Fesili Mai le ʻAufaitau

Pe e talafeagai i se Molimau a Ieova ona auai i se faaipoipoga a sana tauaiga po o sana uō e lē o se Molimau a Ieova?

O se aso e olioli ai le aso o le faaipoipoga, ma o le tulaga masani e manaʻo se Kerisiano e auai i lenā aso fiafia. E mautinoa lava, pe a valaaulia ni talavou, e manaʻomia ona fesili atu i o latou mātua po o ē o loo vaavaaia i latou e faia le faaiʻuga mo i latou. (Efeso 6:1-3) Ae faapefea pe a manaʻo se tane e lē o se Molimau a Ieova e ō ma lana avā Kerisiano i se faaipoipoga e faia i le lotu? Atonu e faataga e lona lotofuatiaifo e na te auai e aunoa ma lona faia o ni gaoioiga faalelotu e fesootaʻi atu i le faaipoipoga.

O le mea moni, o le filifiliga lea a le tagata lava ia pe afai e auai atu i se faaipoipoga. Peitaʻi, e tatau i Kerisiano ona iloa latou te tali atu iā Ieova, ma e ao ona utagia taʻiala o le Tusi Paia pe a faia se faaiʻuga e auai i se faaipoipoga a sē e lē o se Molimau a Ieova.

O le mea e tatau ona tāmau i le mafaufau o se Kerisiano, o le faanaunauga e maua le finagalo malie o le Atua. Na faapea mai Iesu: “O le Atua o le agaga lava ia, o ē tapuaʻi iā te ia, e tatau ona tapuaʻi atu ai i le agaga ma le faamaoni.” (Ioane 4:24) O lea, e lē auai Molimau a Ieova i faiga a lotu tuufaatasi, e pei o tatalo, faiga masani a lotu, po o ni sauniga e feteenaʻi ma upu moni o le Tusi Paia.—2 Korinito 6:14-17.

O loo amanaʻia foʻi e se Kerisiano e mafai ona aafia isi i lana faaiʻuga e fai. Pe afai e te filifili e auai, po o le a afāina faalogona o ou tauaiga pe a e lē auai i vala uma o le faaipoipoga? E tatau foʻi ona nofouta i aafiaga i o tatou uso talitonu. (Roma 14:13) Atonu e te faia le faaiʻuga e auai atu ma isi o la outou aiga i se faaipoipoga e lē o se Molimau a Ieova ma faapea mai, o le a leai se afāina o lenei mea. Pe faamata e afāina ai ou uso ma tuafafine faaleagaga? Pe e ono afāina le lotofuatiaifo o se isi?

E ono iai ni tulaga faigatā i sauniga o faaipoipoga e aafia ai ni tauaiga e lē o ni Molimau a Ieova. Ae faapefea pe a talosagaina oe e auai i le laina o le faaipoipoga? Po o le faapea o lau paaga e lē o se Molimau a Ieova ma o loo ia manaʻo e auaʻi i vala uma? Pe afai e fai se faaipoipoga faalemalo e se faamasino po o se tagata o le ofisa, atonu o le auai atu i ai ua na o le molimauina o se faiga faaletulafono.

Peitaʻi, e iai nisi popolega pe a faia le sauniga o le faaipoipoga i se falesā, pe fai foʻi e se faifeʻau. Atonu o le a e filifili e te lē auai ina ia usiusitai i lou lotofuatiaifo ua aʻoaʻoina i le Tusi Paia ma ina neʻi lē faaleagaina ou lava talitonuga, po o le faia o se mea e ono faalumaina ai lē ona le faaipoipoga. (Faataoto 22:3) E mafai ona ʻalofia faafitauli i lou aiga ma oe lava e ala i le muaʻi faamalamalama atu o ou talitonuga faale-Tusi Paia, e faailoa atu vala e mafai ona e auai ai, po o se isi auala e te ono fesoasoani atu ai.

A māeʻa ona iloiloina vala uma, atonu o le a filifili nisi Kerisiano e leai se afāina pe a auai i se faaipoipoga a sē e lē o se Molimau a Ieova, ma e aunoa ma le faatinoina o ni faiga faalelotu. Ae a faapea mai se Kerisiano, e ono faaosoosoina ai o ia e lafoaʻia ona talitonuga i le Atua pe a ia auai atu, atonu o le a ia faia se faaiʻuga e tele atu ni ona lamatiaga na i lo aogā e maua mai ai. Afai na te lē auai i le sauniga o le faaipoipoga ae o se tagata valaaulia o le ʻaiga, e tatau ona “faia mea uma lava ia viia ai le Atua.” (1 Korinito 10:31) O le faia o lea faaiʻuga, o le a “taʻitasi ma ave i lana lava avega” o tiute tauave. (Kalatia 6:5) Po o le ā lava lau filifiliga e fai, ia e manatua le matuā tāua o se lotofuatiaifo lelei i luma o Ieova le Atua.