Iluga ang Dakung Manughimo Disipulo
Iluga ang Dakung Manughimo Disipulo
“Mag-andam kon paano ang inyo pagpamati.”—LUCAS 8:18.
1, 2. Ngaa dapat mo talupangdon kon paano nakig-angot si Jesus sa mga tawo sa tion sang iya pagministeryo?
GINATUMAN ni Jesucristo ang iya papel subong Dakung Manunudlo kag Manughimo Disipulo sang ginsilingan niya ang iya mga sumulunod: “Mag-andam kon paano ang inyo pagpamati.” (Lucas 8:18) Ini nga prinsipio naaplikar man sa imo ministeryo subong Cristiano. Kon nagapamati ka sa espirituwal nga mga instruksion kag ginaaplikar ini, nian mangin isa ikaw ka epektibo nga manugbantala sang Ginharian. Matuod nga indi mo na mabatian karon ang tingog ni Jesus, apang sarang mo mabasa sa Kasulatan ang iya ginpamulong kag ginpanghimo. Ano bala ang ginapakita sini tuhoy sa paagi sang pagpakig-angot ni Jesus sa mga tawo sa tion sang iya ministeryo?
2 Si Jesus isa ka dalayawon nga manugbantala sang maayong balita kag isa ka talalupangdon nga manunudlo sang Kasulatan. (Lucas 8:1; Juan 8:28) Ang hilikuton nga paghimo disipulo nagadalahig sing pagbantala kag pagtudlo, apang ang pila ka Cristiano nga epektibo nga mga manugbantala nabudlayan sa pagtudlo sa mga tawo sing epektibo. Kon ang pagbantala nagadalahig sa pagpahayag sing isa ka mensahe, ang pagtudlo naman sa mga tawo tuhoy kay Jehova kag sa iya mga katuyuan masami nagakinahanglan nga ang manughimo disipulo magpalambo sing isa ka kaangtanan sa ila. (Mateo 28:19, 20) Mahimo naton ini paagi sa pag-ilog kay Jesucristo, ang Dakung Manunudlo kag Manughimo Disipulo.—Juan 13:13.
3. Ano ang epekto sang imo pag-ilog kay Jesus sa imo mga panikasog nga maghimo sing mga disipulo?
3 Kon ginailog mo ang mga pamaagi sang pagtudlo ni Jesus, ginatuman mo ang laygay ni apostol Pablo: “Maggawi sa kaalam ayon sa mga tagaluwas, nga nagahimulus sang tion. Magpamolong kamo sa gihapon nga may bugay, nga naunawan sing asin, agud nga makahibalo kamo kon ano ang dapat nga pagsabat ninyo sa tagsatagsa.” (Colosas 4:5, 6) Ang pag-ilog kay Jesus sa hilikuton nga paghimo disipulo nagakinahanglan sing panikasog, apang himuon sini nga epektibo ang imo pagpanudlo kay magabulig ini sa imo sa ‘pagsabat sa tagsatagsa’ suno sa iya kinahanglanon.
Ginpalig-on ni Jesus ang Iban nga Maghambal
4. Ngaa masiling naton nga si Jesus isa ka maayo nga manugpamati?
4 Halin pa sa pagkabata, naandan na ni Jesus nga magpamati sa mga tawo kag palig-unon sila nga ipabutyag ang ila mga pagtamod. Halimbawa, sang 12 anyos sia, nakit-an sia sang iya mga ginikanan sa tunga sang mga manunudlo sa templo, “nga nagapamati sa ila kag nagapamangkot sa ila.” (Lucas 2:46) Wala nagkadto si Jesus sa templo agod ipakita sa mga manunudlo nga mas madamo sia sing nahibaluan. Nagkadto sia didto agod mamati, bisan pa nagapautwas man sia sing mga pamangkot. Mahimo nga ang iya kinaiya subong maayo nga manugpamati amo ang rason kon ngaa nahamut-an sia sang Dios kag sang mga tawo.—Lucas 2:52.
5, 6. Paano naton napat-od nga namati si Jesus sa iya mga gintudluan?
5 Pagkatapos sang iya bawtismo kag paghaplas sa iya subong Mesias, ginhuptan ni Jesus ang iya interes sa pagpamati sa mga tawo. Wala sia nagkonsentrar sing tuman sa iya ginatudlo amo nga nalimtan na niya ang mga nagkari agod mamati sa iya. Masami nga nagadulog sia sing makadali kag ginapamangkot sila kon ano ang ila ginahunahuna, nian ginapamatian niya sila. (Mateo 16:13-15) Halimbawa, sang napatay si Lazaro, ginsilingan ni Jesus ang utod ni Lazaro nga si Marta: “Ang bisan sin-o nga nagakabuhi kag nagatoo sa akon indi na gid mapatay.” Pagkatapos ginpamangkot niya sia: “Nagatoo ka bala [sa] sini?” Kag sigurado nga namati gid si Jesus sang nagsabat si Marta: “Hoo, Ginoo; nagatoo ako nga ikaw ang Cristo, ang Anak sang Dios.” (Juan 11:26, 27) Pat-od nga makalilipay gid pamatian ining pagpabutyag ni Marta sang iya pagtuo!
6 Sang ang madamo nga disipulo ni Jesus nagbiya sa iya, interesado sia nga pamatian kon ano ang pagtamod sang iya mga apostoles, amo nga namangkot sia: “Buut man bala kamo maghalin?” Nagsabat si Simon Pedro: “Ginoo, kay sin-o bala kami makadto? Ikaw may mga polong sang kabuhi nga walay katapusan; kag kami nagatoo, kag nagakilala, nga ikaw ang Balaan sang Dios.” (Juan 6:66-69) Sigurado nga nagpahamuot gid kay Jesus yadtong mga pulong! Pat-od nga malipay ka man kon mabatian mo ang kaanggid nga pagpabutyag sing pagtuo gikan sa imo ginatun-an sang Biblia.
Si Jesus Namati nga May Pagtahod
7. Ngaa madamo nga Samariahanon ang nagtuo kay Jesus?
7 Ang isa pa ka rason kon ngaa si Jesus isa ka epektibo nga manughimo disipulo bangod nabalaka sia sa mga tawo kag namati sia sa ila nga may pagtahod. Halimbawa, isa ka bes, nagpanaksi anay si Jesus sa isa ka Samaritana malapit sa bubon ni Jacob sa Sicar. Sa ila pagsugilanunay, indi lamang si Jesus ang nagahambal; ginpamatian niya ang ginahambal sang babayi. Samtang nagapamati sia sa babayi, natalupangdan ni Jesus ang iya interes sa pagsimba kag ginsugiran sia nga ang Dios nagapangita sing mga magasimba sa Iya sa espiritu kag kamatuoran. Nagpakita si Jesus sing pagtahod kag kabalaka sa sining babayi, busa ginsugiran sining babayi ang iban tuhoy kay Jesus, kag “madamu sang mga Samariahanon sa sadtong banwa ang nagtoo sa iya bangud sang pagpamatuud sang babayi.”—Juan 4:5-29, 39-42.
8. Paano ang huyog sang mga tawo nga ipabutyag ang ila opinyon makabulig sa imo nga makasugod sing isa ka pagsugilanunay sa ministeryo?
8 Sa masami, nalipay ang mga tawo magpabutyag sang ila mga pagtamod. Halimbawa, ang mga tawo sa dumaan nga Atenas nalipay sa pagpabutyag sang ila opinyon kag sa pagpamati sa bisan ano nga bag-o nga butang. Bangod sini, nangin epektibo ang diskurso ni Pablo sa Areopago sa sinang siudad. (Binuhatan 17:18-34) Kon nagasugod sing isa ka pagpakigsugilanon sa tagbalay sa imo pagministeryo, mahimo ka magsiling, “Nagduaw ako sa imo kay interesado ako sa imo opinyon tuhoy sa [isa ka topiko].” Pamatii ang iya pagtamod kag komentuhi ini, ukon magpautwas sing isa ka pamangkot tuhoy sa sini. Nian, mainayuhon nga ipakita kon ano ang ginasiling sang Biblia tuhoy sa sini nga topiko.
Nakahibalo si Jesus Makigsugilanon
9. Ano ang ginhimo ni Jesus antes niya ‘gintalastas ang mga kasulatan’ kanday Cleofas kag sa iya kaupod?
9 Wala nagakaubusan sing inughambal si Jesus. Wala labot nga isa sia ka maayo nga manugpamati, sa masami nahibaluan niya kon ano ang ginahunahuna sang mga tawo, kag nakahibalo gid sia kon ano ang dapat ihambal. (Mateo 9:4; 12:22-30; Lucas 9:46, 47) Bilang pag-ilustrar: Wala magdugay pagkatapos mabanhaw si Jesus, nagpanglakaton ang iya duha ka disipulo halin sa Jerusalem pakadto sa Emaus. “Sang nagasugilanon sila kag nagapangkotanay,” siling sang rekord sang Ebanghelyo, “si Jesus gid nagpalapit kag nagbuylog sa ila. Apang ang ila mga mata nakulapan sa bagay nga wala sila makakilala sa iya. Kag nagsiling sia sa ila, ‘Ano bala nga mga sugid ining ginahambalan ninyo sa nagalakat kamo?’ Kag nagdolog sila, nga nagakasubu, Niyan ang isa sa ila, nga ginhingalan si Cleofas, nagsabat sa iya, ‘Ikaw lamang bala ang dumalayon sa Jerusalem nga wala makahibalo sang mga butang nga nahanabu didto sa sining mga adlaw?’ Kag nagpamangkot sia sa ila, ‘Ano bala nga mga butang?’” Nagpamati gid ang Daku nga Manunudlo samtang ginapaathag nila nga si Jesus nga Nazaretnon nagtudlo sa mga tawo, naghimo sing mga milagro, kag ginpatay. Ang iban nagasiling nga ginbanhaw sia gikan sa mga minatay. Gintugutan ni Jesus si Cleofas kag ang iya kaupod nga ipabutyag kon ano ang ila ginahunahuna. Nian ginpaathag niya kon ano ang kinahanglan nila mahibaluan kag ‘gintalastas sa ila ang mga kasulatan.’—Lucas 24:13-27, 32.
10. Ano ang himuon mo agod mahibaluan mo ang relihioso nga pagtamod sang tawo nga imo masugilanon sa imo pagministeryo?
10 Mahimo wala ka sing nahibaluan tuhoy sa relihioso nga pagtamod sang tagbalay. Agod mahibaluan ini, puede mo isiling nga luyag mo gid mamati sa ginahunahuna sang mga tawo tuhoy sa pangamuyo. Nian puede mo ipamangkot, “Sa banta mo may yara gid bala nagapamati sa mga pangamuyo?” Mahimo mo mahantop sa sabat sang tawo kon ano ang iya pagtamod kag ginapatihan. Kon relihioso sia, puede mo pa mahibaluan sing dugang ang iya pagtamod paagi sa pagsiling, “Sa banta mo ginapamatian bala sang Dios ang tanan nga pangamuyo, ukon may mga pangamuyo man bala sia nga wala ginapamatian?” Ina nga mga pamangkot mahimo magdul-ong sa maayo nga pagsugilanunay. Kon sa banta mo puede sia basahan sing isa ka teksto, maayo nga himuon mo ini sing mataktikanhon, likawi nga balion ang iya ginapatihan. Kon manamian sia sa pagpamati sa imo, mahimo nga luyag niya nga magbalik ka liwat. Apang ano abi kon indi mo masabat ang iya pamangkot? Puede ka anay manalawsaw agod pagbalik mo handa ka na sa paghatag sing ‘pag-apin sang paglaum nga yara sa imo, apang ginahimo ini nga may pagpaubus kag pagtahud.’—1 Pedro 3:15.
Gintudluan ni Jesus ang mga Takus
11. Ano ang makabulig sa imo agod makita ang mga takus tudluan?
11 Subong himpit nga tawo, nahantop ni Jesus kon sin-o ang takus tudluan. Apang, sa aton bahin, nabudlayan kita sa pagpangita sang mga “husto nga nahuyog para sa kabuhi nga walay katapusan.” (Binuhatan 13:48, NW) Amo man ang mga apostoles nga ginsilingan ni Jesus: “Bisan diin nga banwa ukon minoro ang inyo sudlan, usisaon ninyo kon sin-o didto ang takus.” (Mateo 10:11) Kaangay sang mga apostoles ni Jesus, dapat pangitaon mo ang mga tawo nga handa mamati kag magpatudlo sang kamatuoran sa Biblia. Sarang mo makita ang mga takus paagi sa pagpamati sing maayo sa kada tawo nga masugilanon mo kag sa pagpanilag sa panimuot sang kada indibiduwal.
12. Paano mo padayon nga mabuligan ang isa ka interesado nga tawo?
12 Pagkatapos mo masugilanon ang isa nga nagpakita sing interes sa mensahe sang Ginharian, mas maayo kon padayon mo nga hunahunaon ang iya espirituwal nga mga kinahanglanon. Kon isulat mo kon ano ang imo nahibaluan sa tawo pagkatapos mo sia masugilanon tuhoy sa maayong balita, makabulig ini sa imo padayon nga pagbulig sa iya sa espirituwal. Sa kada duaw mo, dapat mamati ka sing maayo kon luyag mo mahibaluan ang iya mga pagpati, panimuot, kag mga kahimtangan.
13. Ano ang makabulig sa imo agod mahantop kon ano ang pagtamod sang isa ka tawo sa Biblia?
13 Paano mo mapalig-on ang mga tawo nga magsugid kon ano ang ila pagtamod sa Pulong sang Dios? Sa pila ka lugar, epektibo nga mamangkot sing, “Gintinguhaan mo na bala nga hangpon ang Biblia?” Sa masami, ang sabat sang mga tawo sa sinang pamangkot nagapakita kon ano gid ang ila panimuot sa espirituwal nga mga butang. Ang isa pa ka paagi amo ang pagbasa sing isa ka teksto sa ila kag mamangkot, “Para sa imo, makatarunganon bala ang ginasiling diri?” Kaangay ni Jesus, madamo ka sing mahimo sa imo ministeryo paagi sa paggamit sing nagakaigo nga mga pamangkot. Apang kinahanglan ka man maghalong.
Si Jesus Epektibo nga Naggamit sing mga Pamangkot
14. Paano ka makapakita sing interes sa pagtamod sang mga tawo nga wala sila ginapisapisa sa pamangkot?
14 Magpakita sing interes sa pagtamod sang iban sa paagi nga indi sila mahuy-an. Sunda ang pamaagi ni Jesus. Wala sia basta nagapataka lang sa pagpamangkot, kundi naggamit sia sing makapahunahuna nga mga pamangkot. Si Jesus isa man ka mainayuhon nga manugpamati nga nagapaumpaw sa sinsero nga mga tawo kag napahamtang ang mga tawo sa iya. (Mateo 11:28) Wala natahap sa pagpalapit sa iya ang tanan nga sahi sang tawo tuhoy sa ila mga problema. (Marcos 1:40; 5:35, 36; 10:13, 17, 46, 47) Kon ang mga tawo wala natahap sa pagsugid sa imo kon ano ang ila pagtamod sa Biblia kag sa mga panudlo sini, indi mo sila dapat pisapisahon sa pamangkot.
15, 16. Paano mo mapalig-on ang mga tawo nga makigsugilanon tuhoy sa relihion?
15 Luwas pa sa epektibo nga paggamit sing pamangkot, sarang mo mapalig-on ang paghambalanay paagi sa pagsambit sing isa ka interesante nga butang kag pagkatapos mamati sa ila komento. Halimbawa, ginsilingan ni Jesus si Nicodemo: “Kon ang isa indi matawo liwat, indi sia makakita sang ginharian sang Dios.” (Juan 3:3) Ini nga mga pulong interesante gid amo nga wala nakapugong si Nicodemo sa pagsabat kag sa pagpamati kay Jesus. (Juan 3:4-20) Ini nga pamaagi sarang mo man mahimo.
16 Sa karon, interesado ang mga tawo sa pag-ulhot sang madamo nga relihion sa pila ka lugar subong sang Aprika, Nasidlangan nga Europa, kag Latin Amerika. Sa sina nga mga duog, mahapos lang sugdan ang pagpakigsugilanon paagi sa pagsiling: “Nabalaka gid ako bangod madamo na katama sing relihion. Apang nagalaum gid ako nga sa indi madugay ang tanan nga tawo gikan sa tanan nga pungsod mahiusa na sa matuod nga pagsimba. Luyag mo man bala nga matabo ina?” Paagi sa paghambal sing isa ka makalilipay nga butang nga imo ginalauman, mahimo mo mapalig-on ang tawo nga ipabutyag ang iya pagtamod. Kag mas mahapos sabton ang pamangkot kon duha ang posible nga pililian. (Mateo 17:25) Pagkatapos makomentuhan sang tagbalay ang imo pamangkot, sabta ini mismo paagi sa isa ukon duha ka teksto. (Isaias 11:9; Sofonias 3:9) Paagi sa pagpamati sing maayo kag sa pagtalupangod sa sabat sang tawo, mahimo mo na karon mapat-od kon ano ang dapat hambalan sa masunod mo nga pagduaw.
Si Jesus Namati sa mga Bata
17. Ano ang nagapamatuod nga interesado si Jesus sa mga bata?
17 Indi lamang interesado si Jesus sa mga adulto kundi pati man sa mga bata. Nahibaluan niya ang mga hampang sang kabataan kag ang ila mga ginaistoryahan. Kon kaisa ginaagda niya ang mga bata nga magpalapit sa iya. (Lucas 7:31, 32; 18:15-17) Madamo ang bata sa kadam-an nga tagpalamati ni Jesus. Sang ang mga bata nga lalaki nagsinggit sing pagdayaw sa Mesias, gintalupangod ini ni Jesus kag ginpakita nga gintagna ini sang Kasulatan. (Mateo 14:21; 15:38; 21:15, 16) Sa karon, madamo nga kabataan ang nangin mga disipulo ni Jesus. Paano mo sila mabuligan?
18, 19. Paano mo mabuligan ang imo bata sa espirituwal?
18 Agod mabuligan mo ang imo bata sa espirituwal, dapat pamatian mo sia. Kinahanglan hantupon mo kon ano nga mga panghunahuna nga yara sa iya ang mahimo wala nahisanto sa panghunahuna ni Jehova. Bisan ano pa ang isiling sang imo bata, maalamon kon magkomento ka anay sing positibo. Nian, puede ka maggamit sing nagakaigo nga mga teksto nga makabulig sa imo bata nga mahangpan kon ano ang pagtamod ni Jehova sa sina nga mga butang.
19 Ang mga pamangkot mabuligon. Apang, kon kita nga mga adulto wala nanamian nga ginapisapisa kita, amo man ang mga bata. Sa baylo nga pabudlayan ang bata sa pagsabat sa mabudlay nga mga pamangkot, ngaa indi ka magsugid sing isa ka malip-ot nga sugilanon tuhoy sa imo kaugalingon? Depende sa topiko nga inyo ginahinun-anunan, mahimo mo isiling kon ano anay ang ginabatyag mo nian ipaathag kon ngaa amo sina ang imo anay ginbatyag. Pagkatapos puede ka mamangkot, “Amo man bala sina ang ginabatyag mo?” Ang sabat sang imo bata mahimo magresulta sa isa ka mabuligon kag makapalig-on nga paghinun-anon sa Biblia.
Padayon nga Iluga ang Dakung Manughimo Disipulo
20, 21. Ngaa dapat ka mangin isa ka maayong manugpamati subong isa ka manughimo disipulo?
20 Kon nagahinun-anon ka sing isa topiko sa imo bata ukon sa iban, importante katama ang maayo nga pagpamati. Sa pagkamatuod, pagpakita ini sang gugma. Paagi sa pagpamati, nagapakita ka sing pagkamapainubuson, kay ginahatagan mo sing pagtahod kag mahigugmaon nga konsiderasyon ang isa nga nagahambal. Sa katunayan, nalakip sa pagpamati ang pagtalupangod sa balatyagon sang tawo.
21 Samtang nagapakigbahin ka sa Cristianong ministeryo, mamati sing maayo sa mga tagbalay. Kon ginapamatian mo sing maayo ang ila ginasiling, mahantop mo kon ano gid nga aspekto sang kamatuoran sa Biblia ang labi nga makaganyat sa ila. Nian, panikasugi nga buligi sila paagi sa pag-ilog sa nanuhaytuhay nga mga pamaagi ni Jesus sa pagtudlo. Sa paghimo sini, matigayon mo ang kalipay kag kaayawan bangod ginailog mo ang Dakung Manughimo Disipulo.
Ano ang Imo Sabat?
• Paano ginpalig-on ni Jesus ang iban nga ipabutyag ang ila panghunahuna?
• Ngaa namati si Jesus sa mga tawo nga iya gintudluan?
• Paano mo magamit ang mga pamangkot sa imo pagministeryo?
• Ano ang sarang mo mahimo agod mabuligan ang mga bata sa espirituwal?
[Mga Pamangkot sa Pagtinuon]
[Piktyur sa pahina 28]
Kon nagabantala, mamati gid sing maayo
[Piktyur sa pahina 30]
Ginailog naton si Jesus kon ginabuligan naton ang mga bata sa espirituwal
