D rɩk karen-saam-kãsengã togs-n-taare
D rɩk karen-saam-kãsengã togs-n-taare
“Bɩ y gũus ne yãmb sẽn kelgd to-to wã.”—LUK 8:18.
1, 2. Bõe yĩng tɩ d segd n bao n bãng a Zezi sẽn tall manesem ning ne nebã a koe-moonegã pʋgẽ?
DAAR a yembre, Karen-saam-kãseng a Zezi Kirist sẽn da wa n zãmsd neba, a yeel-b-la woto: “Bɩ y gũus ne yãmb sẽn kelgd to-to wã.” (Luk 8:16-18, Kãab-paalgã Koe-noogo) Kiris-ned fãa segd n tũu sagl-kãngã koe-moonegã pʋgẽ. D sã n gũusd neer n kelgd b sẽn zãmsd tõnd bũmb nins Wẽnnaam la a raabã wɛɛngẽ wã, d na n tõog n tũume la d yɩ koe-moondb sẽn tar minim. La sẽn paase, d na n tõogd n moonda koɛɛgã la d maand karen-biisi. Yaa sɩd tɩ rũndã-rũndã, d pa tõe n wʋm a Zezi sẽn sɩd gomd ne-d ye. La d sã n karemd Biiblã, d wʋmda goam nins a sẽn gomã la d bãngd a sẽn maanã. Biiblã wilgdame t’a Zezi yel-manesem da yaa wãn to ne nebã a koe-moonegã pʋgẽ?
2 A Zezi yɩɩ koe-moond sẽn da mi koɛɛgã mooneg hal sõma la Biiblã karen-saamb sẽn tall minim wʋsgo. (Luk 8:1; Zã 8:28) Yaa sɩd tɩ karen-biisã maaneg baoodame tɩ d taas nebã koɛɛgã, la baoodame me tɩ d zãms-b Wẽnnaam Gomdã. La pa nana ne kiris-neb kẽer sẽn mi koɛɛgã mooneg sõma tɩ b tõog n zãms ned Biiblã ye. Taas ned koɛɛg yaa togs a soab koɛɛg bala. La naoor wʋsgo, zãms ned Biiblã t’a bãng a Zeova la a raabã baoodame tɩ d yõg zood ne a soabã. (Matɩe 28:19, 20) D sã n dɩk Karen-saam-kãseng a Zezi Kirist togs-n-taare, d na n tõogd n yõgda zood ne nebã.—Zã 13:13.
3. Wãn to la a Zezi togs-n-taar dɩkr na n sõng-d tɩ d maan karen-biisi?
3 D sã n dɩkd a Zezi karen-saamdã togs-n-taare, d tũuda tʋm-tʋmd a Poll saglga. A yeela woto: “Bɩ y gũus y mens neer ne neb nins sẽn ka be tẽeb pʋgẽ wã. La y maan yãmb sẽn tõe tɛk wakat fãa. Bɩ y kɩt tɩ yãmb goamã zĩnd bark wakat fãa n paam yamsem noom, la y bãng sẽn zems n leok ned kam fãa.” (Kolos rãmba 4:5, 6) Yaa sɩd tɩ tõog n zãms nebã Biiblã wa a Zezi sẽn da zãmsd-b to-to wã baooda modgre. La d sã n modgd n dɩkd a togs-n-taare, d na n bãngd n leokda ned kam fãa tɩ zemsdẽ, tɩ kɩt tɩ d tõogd n zãmsd-b Biiblã sõma.
A Zezi ra kɩtdame tɩ nebã wilgd b tagsgo
4. Bõe yĩng tɩ d tõe n yeel t’a Zezi ra mii neb kelgre?
4 Hal a Zezi yãadmẽ, a ra minim n kelgda nebã neer la a kɩtdẽ tɩ b togsd b tagsgo. A sẽn da wa n tar yʋʋm 12, a roagdbã ra tɩ mik-a-la wẽnd-doogã pʋgẽ t’a zĩ karen-saam dãmbã sʋk n kelgd-b la a sogsd-ba. (Luk 2:46) A Zezi ra pa kẽng Wẽnd-doogẽ wã n na n tɩ wilg karen-saam dãmbã tɩ b pa mi Tõogã n ta-a ye. A kẽngame n na n tɩ kelge, la a sok-b-la sogsg wʋsg me. Tõe tɩ yaa a Zezi sẽn da mi nebã kelgrã yĩng n kɩt t’a ra paamd Wẽnnaam la nebã pẽgrã.—Luk 2:52.
5, 6. Wãn to la d mi t’a Zezi ra kelgda neb nins a sẽn zãmsdã?
5 Baa Wẽnnaam sẽn wa n zae a Zezi ne vʋʋsem sõngã a lisgã daar t’a lebg Mesi wã zugẽ, a ra ket n kelgda nebã neere. A pa bas tɩ bũmb ning a sẽn da tar n na n zãms nebã kɩt t’a ra pa ye kelgd sẽn wat-b a nengẽ n na n kelg a goamã ye. Naoor wʋsgo, a mi n basda goamã n sokd-b b sẽn tagsde, la a kelgd-ba. (Matɩe 16:13-15) Wala makre, a Mart tão a Lazaar kũumẽ wã, a Zezi yeela a Mart woto: “Ned ninga fãa sẽn vɩ n tẽed maam, a kõn ki abada ye.” Rẽ poore, a soka a Mart yaa: “Fo tẽeda woto bɩ?” T’a Mart leoke: “N-ye Zusoaba, mam tẽedame tɩ yãmb yaa Kirist, Wẽnnaam Biigã.” (Zã 11:26, 27) Yaa vẽeneg t’a Zezi sũur segd n yɩɩ noog a Mart sẽn leok woto n wilg t’a sɩd tẽed-a lame wã.
6 A Zezi karen-biis wʋsg sẽn da wa n tõdg tɩ b pa na n ye tũ-a wã, a tʋlg n bãnga a tʋm-tʋmdbã tagsgo. Rẽ kɩtame t’a sok-b woto: “La yãmba, yãmb me ka rat n bas maam la?” A Sɩmo Pɩɛɛr leoka bãmb yaa: “Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama. La tõnd tẽeme la d miime tɩ yãmb yaa Kirist sẽn yaa Wẽnnaam Sõng Soabã.” (Zã 6:66-69) Ad gom-kãensã sɩd ra segd n yɩ a Zezi noogo! Vẽenega, d sã n paam tɩ ned d sẽn zãmsd Biiblã me wilg-d a tẽeb woto, d sũur na n yɩɩ noogo.
A Zezi ra waoogda neb nins a sẽn kelgdã
7. Bõe n kɩt tɩ Samari neb wʋsg sak n tẽ a Zezi?
7 Bũmb a to n da kɩt me t’a Zezi tõogdẽ t’a kɛlgdbã lebgd a karen-biisi. A ra maagda a yĩng n kelgd-b tɩ wilgdẽ t’a nand-b lame la t’a sɩd tʋll n sõng-b lame. Wala makre, Sɩkaar soolmẽ wã, a Zakoob bulgã noore, a Zezi moona koɛɛgã Samari paga. B sõsgã pʋgẽ a pa teeg goam bal ye, a basa pagã me t’a togs a tagsgo. A Zezi sẽn kelg-a wã, a mikame tɩ yaa ned sẽn nong Wẽnnaam tũudmã, tɩ kɩt t’a yeel-a tɩ Wẽnnaam baooda neb sẽn na n waoog-a ne sɩɩga, la ne sɩda. A Zezi waooga pagã la a wilg t’a sɩd tʋll n sõng-a lame. Woto kɩtame tɩ pagã tɩ gom ne neb a taaba, hal tɩ Samari rãmbã wʋsg sẽn be tẽn-kãng pʋgẽ wã tẽ a Zezi, pagã goamã yĩnga.—Zã 4:5-29, 39-42.
8. Koe-moonegã sasa, wãn to la d tõe n tũnug nebã sẽn nong n dat n wilg b tagsgã n sɩng sõsg ne-ba?
8 Naoor wʋsgo, nebã nong n datame tɩ b bas-b tɩ b wilg b tagsgo. Wala makre, pĩnd wẽndẽ Atɛn tẽngã neb ra nonga koe-paals kelgre, la b nong n togsd b tagsgo. Woto kɩtame tɩ tʋm-tʋmd a Poll paam n sõs ne-b b Areopaazẽ wã hal tɩ wʋsg sak n lebg tẽedba. (Tʋʋma 17:18-34) D sã n dat n sɩng sõsg ne ned koe-moonegã pʋgẽ, d me tõe n sɩnga woto: “Tõnd kaagda nebã rũndã, bala d nong n bãnga b tagsgo, [la d wilg bũmb ning zug d sẽn dat n sõsã].” Rẽ poor bɩ d kelg a soabã la d yaool n leok-a, wall d sok-a bũmb a sẽn yeelã zugu. Sẽn pʋgd bɩ d wilg-a Biiblã sẽn yet bũmb ningã. La d segd n maan boto ne waoogre.
A Zezi ra mi a sẽn na n sɩng sõsg to-to
9. Nand t’a Zezi bilg a Kleopas ne a tũud-n-taagã “Gʋlsg Sõamyã fãa võyã,” bõe la a maan-yã?
9 A Zezi ra zɩ n kong a sẽn na yɛɛlg n sɩng sõsg ye. A sẽn da kelgd nebã neerã toor sẽn ka be, naoor wʋsgo, a ra mi b tagsgã me, tɩ ra kɩtdẽ t’a mi a sẽn na n sɩng a sõsgã to-to. (Matɩe 9:4; 12:22-30; Luk 9:46, 47) Wala makre, a Zezi vʋʋgrã poor bilfu, a karen-biis a yiib n da yi Zerizalɛm n debd Emayusi. Ad evãnzillã sẽn yet rẽ wɛɛngẽ: ‘Bãmb sẽn yẽsd ne taaba, a Zezi kolgame n kẽnd ne bãmba. La bãmb yam ludame tɩ bãmb ka bãng tɩ yaa a Zezi ye. A Zezi soka bãmb yaa: “Yãmb kẽndame n yẽsd ne taab tɩ bõe tɩ y nens gãnem woto?” La bãmb ned a yembr sẽn boond t’a Kleopas leoka a Zezi yaa: “Yaa yãmb y ye bal n be Zerizalɛm n ka bãng bũmb ninga sẽn maan masã wã bɩ?” A Zezi soka bãmb yaa: ‘Yaa bõe yelle?’” Rẽ poore, Karen-saam-kãsengã maaga a yĩng n na n kelg-ba. B leokame tɩ Nazarɛt dao sẽn da zãmsd nebã Wẽnnaam daabã hal sõma la a maand yel-soalem la b kʋ-yã, tɩ kẽer yetẽ tɩ Wẽnnaam vʋʋg-a lame. A Zezi basame t’a Kleopas ne a tũud-n-taagã gom n sa. Rẽ poore, a sõng-b lame tɩ b wʋm yel-kãngã võore, ‘n bilg-b Gʋlsg Sõamyã fãa võyã.’—Luk 24:13-27, 32.
10. Koe-moonegã sasa, wãn-wãn la d tõe n maan n bãng ned tũudum la a tagsgo?
10 Koe-moonegã pʋgẽ, d tõe n sega ned n pa mi a tũudmã, bɩ a tũudmã sẽn zãms-a bũmb ning ye. Sẽn na yɩl n bãnge, d tõe n yeela a soabã tɩ d sogsda nebã n tʋll n bãng b tagsg pʋʋsgã wɛɛngẽ. Dẽ poore, d tõe n sok-a-la woto: “Rẽ yĩnga yãmb tagsdame tɩ ãdem-biisã pʋʋsg paamda kelgr bɩ?” A sẽn na n leok to-to wã tõe n sõng-d lame tɩ d bãng a tagsgo, la a sẽn yaa tũudum ning neda. Sã n yaa ned sẽn sɩd nong tũudmã, d tõe n sok-a-la woto n paase: “Yãmb tagsdame tɩ Wẽnnaam kelgda pʋʋsg buud fãa bɩ, bɩ pʋʋsg kẽer n be n pa tat a yam?” Sogs-kãensã tõe n kɩtame tɩ d paam n sõs ne-a sõma. Sã n zemsame tɩ d karem verse n wilg Biiblã sẽn yete, d segd n maana rẽ ne yam n da paoog a tũudmã ye. D sõsgã sã n yɩ-a noogo, tõe t’a tʋlg tɩ d ye wa nindaare. La a sã n sok sokr d sẽn pa tõe n leoke, d maanda wãna? D segd n tɩ maana vaeesg n lebg n tɩ leoke. La d sã n na n leok-a, segd n yɩɩ ne sik-m-meng la waoogre.—1 Pɩɛɛr 3:15.
A Zezi ra zãmsda sẽn dat-bã
11. Bõe n na n sõng-d tɩ d bãng sẽn sɩd rat-b n zãms Biiblã n welge?
11 A Zezi sẽn zems zãngã, a ra mii neb nins sẽn sɩd rat a zãmsgã la sẽn pa rat-bã n welge. La yaa toog ne tõnd tɩ d bãng sẽn sɩd rat-b vɩɩm-sẽn-kõn-sa wã. (Tʋʋma 13:48) A Zezi ra sagla a tʋm-tʋmdbã tɩ b bao bãmb dãmbã. A yeel-b-la woto: “Yãmb sẽn kẽ tẽng ninga fãa, a sã n yaa tẽn-kãseng bɩ tẽn-bila, bɩ y bao ned sẽn zemse.” (Matɩe 10:11) Wa a Zezi tʋm-tʋmdbã, tõnd me segd n baoa neb nins sẽn sɩd rat n kelg koɛɛgã la b zãms Biiblã. D sã n maagd d yĩng n kelgd d sẽn sõsd ne neb ninsã la d gũusd n get b manesmã, d tõogd n bãnga sẽn sɩd rat-bã n welge.
12. Sẽn na yɩl n tõog n kell n sõng ned sẽn dat n zãms Biiblã, wãn to la d tõe n maane?
12 D sã n sõs ne ned Rĩungã koɛɛg zug t’a wilg t’a tʋll n kelgame n paase, rẽ poore d segd n ket n tagsda a soabã yelle, n baood d sẽn na n lebg n tɩ wilg-a bũmb ning Biiblã pʋgẽ tɩ sõng-a. Sẽn na yɩl n tõog n lebg n tɩ sõng neda, yɩta sõma tɩ d sã n sõs ne-a n sa bɩ d gʋls bũmb ning sẽn yɩ a noogã. D sã n lebgd n tʋgd n kaagd neda, d segd n kelgd-a-la neere. Rẽ d bãngda a sẽn tẽed bũmb ninga, a yel-manesmã la a yɛlã sẽn yaa to-to.
13. Bõe la d tõe n maan n bãng ned tagsg sẽn yaa a soab ne Biiblã?
13 Wãn-wãn la d tõe n maan n kɩt tɩ ned togs-d a tagsg Wẽnnaam Gomdã zugu? Zĩis kẽere, koe-moondbã sokda woto: “Yãmb getame tɩ Biiblã goam võor wʋmb yaa toog bɩ?” Naoor wʋsgo, ned sẽn na n leok sok-kãngã to-to wã tõe n kɩtame tɩ d bãng a sã n nanda Wẽnnaam Gomdã. Bũmb a to d sẽn tõe n maan me yaa karem verse la d yaool n sok kɛlgdã woto: “Bõe la yãmb tagsd gom-kãensã zugu?” Wala a Zezi, d sã n sokd sogs-tɩrse, d na n tõog n sõnga neb wʋsg d koe-moonegã pʋgẽ. La baasgo, d segd n gũusame.
A Zezi ra mii nebã sogsgo
14. Wãn to la d tõe n bãng nebã tagsg tɩ pa tũ ne sogs-toogo?
14 D sã n na n sok ned sokre, d segd n gũusame n da wa kɩt t’a soabã zoe leokr ye. D maand wa a Zezi. A ra sogsda nebã ne yam tɩ ra kɩtdẽ tɩ b tagsd neere. A Zezi leb n da mii nebã kelgre. Woto kɩtame tɩ sẽn da wat-b a nengẽ wã paamd yolsg bɩ belsgo, la b sõsd ne-a n pa zoet yãnd wall rabeem ye. (Matɩe 11:28) Neb buud toor-toor da tʋgd n wilgd-a-la b zu-loees n pa yɛɛsdẽ ye. (Mark 1:40; 5:35, 36; 10:13, 17, 46, 47) Sẽn na yɩl tɩ nebã sak n togs b sẽn tagsd Biiblã la a sẽn yet bũmb ninsã zug n pa zoe yãnd bɩ rabeem, d segd n gũusdame n da yɩ sogs-toog soab ye.
15, 16. Wãn to la d tõe n maan n paam n sõs tũudmã zug ne nebã?
15 Sogsgã toor sẽn ka be, sẽn na yɩl n tõog tɩ ned sõs ne-do, d tõe n goma bũmb sẽn na n yɩ-a noog yelle, la d kelg a sẽn na n yeel bũmb ninga. A Zezi maana woto ne a Nikodɛm. A yeel-a-la woto: “Ned sã n ka paam dogem paalga, a ka tõe n yã Wẽnnaam soolem ye.” (Zã 3:3) Gom-kãngã linga a Nikodɛm hal tɩ kɩt t’a sok a Zezi n na n bãng a gomdã võore. (Zã 3:4-20) D me sã n maan woto ne neda, d tõogdame t’a sõs ne-do.
16 Rũndã-rũndã, Afiriki, Erop delɛst la Amerik Latɩn tẽns wʋsg pʋsẽ, nebã nong n gomda tũudum paalsã yelle. Sẽn na yɩl n paam n sɩng sõsg ne ned zĩ-kãense, d tõe n yeela woto: “Tũudmã sẽn yaa toɛy-toɛy woto wã pa noom maam ye. La m saagdame tɩ ka la bilfu, dũniyã gill neb fãa na n talla tũudum a ye tãa. Ne yãmba, woto yɩta sõma bɩ?” D sã n yeel bũmb sẽn lingd nebã, b na n leokame tɩ d paam n bãng b tagsgo. Sẽn paase, d sã n sok sokr sẽn tar leoor a yiibu, yɩta nana ne-b tɩ b leoke. (Matɩe 17:25) D kɛlgdã sã n kõ a tagsgo, d tõe n yaool n karma verse a ye bɩ a yiib n wilg bũmb ning sẽn kɩt tɩ d tẽed woto wã. (Ezai 11:9; Sofoni 3:9) D sã n kelg a soabã neer la d gũus n ges a manesmã, d tõogd n bãnga bũmb ning d sẽn na n wilg-a nindaare.
A Zezi ra kelgda kambã
17. Bõe n wilgd t’a Zezi ra nanda kambã?
17 Pa kãsembã yell bal n da pak a Zezi ye. A ra kelgda kambã me. A ra mii reem nins kambã sẽn da minim n deemdẽ wã, la b sẽn nong n yet taaba. Wakat ninga, a ra boonda kambã tɩ b wat a nengẽ. (Luk 7:31, 32; 18:15-17) Kamb wʋsg n da naag kʋʋngã sẽn da kelgd a Zezi wã sʋka. Kom-bõonegã sẽn da kaas n pẽg a Zezi sẽn yaa Mesi wã, a kelg-b lame la a yeel nebã tɩ Gʋlsg Sõamyã ra pĩnd n wilga rẽ. (Matɩe 14:21; 15:38; 21:15, 16) Rũndã-rũndã, kamb wʋsg n lebgd a Zezi karen-biisi. Woto yĩnga, wãn-wãn la d tõe n sõng-ba?
18, 19. Wãn to la y tõe n sõng y biig t’a lebg a Zezi karen-biiga?
18 Y sã n dat n sõng y biig t’a lebg a Zezi karen-biiga, y segd n kelgd-a lame. Y segd n baood n bãngda a tagsg nins sẽn pa zems ne a Zeova raabã. Baa biigã sã n gom gomd sẽn pa segd bɩ y modg n tõog y sũuri, n deng n wilg tɩ y nanda a gomdã. Rẽ poore, y tõe n talla Biiblã n sõng-a t’a bãng a Zeova tagsgo.
19 Sẽn na yɩl n tõog n bãng kambã tagsgo, d segd n sokd-b-la sogsgo. La wa kãsembã, kambã me pa nong sogs-toog ye. Sẽn na yɩl n bãng y biig tagsg n pa nams-a ne sogsg sẽn yaa toogo, y tõe n goma ne-a yãmb mengã yell bilfu. Wala makre, y tõe n togs-a-la bũmb y sẽn da tagsd y sẽn da wa n yaa biigã, la y wilg-a bũmb ning sẽn kɩt tɩ y ra tagsd boto wã, tɩ rẽ poor bɩ y sok-a woto: “Fo-me tagsda woto bɩ?” Biigã sẽn na n leok to-to wã tõe n kɩtame tɩ y paam n sõs ne-a Biiblã zug tɩ naf-a.
D ket n dɩkd Karen-saam-kãsengã togs-n-taare
20, 21. Karen-biisã maaneg pʋgẽ, bõe yĩng tɩ d segd n bãng nebã kelgre?
20 Yaa d biig tɩ yaa ned a to me la d sõsd ne, segdame tɩ d kelgd a soabã neere. Bala, d sã n maand woto, d wilgdame tɩ d nong-a lame. Leb n wilgdame tɩ d tara sik-m-menga, la tɩ d waoogda a soabã la d nand-a. La ned kelgr baoodame tɩ d kelg a sẽn yetã neere.
21 D sã n wa moond koɛɛgã, bɩ d kelgd d sẽn sõsd ne-b rãmbã neere. D sã n kelgd b goamã ne gũusgu, d tõogd n bãnga Biiblã verse nins d sẽn na n karem tɩ yɩ-b noogo. Rẽ poore, bɩ d mao n sõng-b wa a Zezi sẽn da sõngd nebã to-to wã, tɩ b lebg a karen-biisi. D sã n maand woto d sũy na n yɩɩ noogo, bala yaa Karen-saam-kãsengã togs-n-taar la d rɩkda.
Wãn to la y na n leoke?
• Wãn to la a Zezi ra maand n kɩtdẽ tɩ nebã togsd b tagsgo?
• Bõe yĩng t’a Zezi ra kelgd neb nins a sẽn da sõsd ne wã?
• Koe-moonegã pʋgẽ, wãn to la y tõe n gũus ne y sẽn sogsd nebã to-to wã?
• Bõe la y tõe n maan n sõng kambã tɩ b lebg karen-biisi?
[Zãmsgã sogsgã]
[Foto, seb-neng 26]
Y sã n moond koɛɛgã bɩ y kelgd nebã neere