Tepetepet na Saray Manbabasa

Nayari kasin onatendi so sakey a Tasi nen Jehova diad kasal na aliwan-Tasin kanayon odino kabkabat?

Say kasal et maliket ya okasyon, tan natural labat a labay na sakey a Kristiano so onatendi ed ontan. Siempre, saray menor de edad a naimbitaan so nepeg ya ontulok ed atateng da odino ed saramay onaakton ateng a walaan na kanepegan a mandesisyon nipaakar ed satan. (Efeso 6:1-3) Balet panon to no say Kristianon asawan bii et itagar na aliwan-Tasin asawa to diad sakey a kasal ed simbaan? Nayarin sikatoy abuloyan na konsiensia to ya onatendi balet ta manimaton labat ya agton balot mibiang ed antokaman a relihyoson seremonya ed satan ya okasyon.

Sirin, say iyatendi odino ag-iyatendi ed sakey a kasal et personal a desisyon. Balet, nepeg ya isipen na kada Kristiano a walay eebatan to ed si Jehova tan kaukolan ton ikonsidera ni so pigaran prinsipyo na Biblia sano sikatoy mandesisyon ya onatendi ed kasal na aliwan Tasi.

Say sankaimportantian a nodnonoten na sakey a Kristiano et say panangabobon na Dios. Oniay inkuan nen Jesus: “Say Dios sikatoy sakey ya espiritu: et saray mangigalang ed sikato nepeg dan igalang ed espiritu tan katuaan.” (Juan 4:24) Sirin, saray Tasi nen Jehova et agmibibiang ed saray gagawaen na arum a relihyon, a singa saray dasal, ritual, odino seremonya a sumlang ed katuaan na Biblia.​—2 Corinto 6:14-17.

Nepeg a bidbiren na sakey a Kristiano a say desisyon to et makaapekto met ed arum. No bilang ta say desisyon mo et onatendi, naopendi kasi so kakanayon mo no agka sigpot a mibiang ed saray seremonya na kasal? Nakaukolan met a nodnonoten so posiblin epekto na satan ed saray kapananisiaan. (Roma 14:13) Anggano aliwan makapuy parad sika odino ed kapamilyaan mo so onatendi ed kasal na aliwan Tasi, kasin naapektoan a maong iray kaagian mo? Kasin nasakitan so konsiensia na arum?

Diad saray seremonya ed kasal na saray aliwan-Tasin kakanayon et walaray onlelesan mairap a situasyon. Panon to no labay da kan magmaliw ya abay? Odino panon to no say asawam et aliwan Tasi tan labay to kan mibiang ed amin a seremonya? No say kasal et sibil tan say mangasal et sakey a huis odino opisyal na gobierno, say naimatonan labat ed satan et legal iran uksoyan.

Balet, lalon makapadesdes so kipapasen no say seremonya na kasal et diad loob na simbaan odino say mangasal et sakey a pari. Ta pian natumbok mo so konsiensiam a nipasal ed Biblia tan agmo nikompromiso iray sisiaen mo odino agka makagawa na bengatlan pansengegay kababaingan na saray angimbita, nayarin desidien mon agla onatendi. (Uliran 22:3) Sika tan say pamilyam so makapaliis ed problema no masakbay mo lan ipaliwawa iray sisiaen mon nibase ed Biblia, ya ipalinew mo iray agnayari odino nayari ed sikayo.

Kayari na maalwar a pannonot ed amin a nalalanor, nayarin desidien na arum a Kristiano ya aliwan makapuy so onatendi daput no manimaton labat ed kasal na aliwan Tasi. Balet no natebek na sakey a Kristiano a nayarin sikatoy natukson mangikompromiso ed maridios iran prinsipyo no sikatoy onatendi, nepeg ya isipen to a mas baleg so kapeligroan nen say posiblin pakagunggonaan. No say desisyon to et ag-onatendi ed seremonya balet ta labay toy onla ed ponsia bilang naimbitaan a bisita, nepeg a sikatoy determinadon ‘manggawa na amin diad kigloriaan na Dios.’ (1 Corinto 10:31) Diad panggawa ed saratan a desisyon, “balang sakey taroken to naani so awi’ton dili.” (Galacia 6:5) Antokaman sirin so desisyon yo, tandaan a mas importante so pamasiansia ed maong a konsiensia ed imaton nen Jehova a Dios.