Imbujolenu Mukwakwilisha Atumbanji Muneni

“Babelenu chimukutiya.”—LUKA 8:18.

1, 2. Muloñadi chimukukeñela kwiluka chazatiliyi Yesu nawantu mumudimu windi wakushimwina?

 YESU KRISTU wakoñeleña mudimu windi neyi Ntañishi Muneni nawa Mukwakwilisha Atumbanji Muneni hampinji yayilejeliyi atumbanji twindi nindi: “Babelenu chimukutiya.” (Luka 8:16-18) Ilu lushimbi lunakundami kumudimu weyi wakushimwina hamu neyi mwiniKristu. Neyi mukutiyilila kufumba kwakuspiritu, mukukwizatisha nawa mukwikala mukwakushimwina waWanta wakuluka yitembi. Hela chakwila makonu himwatiyaña Yesu nakuhoshaku, ilaña munateli kutaña mazu ahosheliyi niyuma yeliliyi, neyi chayishimunawu muNsona. Indi nsona yahoshaña nawudi chazatiliyi Yesu nawantu mumudimu windi wakushimwina?

² Yesu wadiña mukwakushimwina nsañu yayiwahi wakuluka yitembi nawa wadiña ntañishi wabadika wachalala chamuNsona. (Luka 8:1; Yowanu 8:28) Mudimu wakwilisha atumbanji wabombelamu kushimwina nikudizisha, ilaña eniKristu amakwawu elukisha kushimwina chayikalilaña kudizisha antu chachiwahi. Mukushimwina mwabombela kubidika nsañu, ilaña kuleja antu hadi Yehova nihankeñelu yindi chakeñekaña ntañishi kukwata wubwambu nakambanji. (Matewu 28:19, 20) Tunateli kwila mwenimu kuhitila mukumwimbujola Yesu Kristu, Ntañishi Muneni nawa Mukwakwilisha Atumbanji.—Yowanu 13:13.

3. Indi kumwimbujola Yesu kunateli kukwasha ñahi mudimu wenu wakwilisha atumbanji?

³ Neyi mukwimbujola ntañishililu yaYesu, dikwila nawu mukulondelaña kufumba kwakapostolu Pawulu kwahosheliyi nindi: “Endenu namaana kumesu awantu adi hanzi, nakukwatila mafuku maana. Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” (Akolose 4:5, 6) Kumwimbujola Yesu mumudimu wakwilisha atumbanji chakeñekaña kuzata nañovu. Nawa chikuwahishaku ntañishilu yenu muloña chikuyikwashaku ‘kwiluka mwakwakwila’ kwesekeja nachuma chinakukeñayi muntu.

Yesu Wetejeleña Amakwawu Kuhosha

4. Muloñadi chitukuhoshela netu Yesu wadiña ntiyilili wamuwahi?

⁴ Kufuma tuhu kuwansi windi, Yesu wadiña nachaaku chakutiyilila kudi antu nikuyiteja kuhosha yuma yinakutoñojokawu. Chakutalilahu, chashikijiliyi yaaka 12, anvwali jindi amuwanini mutembeli, nashakami mukachi kawankuluñaña, “nakutiya nikuyihujola.” (Luka 2:46) Yesu hayili kutembeli nakutiyisha ankuluñaña nsonyi namaaninduku. Yesu wayili kutembeli nakutiya, hela chakwila wehwileña malwihu. Hamuloña wakwikala nachililu chakutiyilila chamuletesheli kwikala muntu wamuwahi kudi Nzambi nikudi antu.—Luka 2:52.

5, 6. Tuneluki ñahi netu Yesu watiyilileña chadiña nakuhoshawu antu atañishileñayi?

⁵ Hanyima yachipapatishu chindi nikumuwayisha neyi Mesiya, Yesu watwalekeluhu nakutiyilila kudi antu. Hashindameneni hayuma yatañishileñayi chakwila yavulamena niantu enjileña nakutiya chahosheleñayiku. Kakavulu, wahudikilileña, nakwihula chatoñojokeleñawu, nikutiya chakwileñawu. (Matewu 16:13-15) Chakutalilahu, chelili Lazaru, mana kwa Mata nafwi dehi, Yesu wamulejili Mata nindi: “Muntu wamumi nankuhwelelami hamba kafwaku.” Dichi hakumwila Mata nindi: “Eyi wunetiyi mwenimu?” Yesu watiyilili hampinji yakwileñayi Mata nindi: “Eña Mwanta, netiyi  nami yeyi Kristu, Mwana kaNzambi.” (Yowanu 11:26, 27) Wenowu muzañalu watiyiliyi hakutiya Mata nakuhosha hachikuhwelelu chindi muniyi njila!

⁶ Chelili atumbanji amavulu anamutemuki dehi, Yesu wakeñeli kutiya chatoñojokeleñawu apostolu indi. Wayihwili nindi: “Ninenu nawa keña muyi kwenu, tahindi?” Kuchinka Shimona Petulu nindi: “Tukuya kudinyi [Mwanta]? Eyi yeyi wukweti mazu awumi wahaya nyaka. Tunetiyi, tuneluki netu eyi yeyi Wajila waNzambi.” (Yowanu 6:66-69) Awa mazu atela amuzañalesheli Yesu chikupu. Kadizi waBayibolu neyi yahosha mazu amuchidiwu achikuhwelelu akuyizañalesha chikupu.

Yesu Watiyilileña naKalemesha

7. Muloñadi aSamariya amavulu chiyamwitiyiluwu Yesu?

⁷ Kwakamena antu nikuyitiyilila nakalemesha dichuma chikwawu chamukwashili Yesu kwikala mukwakwilisha atumbanji wamuwahi. Mpinji yimu, Yesu washimwinini kudi mumbanda kaSamariya kwakwihi neshima daYakoba kuSika. Hampinji yahanjekeleñawu, Yesu hahosheleña hohu nkawinduku; ilaña wamwitejeli mumbanda kuhosha iku yena nakutiyilila. Hampinji yatiyilileñayi, Yesu welukili nindi ona mumbanda wakeñeli kudifukula nawa wamulejeli nindi Nzambi wakeñeleña antu akudifukula kudi Yena muspiritu nimuchalala. Yesu wamulemeshili nikumwakamena iwu mumbanda. Chumichi chamuleñeleli iwu mumbanda kuya nakuleja akwawu hadi Yesu, nawa “aSamariya amavulu amumukalowu amwitiyili nezu danowu mumbanda.”—Yowanu 4:5-29, 39-42.

8. Indi yililu yawantu yakukeña kuhosha yuma yinakutoñojokawu yikuyikwasha ñahi kutachika mpanji mwiha?

⁸ Kakavulu antu akeñaña kuhosha yuma yinakutoñojokawu. Chakutalilahu, antu amuAtena wakunyaka akeñeleña kuhosha mwanafuukuluwu nikutiyilila kuchuma chachiha. Chumichi chamuletesheli kapostolu Pawulu kuhana mpanji yayiwahi kutalisha hampidi yaMarasa muwuna musumba. (Yililu 17:18-34) Dichi neyi himukutachika kuhosha namwiniitala, mwatela kuhosha nenu, “Nayendeli muloña nakukeña kutiya yitoñojoka yenu kutalisha [shimunenu mutu wampanji].” Tiyililenu chinakuhoshayi, nawa hoshenuhu, hela ihulenu lwihu kutalisha hayuma yimunatiyi. Nawa mulejenu chachiwahi chiyahoshaña Bayibolu hanoyu nsañu.

Yesu Welukili Chakutachika Kuhanjeka

9. Chumanyi cheliliyi Yesu henohu kanda ‘yayilumbulwili Nyikanda Yajila’ aKilopa nimulundanindi?

⁹ Yesu habulileña mazu akuhoshaku. Hela chakwila wadiña ntiyilili wamuwahi, Yesu welukileña chatoñojokeleñawu antu, nawa welukili mazu akuhosha. (Matewu 9:4; 12:22-30; Luka 9:46, 47) Chakutalilahu: Chimwahitili mafuku antesha kufuma hakusañuka kwaYesu, atumbanji twindi ayedi afumineña kuYerusalema nakuya kuEmawusi. Chileji chaNsañu Yayiwahi chahoshaña nawu: “Chadiñi nakuhanjikawu nakudihujola, yomweni Yesu hakukundama kwakwihi, hakwenda nawu. Ilaña mesu awu akañenyi kumwiluka. Hakuyila nindi, Oyu nsañu yimudi nakuya nakuhosha, nsañwinyi? Wena hiyakwimana ku-ka nakudihomba. Wumu ijina dindi Kilopa,  hakumwakula nindi, Eyi yeyi mwenyi kanka weyi muYerusalema, wunabuli kwiluka yuma yinamwekanumu mafuku anu? Hakuyila nindi, Yumanyi?” Ntañishi Muneni watiyilili chalumbulwileñawu atumbanji nawu Yesu wakuNazareta watañishileña antu, nikwila yihayamisha, anamujahi. Ilaña amakwawu ahosheleña nawu anamusañuli mudi afu. Yesu wayitejeli aKilopa nimulundanindi kudihoshela aweni. Dichi wayilumbulwilili yuma yateleleluwu kwiluka, ‘nakuyilumbulwila Nyikanda Yajila.’—Luka 24:13-27, 32.

10. Munateli kwiluka ñahi yitoñojoka yamuntu yimukuhumañana mwiha kutalisha hansakililu yindi?

¹⁰ Hadaha muneluki wanyi yitoñojoka yamwiniitala kutalisha hansakililu yindi. Hakwila mwiluki, mwatela kuhosha nenu mwakeñaña kutiya chatoñojokañawu antu kutalisha hakulomba. Kuhiñahu mwatela kwihula nenu, “Komana mwatoñojokaña nenu kudi muntu watiyaña kulomba?” Ñakwilu yindi yikushimuna yuma yayivulu kutalisha hayitoñojoka yanowu muntu ninsakililu yindi. Neyi himukwansakililu, mwatela kwiluka chinakutoñojokayi kuhitila mukumwihula nenu, “Komana mwatoñojokaña nenu Nzambi watiyaña kulomba kwejima, tahindi kudi kulomba kukwawu kwabulaña kwitejayi?” Kuzatisha malwihu muniyi njila kukuyikwashaku kuhanjeka chiwahi. Neyi munakukeña kumuleja chahoshaña Bayibolu hanoyu nsañu, mwatela kubabala, bayi kuhosha neyi munakumusompesha hayuma yakuhwelelayiku. Neyi natiyi kuwaha, wukuyileja nindi mwakafuntuku cheñi. Indi neyi wukuyihula lwihu lwakala, mukwiladi? Mwatela kuya nakusandujola kulonda mukafunti cheñi adiloñesha kuhana ‘nsañu yakuchiñeja kumwachiñejaña; nakudizoza niwoma.’—1 Petulu 3:15.

Yesu Watañishileña Antu Atelela

11. Chumanyi chikuyikwashaku kuwana antu atelela kudizisha?

¹¹ Muntu waloña Yesu wadiñi nakashinshi kamukwashileñaku kwiluka antu atelela kutañisha. Anetu nawa chatwikalilaña kuwana chikupu antu “afuukwilawu dehi kumona wumi wahaya nyaka.” (Yililu 13:48) Dicheliliwu niapostolu alejeluwu kudi Yesu nawu: “Nimunyikala yejima yimwakeñila, hela yeneni, hela yanyanya, mwakakeñakeñamu yowu wudumu watela.” (Matewu 10:11) Kufwana apostolu aYesu, munateli kukeñakeña antu anakukeña kutiya nikuyileja chalala chamuBayibolu. Munateli kuwana antu atelela kuhitila mukutiyilila antu ejima yimukuhosha nawu, nikwiluka yitoñojoka yamuntu nimuntu.

12. Munateli kutwalekelahu ñahi kukwasha muntu wunamwekeshi mpwila?

¹² Neyi munakumishi dehi kuhanjeka namuntu wunamwekeshi mpwila munsañu yaWanta, chikuwaha neyi mukutwalekahu kutoñojoka hachalala chaBayibolu chinakukeñayi kudiza. Neyi musoneka yuma yimwatiya hampinji yimwahanjika namuntu hansañu yayiwahi, chikuyikwashaku kutwalekahu kumukwasha iwu muntu lwakuspiritu. Hakufuntilaku, mwatela kushaku kashinshi kakutiyilila neyi munakukeña kwiluka jajivulu hayuma yakuhwelelayi iwu muntu, yililu yindi ninshakaminu yindi.

13. Chumanyi chikuyikwasha kwiluka yitoñojoka yamuntu kutalisha haBayibolu?

¹³ Munjilanyi mumwatela kukwashila antu kulonda ayileji chatoñojokañawu kutalisha Hezu daNzambi? Kumaluña amakwawu, mwatela kwihula nenu, “Komana mwesekahu dehi kutiyishisha chahoshaña Bayibolu?” Ñakwilu yindi yikumwekesha neyi wamulemesha Nzambi hela nehi. Njila yikwawu yidi yakutaña nsona nikumwihula nenu, “Indi iyi nsañu munayitiyi ñahi?” Kufwana Yesu, munateli kuzata chiwahi mudimu wenu wakushimwina kuhitila mukuzatisha malwihu amawahi. Hela chochu, twatela kusoñama.

Yesu Wazatishileña Malwihu Chachiwahi

14. Munateli kulemesha ñahi yitoñojoka yawantu, chakadi kuyihula neyi munakuyinka muloña?

¹⁴ Lemeshenu yuma yinakuhoshawu amakwawu chakadi kuyitiyisha nsonyi. Londelenu chakutalilahu chaYesu. Hadiña nakwihula malwihu akufwisha namuloñaku, ilaña wazatishileña malwihu akuletesha kutoñojoka. Yesu  wadiñi cheñi mukwakutiyilila wanookesheleña antu ashinshika nikuwundisha nyichima yawu. (Matewu 11:28) Antu ejima enjileña nakumuleja kukala kwawu chakadi kutiya woma. (Maku 1:40; 5:35, 36; 10:13, 17, 46, 47) Hakwila nawu antu abuli kwakamena hampinji yinakuyilejawu chatoñojokañawu kutalisha haBayibolu nintañishilu yachu, bayi muyihulaña neyi munakuyinka muloñaku.

15, 16. Munateli kutachika ñahi kuhanjeka nawantu kutalisha hansañu yinakundami kunsakililu?

¹⁵ Chuma chikwawu chinakukeñeka hakuzatisha chiwahi malwihu, hikutwalekahu kuhanjeka kuhitila mukuhosha nsañu yayiwahi nikutiya chikwakulawu. Chakutalilahu, Yesu wamwilili Nikodemu nindi: “Muntu kutwesha kumona wanta waNzambi chiña avwalika chachiha.” (Yowanu 3:3) Awa mazu amuzañalesheli Nikodemu chikupu chakwila wamwakwili nikumutiyilila Yesu. (Yowanu 3:4-20) Ninenu nawa munateli kutachika kuhanjeka nawantu munjila yoyimu.

¹⁶ Makonu, kuvula kwansakililu jajiha dichuma chinakusweja kuhoshahu antu muAfrica, kuMusela waEurope, nikuLatin America. Munawa matuña, munateli kutachika kuhanjeka nenu: “Nakwakamena hansañu yakuvula kwansakililu. Ilaña nakutalila mpinji yikadinuña antu akunyuza yejima mukudifukula kwalala. Komana munakukeña kumona chuma chamuchidiwu?” Chimwahosha nsañu yakuhayamisha kutalisha hakuchiñeja kwenu, chikuletesha antu kuhosha chinakutoñojokawu. Malwihu niwena ekalaña aswayi kwakula neyi adi munjila jiyedi jakwakwilamu. (Matewu 17:25) Neyi mwiniitala nahoshuhu dehi halwihu lumunehuli, anenu nawa akulenu kuzatisha nsona yimu hela jiyedi. (Isaya 11:9; Zefwaniya 3:9) Kuhitila mukutiyilila nakanañachima nikwiluka chinakwakulayi muntu, munateli kwiluka nsañu yimukahanjekahu chimwakafunta.

Yesu Watiyilileña Anyana

17. Chumanyi chinakumwekesha nawu Yesu wayikeñeli anyana?

¹⁷ Yesu hakeñeli akulumpi hohuku ilaña wakeñeli nianyana. Welukili yisela yahemeneñawu atwansi ninsañu yahosheleñawu. Mpinji yikwawu watambikileña anyana kwinza kudi yena. (Luka 7:31, 32; 18:15-17) Atwansi amavulu adiña hakachi kamazaza awantu atiyileña chahosheleñayi Yesu. Chelili anyana hiyakubilela nakumuhameka Mesiya, Yesu wamweni, nawa wahosheli nindi Nyikanda yashimwineñahu dehi nawu chumichi chikamwekana. (Matewu 14:21; 15:38; 21:15, 16) Makonu, atwansi amavulu anakwikala atumbanji twaYesu. Dichi munateli kuyikwasha ñahi?

18, 19. Munateli kukwasha ñahi mwanenu kwikala kambanji kaYesu?

¹⁸ Hakwila nawu mukwashiku mwanenu lwakuspiritu, mwatela kutiya chinakuhoshayi. Mwatela kutiya yitoñojoka yindi chiyidi hadaha yinambukiku nayitoñojoka yaYehova. Hichikweti muloña nachinahoshiyi mwanenuku, chikuwaha neyi mukusambila kumuhameka. Kufumahu dinu himukuzatisha nsona jatelela kulonda mumukwashi kwiluka Yehova chamonañayi yuma.

¹⁹ Malwihu anateli kuyikwashaku kwiluka chinakutoñojokawu anyanenu. Akulumpi hiyakeñaña kuyihujola neyi munakuyinka muloñaku. Anyana niwena hiyakeñañaku. Chatela kumutwika mwana chitelu chakwakula malwihu amavulu akala, komana kwila muhosha chantesha chimwatoñojokaña nehi? Kwesekeja nansañu yimunakuhoshahu, mwatela kulumbulula nenu dichimwatoñojokeleña nawa shimunenu chayiletesheli kutoñojoka muniyi njila. Kufumahu mwatela kwihula nenu, “Komana nineyi dichiwatoñojokaña?” Chikwakulayi  mwanenu chikuyileñela mwikali nampanji yayiwahi yamuNsona nawa yakukolesha.

Imbujolenuña Mukwakwilisha Atumbanji Muneni

20, 21. Muloñadi chimwatela kwikala ntiyilili wamuwahi mumudimu wenu wakwilisha atumbanji?

²⁰ Hela munakuhanjeka namwanenu hela namuntu mukwawu, mwatela kutiyilila chikupu. Eña, kutiyilila hichinjikijilu chakukeña. Kutiyilila kwamwekeshaña kudizoza, nawa kwamwekeshaña nawu munamulemeshi nikumwakamena muntu wunakuhosha. Ilaña, kutiyilila kwakeñekaña kushaku kashinshi kakeni kumazu anakuhoshayi muntu.

²¹ Chimukuzataña mumudimu wawiniKristu, tiyililenuña chikupu chikuhoshaña enimatala. Neyi mukutiyililaña chiyanakuhosha, mukwiluka nsañu yalala yamuBayibolu yatela kuyizañalesha nankashi. Nawa fwilenu kuyikwasha kuhitila mukuzatisha njila jashiyashana jatañishilileñamu Yesu. Chimukwilaña mwenimu, mukwikala namuzañalu weneni muloña munakwimbujola Mukwakwilisha Atumbanji Muneni.

Mukwakula Nenudi?

• Indi Yesu wetejeleña ñahi antu kuhosha mwatoñojokeleñawu?

• Muloñadi Yesu chatiyilileñayi antu atañishileñayi?

• Munateli kuzatisha ñahi malwihu mumudimu wakushimwina?

• Chumanyi chimwatela kwila kulonda kukwasha anyana lwakuspiritu?

[Malwihu aKuzatisha haKudiza]

[Mwevulu wudi hefu 26]

Neyi munakushimwina, mwatela kutiyilila chikupu