Ajoqersuisorsuup ilaarneratigut ajoqersuganngortitsiortorit

„Sianiginiarsiuk qanoq tusartusi [tusarnaartusi, NV].“ — LUKASI 8:18.

1, 2. Sooq Jiisusip oqaluussillunilu ilinniartitsigaangami inunnik qanoq pinnittarnera eqqumaffigisariaqarparput?

JIISUSI Kristusi, Ajoqersuisorsuugami ajoqersuganngortitsiortortoq, malitsiminut ima oqarpoq: „Sianiginiarsiuk qanoq tusartusi [tusarnaartusi, NV].“ (Lukasi 8:16-18) Najoqqutassiaq tamanna illit kristumiutut kiffartorninnut aamma atuuppoq. Anersaakkut ilinniartinneqarnerit eqqumaffigigukku allat Guutip naalagaaffianik oqaluttuukkaangakkit ilisimasatit sunniuteqarluartumik atortassavatit. Soorunami Jiisusip nipaa ullumikkut tusaanavianngilat, oqaaserisimasaali iliuuserisimasaalu Biibilimi atuarsinnaavatit. Jiisusip nunarsuarmiitilluni oqaluussillunilu ilinniartitsigaangami inunnik qanoq pinnittarnera pillugu Biibilimi qanoq allassimasoqarami?

² Jiisusi nutaarsiassamik nuannersumik oqaluussissutiginnillaqqissorsuullunilu Allakkat pillugit ilinniartitsillaqqissorsuusimavoq. (Lukasi 8:1; Johannesi 8:28) Ajoqersuganngortitsiortornermut ilaapput oqaluussineq ilinniartitsinerlu; kristumiulli oqaluussinermut pikkorissut ilaasa sunniuteqarluartumik ilinniartitsinissaq sapernartittarpaat. Oqaluussineq tassaavoq oqariartuummik saqqummiussineq, Jehovali taassumalu siunertai pillugit ilinniartitsissagaanni ajoqersukkamut qanittumik attaveqarnermik ineriartortitsinissaq amerlanertigut pisariaqartarpoq. (Matthæusi 28:19, 20) Taamaattumik Jiisusi Kristusi, Ajoqersuisorsuaq ajoqersuganngortitsiortornermut pikkorissoq, ilaarneqartariaqarpoq. — Johannesi 13:13.

3. Jiisusimik ilaarsinerit ajoqersuganngortitsiortorniarlutit ilungersorninnut qanoq sunniuteqassava?

³ Jiisusip ilinniartitseriaasii ilaartarukkit aamma apustilip Paulusip kajumissaarutaa una malissavat: „Ilaginngisassi peqatigisarnerini silatusaartaritsi piffissaqqissorlu atortarsiuk. Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.“ (Kolossemiut 4:5, 6) Ajoqersuganngortitsiortorneq eqqarsaatigalugu Jiisusimik  ilaarsissagaanni iliuuseqarnissaq pisariaqarpoq, kiffartornerilli sunniuteqarluassaaq „kikkut tamaasa“ inuttut pisariaqartitaat naapertorlugit ’akisinnaassagakkit’.

Jiisusip allat oqaaseqaqqullugit kajumissaartarpai

4. Sumit erserpa Jiisusi tusarnaallaqqissuusoq?

⁴ Jiisusip meeraallunili allat tusarnaartarlugillu qanoq isumaqarnerat oqaatigeqqullugu kajumissaartarpai. Assersuutigalugu aqqaneq-marlunnik ukioqartoq angajoqqaavisa ajoqersuisut akornanniittoq nanivaat, taakkua ’tusarnaarlugillu aperisarai’. (Lukasi 2:46) Jiisusi naalaffimmukanngilaq qanoq ilisimasaqartiginini kakkanniutiginiarlugu. Naalaffimmukarpoq tusarnaarniarluni, aammattaaq aperisarpoq. Tusarnaarusussuseqarluarnera Guutimit inunnillu iluarineqalissutigisaanut ilaasimasinnaavoq. — Lukasi 2:52.

5, 6. Qanoq ililluta nalunngilarput Jiisusip ilinniartitani tusarnaartarai?

⁵ Jiisusip kuisinnermi Missiarsitullu taninneqarnermi kingorna allat soqutiginnilluni tusarnaartuarpai. Allanut ilinniartitsissutigisani ima eqqarsaatigitiginngilai imminik tusarnaarniarlutik aggersut puiorlugit. Qassiinik unikkallartarpoq, tusarnaartut qanoq isumaqarnersut aperalugit, akissutaallu tusarnaartarlugit. (Matthæusi 16:13-15) Ilaatigut taamaaliorpoq Lazarusi toqummat. Jiisusip taassuma qatanngutaa Martha ima oqarfigaa: „Inuusoq uannullu uppertoq kinaluunniit toqunngisaannavissussaavoq.“ Taava ima aperaa: „Tamanna upperaajuk?“ Qularnanngivissumillu Jiisusip Martha ima akimmat tusarnaarsimassavaa: „Aap, Naalagaq, upperpunga Kristusiusutit, Guutip ernera.“ (Johannesi 11:26, 27) Marthap taamatut uppernerminik ersersitsinera tusaallugu nuannaarutigisimassaqaa!

⁶ Ajoqersugarpassuit qimammanni Jiisusip apustilit qanoq isumaqarnersut paaserusuppaa. Taamaattumik ima aperai: „Aamma ilissi qimanniarpisinga?“ Siimuut-Petrusi ima akivoq: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit, upperpugullu nalunagulu illit tassaasutit Guutip illernartua.“ (Johannesi 6:66-69) Taamatut oqarnera Jiisusip nuannaarutigisimassaqaa! Biibilimik atuaqqissaaqatigisartakkavit uppernerminut ersiutaasumik tamatumunnga assingusumik oqarnera qularnanngitsumik aamma illit nuannaarutigissavat.

Jiisusi ataqqinnilluni tusarnaartarpoq

7. Sooq Samariamiorpassuit Jiisusi upperfigilerpaat?

⁷ Jiisusip ajoqersuganngortitsiortornermut taama pikkoritsigineranut pissutaasoq alla tassaavoq inunnik soqutiginninnera ataqqinnillunilu tusarnaartarnera. Taamaattumik ilaanni Jaakup Puilasuata Sykarimiittup killingani arnaq Samariamiu nalunaajaaffigigamiuk oqaluinnavinngilaq, aamma tusarnaarpaa. Tusarnaartilluni arnap Guutimik pallorfiginninnermik pingaartitsinera maluginiarpaa, oqaluttuuppaalu Guutip anersaakkut ilumoornikkullu imminik pallorfiginnikkumasut ujarai. Jiisusip arnaq taanna ataqqillugulu soqutigaa, taassumalu allat Jiisusi pillugu oqaluttuummagit „Samariamiut illoqarfimmit tassannga pisut amerlasuut Jiisusi upperfigilerpaat arnap oqaasii pillugit“. — Johannesi 4:5-29, 39-42.

8. Inuit amerlanertigut isummaminnik annisserusuttarnerat oqaluussigaangavit oqaloqateqarniarlutit aallarniinissamut qanoq iluaqutigisinnaaviuk?

⁸ Inuit amerlanersaasa isummatik kajumillutik oqaatigisarpaat. Assersuutigalugu Paulusip nalaani Athenimiut isummamik oqaatiginissaat sunillu nutaanik tusarniaaneq nuannaraat. Tamanna pissutigalugu Paulusi Areopagusimi sunniuteqarluartumik nalunaajaanissaminut periarfissaqalerpoq. (Apustilit Suliaat 17:18-34) Illit oqaluussinermi oqaloqateqarniarlutit aallarniigaangavit ima oqarsinnaavutit: „Kasuttorpunga [sammisaq aalajangersimasoq] qanoq isumaqarfiginerit paaserusullugu.“ Pulaakkavit akissutaa tusarnaaruk akissutaalu oqaaseqarfigalugu, imaluunniit akissutaa tunngavigalugu aperiuk. Taava oqaluuserisarsi pillugu Biibilimi qanoq allassimasoqarnera inussiarnerlutit takutiguk.

Jiisusip qanoq ililluni oqaloqateqalissanerluni nalunngilaa

9. Jiisusi Kleofasimut taassumalu ilagisaanut ’Allakkanik nassuiaannginnermini’ sua?

⁹ Jiisusi oqaasissaaleqinngisaannarpoq. Tusarnaallaqqiinnanngilaq,  amerlanertigulli inuit qanoq eqqarsarnersut qanorpiarlu oqassanerluni naluneq ajorpaa. (Matthæusi 9:4; 12:22-30; Lukasi 9:46, 47) Assersuutigalugu taamaappoq makititaanermi kingunitsianngua ajoqersukkami ilaat marluk Jerusalemimiit Emmausimukarneranni. Iivangkiiliulersaarummi ima allassimavoq: „Ingerlanerminni oqaloqatigiillutik akioriitsillugit Jiisusi nammineq tikiuppoq ingerlaqatigilerlugillu. Isitilli takunnitsaalisaammata ilisarinngilaat. Aperaalu: ’Sunaana ingerlatillusi oqaloqatigiissutigigissi?’ Unipput aliasuppalullutik, aappaatalu Kleofasimik atillip akivaa: ’Jerusalemimukarsimasuni taannatuaanerputit sianigisaqanngitsoq ulluni makkunani tassani pisimasunik?’ ’Sunik?’, aperivoq.“ Ajoqersuisorsuaq tusarnaarpoq taakku oqaluttuarmata Jiisusi Nazaretimioq inunnik ilinniartitsisimasoq, tupinnartuliorsimasoq toqutaasimasorlu. Maanna toqusunit makititaasimanera oqallisaavoq. Jiisusip Kleofasi taassumalu ilagisaa oqalutsiinnarpai. Taava ilisimasariaqagaannik nassuiaappai, ’Allakkanik nassuiaallugit’. — Lukasi 24:13-27, 32.

10. Pulaakkavit upperisarsiorneq qanoq isumaqarfigineraa qanoq ilillutit paasisinnaaviuk?

¹⁰ Taavami pulaakkavit upperisarsiorneq qanoq isumaqarfigineraa nalugukku? Immaqa oqarsinnaavutit inuit qinuneq qanoq isumaqarfigineraat tusassallugu nuannaralugu imalu aperalutit: „Isumaqarpit qinnutinut ilumut tusarnaartoqartartoq?“ Apeqqummut tamatumunnga akissut pulaakkap isumaanik upperisarsiornikkullu tunuliaqutaanik paasisaqarfiulluarsinnaavoq. Upperisamik pingaartitsippat ima aperiguit immaqa isumaanut tunngasunik suli paasisaqarnerusinnaavutit: „Isumaqarpit Guutip qinnutit tamaasa tusarnaartarai, imaluunniit qinnuteqarsinnaava taassuma akuerinngisaanik?“ Taamatut aperigaanni akunnattuunganani pissusissamisoortumik oqaloqatigiittoqalersinnaavoq. Biibilimi qanoq allassimasoqarneranik takutissallugu naleqqukkaangat periaaserillutit taamaaliortarit oqaloqatigisavit upperisaa isornartorsiornagu. Ilinnut tusarnaarnissani nuannariguniuk immaqa pulaaqqinnerit nuannarissavaa. Qanorli iliussavit akisinnaanngisannik apeqquteqarpat? Apeqqutigisaanut tunngasunik misissuigit, piareersarluarsimallutillu pulaaqqiguk ’neriuutigisaq ilinniittoq pillugu isummat illersorsinnaaqqullugu’, taamaaliorillu ’saamallutit ataqqinnilluinnarlutillu’ (NV). — 1 Petrusi 3:15.

Jiisusip „qinngaqqunnanngitsut“ ilinniartippai

11. Ilinniartinneqarnissaminnut qinngaqqunnanngitsut qanoq ilillutit nanisinnaavigit?

¹¹ Inuk naammalluinnartoq Jiisusi ima naliliilluarsinnaatigaaq kikkut ilinniartinneqarnissaminnut qinngaqqunnannginnersut nalilersinnaallugu. Kikkut ’inuunermik naassaanngitsumik eqqortumik isumaqarfiginnittuunerata’ aalajangersimasumik oqaatiginissaa uagutsinnut sapernarnerujussuuvoq. (Apustilit Suliaat 13:48, NV) Aamma apustilit tamanna sapernartippaat. Jiisusip ima ilitsersorpai: „Sumut illoqarfimmut nunaqarfimmulluunniit pigaangassi, tassani qinngaqqunnanngitsut tassanimiut ujassavasi.“ (Matthæusi 10:11, NV) Jiisusip apustiliisa pisimanerattut tusarnaarumasunik Biibililu pillugu ilisimasaqalerumasunik ujaasisariaqarputit.  Qinngaqqunnanngitsut nanisinnaavatit oqaloqatigisatit tamaasa tusarnaaqqissaarlugit tamarmillu immikkut qanoq isumaqarnerat maluginiarlugu.

12. Soqutiginnittoq qanoq siumukartumik ikiorsinnaaviuk?

¹² Guutip naalagaaffia pillugu tusarliussamik soqutiginnittoq qimareeraangakku, taassuma anersaakkut pisariaqartitaasa eqqarsaatigiuarnissaat pitsaassaaq. Nutaarsiassaq nuannersoq pillugu oqaloqateqareeraangavit sunik oqaloqatigiissuteqarsimanersi pulaakkavillu sunik paasisaqarnerorusunnera pillugit eqqaamassutissannik naatsunik atorluarsinnaasunillu allattuisaruit pulaakkat anersaakkut siumukartumik ikiorsinnaanerussavat. Pulaaqqiininni tusarnaaqqissaartariaqarputit pulaakkavit upperisaa, qanoq isumaqarnera pissutsillu atugai ilisimasaqarfigilluarnerulerniassagakkit.

13. Pulaakkavit Biibili qanoq isumaqarfigineraa qanoq ilillutit paasisinnaaviuk?

¹³ Qanoq ilillutit inuit Guutip oqaasianik qanoq isumaqarfiginninnerat pillugu oqaluttuarusulersissinnaavigit? Sumiiffiit ilaanni ima aperaluni pitsaasarpoq: „Illit Biibili paasiuminaatsippiuk?“ Apeqqummut tamatumunnga akissutaa taassuma anersaakkut ittunik qanoq isumaqarfiginninneranik amerlanertigut paasisaqarfiungaatsiartarpoq. Aamma allassimaffimmik atuarsinnaavutit imalu aperalutit: „Tamanna qanoq igaajuk?“ Immaqa Jiisusip pisimaneratut naleqquttunik apeqquteqartarnikkut oqaluussisartutut naammassisaqarluarsinnaavutit. Matumanili mianersoqqusinissaq naleqqutissaaq.

Jiisusi naleqquttunik sunniuteqarluartunillu aperisarpoq

14. ’Killisiuinak’ allat isumaannik soqutiginninnerit qanoq ilillutit ersersissinnaaviuk?

¹⁴ Alapernaappallaarnak allat qanoq isumaqarnerannik soqutiginninnerit ersersittaruk. Jiisusip periaasia ilaartaruk. Taanna naleqqutinngitsumik apersuineq ajorpoq, eqqarsalernartunilli apeqquteqartarpoq. Inussiarnerluni tusarnaartarpoq, eqqortuliorusuttut nukissaqalersittarlugit, ilorrisimaalersittarlugillu. (Matthæusi 11:28) Inuit tamalaat isumakuluutitik pillugit taassumunnga saaffiginninnissartik pissusissamisoortutut isigaat. (Markusi 1:40; 5:35, 36; 10:13, 17, 46, 47) Inuit Biibili tassanilu ajoqersuutigineqartut pillugit isummatik ilinnut oqaluttuariuminartissappatigit killisiortutut issanngilatit.

15, 16. Qanoq ilillutit inuit upperisarsiornermut tunngasunik oqaloqatigilersinnaavigit?

¹⁵ Apeqqutinut sunniuteqarluartunut tapertatut immaqa arlaannik soqutiginartumik oqaaseqarlutit oqaloqateqalersinnaavutit taavalu tamatumunnga akissutigineqartoq tusarnaarlugu. Jiisusi taamaaliorpoq Nikodemusi ima oqarfigigamiuk: „Guutip naalagaaffia inuup takusinnaanngilaa ernioqqissimanngikkuni.“ (Johannesi 3:3) Oqaatsit taakku ima sunniuteqartigipput Nikodemusi akinngitsoorsinnaananilu Jiisusimut tusarnaanngitsoorsinnaanani. (Johannesi 3:4-20) Immaqa aamma illit inuit taamatupajaaq oqaloqatigilersinnaavatit.

¹⁶ Ullumikkut upperisarsiornerit nutaat siuariartornerat ilaatigut Afrikami, Europap Kangisissuani Latinamerikamilu oqallisaasarpoq. Sumiiffinni taakkunani amerlanertigut oqaloqatigiinnermik aallarniisoqarsinnaavoq ima oqarluni: „Taama amerlatigisunik upperisarsioqatigeeqarnera isumakulunnarsinnaavoq. Neriuppungali inuit inuiannit tamaneersut qanittukkut Guutip piumasaa naapertorlugu taassuminnga pallorfiginninnermi ataasioqatigiilerumaartut. Taamatut pisoqarnissaa aamma illit kissaatigaajuk?“ Allat ilimaginngisaannik illit neriuutit pillugu oqaaseqarnikkut immaqa allat isumaannik annisserusulersissinnaavatit. Aamma apeqqutit akiuminarnerusarput apeqqutip akinissaanut periarfissat marluugaangata. (Matthæusi 17:25) Pulaakkavit apeqqutit oqaaseqarfigereerpagu, taava allassimaffik ataaseq allassimaffiilluunniit marluk atorlugit apeqqut illit nammineq akiuk. (Esaja 11:9; Sefania 3:9) Tusarnaaqqissaaruit oqaaserineqartullu maluginiarukkit immaqa tulliani pulaaqqinnissannut sammisinnaasassinnik isumassarsisinnaavutit.

Jiisusip meeqqat tusarnaartarpai

17. Qanoq nalunngilarput Jiisusip meeqqat soqutigigai?

¹⁷ Jiisusip inersimasut kisiisa soqutiginagit  aammali meeqqat soqutigai. Meeqqat pinnguaataat oqaloriaasiilu ilisimasaqarfigai. Ilaannikkut meeqqat qaaqqusarpai. (Lukasi 7:31, 32; 18:15-17) Inuppassuit Jiisusimut tusarnaartut akornanni meerarpassuaqartarpoq. Nukappiaqqat nipituumik Missiarsitut unnersiutigimmanni tamanna maluginiarpaa tamatumalu Allakkani siulittuutigineqarsimanera malugeqqullugu. (Matthæusi 14:21; 15:38; 21:15, 16) Ullumikkut meerarpassuit Jiisusimut ajoqersuganngortarput. Taakku qanoq ikiorsinnaavigit?

18, 19. Qitornat anersaakkut ineriartornissaanut qanoq ikiorsinnaaviuk?

¹⁸ Qitornat anersaakkut ittumik ikiussagukku tusarnaartariaqarpat. Paasisariaqarpat meeraq Jehovap eqqarsartaasianut naapertuutinngitsunik isumaqarsinnaammat. Qitornat qanorluunniit oqaraluarpat silatusaarnerussaaq akuersaartumik oqaaseqarluni aallartinnissaq. Taava allassimaffiit naleqquttut atorlugit qitornat paasitissinnaavat oqaloqatigiissutigisarsi Jehovap qanoq isigineraa.

¹⁹ Aperisarneq pitsaaquteqarpoq. Meeqqalli killisiorneqarneq inersimasutulli nuannarinngitsigisarpaat. Qitornat akiuminaatsunik aperisarnagu, imminulli naatsunnguamik oqaluttuarisarit. Suna oqaloqatigiissutiginerissi apeqqutaalluni illit nammineq qanoq misigisimanerlutit aamma sooq taamatut misigisimanerlutit oqaluttuarisinnaavat. Taava ima aperisinnaavutit: „Aamma illit taamatut misiginikuuit?“ Qitornavit akissutaa tunngavigalugu Biibili iluaqutaasumik kajumissinartumillu oqaloqatigiissutigisinnaavarsi.

Ajoqersuisorsuaq ilaartuaruk

20, 21. Sooq ajoqersuganngortitsiniarninni tusarnaallaqqissuunissat pingaaruteqarpa?

²⁰ Oqaloqatigisat qitornarigaluarukku inersimasuugaluarpalluunniit tusarnaarluartarnissaq pingaaruteqarpoq. Tamannami asanninnermut ersiutaavoq. Tusarnaaraangavit maniguuttarputit, aamma oqaloqatigisat ataqqisarlugulu asannillutit qajassuuttarpat. Soorunami tamatumunnga ilaavoq oqaloqatigisavit oqaasiinik eqqumaffiginninnissat.

²¹ Oqaluusseqataagaangavit, taava oqaloqatigisatit tamatigut tusarnaaqqissaartakkit. Oqaasii maluginiaqqissaartarukkit, tusarliussamut Biibilimeersumut tunngassuteqartut suut immikkut soqutigissaneraat qularnanngitsumik nalilersinnaassavat. Taava Jiisusip ilinniartitseriaasii assigiinngitsut atorlugit ikiorniarlugit sapinngisannik iliorit. Taamaalioruit nuannaarneq nalerisimaarnerlu akissarsiarissavatit Ajoqersuisorsuarmik ajoqersuganngortitsiortornermut pikkorissumik ilaarsinerit pissutigalugu. (wE 11/15 07)

Qanoq akissavit?

• Inuit eqqarsaatiminnik oqaatiginninnissaannut kajumissaarniarlugit Jiisusi qanoq iliortarpa?

• Sooq Jiisusip ilinniartitani tusarnaartarpai?

• Oqaluussinermi apeqqutit qanoq atorsinnaavigit?

• Meeqqat anersaakkut ikiorniarlugit qanoq iliorsinnaavit?

[Atuaqqissaarnermi apeqqutit]

[Qupp. 29-mi assiliartaq]

Oqaluussigaangavit tusarnaaqqissaartarnissat eqqaamajuk

[Qupp. 31-mi assiliartaq]

Meeqqat anersaakkut ikioraangatsigit Jiisusi ilaartarparput