Kajitõk ko Jen Ro Rej Read

Ekkar ke bwe juõn ian Ri Kennan ro an Jehovah ren bed ilo kõmare an juõn nukin ak juõn eo ebake me ejjab bed ilo mol eo?

Kõmare ko rej ien ko rekalañliñ, im ealikar bwe juõn Ri Christian enaj kõnan bed ilo ien kamõnõnõ rot kein. Emol, ajiri im jodikdik ro rej kir ir ñan ien rot kein rej aikwij bokake jemeir im jineir ak ro me rej lale ir, ro im ewõr air maroñ ñan kõmmane bebe eo ñan ir. (Dri Epesõs 6:​1-3) Ak ta elañe juõn emaan ejjab juõn ian Ri Kennan ro an Jehovah ej kajitõk ibben lio belen im ej Christian bwe en etal ibbenlok ñan juõn mare ej kõmman ilo juõn imõn jar? Bõklikit eo an lio emaroñ kõtloke bwe en baj etal wõt bwe en lale bõtab ej bebe ñan an jab bõk kunan ilo jabdewõt makitkit ko an kabuñ ko ilo ien rot in.

Ilo mol, ej bebe eo an juõn armij make elañe ekõnan bed ilo juõn ien kõmare. Bõtab, kajjojo Ri Christian ej aikwij lemnak kin eddo eo an ñan Jehovah im en lemnak kin nan in kaiñi ko relõñ ilo Bible ñe ej kõmman juõn bebe kin bed ilo kõmare an juõn eo ejjab bed ilo mol eo.

Men eo eaorõktata ej bed ilo lemnak an juõn Ri Christian ej bwe en aikwij wõr juõn kõnan ñan kabuñburuen Anij. Jesus ear ba: “Anij e Jitõb: im ro rej kabuñ ñõn E, ren kabuñ ilo Jitõb im ilo mol.” (Jon 4:​24) Kin men in, Ri Kennan ro an Jehovah rejjab bõk kunair ilo makitkit ko an kabuñ ko jet, einwõt jar, mantin wãwen air kabuñ, ak kwojkwoj ko air me rejjab errã ibben mol eo ilo Bible.​​—2 Dri Korint 6:​14-​17.

Juõn Ri Christian ej kile bwe bebe eo an emaroñ bareinwõt jelet ro jet. Elañe kwoj bebe ñan bed ilo ien mare eo ak kwojjab lukkun bõk kunam ilo makitkit ko ie, ro nukõm renaj ke lõkatip ibbam? Jej aikwij bareinwõt lemnak kin wãwen eo emaroñ jelet ri tõmak ro mõttad. (Dri Rom 14:​13) Meñe kwe ak ro jet uan family eo am komij bebe bwe ejjab nana bed ilo mare an juõn eo ejjab Ri Kennan, emaroñ ke kalõkatip ro jeimi im jatimi? Emaroñ ke kokkure bõklikit eo an ro jet?

Ien mare ko me rej kitibuj ro nukõm me rejjab Ri Kennan ro emaroñ ien ko rebin. Ta elañe rar kajitõk bwe kwon juõn ri abar? Ak ta elañe eo beleõm ejjab bed ilo mol eo ej kõnan lukkun bõk kunan ilo aolep makitkit ko ie? Elañe mare eo ear kõmman ilo kien ikijen juõn ri ekajet ak juõn ri jerbal in kien, am bed emaroñ kitibuj elõñlok men ko jen am baj bõk kunam ak ri kamol ilo ien mare eo.

Bõtab, ñe juõn mare ej kõmman ilo juõn imõn jar ak juõn ri tel in kabuñ ej kõmmane, men in ej bõkmantak inebata ko jet. Ñan am lor bõklikit eo am emwij an Bible eo katakini im bõprae am jumae tõmak eo am ak kõmman jet men me remaroñ kajook ri mare ro im ro ewõr kunair ilo ien kõmare eo einwõt family ko an lio im leo ekoba ri abar ro, kwomaroñ kãlet ñan am jab kobalok. (Jabõn Kennan Ko 22:⁠3) Kwomaroñ bõprae inebata ko relap an family eo am im kwe make ikijen am kameleleik tõmak eo am jen Bible eo moktalok, im kwalok joñan eo kwoj mõnõnõ in bõk kunam ie.

Elikin air etale aolep tokjen ko renaj walok jen menin, jet Ri Christian ro remaroñ bebe bwe ejjab nana ñan bed ilo kõmare an ro rejjab Ri Kennan ro an Jehovah elañe rejjab bõk kunair ilo aolep makitkit ko an kabuñ eo. Ak elañe juõn Ri Christian ej kile bwe an bed ilo kõmare an ro rejjab bed ilo mol eo, emaroñ bo ilo manit ko rejõkkar, emaroñ bebe bwe emõnlok an jab etal. Elañe ej kãlet ñan jab kobalok ilo ien kõmare eo ak ej beek in bed ilo ien kwojkwoj in mõñã eo me enaj kõmman tokelik, ej aikwij kabin bebe eo an ñan “kõmõn men otemjej ñõn aibujuij an Anij.” (1 Dri Korint 10:​31) Ikijen bebe ko einwõt in, “jabrewõt armij e naj mõke inek kwonan.” (Dri Galetia 6:⁠5) Kin men in, jabdewõt bebe kwonaj kãlete, kememej bwe kejbãrok juõn bõklikit emõn iman mejen Jehovah elukkun aorõk.