Amutobele Cikozyanyo Ca Mwiiyi Mupati
Amutobele Cikozyanyo Ca Mwiiyi Mupati
“Amucenjele mbomumvwa.”—LUKA 8:18.
1, 2. Nkaambo nzi ncomweelede kulanga-langa mbwaakali kubalanganya bantu Jesu mumulimo wakwe?
JESU KRISTO wakali kuzuzikizya mulimo wakwe kali Mwiiyi Mupati alimwi Sikugwasya bamwi kuba basikwiiya naakaambila basikumutobela kuti: “Amucenjele mbomumvwa.” (Luka 8:16-18) Eeyi njiisyo ilabeleka kumulimo ngomujisi mbomuli Banakristo. Kwiinda mukuswiilila malailile aakumuuya akwaatobela, mulakonzya kuba basikwaambilizya Bwami bacibwene. Masimpe ngakuti tamukonzyi kulimvwa ijwi lya Jesu mazuba aano, pele mulakonzya kubala zintu nzyakaamba anzyaakacita mu Magwalo. Ino ncinzi Magwalo ncaamba kujatikizya mbwaakali kubalanganya bantu Jesu mumulimo wakwe?
2 Jesu wakali mukambausi uucibwene wamakani mabotu alimwi wakalicizi kuyiisya kasimpe kamu Magwalo. (Luka 8:1; Johane 8:28) Mulimo wakugwasya bamwi kuba basikwiiya ubikkilizya kukambauka akwiisya, pele Banakristo bamwi bacita kabotu mumulimo wakukambauka bajana buyumuyumu caboola kumakani akwiisya kabotu. Kukambauka caamba kwaambilizya mulumbe, pele kuyiisya bantu kujatikizya Jehova amakanze aakwe bunji bwaziindi kuyandika kuti mwiiyi abe acilongwe asikwiiya. (Matayo 28:19, 20) Eeci cilakonzya kucitwa kwiinda mukutobela Jesu Kristo, Mwiiyi Mupati a Sikugwasya bamwi kuba basikwiiya.—Johane 13:13.
3. Ino kutobela Jesu inga kwamugwasya buti mumulimo wakugwasya bamwi kuba basikwiiya?
3 Ikuti naa mwatobela nzila zyakuyiisya nzyaakabelesya Jesu, inga kwaambwa kuti muccilila lulayo lwa mwaapostolo Paulo lwakuti: “Amucenjele kuti ibe yabusongo inzila njimweenda abaabo batali basimbungano ba-Kristo, alimwi mucibelesye loko ciindi canu coonse. Kwaamba kwanu kulweezegwe amunyo wakulumba, kuti mube abusongo bwakutyaba kabotu kubantu boonse bamubuzya makani.” (Ba-Kolose 4:5, 6) Kutobela cikozyanyo ca Jesu mumulimo wakugwasya bamwi kuba basikwiiya kuyandika kusolekesya, pele kulakonzya kupa kuti muzwidilile mukuyiisya kabotu nkaambo ciyoomugwasya ‘kubataba kabotu bantu boonse’ kweelana anzyobayandika.
Jesu Wakali Kukulwaizya Bamwi Kwaambaula
4. Ino nkaambo nzi ncotukonzya kwaamba kuti Jesu wakali muswiilizi mubotu?
4 Kuzwa kubwana, Jesu wakajisi ciyanza cakuswiilila bantu alimwi akubakulwaizya kwaamba zili mumoyo wabo. Mucikozyanyo, naakali amyaka yakuzyalwa iili 12, bazyali bakwe bakamujana akati kabamayi mutempele “ulabaswiilila akubabuzya.” (Luka 2:46) Jesu taakaunka kutempele kwakubafwubaazya bamayi akaambo kaluzibo ndwaakajisi. Ncaakaunkila cini nkuswiilila, nokuba kuti wakali kubuzya mibuzyo. Kweelede kuti ikuyandisya kuswiilila nkokwakapa kuti akkomanisye Leza abantu.—Luka 2:52.
5, 6. Ino tuzi buti kuti Jesu wakali kubaswiilila aabo mbaakali kuyiisya?
5 Naakabbapatizigwa akunanikwa kuba Mesiya, Jesu wakazumanana kubaswiilila bantu. Naakali kuyiisya bamwi, tanaakali kuyanda kuti bantu kabamuswiilila alikke. Bunji bwaziindi, wakali kupa ciindi akubuzya ncobakali kuyeeya alimwi akuswiilila bwiinguzi bwabo. (Matayo 16:13-15) Mucikozyanyo, munyina Marta, Lazaro naakafwa, Jesu wakamwaambila kuti: “Naba uli buti muumi uusyoma ndime, takooyoofwa pe.” Mpoonya wakamubuzya kuti: “Wazumina obo na?” Masimpe ngakuti Jesu wakaswiilila Marta naakali kwiingula kuti: “Mwami, ndazumina kuti nduwe Kristo, Mwana a-Leza.” (Johane 11:26, 27) Cakali kukkomanisya kaka ikubona lusyomo ndwaakajisi Marta kwiinda mubwiinguzi bwakwe!
6 Basikwiiya banji nibakamusiya, Jesu wakali kuyandisya kuziba cakali mumoyo wabaapostolo bakwe. Aboobo wakabuzya kuti: “Sena anywebo mulainka?” Simoni Petro wakaingula kuti: “Omwami, tuye kuli? Nduwe oojisi majwi aabuumi ubutamani. Eno swebo twakasyoma, alimwi tulizi kuti nduwe Uusalala wa-Leza.” (Johane 6:66-69) Oobu bwiinguzi bweelede kuti bwakamukkomanisya kapati Jesu. Masimpe andinywe mulakonzya kukkomana abwiinguzi bwasikwiiya Bbaibbele ibutondezya lusyomo ndwajisi.
Jesu Wakali Kuswiililisya
7. Ino ncinzi cakapa kuti bana Samariya banji basyome Jesu?
7 Ikaambo kambi ikakapa kuti Jesu abe sikugwasya bamwi kuba basikwiiya nkakuti wakali kubalanganya bantu akubalemeka kwiinda mukubaswiilila. Mucikozyanyo, cimwi ciindi Jesu wakakambaukila mukaintu muna Samariya kumukalo wa Jakobo afwaafwi a Sukari. Mumubandi ooyo, Jesu tanaakali kwaambaula alikke pe, wakali kuswiilila naakali kwaambaula mukaintu. Kwiinda mukuswiilila Jesu wakaziba kuti mukaintu ooyu wakalijisi luyandisisyo lwakukomba, aboobo wakamwaambila kuti Leza uyanda bantu bamukomba mumuuya amubwini. Bulemu akubikkila maano nkwaakatondezya Jesu kumukaintu ooyu kwakapa kuti aambile bamwi nzyaakamwaambila Jesu, mpoona “banjibanji ba-Samariya bakamusyoma nkaambo kajwi lyamwanakazi.”—Johane 4:5-29, 39-42.
8. Ino mbuti luyandisisyo ndobajisi bantu lwakuyanda kwaamba mbobalimvwa mbolukonzya kutugwasya kutalisya mibandi mumulimo wesu?
8 Bunji bwaziindi bantu balakkomana kwaamba mbobalimvwa. Mucikozyanyo, bantu baku Atene yansiku bakali kukkomana kwaamba nzyobakali kuyeeya akuswiilila makani mapya. Eeci cakapa kuti mwaapostolo Paulo aambe makani aakulwaizya mu Areopagi mumunzi ooyo. (Incito 17:18-34) Kutegwa mutalisye mubandi amukamwini ŋanda mumuunda mazuba aano, mulakonzya kwaamba kuti: “Ndamuswaya kutegwa ndimvwe mbomuyeeya kujatikizya [amwaambe kaambo].” Amuswiilile naambaula mbwayeeya, kwamana boobo, amwaambe naa kubuzya mubuzyo kujatikizya makani aayo. Mpoona mulakonzya kumutondezya Bbaibbele ncolyaamba kumakani aayo.
Jesu Wakalicizi Kutalisya Mubandi
9. Ino ncinzi ncaakacita Jesu ‘katanapandulula Magwalo’ kuli Kleopa amweenzinyina?
9 Jesu tanaakali kubula zyakwaamba pe. Kunze lyakuba muswiilizi mubotu, bunji bwaziindi wakalizi nzyobakali kuyeeya bantu alimwi ancakeelede kwaamba. (Matayo 9:4; 12:22-30; Luka 9:46, 47) Mucikozyanyo: Kakwiindide buyo ciindi cisyoonto kuzwa naakabusigwa Jesu, basikwiiya bakwe bobilo bakali kweenda kuzwa ku Jerusalemu kuya ku Emau. Cibalo cili mu Makani Mabotu caamba kuti: “Eno nobakacili kuya bwaambaula akubuzyanya, Jesu mwini wakaswena afwaafwi ambabo, weenda abo. Pele meso aabo akalivumbidwe kuti batamuzibi. Nkabela wakababuzya kuti, Ino makani nzi aya ngomuya bwaambaula nomuya bweenda? Baima balyeetezya. Umwi kuli mbabo uwali kutegwa Kleopa wakamuvuwa kuti, Sena nduwe olike ookede mu Jerusalemu, ootezi makani aakacitika omo kumazuba aya ngoonya? Wakababuzya wakati, Ino makaninzi?” Mwiiyi Mupati wakaswiilila nobakali kupandulula kuti Jesu waku Nazareta wakali kuyiisya bantu, kucita maleele amane wakajaigwa. Ono bamwi bakali kwaamba kuti wabusigwa kuzwa kubafwu. Jesu wakalekela Kleopa amweenzinyina kwaamba mbobakali kulimvwa. Mpoona ‘wakabapanduluda’ makani ngobakali kuyandika kuziba aamu “Magwalo.”—Luka 24:13-27, 32.
10. Mbuti mbomukonzya kuziba mbwayeeya kumakani aabukombi imuntu ngomwajana mumulimo wamumuunda?
10 Mulakonzya kuti kamutazyi mbwayeeya mukamwini ŋanda umwi kumakani aabukombi. Kutegwa muzibe zili mumoyo, mulakonzya kwaamba kuti mulombozya kuziba ncobayeeya bantu kumakani aamupailo. Mpoona mulakonzya kubuzya kuti: “Sena muyeeya kuti kuli umwi uswiilila mipailo?” Bwiinguzi bulakonzya kuyubununa makani manji aali mumoyo wabo alimwi akucikombelo nkobazulilwa. Ikuti kabajisi luyandisisyo kumakani aabukombi, mulakonzya kubakulwaizya kuzumanana kwaamba zili mumoyo kwiinda mukubuzya kuti: “Sena muyeeya kuti Leza ulaiswiilila mipailo yoonse naa kuli mipailo imwi njataswiilili?” Mibuzyo iili boobo ilakonzya kupa kuti mube amubandi mubotu. Ikuti kacikonzyeka kubatondezya ncolyaamba Bbaibbele kumakani ngomubandika, mweelede kucita boobo cabupampu ikutali kukazya ncobasyoma. Ikuti naa bazikkomanina nzyomwali kubandika, inga bamwaambila kuti mukabaswaye alimwi. Ino mbuti kuti babuzya mubuzyo ngomutakonzyi kwiingula? Mulakonzya kubaswaya alimwi mwamana kuvwuntauzya akulibambila kubapanduluda ‘makani aalusyomo ndomujisi, akubaingula amoyo mutete akulemeka Leza.’—1 Petro 3:15.
Jesu Wakayiisya Bantu Beelede
11. Ino ncinzi cikonzya kumugwasya kuziba baabo beelede kuyiisigwa?
11 Akaambo kakuti wakali londokede, Jesu wakali kukonzya kuziba bantu bakeelede kuyiisigwa. Pele swebo cilatukatazya kuziba baabo “basalilidwe buumi butamani.” (Incito 13:48) Mbocakabede akubaapostolo ba Jesu mbaakaambila kuti: “Mumunzi umwi aumwi, nimuba mukanzi kamwi akamwi, amuyandaule muntu umwi wamumo uuelede.” (Matayo 10:11) Mbubwenya mbobakacita baapostolo ba Jesu, mweelede kuyandaula bantu bajisi luyandisisyo lwakuswiilila akuyiisigwa kasimpe kamu Magwalo. Mulakonzya kujana beelela kwiinda mukubaswiilisisya bantu boonse mbomubandika limwi akuziba mpobaimvwi.
12. Ino mbuti mbomukonzya kuzumanana kugwasya muntu uujisi luyandisisyo?
12 Mwamusiya muntu watondezya luyandisisyo mumulumbe wa Bwami, cilayandika kapati kuzumanana kuyeeya nzyayandika kumuuya. Ikulemba ncomwabona kujatikizya muntu ngomwakambaukila makani mabotu, kulakonzya kumugwasya kuzumanana kugwasilizya muntu ooyo kumuuya. Nomupilukila, mweelede kumuswiilisisya kutegwa muzibe zintu nzyasyoma, mbwayeeya naa bukkale bwakwe.
13. Ino ncinzi cikonzya kutugwasya kuziba mbwalimvwa muntu kujatizya Bbaibbele?
13 Mbuti mbomukonzya kukulwaizya bantu kuti bamwaambile mbobalimvwa kujatikizya Jwi lya Leza? Mumasena amwi cilagwasya kubuzya kuti: “Sena mulaakulibala Bbaibbele?” Bwiinguzi kumubuzyo ooyo bulakonzya kutugwasya kuziba mbwazilanga zintu zyakumuuya muntu ooyo. Nzila imwi njakubala lugwalo akubuzya kuti: “Sena mulakasyoma kaambo aaka?” Mbubwenya mbuli Jesu, andinywe mulakonzya kuzwidilila mumulimo wenu kwiinda mukubuzya mibuzyo yeelede. Nokuba boobo, bupampu bulayandika.
Jesu Wakali Kwiibelesya Kabotu Mibuzyo
14. Mbuti mbotukonzya kuziba nzyobayeeya bantu kakutakwe kubabuzya mibuzyo minji?
14 Mibuzyo njotubuzya kutegwa tuzibe nzyobayeeya bantu tayeelede kupa kuti balisende buya pe. Amutobele cikonzyanyo ca Jesu. Tanaakali kubuzya kufwumbwa cazya kumoyo pe, pele wakali kubuzya mibuzyo iipa kuyeeya. Jesu alimwi wakali kuswiilila camoyo woonse cakunga babombe myoyo bakali kulimvwa kukatalukwa akwaanguluka. (Matayo 11:28) Bantu boonse bakalaangulukide kumwaambila mapenzi ngobakajisi. (Marko 1:40; 5:35, 36; 10:13, 17, 46, 47) Ikuti kamuyanda kuti bantu balikwaye kumwaambila mbobayeeya kujatikizya Bbaibbele ancoliyiisya, tamweelede kubabuzya mibuzyo minji mbuli kuti basinswa buya.
15, 16. Ino mbuti mbomukonzya kutalisya mubandi uujatikizya bukombi?
15 Kunze lyakwiibelesya kabotu mibuzyo, mulakonzya kutalisya mubandi kwiinda mukwaamba makani amwi aakkomanisya alimwi akuswiilila kubwiinguzi. Mucikozyanyo, Jesu wakaambila Nikodemo kuti: “Muntu atazyalwa akuzyalwa kwakujulu, takonzya kubona Bwami bwa-Leza.” (Johane 3:3) Aaya majwi akali kukkomanisya kapati cakunga Nikodemo wakatalika kubandika akuswiilila nzyaakali kwaamba Jesu. (Johane 3:4-20) Andinywe mulakonzya kutalisya mubandi kwiinda mukubelesya nzila njimunya eeyi.
16 Ikutalisyigwa kwazikombelo zinji zipya mazuba aano, ngamakani ngobakanana bantu bali mu Afulika, Eastern Europe aku Latin America. Muzisi eezi, mulakonzya kutalisya mubandi kwiinda mukwaamba kuti: “Cilandikatazya kapati mumizeezo kubona kuti kuli zikombelo zinji. Nokuba boobo, ndilijisi bulangizi bwakuti lino-lino bantu bamisyobo yoonse bayookamantana mubukombi bwakasimpe. Sena andinywe mbomusyoma oobo?” Kwiinda mukwaamba kaambo kagambya kujatizya bulangizi mbomujisi, mulakonzya kupa kuti bantu baambe mbobalimvwa. Alimwi mibuzyo iikonzya kwiingulwa munzila zyobilo tiikatazyi. (Matayo 17:25) Mukamwini ŋanda amanizya kupa bwiinguzi kumubuzyo ngomwamubuzya, nywebo mweelede kupa bwiinguzi kwiinda mukubelesya lugwalo lomwe naa obilo. (Isaya 11:9; Zefaniya 3:9) Kwiinda mukuswiililisya akubona mbwaingula mibuzyo, mulakonzya kuziba nzyomweelede kuzyoobandika mwaakupilukila.
Jesu Wakali Kubaswiilila Bana
17. Ino ncinzi citondezya kuti Jesu wakali kubayanda bana?
17 Jesu tanaakali kuyanda buyo bapati pele abana wakali kubayanda. Wakalizizi zisobano zyobakali kusobana bana alimwi azintu nzyobakali kwaambaula. Zimwi ziindi wakali kubaita bana. (Luka 7:31, 32; 18:15-17) Bana banji bakali akati kamakamu aakali kumuswiilila Jesu. Bana basankwa nibakali koongolola kutembaula Mesiya, Jesu wakaswiilila kumane wakaamba kuti Magwalo mbwaakasinsima oobo. (Matayo 14:21; 15:38; 21:15, 16) Mazuba aano, bana banji bali akati kabaabo baba basikwiiya ba Jesu. Aboobo ino mbuti mbomukonzya kubagwasya?
18, 19. Ino mbuti mbomukonzya kugwasya mwanaanu kumuuya?
18 Kutegwa mugwasye mwanaanu kumuuya, mweelede kumuswiilila. Mweelede kuziba mizeezo njajisi iiteendelani amizeezo ya Jehova. Kufwumbwa naa mwana waamba buti, inga cainda kubota kusaanguna kumulumbaizya. Mwamana mulakonzya kubelesya magwalo akonzya kugwasya mwanaanu kubona mbwatubona twaambo Jehova.
19 Mibuzyo ilakonzya kumugwasya kuti muzibe ncobayeeya bana. Pele mbubwenya mbuli bapati, bana abalo tabayandi kubuzigwa mibuzyo minji mbuli kuti babetekwa buya. Muciindi cakubuzya mwanaanu mibuzyo miyumu, inga cainda kugwasya ikwaamba buyo mubufwaafwi icakamucitikila nywebo kweelana amakani ngomubandika akwaamba mbomwakalimvwa. Kwamana boobo, inga mwabuzya kuti: “Sena andiwe mbolimvwa oobo?” Ibwiinguzi bwa mwanaanu bulakonzya kupa kuti mube amubandi wamu Magwalo mubotu alimwi uukulwaizya.
Amuzumanane Kutobela Cikozyanyo ca Mwiiyi Mupati
20, 21. Ino nkaambo nzi ncomweelede kuswiililisya mumulimo wanu wakugwasya bamwi kuba basikwiiya?
20 Kufwumbwa naa mubandika amwanaanu naa amuntu umbi buyo, kuswiilila kulayandika kapati. Masimpe eeci citondezya luyando. Nomuswiilila mutondezya kuti mulalicesya, mumupa bulemu muntu waambaula alimwi mutondezya kuti mulamuyanda. Ibwini mbwakuti, kutegwa muswiililisye mweelede kumutobelezya muntu ncaamba.
21 Nomuli mumulimo wa Bunakristo wakukambauka, amuzumanane kubikkila maano kuzintu nzyobaamba bamukamwini ŋanda. Ikuswiililisya kuyoopa kuti mukonzye kuziba twaambo twamu Bbaibbele tukonzya kubanjila mumoyo. Mpoonya amuzumanane kubagwasya kwiinda mukubelesya nzila ziindene-indene zyakuyiisya nzyaakabelesya Jesu. Mwanakucita boobu, muyookkomana akukkutila akaambo kakuti mutobela cikozyanyo ca Mwiiyi Mupati.
Ino Inga Mwaingula Buti?
• Ino mbuti Jesu mbwaakali kukulwaizya bamwi kwaamba mbobakali kuyeeya?
• Nkaambo nzi Jesu ncaakali kubaswiilila aabo mbaakali kuyiisya?
• Ino mbuti mbomukonzya kubelesya mibuzyo mumulimo wanu?
• Ncinzi ncomukonzya kucita kutegwa mugwasye bana kuba basikwiiya?
[Mibuzyo yaciiyo]
[Cifwanikiso icili apeeji 26]
Mwanookambauka, mweelede kuswiilila