Mga Pamangkot Gikan sa mga Bumalasa

Nagakaigo bala para sa isa ka Saksi ni Jehova nga magtambong sa kasal sang isa ka himata ukon kakilala nga indi Saksi?

Makalilipay gid nga okasyon ang kasal, amo nga natural lang kon luyag sang isa ka Cristiano magtambong sa sini. Siempre pa, ang menor-de-edad nga gin-imbitar sa kasal dapat magtuman sa ila ginikanan ukon sa ila manug-atipan, nga amo ang dapat maghimo sing desisyon kon patambungon sila ukon indi. (Efeso 6:1-3) Apang, ano abi kon agdahon sang bana nga indi Saksi ang iya asawa nga updan sia sa isa ka kasal sa simbahan? Mahimo nga mabaton sang iya konsiensia nga magtambong apang namat-od sia nga indi gid makigbahin sa bisan anong relihiosong buhat sa sina nga okasyon.

Sa pagkamatuod, ang pagtambong ukon ang indi pagtambong sa kasal isa ka personal nga desisyon. Apang, dapat dumdumon sang isa ka Cristiano nga may salabton sia kay Jehova sa iya mga desisyon kag dapat binagbinagon niya ang pila ka prinsipio sa Biblia kon magdesisyon sia nga magtambong sa kasal sang indi Saksi.

Importante gid nga dumdumon sang isa ka Cristiano nga dapat matigayon niya ang kahamuot sang Dios. Si Jesus nagsiling: “Ang Dios espiritu, kag ang mga nagasimba sa iya kinahanglan magsimba sa espiritu kag kamatooran.” (Juan 4:24) Busa, wala nagapakigbahin ang mga Saksi ni Jehova sa relihioso nga mga buhat sang iban nga relihion, subong sang mga pangamuyo, mga rituwal, ukon mga seremonya nga sumpakil sa kamatuoran sa Biblia.—2 Corinto 6:14-17.

Nakahibalo ang isa ka Cristiano nga ang iya desisyon mahimo makaapektar man sa iban. Kon magtambong ka, masaklaw bala ang imo mga himata kon indi ka makigbahin sing bug-os sa selebrasyon sang kasal? Dapat mo man binagbinagon ang posible nga epekto sang imo desisyon sa imo mga masigkatumuluo. (Roma 14:13) Bisan pa sa banta mo kag sang iban nga miembro sang imo pamilya indi man sala ang pagtambong sa kasal sang indi Saksi, basi indi gid maayo ang epekto sini sa imo mga kauturan sa kongregasyon? Magahalit bala ini sa konsiensia sang iban?

Ang seremonya sa kasal sang indi Saksi nga himata mahimo nga magabutang sa isa sa alang-alang. Paano kon pangabayon ka nga mangin abay? Ukon ano abi kon ang imo tiayon indi Saksi kag luyag niya makigbahin sing bug-os sa kasal? Kon huwes ukon opisyal sang gobierno ang manugkasal, mahimo ini kabigon subong isa lamang ka pagtambong sa legal nga proseso.

Apang, kon ang kasal hiwaton sa simbahan ukon ang manugkasal isa ka pari, pastor ukon ministro, may mga butang nga dapat gid binagbinagon. Agod masunod ang imo nahanas sa Biblia nga konsiensia kag malikawan nga ikompromiso ang imo relihioso nga mga pagpati ukon malikawan nga masaklaw ang iban sa tion sang selebrasyon, mahimo nga magdesisyon ka nga indi na lang magtambong. (Hulubaton 22:3) Malikawan mo nga mahul-an ka kag ang imo pamilya paagi sa pagpaathag sing abanse sa ila kon ano ang puede kag indi mo puede himuon sa tion sang selebrasyon.

Sa tapos mabinagbinag ang tanan nga butang, ang iban nga Cristiano mahimo maghinakop nga indi man gid sayop nga magtambong sa kasal sang indi Saksi basta indi lang sila makigbahin sa relihioso nga seremonya. Apang kon mahantop sang isa ka Cristiano nga ang iya pagtambong mahimo mag-ipit sa iya nga lapason ang iya diosnon nga mga prinsipio, mahimo maghinakop sia nga indi na lang magtambong sa seremonya sang kasal kay mas daku pa ang risgo sangsa posible nga mga benepisyo. Apang, kon luyag niya nga sa punsion lang makadto, dapat pat-uron niya nga ‘mahimo niya ang tanan nga butang sa kahimayaan sang Dios.’ (1 Corinto 10:31, NW) Sa pagdesisyon sa sini nga butang, “ang tagsa ka tawo magdala sang iya kaugalingon nga lulan” sang responsibilidad. (Galacia 6:5) Busa, kon ano man ang imo desisyon dumduma nga importante gid ang paghupot sing maayo nga konsiensia sa atubangan ni Jehova nga Dios.