Jajapókena pe mboʼehára ikatupyryvéva ojapohaguéicha

“Pejepyʼamongeta porãmi mbaʼéichapa pehendu” (LUCAS 8:​18, JMP.)

1, 2. Mbaʼérepa jahechavaʼerã mbaʼéichapa Jesús oporotratavaʼekue opredika jave?

 JESUCRISTO, pe Mboʼehára Ikatupyryvéva oporomboʼe hag̃ua, heʼivaʼekue hemimboʼekuérape: “Pejepyʼamongeta porãmi mbaʼéichapa pehendu” (Lucas 8:​16-18, JMP). Péro ko mbaʼe heʼi enterove kristiánope, ndahaʼéi chupekuéra añónte. Upeichaite, opavave ohendúva la Biblia omboʼéva ikatúta ojapo upéicha ha opredikakuaa. Nañahendúiramo jepe Jesús oñeʼẽrõ ñandéve, ñahendu chupe jaleéramo la Biblia, omombeʼúva ñandéve  mbaʼépa heʼi ha ojapovaʼekue. Ha umíva apytépe jajuhúta mbaʼéichapa oporotratavaʼekue opredika jave. Ha mbaʼépa heʼi la Biblia upévare?

² Jesús opredikakuaa ha ikatupyryetereivaʼekue omboʼe hag̃ua Ñandejára Ñeʼẽ (Lucas 8:1; Juan 8:28). Koʼág̃a avei japredika ha ñamboʼevaʼerã ñande rapichakuérape oiko hag̃ua chuguikuéra Jesús remimboʼe. Upéicharamo jepe, oĩ ikatupyrýva opredika hag̃ua, péro ndaikatúiva oporomboʼe porã. Japredika jave ñamombeʼúnte pe marandu porã, péro ñamboʼe hag̃ua Jehová rembipota ha umi mbaʼe haʼe ojapótava tekotevẽ ñañemoag̃uive ñande rapicháre (Mateo 28:​19, 20). Upearã tekotevẽ jajapo Jesucristo ojapohaguéicha, pe Mboʼehára Ikatupyryvéva oporomboʼe hag̃ua (Juan 13:13).

3. Mbaʼépa jahupytýta ñañehaʼãmbaitéramo ñaporomboʼe Jesús ojapohaguéicha?

³ Ñamboʼéramo Jesús ojapohaguéicha, jajapotañaína apóstol Pablo heʼivaʼekue: “Peikokuaákena umi ogueroviaʼỹva ndive, peiporu porã pe ára. Peñeʼẽ porã [memékena] ha ani peneñeʼẽ pohýi ha peikuaavaʼerã mbaʼéichapa peñeʼẽvaʼerã peteĩteĩme” (Colosenses 4: 5, 6, BNP). Jahechakuaa ñañehaʼãmbaitevaʼerãha ñaporomboʼe hag̃ua Jesús ojapohaguéicha. Upéicha ñandekatupyryvéta ha jaikuaátama ‘mbaʼéichapa ñañeʼẽvaʼerã peteĩteĩme’.

Jesús omokyreʼỹvaʼekue opavavépe omombeʼu hag̃ua oñandúva

4. Mbaʼérepa ikatu jaʼe Jesús ohendukuaahague?

⁴ Imitã guive voi Jesús ohendu ha omokyreʼỹ opavavépe heʼi hag̃ua mbaʼéichapa ohecha peteĩ mbaʼe. Upéicha ojapo orekórõ guare 12 áño, isy ha itúva ojuhu hese Ñandejára rógape umi mboʼehára ndive, “ohendu ha oporanduhína chupekuéra” (Lucas 2:46). Jesús ohovaʼekue ohendu hag̃ua chupekuéra, oporandúramo jepe avei heta mbaʼe. Ndohói upépe ohechauka hag̃ua iñaranduha térã omotĩ hag̃ua chupekuéra. Jehová ha umi tapichakuéra oiméne oguerohoryrakaʼe Jesúspe ohendukuaahaguére (Lucas 2:52).

5, 6. Mbaʼe ehémplopa ohechauka Jesús oporohenduhague omboʼe jave?

⁵ Jesús ojevautisa rire ha Jehová oiporavo chupe Mesíasramo, osegivaʼekue oporohendu. Haʼe ndahaʼéi oporomboʼénteva ha nohendúi hapichakuérape. Heta vése haʼe ohaʼarõʼimi ha ojerure chupekuéra heʼi hag̃ua mbaʼéichapa ohecha peteĩ mbaʼe ha ohendu chupekuéra (Mateo 16:​13-15). Upéicha oiko omanórõ guare Lázaro, Marta ermáno. Jesús heʼi Mártape: “Opa oikovéva gueteri ha ojeroviáva cherehe, nomanomoʼãi arakaʼeve”. Upe rire oporandu chupe: “Ndépa rerovia koʼã mbaʼe?”. Ha katuete ohendunerakaʼe Marta heʼíva: “Arovia che Jára. Che arovia nde haʼeha pe Mesías, [Ñandejára] Raʼy” (Juan 11:​26, 27). Ovyʼaiténepa rakaʼe Jesús ohechávo ijerovia imbareteha!

⁶ Peteĩ jey, Jesús ohechakuaávo heta hemimboʼekuéra ohejaha chupe, haʼe oikuaase mbaʼépa opensa ijapostolkuéra. Upévare heʼi: “Peẽ piko pehose avei?”. Upéva ohendúvo, Simón Pedro heʼi chupe: “Ore Jára, máva rendápe piko rohóta? Neñeʼẽ niko umi oporomoingovéva opa árape g̃uarã. Ore niko rogueroviáma, ha roikuaa nde haʼeha pe imarangatúva [Ñandejára] ombouvaʼekue” (Juan 6:​66-69). Mbaʼeichaitépa oiméne ombovyʼa Jesúspe koʼã mbaʼe ojeʼéva chupe! Añetehápe javyʼaiterei ñahendúvo ñane estudiántepe mbaʼeichaitépa ojerovia.

Jesús omombaʼe hapichakuéra oñeʼẽ jave

7. Mbaʼérepa heta Samariaygua ojeroviavaʼekue Jesús rehe?

⁷ Jesús ojepyʼapy ha omombaʼevaʼekue avei hapichakuéra oñeʼẽ jave. Upévare heta oĩvaʼekue ohendúva chupe opredika jave. Ñapensamína opredikarõ guare peteĩ kuña Samariayguápe, Jacob póso mátape. Jesús ohejavaʼekue pe kuña heʼi upe opensáva, ndahaʼéi haʼe meménte oñeʼẽvaʼekue. Ohendu porã rire chupe, ohechakuaa oikuaaseha mbaʼéichapa omombaʼeguasuvaʼerã Ñandejárape. Upévare  heʼi chupe Ñandejára ohekaha ipyʼa porãvape omombaʼeguasu hag̃ua chupe ipyʼaite guive haʼe oipotaháicha. Jesús omombaʼe ha ojepyʼapy rupi hese, pe kuña oho meme oñeʼẽ hag̃ua ivesinokuérandi Jesús heʼivaʼekuére, ha “heta Samariaygua pe távape oikóva ojeroviavaʼekue Jesús rehe” (Juan 4:​5-29, 39-42).

8. Mbaʼéichapa ikatu ñañemongeta ñande rapicha ndive japredika jave chupekuéra?

⁸ Enterove ñamombeʼuse pe ñañandúva térã mbaʼéichapa jahecha peteĩ mbaʼe. Upéicha vaʼekue avei umi Aténaspe oikóva. Haʼekuéra omombeʼusetereivaʼekue mbaʼépa opensa ha oikuaase avei umi mbaʼe oikóva. Pablo oiporu upéva ojapo hag̃ua peteĩ diskúrso pe lugár hérava Areópagope (Hechos 17:​18-34). Upéicha avei koʼág̃a, ñag̃uahẽvo peteĩ ógape, ikatu ñañemongeta ñepyrũ péicha: “Aikuaasemi mbaʼépa nde ere [peteĩ mbaʼére]”. Ha oñeʼẽ jave ñande rapicha ñahenduvaʼerã chupe, ha upe rire ñañeʼẽʼimi térã ñaporandu chupe upe heʼivaʼekuére. Upe rire, iporã jahechauka chupe mbaʼépa heʼi la Biblia upe mbaʼére.

Jesús oikuaavaʼekue mbaʼépa heʼíta

9. Mbaʼépa ojapo Jesús omyesakã porã mboyve Cleopas ha iñirũme Ñandejára Ñeʼẽ?

⁹ Jesús katuete oikuaavaʼekue mbaʼépa heʼíta. Ohendukuaa, péro avei oikuaavaʼekue mbaʼépa opensa umi ohendúva chupe ha mbaʼépa heʼivaʼerã chupekuéra (Mateo 9:4; 12:​22-30; Lucas 9:​46, 47). Jahechami peteĩ ehémplo. Ñandejára omoingove jey riremi Jesúspe, mokõi hemimboʼe oguata ohóvo Jerusaléngui Emaúspe. La Biblia omombeʼu péicha: “Ha upe jave oñemboja Jesús, ha oñemoĩ oguata hendivekuéra. Haʼekuéra katu ndoikuaái chupe. Jesús heʼi chupekuéra: ‘Mbaʼérepa peñemongeta pehóvo’. Haʼekuéra opyta pyʼañembyasýre. Peteĩva hérava [Cleopas], heʼi chupe: ‘Neañoite oiméne ko Jerusalénpe oikuaaʼỹva pe ojehuvaʼekue koʼã árape.’ ‘Mbaʼe piko ojehu mbaʼe raʼe’: heʼi Jesús”. Haʼekuéra heʼi chupe Jesús Nazaretgua ojejukahague, ojeʼéramo jepe hese oikove jeymaha. Pe Mboʼehára Guasu ohenduvaʼekue Cleopas ha iñirũme, ha upe rire omyesakã chupekuéra heta mbaʼe Ñandejára Ñeʼẽ heʼíva (Lucas 24:​13-27, 32, JMP).

10. Mbaʼéichapa ikatu jaikuaa mbaʼépa oguerovia umi óga jára?

¹⁰ Heta vése ndajaikuaái mbaʼépa oguerovia umi ñande rapicha ñañemongetahañaína. Mbaʼéichapa ikatu jaikuaa mbaʼépa opensa hikuái? Ñaporandukuaa chupekuéra mbaʼépa opensa pe ñemboʼe rehe. Ikatu jaʼe: “Mbaʼépa nde ere, oĩnepa ñanerendúva ñañemboʼe jave?”. Upe heʼíva rupive, ikatu jaikuaa mbaʼépa oguerovia ha mbaʼépa opensa pe ñemboʼére. Oiméramo oguerovia Ñandejárape, ikatu ñañeʼẽve hendive ha ñaporandu chupe: “Mbaʼépa ere, ohendúpa Ñandejára opaichagua ñemboʼe?”. Peichagua porandu jajapóramo, ikatúta ñañemongeta porãve ñande rapichakuéra ndive. Ha ijáramo ñandéve jalee hag̃ua la Biblia, jajapokuaantevaʼerã upéva ha ani ñañeʼẽ vai umi mbaʼe haʼekuéra ogueroviávare. Ñande rapicha oñeñandu porãramo oñeʼẽ jave ñanendive, ikatúta ñañemongeta  jey hendive upe rire. Péro mbaʼépa jajapóta oporandúramo ñandéve peteĩ mbaʼe ndaikatúiva ñambohovái? Iporãvéta jaʼe chupe jaju jeytaha ótro día, jajeporeka rire pe téma ñañeʼẽvaʼekuére. Jaha jeývo ñambohovái hag̃ua oporanduvaʼekue, jahechaukavaʼerã ñamombaʼeha chupe ha ñañeʼẽ pyʼaguapýpe (1 Pedro 3:15).

Jesús omboʼevaʼekue umi ipyʼaporãvape

11. Mbaʼépa ñanepytyvõta jajuhu hag̃ua umi ñande rapicha omereséva ñamboʼe Ñandejára Ñeʼẽ?

¹¹ Jesús iperfékto rupi oikuaavaʼekue mávapepa omboʼéta. Ñandéve katu hasyve jaikuaa hag̃ua mávapa omerese “ohupyty [...] jeikove opaveʼỹva” (Hechos 13:48). Upéicha avei oikovaʼekue umi apóstol rehe, ha Jesús heʼi chupekuéra: ‘Peg̃uahévo peteĩ távape térã oimeraẽ ojeikohápe, peheka umi ipyʼaporãva’ (Mateo 10:11). Umi apóstol ojapohaguéicha, ñande avei jahekavaʼerã ñande rapicha ipyʼaporãvape oikuaaséva mbaʼépa omboʼe la Biblia. Ikatu jajuhu peichagua tapicha ñahendu porãramo mbaʼépa heʼi ha ñañatendéramo umi mbaʼe ojapóvare.

12. Mbaʼéichapa ikatu ñaipytyvõve umi omombaʼévape pe marandu porã?

¹² Ñañemongeta rire ñande rapicha omombaʼéva ndive pe marandu porã, mbaʼépa jajapovaʼerã? Ñapensavaʼerã mbaʼépa oikotevẽta gueteri omombaʼeguasu hag̃ua Jehovápe. Upearã ñañemongetávo hendive jahechakuaavaʼerã mbaʼépepa ikatu ñaipytyvõve. Ha jaha jeývo hógape, ñahendu porã vaʼerã chupe ñantende porã hag̃ua mbaʼépa oguerovia, oñandu ha ohasa.

13. Mbaʼéichapa ikatu ñamokyreʼỹ ñande rapichápe heʼi hag̃ua ñandéve mbaʼépa opensa la Biblia omboʼévare?

¹³ Mbaʼéichapa ñamokyreʼỹta ñande rapichápe heʼi hag̃ua ñandéve mbaʼépa opensa Ñandejára Ñeʼẽre? Heta henda rupi ikatu ñaporandu péicha: “Mbaʼépa nde ere, hasýpa ñantende hag̃ua la Biblia omboʼéva?”. Upe heʼívare ojekuaáta omombaʼépa Ñandejára Ñeʼẽ. Ikatu avei jalee peteĩ téysto ha upéi ñaporandu chupe: “Mbaʼépa nde ere koʼápe heʼívare?”. Ñaporandukuaáramo Jesús ojapohaguéicha opredika jave, ikatu avei jahupyty heta mbaʼe porã. Péro jahechataháicha, ñañatende porã vaʼerã avei mbaʼépa jaʼéta.

Jesús oporandukuaavaʼekue

14. Mbaʼépa ikatu jajapo ñande rapichakuéra omombeʼu hag̃ua ñandéve mbaʼéichapa ohecha peteĩ mbaʼe?

¹⁴ Jaikuaaséramo jepe mbaʼépa opensa ñande rapicha, ñaporandukuaavaʼerã chupe. Upévare jasegi Jesús ehémplo. Haʼe noporanduivaʼekue umi mbaʼe ikatúva omoñeñandu vai hapichápe. Oporandu uvei oporomopensa hag̃uáicha. Torýpe ohendu avei umi hapicha ipyʼaporãvape, ha upévare ovyʼa ha ipyʼaguapy hikuái oĩ jave hendive (Mateo 11:28). Upéicha enterove oñembojavaʼekue hendápe omombeʼu hag̃ua mbaʼépa oipyʼapy chupekuéra (Marcos 1:40; 5:​35, 36; 10:​13, 17, 46, 47). Ha ñande upéicha avei: jaipotáramo ñande rapichakuéra omombeʼu ñandéve mbaʼépa opensa la Biblia omboʼévare, nañaporanduivaʼerã umi mbaʼe omoñeñandu vaítava chupekuéra.

15, 16. Mbaʼéichapa ikatu ñamokyreʼỹ ñande rapichakuérape oñemongeta hag̃ua ñanendive?

¹⁵ Ikatu avei ñañemongeta porãve ñande rapicha ndive jaʼéramo peteĩ mbaʼe oikuaasevétava, ha upéi jahecha mbaʼépa heʼi. Jesús ojapovaʼekue upéicha heʼírõ guare Nicodémope: ‘Avave ndaikatúi ohecha Ñandejára Rréino nonasejeýiramo’ (Juan 3:​3, JMP). Upéva heʼi rire, Nicodemo oikuaaseve ha osegi ohendu Jesúspe (Juan 3:​4-20). Jajapóramo upéicha, ñande rapichakuéra oñemongetasevéta ñanendive.

¹⁶ África, Europa oriental ha Latinoaméricape ojehecha oĩha hetaiterei rrelihión pyahu. Umichaha rupi ikatu ñañepyrũ ñañemongeta jaʼévo péicha: “Ahechakuaa hetaiterei rrelihión oĩha. Upéicha avei, ahaʼarõ pe rrelihión Ñandejára oguerohorýva omoingo porãmba oñondive opavavépe. Ndépa reipota avei oiko  upéicha?”. Ñamombeʼúramo umi mbaʼe porã ñahaʼarõva, umi ñanerendúva ikatu oikuaaseve ha heʼi ñandéve mbaʼépa opensa upévare. Avei ikatúta okontesta ndahasýiramo umi mbaʼe ñaporandúva chupekuéra (Mateo 17:25). Upe rire, ñande jaiporuvaʼerã peteĩ térã mokõi téysto ñambohovái hag̃ua pe porandu jajapovaʼekue (Isaías 11:9; Sofonías 3:9). Ñahendu porãramo ñande rapichápe ha jahecha mbaʼépa heʼi, jaikuaáta mbaʼe rehépa ñañeʼẽta jaha jey vove hógape.

Jesús ojepyʼapyvaʼekue mitãnguérare

17. Mbaʼépa ohechauka Jesús ojepyʼapyhague mitãnguérare?

¹⁷ Jesús ndahaʼéi kakuaa rehe añónte ojepyʼapyvaʼekue. Mitãnguérare avei, upévare oikuaa mbaʼépa ohuga ha heʼi hikuái. Sapyʼánte oinvita avei chupekuéra oñemboja hag̃ua hese (Lucas 7:​31, 32; 18:​15-17). Umi Jesúspe ohenduvaʼekue apytépe oĩ avei heta mitã. Ha mitãnguéra omombeʼu guasúrõ guare Jesús haʼeha pe Mesías, haʼe voi ohechauka upéva oĩha la Bíbliape (Mateo 14:21; 15:38; 21:​15, 16). Upéicha avei koʼág̃a, hetaiterei mitãgui oiko Jesús remimboʼe. Mbaʼéichapa ikatu ñaipytyvõ chupekuéra?

18, 19. Mbaʼéichapa ikatu ñaipytyvõ mitãnguérape oiko hag̃ua chuguikuéra Jesús remimboʼe?

¹⁸ Ñaipytyvõséramo umi mitãme oiko hag̃ua chuguikuéra Jesús remimboʼe, ñahenduvaʼerã chupekuéra. Jahechavaʼerã mbaʼépa opensa umi mbaʼe Jehová ojerurévare. Mitãnguéra omombeʼu jepi mbaʼéichapa oñeñandu umi hapicha haʼe ojeroviávape, peteĩ omombaʼéva chupe. Upévare, teʼi heʼíva ñandéve, ñambohovaivaʼerã omokyreʼỹ hag̃uáicha chupe, ha upearã jajejokokuaavaʼerã. Ikatúta avei ojerovia ñanderehe nañamombeʼúiramo avavépe umi heʼivaʼekue ñandéve (Proverbios 11:13). Upéicharamo jepe, sapyʼánte oĩta ñamombeʼúva isy ha itúvape.

¹⁹ Iporãramo jepe ñaporandu mitãnguérape, umi ohendúva chupekuéra oikuaa oporanduetereíramo noguenohemoʼãiha mbaʼeve chuguikuéra. Mitãnguérape ndogustái oñeporandueterei chupekuéra. Ñaporanduetereírangue umi mbaʼe hasýtava ombohovái hag̃ua, iporãve ñañeʼẽ umi mbaʼe chupekuéra ogustávare (Mateo 13:​51, 52). Ikatu avei jaʼe chupe mbaʼéichapa ñañeñanduvaʼekue ha mbaʼérepa, ha upe rire ñaporandu chupe: “Ojehúpa ndéve upéicha avei?”. Jaiporavóramo umi téma ogustáva chupe, ikatúta oikuaaseve la Biblia omboʼéva.

Jajapókena pe Mboʼehára Ikatupyryvéva ojapohaguéicha

20, 21. Mbaʼérepa ñamboʼe jave ñañatende porã vaʼerã ojeʼévare ñandéve?

²⁰ Jahechahaguéicha, oiko hag̃ua ñande rapichágui Jesús remimboʼe ñahendukuaavaʼerã chupekuéra, tahaʼe imitãva térã itujáva. Upéicha jahechauka ñaneumildeha, ñanembaʼeporãha, jahayhu ha ñamombaʼeha ñande rapichakuérape. Ñañatende porã vaʼerã oñeñeʼẽ jave ñandéve, ndahaʼéi ñahendúnteva.

²¹ Japredika jave, ñahendu porã vaʼerã ñande rapichápe. Upéicha ikatu jahechakuaa mbaʼépa oipyʼapy chupe térã mbaʼérepa oñeʼẽseve. Upe rire, ñañehaʼã ñamboʼe chupe Jesús omboʼehaguéicha. Javyʼaitereíta ñamboʼéramo pe Mboʼehára Ikatupyryvéva ojapohaguéicha.

Mbaʼépa ñambohováita?

• Mbaʼéichapa Jesús omokyreʼỹvaʼekue hapichápe heʼi hag̃ua mbaʼéichapa ohecha peteĩ mbaʼe?

• Mbaʼérepa Jesús ohenduvaʼekue hapichápe omboʼe jave?

• Mbaʼéichapa ñaporanduvaʼerã japredika jave?

• Mbaʼéichapa ikatu ñaipytyvõ mitãnguérape oiko hag̃ua chuguikuéra Jesús remimboʼe?

[Porandu ñahesaʼỹijóva]

[Nóta oĩva taʼanga ndive páhina 18]

Ñaipytyvõ mitãnguérape Jesús ojapohaguéicha