Unaj k-kaʼansik le máakoʼob jeʼex tu beetil Jesusoʼ
Unaj k-kaʼansik le máakoʼob jeʼex tu beetil Jesusoʼ
«Táan óolteʼex túun bix a wuʼuyajeʼex.» (LUCAS 8:18.)
1, 2. ¿Baʼaxten maʼalob ka kaambalnakoʼon tiʼ bix úuchik u tratartik Jesús le máakoʼoboʼ?
JESUCRISTOEʼ le táan kaʼach u kaʼansik u disipuloʼobeʼ, tu yaʼalajtiʼob: «Táan óolteʼex [wa jach ilawileʼex] túun bix a wuʼuyajeʼex» (Lucas 8:16-18). Baʼaleʼ, le tsolnuʼuk tu tsʼáaj Jesusaʼ utiaʼal xan tuláakal máax meyajtik Dios. Le oʼolaleʼ wa k-maas tsʼáaik k-óol kaambal tiʼ Dioseʼ, yaan k-maas tsʼáaik ichil k-kuxtal yéetel yaan k-maas kanik kaʼansaj. Kex bejlaʼa minaʼan Jesús way Luʼum utiaʼal u tʼankoʼoneʼ, baʼaleʼ ken k-xok le Biblia le tuʼux tsʼíibtaʼan baʼax tu yaʼalaj yéetel baʼax tu beeteʼ, óoliʼ bey táan k-uʼuyik u tʼankoʼoneʼ. Ichil le baʼaxoʼob tsʼíibtaʼan tu yoʼolal Jesusoʼ tiaʼan le bix úuchik u tratartik le máakoʼoboʼ. ¿Baʼax ku yaʼalik le Biblia tu yoʼolaloʼ?
2 Jesuseʼ jach maʼalob úuchik u kʼaʼaytik u péektsil le Reinooʼ yéetel jach maʼalob xan úuchik u kaʼansik baʼax ku yaʼalik le Kiliʼich Tsʼíiboʼoboʼ (Lucas 8:1; Juan 8:28). Utiaʼal k-beetik disipuloʼobeʼ kʼaʼabéet k-kʼaʼaytaj yéetel k-kaʼansaj. Baʼaleʼ, yaan sukuʼunoʼobeʼ kex jach u yojloʼob kʼaʼaytajeʼ ku talamtaltiʼob u kaʼansajoʼob. Utiaʼal u kʼaʼaytaj máakeʼ chéen kʼaʼabéet u tsʼáaik ojéeltbil baʼax ku yaʼalik le Bibliaoʼ, baʼaleʼ utiaʼal u kaʼansik máak u jaajil tu yoʼolal Jéeoba yéetel baʼaxoʼob ken u beeteʼ, unaj u kanik máak u bisuba yéetel le máax ku kaʼansikoʼ (Mateo 28:19, 20). Le oʼolaleʼ utiaʼal k-kaʼansik uláakʼ máakoʼobeʼ, unaj k-beetik jeʼex tu beetil Jesús, le maas jach maʼalob j-Kaʼansajoʼ (Juan 13:13).
3. ¿Baʼax kun úuchul wa k-ilik kaʼansaj jeʼex tu beetil Jesúseʼ?
3 Wa k-kaʼansaj jeʼex tu beetil Jesuseʼ, yaan k-beetik le baʼax tu yaʼalaj apóstol Pabloaʼ: «Kanáant bix a kuxtaleʼex tu yéetel le máaxoʼob maʼ oksaj óoloʼoboʼ, táan a beetikeʼex u yantal u biilal tuláakal le kʼiinoʼoboʼ. A tsikbaleʼexeʼ mantatsʼ ka uʼuyaʼak maʼalob yéetel jatsʼuts, yéetel ka a wojéelteʼex bix unaj a núukikeʼex u tʼaan jujuntúul» (Colosailoʼob 4: 5, 6). U jaajileʼ, utiaʼal k-kaʼansik le máakoʼob jeʼex tu beetil Jesusoʼ jach unaj k-tsʼáaik k-óoliʼ. Wa k-beetkeʼ yaan k-beetikba jach maʼalob kaʼansaj, tumen yaan k-kanik bix unaj k-núukik le kʼáatchiʼob ku beetaʼaltoʼonoʼ.
Tu líiʼsaj u yóoloʼob utiaʼal ka u yaʼaloʼob baʼax ku tuklikoʼob
4. ¿Baʼaxten k-aʼalik Jesuseʼ u yojel kaʼach u chʼenxikint u maasil?
4 Jesuseʼ desde tu chichnil tu chʼenxikintaj baʼax ku yaʼalik u maasil yéetel tu líiʼsaj u yóoloʼob u yaʼaloʼob baʼax ku tuklikoʼob. Le yaan kaʼach 12 jaʼaboʼob tiʼeʼ, tiʼ ilaʼab tumen u taataʼob teʼ templo ichil le j-kaʼansajoʼob «táan u yuʼubik baʼax ku yaʼalikoʼob yéetel táan u kʼáatchiʼitikoʼob» (Lucas 2:46). Jesuseʼ maʼ bin u suʼlakúunsoʼob yéetel le yaʼab baʼaxoʼob u yojloʼ. Bin u yuʼub u kaʼansajoʼob, baʼaleʼ tu beetajtiʼob xan kʼáatchiʼob. Jesuseʼ tu chʼenxikintaj baʼax ku yaʼalik u maasil, le oʼolal lúub utsil tiʼ Dios bey xan tiʼ le máakoʼoboʼ (Lucas 2:52).
5, 6. ¿Baʼaxoʼob eʼesiktoʼon jach tu chʼenxikintaj Jesús le baʼaxoʼob tu yaʼalaj le máaxoʼob ku kaʼansikoʼ?
5 Le ka okjaʼanaj yéetel ka kʼuch u beetuba Mesíaseʼ, Jesuseʼ maʼ xuʼul u chʼenxikintik baʼax ku yaʼalik u maasiliʼ. Mix utéen jach chʼíik chéen kaʼansaj ka tak tuʼubuktiʼ u chʼenxikintik baʼax ku tuklik le máaxoʼob ku kaʼansikoʼ. Yaʼab utéeneleʼ, tu kʼáataj baʼax ku tuklik le máaxoʼob ku kaʼanskoʼ yéetel tu jach chʼenxikintaj baʼax ku núukikoʼob (Mateo 16:13-15). Le ka kíim Lázaro, u sukuʼun Martaeʼ, Jesuseʼ tu yaʼalaj tiʼ Marta: «Tuláakal le máax kuxaʼan yéetel ku yoksik u yóol tiʼ teneʼ mix bikʼin kun kíimil». Ka tsʼoʼokeʼ tu kʼáatajtiʼ: «¿Ka woksaj óoltik lelaʼ?». Letiʼ túuneʼ tu chʼenxikintaj le baʼax tu núukaj Martaaʼ: «Bey, Yuumtsil, teneʼ kin woksaj óoltik teech letiʼ le Cristooʼ, u Paal Jajal Dios» (Juan 11:26, 27). ¡Bukaʼaj wal úuchik u kiʼimaktal u yóol Jesús le ka tu yilaj jach nojoch le fe yaan tiʼ Martaoʼ!
6 Uláakʼ utéeneʼ, le ka tu yilaj Jesús táan u pʼaʼatal tumen yaʼab tiʼ u disipuloʼobeʼ, letiʼeʼ utiaʼal u yojéeltik baʼax ku tuklik u apostoloʼobeʼ, tu kʼáatajtiʼob: «¿Tak wa teʼex a kʼáateʼex bin?». Simón Pedro túuneʼ tu núukaj: Yuumtsil, ¿tiʼ máax jeʼel u páajtal k-bineʼ? A tʼaanoʼobeʼ u tʼaaniloʼob kuxtal minaʼan u xuul. Toʼoneʼ tsʼoʼok k-oksaj óoltik, yéetel k-ojel techeʼ; letiʼ le Cristooʼ, u Paal le kuxaʼan Jajal Diosoʼ» (Juan 6:66-69). ¡Bukaʼaj wal úuchik u kiʼimaktal u yóol Jesús le ka tu yuʼubaj le baʼax tu yaʼalaj Pedrooʼ! U jaajileʼ bey u yuʼubikuba máak ken u yil jach yaan u fe le máax tiʼ ku tsʼáaik xookoʼ.
Tu chʼenxikintoʼob yéetel tsiikil
7. ¿Baʼaxten yaʼab samaritanoʼob tu tsʼáaj u fejoʼob tiʼ Jesús?
7 Uláakʼ baʼax beet u jach yaʼabtal u disipuloʼob Jesuseʼ, tumen letiʼeʼ tu yeʼesaj u kʼáat u yáant le máakoʼoboʼ yéetel tu chʼenxikintoʼob yéetel tsiikil. Jeʼex le ka tsikbalnaj yéetel utúul samaritana tu jáal upʼéel chʼeʼen tu kaajil Sicareʼ, Jesuseʼ maʼ chéen letiʼ tʼaanajiʼ, baʼaxeʼ tu tsʼáaj xan tuʼux u yaʼalik le samaritana baʼax ku tuklikoʼ. Úuchik u jach chʼenxikintikeʼ, tu tsʼáaj cuentaeʼ le koʼoleloʼ u kʼáat u yojéelt bix unaj u adorartaʼal Dios, le oʼolal tu yaʼalajtiʼ, Dioseʼ u kʼáat ka adorartaʼak yéetel espíritu bey xan yéetel u jaajil. Tumen Jesús tu yeʼesaj tsiikil tiʼ yéetel tu yeʼesaj u kʼáat u yáanteʼ, le samaritanaoʼ áalkabil úuchik u bin u yaʼal tiʼ u vecinoʼob le baʼax tu yuʼuboʼ, yéetel «yaʼab tiʼ u kajnáaliloʼob le kaaj yaan Samariaoʼ, tu yoksaj u yóoloʼob tiʼ Jesús, tu yoʼolal le baʼax aʼalaʼabtiʼob tumen le koʼoleloʼ» (Juan 4:5-29, 39-42).
8. ¿Bix jeʼel k-káajsik tsikbal yéetel máaxoʼob utstutʼaan u yaʼalkoʼob baʼax ku tuklikoʼobeʼ?
8 Óoliʼ tuláakal máak utstutʼaan u yaʼalik baʼax ku tuklik. U kajnáaliloʼob u yúuchben kaajil Atenaseʼ utstutʼaan u yaʼalikoʼob kaʼach baʼax ku tuklikoʼob bey xan u yojéelkoʼob túumben baʼaloʼob. Le oʼolal Pabloeʼ tu yilaj u máansik upʼéel jach maʼalob tsoltʼaan tu Areopagoi le kaajoʼ (Beetaʼanoʼob [Hechos] 17:18-34). Bejlaʼa xaneʼ, ken kʼuchkoʼon tiʼ upʼéel najeʼ jeʼel u páajtal k-káajsik tsikbal beyaʼ: «In kʼáat in wojéelt baʼax ka tuklik yoʼolal [tʼaanen tiʼ upʼéel wa baʼax]». Ken joʼopʼok u tʼaan u yuumil najeʼ kʼaʼabéet k-chʼenxikintik, ken tsʼoʼokkeʼ maʼalob ka tʼaanakoʼon yoʼolal le baʼax tu yaʼaloʼ wa k-beetik upʼéel kʼáatchiʼ tiʼ. Tsʼoʼoleʼ maʼalob ka k-kanáant bix ken k-eʼestiʼ baʼax ku yaʼalik le Biblia yoʼolal le baʼax táan k-tsikbaltikoʼ.
Jesuseʼ mantatsʼ u yojel kaʼach baʼax ken u yaʼale
9. ¿Baʼax tu beetaj Jesús táanil tiʼ «u tsolik[...] le Kiliʼich Tsʼíiboʼob» tiʼ Cleopas yéetel u yéet bimbaloʼ?
9 Jesuseʼ mantatsʼ kaʼach u yojel baʼax ken u yaʼaleʼ. Letiʼ kaʼacheʼ maʼ chéen u yojel u chʼenxikintik le máax yéetel ku tsikbaloʼ, u yojel xan tiʼ baʼax táan u tuukuloʼob yéetel jach u yojel xan baʼax ken u yaʼale (Mateo 9:4; 12:22-30; Lucas 9:46, 47). Koʼox ilik upʼéel baʼax tu beetaj. Maʼ sen úuch kaʼa kuxkíintaʼak Jesuseʼ, kaʼatúul tiʼ u disipuloʼobeʼ jóokʼoʼob tu kaajil Jerusalén utiaʼal u binoʼob tu kaajil Emaús. Le Evangeliooʼ ku yaʼalik: «Kaʼalikil táan u tsikbaltikoʼob yéetel táan u tʼanal tʼaanoʼobeʼ, Jesuseʼ tu natsʼuba tu yiknaloʼobeʼ ka joʼopʼ u xíimbal yéeteloʼob. Baʼaleʼ kex tu yilajoʼobeʼ yaan baʼax beetik maʼ u kʼaj óoltikoʼob máaxiʼ. Ka túun kʼáataʼabtiʼob tumen Jesús: ¿Baʼax ka tʼanal tʼantikeʼex kaʼalikil táan a xíimbaleʼex teʼ bejaʼ? ¿Baʼaxten jach lubaʼan a wóoleʼex? Cleofas, juntúul tiʼobeʼ tu núukajtiʼ: ¿Chéen wa teech ichil le [uʼulaboʼob] maʼ a wojel baʼax tsʼoʼok u yúuchul Jerusalén tiʼ le kʼiinoʼobaʼ? Jesuseʼ tu yaʼalajtiʼob: ¿Baʼax tsʼoʼok u yúuchul?». Letiʼob túuneʼ tu tsikbaltoʼob tiʼeʼ, Jesús le Nazaretil, le máax kʼaj óolaʼan yoʼolal u kaʼansajoʼob yéetel yoʼolal u milagroʼobeʼ, tsʼoʼok u kíimsaʼal, kex yaan máaxoʼob aʼalik tsʼoʼok u kaʼa kuxkíintaʼal. Le Nojoch j-Kaʼansaj túunoʼ tu yuʼubaj baʼax ku yaʼalik Cleopas yéetel le máax u yéet binoʼ, tsʼoʼoleʼ ka tu «tsol[ajtiʼob] le Kiliʼich Tsʼíiboʼoboʼ» (Lucas 24:13-27, 32).
10. ¿Bix jeʼel u páajtal k-ojéeltik baʼax ku creertik le máaxoʼob k-xíimbaltikoʼoboʼ?
10 Yaʼab utéeneleʼ toʼoneʼ maʼ k-ojel baʼax ku creertik le máax yéetel k-tsikbaloʼ. Baʼaleʼ ¿bix jeʼel k-ojéeltik baʼax ku tuklikeʼ? Upʼéel bixeʼ, letiʼe ka k-aʼaltiʼ uts t-tʼaan k-ojéeltik baʼax ku tuklik le máakoʼob yoʼolal le oracionoʼ. Tsʼoʼoleʼ jeʼel u páajtal k-kʼáatiktiʼeʼ: «A tuklikeʼ, ¿yaan wa máax uʼuyik le oracionoʼob k-beetkoʼ?». Le baʼax ken u núukoʼ, maʼ xaaneʼ yaan u yeʼesiktoʼon baʼax ku tuklik yéetel baʼax u religión. Wa k-ilik taak u maas kaambal tiʼ Dioseʼ, maʼ xaaneʼ jeʼel u páajtal k-kʼáatiktiʼeʼ: «A tuklikeʼ, ¿ku yuʼubik wa Dios tuláakal le oracionoʼoboʼ, wa yaan maʼatechiʼ?». Wa k-beetik kʼáatchiʼob beyaʼ, maʼ xaaneʼ jeʼel u yantaltoʼon upʼéel maʼalob tsikbaleʼ. Wa k-ilik kʼaʼabéet k-xokik upʼéel teksto tiʼ le Bibliaoʼ, unaj k-kanáantik bix ken k-beetil utiaʼal maʼ k-tʼaan kʼaas yoʼolal baʼax ku creertik. Wa jatsʼuts tu yilij le bix úuchik k-tsikbal tu yéeteloʼ, maas yaan u yóotik u kaʼa kʼamoʼon tuláakʼ kʼiin. Baʼaleʼ ¿kux túun wa ku beetiktoʼon upʼéel kʼáatchiʼ maʼ k-ojel u núukileʼ? Maas maʼalob ka k-aʼaltiʼ jeʼel k-suut tuláakʼ kʼiin, ken tsʼoʼokok k-kaxtik u núukil le kʼáatchiʼoʼ yéetel ken páatak k-tsolik maʼalob «le alab óolal yaan tiʼ [toʼonoʼ]», baʼaleʼ unaj k-beetik «yéetel kabal óolal bey xan yéetel tsiikil» (1 Pedro 3:15).
Jesuseʼ tu kaʼansaj le máaxoʼob ku náajmatikoʼoboʼ
11. ¿Baʼax kun áantkoʼon kaxt le máaxoʼob ku náajmatik u kaʼansaʼaltiʼob le baʼax ku yaʼalik le Bibliaoʼ?
11 Tumen Jesús minaʼan kʼeban tiʼeʼ, séeb tu kʼaj óoltil máax ku náajmatik u kʼamik u kaʼansaj yéetel máax maʼatech. Baʼaleʼ, tiʼ toʼoneʼ ku talamtal k-kaxtik le máaxoʼob u kʼáatoʼob «ka yanaktiʼob kuxtal minaʼan u xuuloʼ» (Beetaʼanoʼob 13:48). Tiʼ le apostoloʼoboʼ bey xan úuchiktiʼoboʼ, le oʼolal Jesuseʼ tu yaʼalajtiʼob: «Le ken kʼuchukeʼex tiʼ jumpʼéel kaaj wa tiʼ jumpʼéel kajtalileʼ, kaxteʼex teʼeloʼ juntúul máak ku náajmatik» (Mateo 10:11). Jeʼex le apostoloʼoboʼ, kʼaʼabéet k-kaxtik le máaxoʼob u kʼáat u yuʼuboʼob yéetel u kanoʼob le baʼax ku kaʼansik le Bibliaoʼ. Yaan k-kaxkoʼob wa k-chʼenxikint le máaxoʼob yéetel k-tsikbaloʼ yéetel wa k-tsʼáaik cuenta bix u yuʼubkubaʼob yoʼolal le baʼax k-tsikbaltiktiʼoboʼ.
12. ¿Bix jeʼel u seguer k-áantik le máaxoʼob u kʼáatoʼob kaambaloʼ?
12 Ken tsʼoʼokok k-tsikbal yéetel le máaxoʼob t-ilaj u kʼáatoʼob kaambaleʼ, ¿baʼax kʼaʼabéet k-beetik? Kʼaʼabéet tuklik bix jeʼel k-maas áantkoʼobeʼ. Utiaʼal lelaʼ maʼalob ka k-tsʼíibt le baʼax t-ilaj le ka tsikbalnajoʼon tu yéeteloʼoboʼ. Cada ken xiʼikoʼon xíimbaltoʼobeʼ, kʼaʼabéet k-jach chʼenxikintkoʼob utiaʼal k-maas ojéeltik baʼax ku creerkoʼob, bix u tuukuloʼob yéetel baʼax talamil ku aktáantikoʼob.
13. ¿Bix jeʼel k-ojéeltik baʼax ku tuklik le máakoʼob yoʼolal le Bibliaoʼ?
13 ¿Bix jeʼel k-ojéeltik baʼax ku tuklik le máakoʼob yoʼolal le Bibliaoʼ? Yaan tuʼuxoʼobeʼ ku meyaj le kʼáatchiʼaʼ: «A tuklikeʼ, ¿talam wa u naʼataʼal baʼax ku yaʼalik le Bibliaoʼ?». Le baʼax ken u núukoʼ yaan u yeʼesiktoʼon wa ku creertik baʼax ku yaʼalik le Bibliaoʼ. Uláakʼ baʼax jeʼel u páajtal k-beetkeʼ, letiʼe k-xokik upʼéel teksto tiʼoʼ yéetel k-kʼáatiktiʼ: «¿Bix a wilik le baʼax tsʼoʼok k-xokikaʼ?». Jeʼex Jesuseʼ, jeʼel u bintoʼon utsil tiʼ k-meeyjil kaʼansaj wa k-beetik maʼalob kʼáatchiʼobeʼ. Baʼaleʼ, jeʼex ken k-il beoraaʼ, kʼaʼabéet kanáantik bix ken k-beetil le kʼáatchiʼoboʼ.
Jesuseʼ jach maʼalob tu beetil le kʼáatchiʼoboʼ
14. Kex maʼ k-sen beetik kʼáatchiʼobeʼ, ¿bix jeʼel k-ojéeltik baʼax ku tuklik le máakoʼoboʼ?
14 Kex k-kʼáat ojéelt baʼax ku tuklik le máakoʼoboʼ, maʼ k-kʼáat suʼlakkúuntoʼobiʼ. Le oʼolal k-ilik beetik jeʼex Jesuseʼ. Letiʼeʼ maʼ chéen tu sen beetaj kʼáatchiʼob tiʼ wa máaxiʼ. Baʼaxeʼ, le kʼáatchiʼob meyajnajtiʼoʼ tu beetaj u tuukul le máakoʼoboʼ. Tsʼoʼoleʼ, tu jach chʼenxikintaj le máaxoʼob jach taak u kaambaloʼoboʼ yéetel tu beetaj u yuʼubkubaʼob maʼalobil (Mateo 11:28). Tuláakal máak ku natsʼkuba kaʼach utiaʼal u tsikbaltoʼob tiʼ baʼax chiʼichnakkúuntkoʼob (Marcos 1:40; 5:35, 36; 10:13, 17, 46, 47). Toʼon xaneʼ: wa k-kʼáat ka aʼalaʼaktoʼon tumen le máaxoʼob k-kaʼanskoʼob baʼax ku tuklikoʼob yoʼolal baʼax ku kaʼansik le Bibliaoʼ, maʼ unaj xan k-sen beetik kʼáatchiʼobiʼ.
15, 16. ¿Bix jeʼel u páajtal k-beetik u tsikbal le máakoʼob yoʼolal le baʼax ku creerkoʼoboʼ?
15 Kex maʼalob ka k-beet kʼáatchiʼobeʼ, baʼaleʼ jeʼel u páajtal xan k-káajsik tsikbal yéetel u yuumil naj tiʼ upʼéel baʼax jeʼel u taaktal u yuʼubikeʼ, tsʼoʼoleʼ unaj xan k-tsʼáaik cuenta bix u kʼamik. Jesuseʼ bey úuchik u beetik le ka tu yaʼalaj tiʼ Nicodemo: «Le máax maʼ tu síijil tu kaʼatéeneʼ maʼ tu páajtal u yilik u [reino] Jajal Dios» (Juan 3:3). Nicodemoeʼ jach taakchaj u yojéeltik le baʼax tu yóotaj u yaʼal Jesusoʼ, le oʼolal tu jach chʼenxikintaj Jesús (Juan 3:4-20). Wa k-beetik jeʼex tu beetil Jesusoʼ, le máakoʼoboʼ jeʼel u maas yóotkoʼob tsikbaleʼ.
16 Tiʼ luʼumiloʼob jeʼex África, Europa oriental yéetel Latinoamericaeʼ, táan u maas yantal túumben religionoʼobiʼ. Teʼ luʼumoʼobaʼ jeʼel u páajtal u káajsik máak upʼéel tsikbal beyaʼ: «¿Máasaʼ bejlaʼeʼ jach yaʼab religionoʼob yaan? Baʼaleʼ teneʼ kin creertikeʼ yaan u kʼuchul u kʼiinil u láaj muchʼkíintaʼal le máakoʼob tumen le religión ku kaʼansik u jaajiloʼ. ¿Maʼ wa utstatʼaan ka úuchuk beyoʼ?». Ken tʼaanakoʼon tiʼ le baʼaxoʼob jeʼel u taaktal u yuʼubik le máakoʼoboʼ, maʼ xaaneʼ jeʼel k-beetik u yaʼalikoʼob baʼax ku tuklikoʼobeʼ. Jeʼel xan u maas núukikoʼob le kʼáatchiʼob k-beetik wa maʼ chowak u núukiliʼ (Mateo 17:25). Le ken tsʼoʼokok u núukikoʼobeʼ, jeʼel u páajtal k-xokik upʼéel wa kaʼapʼéel tekstoʼob utiaʼal k-eʼesiktiʼob bix u núukik le Biblia le kʼáatchiʼoʼ (Isaías 11:9; Sofonías 3:9). Wa k-chʼenxikintkoʼob yéetel wa k-tsʼáaik cuenta baʼax ku tuklikoʼobeʼ, yaan u páajtal k-ilik tiʼ baʼax ken k-tʼaan ken suunakoʼon xíimbaltoʼob.
Jesuseʼ tu chʼenxikintaj le mejen paalaloʼoboʼ
17. ¿Bix tu yeʼesil Jesús u kʼáat u yáant le mejen paalaloʼoboʼ?
17 Jesuseʼ maʼ chéen nukuch máakoʼob tu yilaj u yáantkoʼobiʼ. Tu yilaj xan u yáantik le mejen paalaloʼoboʼ, le oʼolal tu tsʼáaj cuenta baʼax báaxalil ku beetkoʼob yéetel tiʼ baʼax ku tʼaanoʼob. Yaan kʼiineʼ tu yaʼalaj xan tiʼob ka u natsʼubaʼob tu yiknal (Lucas 7:31, 32; 18:15-17). Ichil le yaʼab máaxoʼob uʼuy u kaʼansaj Jesusoʼ anchaj xan mejen paalaloʼobiʼ. Yéetel le ka joʼopʼ u kʼaʼam aʼalaʼal tumen jujuntúul mejen paalal letiʼ le Mesíasoʼ, letiʼeʼ maʼ chéen tu chʼenxikintoʼobiʼ, baʼaxeʼ tu yaʼalaj bey tsʼíibtaʼanik teʼ Kiliʼich Tsʼíiboʼoboʼ (Mateo 14:21; 15:38; 21:15, 16). Teʼ kʼiinoʼob xanaʼ, yaʼab mejen paalal táan u beetkubaʼob disipuloʼob tiʼ Cristo. ¿Bix jeʼel k-áantikoʼobeʼ?
18, 19. ¿Bix jeʼel k-áantik le mejen paalaloʼob utiaʼal ka maas kaambalnakoʼob tiʼ Diosoʼ?
18 Wa k-kʼáat k-áant le mejen paalaloʼob utiaʼal ka u beetubaʼob disipuloʼob tiʼ Jesuseʼ, kʼaʼabéet k-chʼenxikintkoʼob. Kʼaʼabéet k-ilik ojéeltik wa yaan baʼax ku tuklikoʼob ku bin tu contra le baʼax u kʼáat Jéeobaoʼ. Jeʼex le nukuch máakoʼoboʼ, le mejen paalaloʼob xanoʼ chéen ku yaʼalkoʼob baʼax ku tuklikoʼob tiʼ máax chʼenxikintkoʼob, tiʼ máax eʼesik tsiikil tiʼob wa tiʼ máax maʼatech u mixbaʼalkúuntikoʼob. Le oʼolaleʼ, kex jeʼel baʼalak ka u yaʼaloʼobeʼ, kʼaʼabéet k-núukiktiʼob maʼalob yéetel maʼ unaj k-jáan pʼuʼujul tu yéeteloʼobiʼ. Wa ku yilkoʼob maʼatech k-tsikbaltik tiʼ u maasil le baʼax ku yaʼalikoʼobtoʼoneʼ maʼ xaaneʼ jeʼel u maas yóotkoʼob u tsikbaltoʼobtoʼon baʼax ku tuklikoʼobeʼ (Proverbios 11:13). Baʼaleʼ, yaan kʼiineʼ yaan u kʼaʼabéettal k-aʼalik tiʼ u taataʼob baʼax ku tuklikoʼob.
19 Kex maʼalob ka beetaʼak kʼáatchiʼob tiʼ le mejen paalaloʼoboʼ, le máax suuk u chʼenxikintkoʼobeʼ u yojel wa chéen ku sen beetik kʼáatchiʼob tiʼobeʼ yaan baʼax maʼ ken u yóot u yaʼaloʼob. Jeʼex le nukuch máakoʼoboʼ le mejen paalaloʼoboʼ maʼ xan utstutʼaanoʼob ka sen beetaʼak kʼáatchiʼob tiʼobiʼ. Utiaʼal maʼ k-náaksik u yóoloʼobeʼ, maas maʼalob ka tʼaanakoʼon tiʼ jujumpʼéel baʼax yaan yil t-éetel wa tiʼ uláakʼ baʼaxoʼob u kʼáat u yuʼuboʼob (Mateo 13:51, 52). Jeʼel u páajtal k-aʼaliktiʼob bix k-uʼuyikba kaʼach t-paalil yoʼolal wa baʼaxeʼ, tsʼoʼoleʼ k-kʼáatiktiʼob: «¿Bey wa xan a wuʼuykabaoʼ?». Wa k-yéeyik baʼaxoʼob ku kaʼansik le Biblia utstutʼaan u yuʼubik le mejen paalaloʼoboʼ, maʼ xaaneʼ yaan k-líiʼsik u yóoloʼob utiaʼal u xokikoʼob le Bibliaoʼ yéetel ka seguernak u beetkoʼob.
Unaj k-kaʼansaj mantatsʼ jeʼex tu beetil Jesuseʼ
20, 21. Ken k-beet disipuloʼobeʼ, ¿baʼaxten jach kʼaʼabéet k-chʼenxikintik le máakoʼoboʼ?
20 Jeʼex tsʼoʼok k-ilkoʼ, utiaʼal k-kaʼansik uláakʼ máakoʼob jeʼex tu beetil Cristoeʼ unaj k-kanik chʼenxikint tuláakal máak, kex jeʼel bukaʼaj u jaʼabileʼ. Wa k-beetik beyoʼ k-eʼesik yaabilaj, kabal óolal, tsiikil yéetel chʼaʼaj óotsilaj. Baʼaleʼ, maʼ chéen unaj k-uʼuyik baʼax ku yaʼalaʼaliʼ, kʼaʼabéet k-jach chʼenxikintik.
21 Ken k-beet le meeyjil kaʼansajoʼ, kʼaʼabéet k-jach chʼenxikintik baʼax ku yaʼalaʼaltoʼon tumen u yuumil naj. Wa k-beetik beyoʼ, maʼ xaaneʼ jeʼel k-tsʼáaik cuenta baʼax kaʼansajil tiʼ le Biblia jeʼel u maas taaktal u yuʼubik le máakoʼoboʼ. Tsʼoʼoleʼ, unaj k-ilik kaʼanskoʼob jeʼex tu beetil Jesusoʼ. Ken kaʼansajnakoʼon túun jeʼex tu beetil le maas jach Nojoch j-Kaʼansajoʼ, yaan u jach yantaltoʼon kiʼimak óolal.
¿Baʼax jeʼel k-núukikeʼ?
• Jesuseʼ, ¿bix tu líiʼsil u yóol le máakoʼob utiaʼal ka u yaʼaloʼob baʼax ku tuklikoʼoboʼ?
• ¿Baʼaxten tu chʼenxikintaj Jesús le máaxoʼob tu kaʼansajoʼ?
• ¿Bix jeʼel u meyajtoʼon le kʼáatchiʼob ken kʼaʼaytajnakoʼoneʼ?
• ¿Bix jeʼel u yáantaʼal le mejen paalaloʼob utiaʼal ka maas kaambalnakoʼob tiʼ Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 26]
Maʼ u tuʼubultoʼon k-chʼenxikintik u maasil ken kʼaʼaytajnakoʼon