Ia Faaa‘oa‘o i le A‘oa‘o Sili
Ia Faaaʻoaʻo i le Aʻoaʻo Sili
“Ia outou, pe faapefea lo outou faalogo.”—LUKA 8:18.
1, 2. Aiseā e tatau ai ona tatou mātauina le auala na feutagaʻi ai Iesu ma tagata i le taimi o lana faiva?
SA FAATAUNUUINA e Iesu Keriso lana matafaioi o le Faiaʻoga Sili ma o Sē Faia Isi ma Soo ina ua ia faapea atu i ona soo: “Ia outou, pe faapefea lo outou faalogo.” (Luka 8:16-18) E faatatau atu lenā fautuaga i lau faiva o se Kerisiano. Pe afai e te uaʻi atu i aʻoaʻoga faaleagaga, o le a e gaoioi e tusa ai ma na aʻoaʻoga ma avea o se tagata talaʻi taulau o le Malo. Ioe, e lē mafai ona e lagona atu le leo o Iesu i aso nei, peitaʻi e mafai ona e faitau i mea sa ia fetalai i ai ma faia, e pei ona faamauina i le Tusi Paia. O le ā ua faailoa mai ai e faatatau i le auala na feutagaʻi ai Iesu ma tagata i le taimi o lana faiva?
2 Sa avea Iesu o se tagata talaʻi sili ona lelei o le tala lelei ma o se faiaʻoga iloga o le Tusi Paia. (Luka 8:1; Ioane 8:28) O le galuega o le faia o isi ma soo e aofia ai le talaʻi atu ma le aʻoaʻo atu, ae o nisi Kerisiano e lelei i le talaʻi atu, ua faigatā ona latou aʻoaʻoina tagata i se auala e maua ai iʻuga lelei. E ui o le talaʻi atu e aofia ai le faalauiloaina o se feʻau, ae o le aʻoaʻoina o tagata e uiga iā Ieova ma ana fuafuaga, e masani lava e manaʻomia ai ona atiaʻe e le faiaʻoga se faiā ma le soo. (Mataio 28:19, 20) E mafai ona faia lenei mea e ala i le faaaʻoaʻo iā Iesu Keriso, le Faiaʻoga Sili ma Sē Faia Isi ma Soo.—Ioane 13:13.
3. E faapefea ona aogā lou faaaʻoaʻo iā Iesu i au taumafaiga e fai isi ma soo?
3 Afai e te faaaʻoaʻo i le auala na aʻoaʻo ai Iesu, o le a e usitaia la le apoapoaʻiga a Paulo e faapea: “Ia savavali ma le poto i ē o i tua, ma faaaogāina e outou aso o lenei olaga. Ia lē aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taʻitoʻatasi uma.” (Kolose 4:5, 6) O le faaaʻoaʻo atu iā Iesu i le galuega o le faia o isi ma soo, e manaʻomia ai taumafaiga. Peitaʻi o le a fua mai lau aʻoaʻo atu, auā e fesoasoani lenā iā te oe e “fai faatatau se tali i tagata e taʻitoʻatasi uma” e tusa ma lona manaʻoga.
Na Faalaeiau e Iesu Isi ia Talanoa Mai
4. Na faapefea ona faaalia o Iesu o sē e faalogologo lelei?
4 Sa fai ma masani a Iesu mai lava o laʻitiiti, le faalogologo atu i tagata ma faalaeiau e faailoa mai o latou manatu. O se faaaʻoaʻoga, ina ua sefululua ona tausaga, na maua atu o ia e ona mātua o i le lotolotoi o aʻoaʻo, “o loo faalogologo iā i latou, ma taufesili iā te i latou.” (Luka 2:46) E leʻi alu Iesu i le malumalu ina ia taʻufaatauvaa aʻoaʻo ona o lona atamai. Na alu o ia i inā e faalogologo, e ui sa fai foʻi ana fesili. O le mea moni, o lona faalogologo lelei, na avea lenā ma se tasi o uiga na talileleia ai o ia e le Atua faapea ma tagata.—Luka 2:52.
5, 6. E faapefea ona tatou iloa na faalogo atu Iesu i manatu o i latou na ia aʻoaʻoina?
5 Ina ua uma lona papatisoga ma faauuina e avea ma Mesia, na tumau pea le fiafia o Iesu e faalogologo atu i tagata. E leʻi soona uaʻi atu o ia i ana aʻoaʻoga ma galo ai i latou o ē na ō ane e faalogologo i ana fetalaiga. E masani ona ia fesili atu po o ā ni o latou manatu, ma faalogo atu i a latou tali. (Mataio 16:13-15) O se faaaʻoaʻoga, ina ua mavae le oti o le tuagane o Mareta, o Lasalo, na taʻu atu e Iesu iā te ia e faapea: “O tagata ola uma o ē faatuatua mai iā te aʻu, e lē oti lava e oo i le faavavau.” Ona ia fesili atu lea iā te ia: “Po ua e talitonu mai ea i lenā mea?” Ma e mautinoa na faalogo atu Iesu a o tali mai Mareta e faapea: “Ioe, le Alii e, ua ou talitonu lava, o oe le Keriso le Alo o le Atua.” (Ioane 11:26, 27) Maʻeu le faamalieina i le faalogo atu o faailoa mai e Mareta lona faatuatua i lenā auala!
6 Ina ua tuua e le toʻatele o le ʻausoo Iesu, sa fiafia o ia e faalogo atu i manatu o ona aposetolo. O lea na ia fesili atu ai: “Pe tou te fia ō ese foʻi?” Ona tali mai lea o Simona Peteru: “Le Alii e, a matou ō ea iā te ai? O iā te oe upu o le ola faavavau. Ua matou talitonu, ma ua matou iloa o oe o le Paia o le Atua.” (Ioane 6:66-69) Maʻeu le faafiafiaina o Iesu i na upu! O le a faafiafiaina foʻi oe pe a faailoa mai faapena le faatuatua o se tagata aʻoga o le Tusi Paia.
Na Faaaloalo Iesu e Ala i le Faalogologo Lelei
7. Aiseā na toʻatele ai tagata Samaria na faatuatua iā Iesu?
7 O le isi māfuaaga na avea ai Iesu ma Sē na taulau i le faia o isi ma soo, ona o le manatu mamafa i tagata ma na faalogologo lelei iā i latou. O se faaaʻoaʻoga, i se tasi taimi, na talaʻi atu ai Iesu i se fafine Samaria e lata i le vaieli o Iakopo i Sukara. A o fai lenā talanoaga, e leʻi faia uma e Iesu tala; sa ia faalogologo atu i mea na fai mai ai le fafine. A o faalogologo atu iā te ia, na mātauina e Iesu lona fiafia e tapuaʻi, ma na ia taʻu atu iā te ia o loo saʻili le Atua i ē tapuaʻi atu i le agaga ma le upu moni. Sa faaalia e Iesu le faaaloalo ma le naunau i lenei fafine, ma na taʻu atu e le fafine i isi e uiga iā te ia, ma “e toʻatele Samaria i lea aai na faatuatua iā te ia, ona o le upu a le fafine.”—Ioane 4:5-29, 39-42.
8. E faapefea ona aogā le salusalu talanoa mai o tagata, ina ia amata ai se talanoaga i le talaʻiga?
8 E masani lava ona salusalu talanoa mai tagata e uiga i o latou manatu. O se faaaʻoaʻoga, na naunau tagatānuu anamua o Atenai e faaali o latou manatu, ma fia faalogo i se tala fou. Na iʻu ai ina faia le lauga uigā a le aposetolo o Paulo i Areopako i lenā aai. (Galuega 17:18-34) Pe a amata se talanoaga ma se tagata o le aiga i lau talaʻiga i lenei aso, e te ono faapea atu, “Ua ou asiasi mai iā te oe ona ou te fia iloa sou manatu e tusa ai ma [se mataupu].” Ia faalogologo atu i le manatu o le tagata, ma fai se faaopoopoga, pe fai foʻi se fesili e faatatau i le mataupu. Ona faaali atu lea ma le agalelei i ai o le manatu o le Tusi Paia e uiga i le mataupu.
Na Silafia e Iesu le Auala e Amata ai se Talanoaga
9. O le ā na fai muamua e Iesu a o leʻi ‘faamatalaina atu Tusi’ iā Kaleopa ma lana uō?
9 Sa silafia lelei e Iesu le auala e amata ai se talanoaga. E lē gata o ia o Sē na faalogologo lelei, ae sa masani foʻi ona ia malamalama lelei i manatu o tagata, ma na ia silafia upu tonu e fai atu. (Mataio 9:4; 12:22-30; Luka 9:46, 47) O se faataʻitaʻiga: Ina ua faatoʻā mavae le toetū o Iesu, na savavali mai ai ona soo e toʻalua mai Ierusalema i Emau. Ua taʻua i le faamatalaga a le Evagelia e faapea: “Ua la fetautalatalaaʻi, ma fesuʻeaʻi, ona faalatalata mai ai lea o Iesu, ua ō faatasi ma i laʻua. A ua punitia o laʻua mata, o lea ua lē iloa ai o ia e i laʻua. Ua fetalai atu o ia iā te i laʻua, “O ā ea ia upu ua oulua felafolafoaʻi ai, o oulua o savavali?” Ua tutū i laʻua ma mata faanoanoa. O le tasi o i laʻua e igoa iā Kaleopa, ua tali mai iā te ia, “Pe na o oe ea lē aumau i Ierusalema ma le lē iloa o mea ua tutupu ai i ona pō nei?” Ona fetalai atu lea o ia iā te i laʻua, “O ā mea?” Sa faalogologo lelei le Faiaʻoga Sili a o la faamatala mai e faapea, na aʻoaʻoina e Iesu le Nasareta tagata, na faatinoina vavega, ma na fasiotia foʻi. Ae o lea ua fai mai nisi ua toetū o ia. Sa tuu e Iesu le avanoa iā Kaleopa ma lana uō e faailoa mai ai o la manatu. Ona ia faamatala atu lea o le mea na la fia iloa, ua ‘faamatala atu foʻi e ia o Tusi’ iā te i laʻua.—Luka 24:13-27, 32.
10. E faapefea ona e iloa talitonuga o se tagata e te feiloaʻi i ai i le talaʻiga?
10 Atonu e te lē iloa talitonuga o le tagata o le aiga. Ae ina ia iloa po o ā ona talitonuga, e te ono faapea atu e te fiafia e faalogologo i manatu o tagata e faatatau i le tatalo. Atonu la e te fesili atu, “Pe e te manatu o iai moni se isi o faafofoga mai i tatalo?” O le a mafai ona e iloa i lana tali le manatu ma le talaaga faalotu o le tagata. Afai e fiafia o ia i mea faaleagaga, o le a e iloa atili ona manatu pe a e fesili atu, “Pe faamata e faafofoga mai le Atua i tatalo uma, pe e i ai ni tatalo e na te lē taliaina?” O fesili faapena e iʻu ai i se talanoaga māfana. Afai e talafeagai ona faailoa atu iā te ia le manatu o le Tusi Paia i le mataupu, ia fai ma le faautauta, ae ia lē taʻuleagaina ai lona talitonuga. Afai e fiafia e faalogo iā te oe, atonu la e manaʻo e te toe asiasi atu. Ae faapefea pe afai e fai mai se fesili e te lē iloa tali? Ia fai ni nai au saʻiliʻiliga ma sauni e toe foʻi e avatu ‘se tali mo lou faamoemoe, a ia tali atu ma le agamalu ma le filemu.’—1 Peteru 3:15.
Na Aʻoaʻo e Iesu Ē ua Tatau Ai
11. E faapefea ona e maua i latou e naunau e fia aʻoaʻoina?
11 Na mafai ona mātaulia e Iesu i latou sa naunau moni e aʻoaʻoina, ona e lelei atoatoa o ia. Peitaʻi, e lē faigofie iā i tatou ona mauaina i latou “ua saunia i le ola faavavau.” (Galuega 13:48) Sa faapena foʻi le ʻau aposetolo, lea na fetalai atu i ai Iesu: “O se aai po o se faoa aai tou te oo atu i ai, ia fesili po o ai sē i ai ua tatau.” (Mataio 10:11) I le pei o aposetolo o Iesu, e tatau ona e saʻilia tagata e fia faalogo ma fia aʻoaʻoina upu moni o le Tusi Paia. E mafai ona maua i latou ua tatau ai e ala i le faalogologo lelei, a o e talanoa atu i lea tagata ma lea tagata, ma mātau o latou uiga.
12. O le ā le auala e te avatu ai pea le fesoasoani i se tagata na faaalia le fiafia?
12 Pe a e tuua se tagata na faaalia le fiafia i le feʻau o le Malo, e lelei pe a e mafaufau pea i ona manaʻoga faaleagaga. Afai e te faamauina mea ua e iloa e uiga i lea tagata ina ua uma le lua talanoaga i le tala lelei, o le a aogā pea lea tulaga e te fesoasoani ai faaleagaga iā te ia. Pe afai e te fia iloa atili ona talitonuga, ona uiga, po o tulaga o tagata taʻitoʻatasi, e manaʻomia la ona e faalogologo lelei i le taimi e faia ai toe asiga.
13. E faapefea ona e iloa manatu o se tagata e faatatau i le Tusi Paia?
13 E faapefea ona e faalaeiau tagata ia faailoa mai o latou manatu e faatatau i le Afioga a le Atua? I nisi vaipanoa, e aogā ona e fesili atu faapea, “Pe e te manatu e faigatā ona tatou malamalama i le Tusi Paia?” E masani lava ona faaalia i le tali o lenā fesili uiga o se tagata agaʻi i mea faaleagaga. O se isi auala, o le faitau atu lea o se mau ma fesili atu, “O le ā sou manatu?” I le pei o Iesu, e tele mea e mafai ona e taulau ai i lau faiva e ala i le faaaogā o fesili talafeagai. Peitaʻi, ia faaeteete i le auala e fai ai fesili.
Sa Aogā Fesili a Iesu
14. E mafai faapefea ona e faaalia le naunau i manatu o tagata e aunoa ma le fesili soo i ai?
14 Ia faaalia le naunau i manatu o isi e aunoa ma le faamasiasia o i latou. Ia mulimuli i le auala a Iesu. Na te leʻi faia ni fesili faaloia, peitaʻi na ia faaaogā fesili faatupu manatu. Sa faalogologo foʻi Iesu i se auala agalelei, ma na faafouina ai tagata loto faamaoni ma toʻafilemu ai i latou. (Mataio 11:28) Sa saʻoloto ona talanoa atu tagata uma iā te ia e faatatau i o latou faafitauli. (Mareko 1:40; 5:35, 36; 10:13, 17, 46, 47) Ina ia lagona e tagata e faigofie ona taʻu atu o latou manatu e faatatau i le Tusi Paia ma ana aʻoaʻoga, e tatau ona e ʻalofia le fesili soo.
15, 16. E faapefea ona e tataʻi tagata ina ia talanoa i mataupu tau tapuaʻiga?
15 E faaopoopo atu i le faaaogā lelei o fesili, e mafai ona e amata se talanoaga e ala i le faamatala atu o se tala e faatupu manatu, ona tuu lea e fai mai sona manatu. O se faaaʻoaʻoga, na taʻu atu e Iesu iā Nikotemo e faapea: “A lē toe fanau le tagata, e lē mafai ona iloa e ia le Malo o le Atua.” (Ioane 3:3) Na vave lava ona tali mai Nikotemo ma faalogo iā Iesu, ona e fou ia upu iā te ia. (Ioane 3:4-20) E mafai foʻi ona e faavae se talanoaga ma tagata i se auala faapena.
16 I Aferika, Europa i sasaʻe, ma Amerika Latina, e fiafia tagata i aso nei e talanoa i le tele o tapuaʻiga fou ua aliaʻi mai. E masani ona amata talanoaga i nei nofoaga e ala i le faapea atu: “Ou te mātauina ua tele tapuaʻiga fou. Peitaʻi ou te faamoemoe e lē o toe umi ae faatasia tagata mai atunuu uma i le tapuaʻiga moni e tasi. Pe e lelei lenā mea i lau faafofoga?” E mafai ona e faaosofia tagata e faailoa mai o latou manatu, e ala i le taʻu atu o se mea e faateʻia ai e uiga i lou faamoemoe. Ma e taligofie fesili e lē na o le tasi se manatu e faamatala ai. (Mataio 17:25) Pe a uma ona tali mai le tagata o le aiga i lau fesili, ona e tali atu lea e ala i se mau e tasi pe lua. (Isaia 11:9; Sefanaia 3:9) O le a e iloa se mataupu o le a lua talanoaina i le isi asiasiga, pe a e faalogologo lelei ma mātau le tali mai a le tagata.
Sa Faalogo Iesu i Tamaiti
17. Na faapefea ona faaalia le naunau o Iesu i tamaiti?
17 Sa naunau Iesu e lē na o tagata matutua ae faapea foʻi ma tamaiti. Sa ia silafia taaloga e taaalo ai tamaiti ma a latou tala e fai. O nisi taimi e na te valaaulia ai tamaiti e ō mai iā te ia. (Luka 7:31, 32; 18:15-17) E toʻatele tamaiti na iai i le motu o tagata na faalogologo iā Iesu. Ina ua alalaga tamaiti e vivii i le Mesia, na silafia e Iesu ma na ia faaalia e faapea na valoia e le Tusi Paia lenā mea. (Mataio 14:21; 15:38; 21:15, 16) I aso nei, e toʻatele tamaiti ua avea ma soo o Iesu. E faapefea la ona e fesoasoani iā i latou?
18, 19. E faapefea ona e fesoasoani i lau tama i le itu faaleagaga?
18 Ina ia fesoasoani faaleagaga i lau tama, e tatau ona e faalogo atu iā te ia. E manaʻomia ona e malamalama i ona manatu lea atonu e lē o ōgatusa ma le silafaga a Ieova. Po o le ā lava e taʻu atu e lau tama, o se tulaga atamai le tali muamua atu i se faaupuga logoleleia. Ona e faaaogā lea o ni mau talafeagai e fesoasoani ai i lau tama, ia malamalama i le silafaga a Ieova e faatatau i mataupu.
19 O le a fesoasoani fesili e te iloa ai manatu o lau tama. Peitaʻi, e pei foʻi tamaiti o tagata matutua, e lē fiafia ae fesili soo. Na i lo le faafaigatā i lau tama ona tali ni fesili faigatā, e lelei ona fai se faamatalaga puupuu e faatatau iā te oe. Atonu e te fai i ai sa iā te oe foʻi lea manatu, e fua i le mataupu o loo talanoaina, ma faamatala le māfuaaga. Atonu la e te fesili atu, “Po o le lagona ea foʻi lenā o loo iā te oe?” O le tali mai a lau tama, atonu o le a iʻu ai i se talanoaga e aogā ma faalaeiau ai.
Ia Faaauau Pea Ona Faaaʻoaʻo i le Aʻoaʻo Sili
20, 21. Aiseā e tatau ai ona e faalogologo lelei a o e auai i le galuega o le faia o isi ma soo?
20 E matuā aogā tele le faalogologo lelei, e tusa lava po o e talanoaina se mataupu ma lau tama po o so o se tasi. O le mea moni, o se faailoga lenā o le alofa. Ua e faaalia le lotomaulalo pe afai e te faalogologo lelei, ma faaalia ai le faaaloalo ma le manatu alofa i lē o loo talanoa mai. Ioe, e manaʻomia le faalogologo lelei ina ia e uaʻi atu ai i manatu o le tagata.
21 A o e auai i le talaʻiga, ia faaauau pea ona faalogologo lelei i tagata o aiga. Afai e te uaʻi atu i mea o loo latou talanoa mai ai, o le a e iloa ai po o le fea vala o le upu moni o le Tusi Paia o le a faapitoa ona logoleleia iā i latou. Ona taumafai lea e fesoasoani iā i latou e ala i le faatinoina o auala eseese tau aʻoaʻo atu a Iesu. A o e faia faapea, o le a tauia oe i le olioli ma le faamalieina, talu ai o loo e faaaʻoaʻo i le Aʻoaʻo Sili.
O le a Faapefea Ona E Tali?
• Na faapefea ona faalaeiau e Iesu isi ia faailoa mai o latou manatu?
• Aiseā na faalogo atu ai Iesu i tagata na ia aʻoaʻoina?
• E faapefea ona e faaaogāina fesili i le talaʻiga?
• E faapefea ona e fesoasoani i tamaiti i le itu faaleagaga?
[Fesili mo le Suʻesuʻega]
[Ata i le itulau 28]
A o talaʻi, ia faalogologo lelei
[Ata i le itulau 30]
Tatou te faaaʻoaʻo iā Iesu pe a fesoasoani i tamaiti i le itu faaleagaga