Pregunta di Lektor

Ta apropiá pa un Testigu di Yehova asistí na un kasamentu di un famia òf un konosí ku no ta Testigu? *

Ya ku kasamentu ta un okashon di alegria ta komprendibel ku un kristian lo ke ta presente. Ta klaru ku menornan di edat ku haña un invitashon mester obedesé nan mayornan òf nan vogtnan, ku tin derecho di tuma e desishon final. (Efesionan 6:1-3) Pero kiko si un hende hòmber ku no ta un Testigu di Yehova ta pidi su esposa kristian pa bai kuné un kasamentu na misa? Konsenshi di e esposa kisas ta permitié bai simplemente komo un opservadó ku ta determiná pa no partisipá den ningun akto religioso ku tin di haber ku e okashon.

Pues básikamente, kada kristian mes tin ku disidí si nan ta bai un kasamentu òf no. Sin embargo, kada un di nan mester tene na mente ku nan tin ku duna kuenta na Yehova pa nan desishonnan, i nan mester konsiderá un par di prinsipio bíbliko ora nan ta disidí si nan ta bai un kasamentu di hende ku no ta Testigu.

E kos mas importante ku un kristian mester tin na mente ta e deseo di tin Dios su aprobashon. Hesus a bisa: “Dios ta Spiritu, i esnan ku ta ador’é mester adorá den spiritu i bèrdat.” (Juan 4:24) P’esei, Testigunan di Yehova no ta partisipá den aktividatnan religioso di otro religion, manera orashon, ritualnan òf seremonianan ku ta na konflikto ku bèrdatnan di Beibel.—2 Korintionan 6:14-17.

Un kristian ta rekonosé tambe ku su desishon lo por tin efekto riba otro hende. Si bo disidí di bai, bo famianan lo sinti nan ofendí si bo no partisipá den tur e aktividatnan di e kasamentu? Tambe mester tene kuenta ku e desishon lo por tin efekto riba otro kristiannan. (Romanonan 14:13) Asta si abo òf otro miembronan di bo famia saka konklushon ku no ta un problema pa boso bai un kasamentu di hende ku no ta Testigu, ta bon pa puntra: Lo e por tin un efekto negativo riba bo rumannan kristian? E desishon lo por ofendé un di nan?

Seremonianan di kasamentu di famianan ku no ta Testigu por kousa situashonnan difísil. Kiko si nan puntra bo pa sirbi e kasamentu? Òf kiko si bo kasá no ta un Testigu i ke partisipá den tur e aktividatnan? Si un hues òf un ámtenar di gobièrnu kasa e pareha den un seremonia sivil, esei ta nifiká ku lo bo ta presensiando djis un prosedura legal.

Di otro banda, si un seremonia di kasamentu tuma lugá den un edifisio religioso òf si un klero kasa e pareha, esei por kousa preokupashonnan adishonal. Pa bo por sigui bo konsenshi bíblikamente entrená i pa evitá di aktua nèt kontrali ku bo konvikshonnan religioso òf di hasi algu ku ta kousa bèrgwensa pa e pareha i e famianan, lo bo por disidí di keda sin bai. (Proverbionan 22:3) Lo bo por evitá hopi tenshon tantu pa bo famia komo bo mes dor di splika di antemano kiko ta bo konvikshonnan basá riba Beibel, i te na ki grado bo ta dispuesto pa partisipá òf kisas sugerí un alternativa.

Despues di evaluá tur e faktornan, algun kristian kisas ta disidí ku lo no ta inapropiá pa bai simplemente komo opservadó na un kasamentu di un pareha ku no ta Testigu. Pero un kristian por sinti ku si e bai lo e por hañ’é ta aktua kontrali ku e prinsipionan di Dios, lo e por konkluí ku e ta pèrdè mas ku e ta gana. Si e disidí di no bai e seremonia religioso pero ku e ta bai e fiesta komo un invitado, e mester ta determiná pa “hasi tur [kos] pa e gloria di Dios.” (1 Korintionan 10:31) Ora di tuma desishonnan asina, “kada un lo karga su mes karga.” (Galationan 6:5) P’esei sea kual sea ta bo desishon, kòrda ku ta hopi importante pa keda ku un bon konsenshi dilanti di Yehova Dios.

[Nota]