiduki ka bahin niana ug mobalik nga andam sa paghatag ug ‘katarongan sa imong paglaom, nga magbuhat niana uban ang kalumo sa buot ug halawom nga pagtahod.’—1 Pedro 3:15.

Gitudloan ni Jesus ang mga Takos

11. Unsay makatabang nimo sa pagkaplag niadtong mga takos tudloan?

¹¹ Ang hingpit nga tawong si Jesus may katakos sa pag-ila sa mga tawo nga takos tudloan. Kita mas malisdan nga mangita niadtong “hustong nakiling alang sa kinabuhing walay kataposan.” (Buhat 13:48) Nalisdan usab ang mga apostoles nga gisugo ni Jesus: “Sa bisan unsang siyudad o balangay nga kamo mosulod, pangitaa kon kinsa didto ang takos.” (Mateo 10:11) Sama  sa mga apostoles ni Jesus, kinahanglan nimong pangitaon ang mga tawong andam maminaw ug magpatudlo sa kamatuoran bahin sa Bibliya. Makaplagan nimo ang mga takos pinaagi sa pagpatalinghog pag-ayo sa tanan nimong ikaestorya, nga matikdan ang tinamdan sa matag usa kanila.

12. Sa unsang paagi makapadayon ka sa pagtabang sa usa ka tawong interesado?

¹² Inigbiya nimo sa usa ka tawo nga nagpakitag interes sa mensahe sa Gingharian, maayong ipadayon nimo ang paghunahuna kon unsang mga kamatuoran sa Bibliya ang angay pa niyang makat-onan. Kon imong isulat kon unsay imong nahibaloan human makig-estorya sa usa ka tawo bahin sa maayong balita, kini makatabang kanimo sa pagpadayon sa pagtabang kaniya nga mouswag ang iyang kahibalo bahin sa Bibliya. Panahon sa mga balikduaw, angay kang maminaw pag-ayo aron dugang kang mahibalo bahin sa iyang mga gituohan, tinamdan, o mga kahimtang.

13. Unsay makatabang kanimo aron imong mahibaloan kon unsay hunahuna sa usa ka tawo bahin sa Bibliya?

¹³ Sa unsang paagi makadasig ka sa mga tawo sa pagpahayag kon unsay ilang hunahuna bahin sa Pulong sa Diyos? Diha sa pipila ka dapit, epektibo ang pagpangutana, “Nakasulay ka na bag basa sa Bibliya aron masabtan kini?” Ang tubag nianang pangutanaha sagad magbutyag sa tinamdan sa usa ka tawo bahin sa Diyos o sa Bibliya. Ang laing paagi mao ang pagbasag usa ka teksto ug unya mangutana, “Makataronganon ba kana kanimo?” Sama kang Jesus, mahimong nagmalamposon ka sa imong ministeryo pinaagi sa pagsuknag haom nga mga pangutana. Apan, aniay usa ka pasidaan.

Epektibong Gigamit ni Jesus ang mga Pangutana

14. Sa unsang paagi makapakita kag interes sa panghunahuna sa mga tawo nga dili sila sukitsukiton?

¹⁴ Magpakitag interes sa panghunahuna sa uban sa paagi nga dili sila mapakaulawan. Sundoga ang pamaagi ni Jesus. Ang iyang mga pangutana mataktikanhon ug makapukaw sa kaisipan. Si Jesus maoy mabination usab nga tigpaminaw nga nakapadasig sa sinserong mga tawo ug sila wala magkinto kaniya. (Mateo 11:28) Ang tanang matang sa mga tawo wala magpanuko sa pagduol kaniya aron magpakitambag bahin sa ilang mga suliran. (Marcos 1:40; 5:35, 36; 10:13, 17, 46, 47) Aron dili managana ang mga tawo sa pagpahayag kon unsay ilang panghunahuna bahin sa Bibliya ug mga pagtulon-an niini, ayaw gayod silag sukitsukita.

15, 16. Sa unsang paagi makadani ka sa mga tawo aron makig-estorya kanimo bahin sa relihiyosong mga butang?

¹⁵ Gawas pa sa epektibong paggamit ug mga pangutana, makasugod ka sa estoryahay pinaagi sa pagsultig makaiikag nga butang ug unya pagpaminaw sa tubag. Pananglitan, si Jesus miingon kang Nicodemo: “Gawas kon ang usa ipanganak pag-usab, dili siya makakita sa gingharian sa Diyos.” (Juan 3:3) Kanang mga pulonga nakapaikag gayod kang Nicodemo mao nga siya nangutana ug dayon naminaw kang Jesus. (Juan 3:4-20) Makadani ka sa mga tawo sa pagpakig-estorya kanimo sa susamang paagi.

¹⁶ Karong panahona, ang pagtungha sa bag-ong mga relihiyon maoy giestoryahan sa Aprika, Latin Amerika, ug Sidlakang Uropa. Nianang mga dapita, kasagarang masugdan mo ang estoryahay pinaagi sa pag-ingon: “Natingala ka ba kon nganong adunay daghan kaayong relihiyon? Naglaom ko nga sa dili na madugay ang tanang tawo gikan sa tanang kanasoran magkahiusa diha sa matuod nga pagsimba. Gusto mo bang mahitabo kana?” Pinaagi sa pagsultig makaiikag nga butang bahin sa imong paglaom, lagmit makadasig ka sa mga tawo sa pagpahayag sa ilang opinyon. Ug mas daling matubag ang mga pangutana kon kana adunay duha ka posibleng tubag. (Mateo 17:25) Human makatubag ang tagbalay sa imong pangutana, tubaga usab kana uban ang usa o duha ka kasulatan. (Isaias 11:9; Sofonias 3:9) Pinaagi sa pagpaminaw pag-ayo ug pagmatikod sa tubag sa tagbalay, lagmit makahibalo ka kon unsay inyong hisgotan sa imong pagbalik.

Si Jesus Nagpatalinghog sa mga Bata

17. Unsay nagpakita nga interesado si Jesus sa mga bata?

¹⁷ Si Jesus interesado sa mga hamtong ingon man sa mga bata. Nahibalo siya bahin sa mga dula sa mga bata ug sa ilang gipanulti. Iyang  awhagon usahay ang mga bata sa pagduol kaniya. (Lucas 7:31, 32; 18:15-17) Apil ang mga bata sa panon sa mga tawo nga naminaw kang Jesus. Sa dihang naninggit ang mga bata sa pagdayeg sa Mesiyas, gitagad kadto ni Jesus ug iyang gipadayag nga kadto gitagna sa Kasulatan. (Mateo 14:21; 15:38; 21:15, 16) Karong panahona, daghang kabataan ang nahimong mga tinun-an ni Jesus. Busa sa unsang paagi imo silang matabangan?

18, 19. Sa unsang paagi imong matabangan ang imong anak nga mahimong tinun-an ni Jesus?

¹⁸ Sa pagtabang sa imong anak nga mahimong tinun-an, kinahanglan nimong patalinghogan siya. Kinahanglan nimong masayran kon unsay iyang gihunahuna nga basin sukwahi sa panghunahuna ni Jehova. Bisag unsa pay isulti sa imong anak, maalamon nga ang imong reaksiyon unhan ug pagdayeg. Dayon makagamit kag haom nga mga kasulatan aron matabangan ang imong anak nga makasabot sa panghunahuna ni Jehova.

¹⁹ Ang mga pangutana makatabang sa pagtugkad sa hunahuna sa mga bata. Apan ang mga bata dili usab gustong sukitsukiton sama ra sa mga hamtong. Imbes pabug-atan ang imong anak pinaagi sa pagpatubag ug lisod nga mga pangutana, dili ba mas maayo nga may mubo ka nga isulti bahin sa imong kaugalingon? Depende sa inyong gihisgotan, tingali makaingon ka nga kaniadto ikaw maulawon ug ipatin-aw kon nganong kanay imong gibati. Dayon makapangutana ka, “Mao ba usab kanay imong gibati?” Ang tubag sa imong anak mahimong motultol ngadto sa mapuslanon ug makapadasig nga panaghisgot sa Kasulatan.

Magpadayon sa Pagsundog sa Dakong Tighimog Tinun-an

20, 21. Nganong angay kang magpatalinghog pag-ayo diha sa imong paghimog tinun-an?

²⁰ Hinungdanon gayod ang pagpatalinghog sa dihang makig-estorya ka sa imong anak o kang bisan kinsa. Sa pagkatinuod, usa kini ka pagpahayag sa imong gugma. Pinaagi sa pagpatalinghog, ikaw nagmapainubsanon, nagmatinahoron ug nagpakitag mahigugmaong konsiderasyon sa tawo nga nagsulti. Hinuon, ang pagpatalinghog nagpasabot nga tagdon mo usab ang reaksiyon sa nawong ug paningog sa usa ka tawo.

²¹ Samtang nagsangyaw, paminawa pag-ayo ang mga tagbalay. Kon maminaw kag maayo sa ilang isulti, hayan masabtan mo kon unsa ang mga kamatuoran sa Bibliya nga makapadani gayod kanila. Dayon paningkamoting tabangan sila pinaagi sa pagpadapat sa lainlaing mga pamaagi sa pagpanudlo ni Jesus. Kon buhaton mo kana, balosan kag kalipay ug katagbawan tungod kay imong ginasundog ang Dakong Tighimog Tinun-an.

Unsay Imong Tubag?

• Giunsa pagdasig ni Jesus ang uban sa pagpahayag sa ilang mga hunahuna?

• Nganong nagpatalinghog si Jesus niadtong iyang gitudloan?

• Sa unsang paagi makagamit kag mga pangutana diha sa imong ministeryo?

• Unsay imong mahimo sa pagtabang sa mga bata nga mahimong mga tinun-an?

[Mga Pangutana sa Pagtuon]

[Hulagway sa panid 28]

Sa dihang magsangyaw, patalinghog pag-ayo

[Hulagway sa panid 30]

Gisundog nato si Jesus sa dihang gitabangan nato ang mga bata nga mahimong mga tinun-an