Jehova Thu Chu A Nung

Hagaia leh Zakaria Bu Aṭanga Thu Pawimawh Hrilhfiahna

A HUN chu B.C.E 520 a ni a. Babulon sal tânna aṭanga chhuak Judate’n Jerusalema Jehova biak in lungphûm an phûmna pawh kum sâwm leh kum ruk lai a liam tawh a ni. Mahse, biak in chu sak zawh a la ni lo va, in sak hna chu khapbeh a ni bawk. Jehova chuan zâwlnei Hagaia leh thla hnih a ral hnuah chuan zâwlnei Zakaria chu A thu sawi chhuak tûrin a ruat ta a.

Hagaia leh Zakaria chuan thil tum thuhmun an nei: Chu chu mipuite biak in sakna chhunzawm tûra tihphûr hi a ni. Hêng zâwlneite thawh rimna hi a hlawhtling a, a hnu kum ngaah biak in chu sak zawh a ni ta. Hagaia leh Zakaria thu puan chhuah chu an hming chawi Bible bu-ah hian chhinchhiah a ni. Hagaia leh Zakaria lehkhabute chu B.C.E. 520 leh B.C.E. 518 khân ziah zawh a ni a. Chûng zâwlneite ang bawk chuan keini pawhin Pathian pêk hna thawh tûr kan nei a, chu chu khawvêl tâwp hmaa thawh zawh tûr a ni. Chu chu Lalram thu hrilh leh zirtîr siamna hna a ni. Hagaia leh Zakaria lehkha bu aṭanga fuihna kan hmuh theihte chu i lo en ang u.

“IN KAWNGTE CHU CHHUT NGUN RAWH U”

(Hagaia 1:1–2:⁠23)

Ni 112 chhûngin, Hagaia chuan thuchah mi chêttîr thei tak pali a sawi a. A pakhatna chu: “In kawngte chu chhût ngun rawh u. Tlângah kal chho ula, thing han la ula, in chu sa rawh u, chu chu ka lâwm ang a, chawimawiin ka awm ang, LALPAN a ti,” tih chu a ni. (Hagaia 1:​7, 8) Mipuite chuan chu thupêk chu an zâwm a ni. Thuchah pahnihna chu: “He in hi ropuinain ka tikhat ang,” tih Jehova thusawi hi a ni.​—⁠Hagaia 2:⁠7.

Thuchah pathumna chuan biak in sak ṭhat leh an ngaihthahnain ‘mite leh an kut chhuak tinrêng’ chu Jehova hmaah thil bawlhhlawh a nihtîr thu a sawi. Amaherawhchu, biak in sak ṭhat hna an ṭan nî aṭangin Jehova chuan anni chu “mal a sâwm ang” tih a sawi bawk. Thuchah palinain a sawi angin, Jehova chuan ‘hnamte ram chakna chu a tichhia ang a,’ Ram Awptu Zerubabela chu ‘hming nemna zungbunah’ a siam ang tih a sawi a ni.​—⁠Hagaia 2:​14, 19, 21, 23.

 Bible Chungchânga Zawhnate Chhânna:

1:6​—⁠“In in a, in kham si lo,” tih chu eng tihna nge ni? Hei hi uain vânzia sawina mai a ni. Jehova malsâwmna a awm loh avângin, uain chu a tlêm a​—⁠kham khawp in tûr pawh a awm lo tih a chiang hle.

2:​6, 7, 21, 22​—⁠Tihnghînna chu tuin nge, a nih loh leh engin nge awmtîr a, chu chuan eng nge a rah chhuah? Jehova chuan khawvêl pum puia Lalram thu hrilhna hmangin ‘hnam tinrêng a tinghîng’ a. Thu hrilhna pawh chuan “hnam tinrênga thil duhzâwngte” Jehova ina rawn hruai lûtin, chu in chu ropuinain a tikhat bawk a ni. A hun takah “sipaihote LALPA” chuan “vân te leh lei te leh tuifinriat te leh khawmualte” a tinghîng dâwn a ni.​—⁠Hebrai 12:​26, 27.

2:9​—⁠Eng kawngin nge ‘he in ropuina hnuhnûng zâwk hi a hmasa ai khân a nasat zâwk’ ang? Chu chu kawng thum talin a nasa zâwk a ni: biak in chu a ding rei zâwk a, chuta zirtîrtu chu a ropui zâwk a; tin, chu mi hmuna Jehova be tûra lo kal khâwm an tam zâwk bawk. Solomona biak in ropui tak chu B.C.E. 1027 aṭanga B.C.E. 607 thleng, kum 420 lai ding mah se, ‘in hnuhnûng zâwk’ B.C.E. 515-a sak zawh chu C.E. 70-a tihchhiat a nih thleng, kum 580 aia tam a ding a ni. Chu bâkah, Messia​—⁠Isua Krista​—⁠ngei chuan ‘in hnuhnûng’ zâwkah a zirtîr a, ‘a hmasa zâwk’ ai khân Pathian be tûrin mi tam zâwkte an lo kal khâwm a ni.​—⁠Tirhkohte 2:​1-11.

Kan Zir Tûrte:

1:​2-4. Kan thu hrilhnaa dodâlna kan tawhna chuan Pathian ‘ram kan zawn hmasakna’ ata mahni ham ṭhatna tûr min zawn hmasaktîr tûr a ni lo.​—⁠Matthaia 6:⁠33.

1:​5, 7. Kan tân chuan ‘kan kawngte kan chhût ngun’ a, kan nuna kan thiltihin Pathian nêna kan inlaichînna a nghawng dân ngaihtuah chu a finthlâk a ni.

1:​6, 9-11; 2:​14-17. Hagaia hun laia Judate chuan mahni tân hna an thawk rim hle a; mahse, an thawh hah rah chu an seng lo. Biak in an ngaihthah avângin, Pathian malsâwmna an dawng lo a ni. Kan hausa emaw rethei emaw pawh ni se, ‘LALPA malsâwmna chuan mi a tihhausa ṭhîn’ tih hre rengin, thlarau lam thilte chu kan dah pawimawh ber ang a, thinlung tak zetin Pathian rawng chu kan bâwl tûr a ni.​—⁠Thufingte 10:⁠22.

‘THILTIHTHEIHNA NI LOVIN, KA THLARAU ZAWKIN’

(Zakaria 1:1–14:⁠21)

Zakaria chuan a hrilh lâwkna chu ‘Jehova hnêna kîr leh tûra’ Judate sâwmnain a ṭan a. (Zakaria 1:⁠3) Chu mi hnua inlârna pariatte chuan biak in sak ṭhat lehnaa Pathian ṭanpuina a tiam a ni. (“Zakaria Hmuh Entîrnei Inlârna Pariatte” tih bâwm chu en rawh.) In sakna hna chu ‘chakna ni lovin, thiltihtheihna ni hek lovin, [Jehova] thlarau zâwkin’ thawh zawh a ni ang. (Zakaria 4:⁠6) Mi a hming Chawr No chuan “LALPA biak in chu a rawn sa ang,” tichuan, “a lalṭhutthlêngah chuan puithiam a ni ang.”​—⁠Zakaria 6:​12, 13.

Bethel chuan puithiam hnêna Jerusalem chhiat hriatrengna chaw ngheia hman dân tûr zâwt tûrin mi a tîr a. Jehova chuan Jerusalem chunga chhiatna thleng hriatreng nâna vawi li chaw ngheia sûnna chu “hlimna leh lâwmna, ruai hlimawm” takah a chang ang tih Zakaria a hrilh a ni. (Zakaria 7:​2, 3; 8:19) Chu mi hnua thu puanchhuah pahnihah chuan hnamte leh zâwlnei derte chunga rorêlna te, Messia hrilh lâwkna te, leh Pathian mite dinthar lehna thute a tel a ni.​—⁠Zakaria 9:1; 12:⁠1.

Bible Chungchânga Zawhnate Chhânna:

2:1​—⁠Engvângin nge mi pakhat chuan a tehna kena Jerusalem chu a teh? He a thiltih hian khawpui hualtu inhumhimna kulh bang sak chungchâng a sawina a ni thei ang. Vântirhkoh chuan chu pa hnênah chuan Jerusalem chu tihzauh a nih tûr leh Jehova’n a  vênhim tûr thu a hriattîr a ni.​—⁠Zakaria 2:​3-5.

6:​11-13​—⁠Puithiam Lal Josua chu lallukhum khumtîrna chuan ani chu lal leh puithiamah a siam em? Siam lo, Josua chu Davida thlah, lal thlaha mi a ni lo. Mahse, lallukhum khumtîr a nihna chuan ani chu Messia nihna entîrtu a nihtîr a ni. (Hebrai 6:20) “Chawr no” chungchâng hrilh lâwkna chu vân lam Lal leh Puithiam, Isua Kristaah a thleng famkim a. (Jeremia 23:⁠5) Josua chuan Juda kîr lehte tâna biak in sak ṭhatah puithiam lal anga rawng a bâwl angin, Isua chu Jehova thlarau lam biak ina biakna dik atâna Puithiam Lal a ni.

8:​1-23​—⁠Hêng Bible chânga awm thu puanchhuahna sâwmte chu eng hunah nge a thlen famkim? Thu puanchhuahna apiang chu Pathianin a mite tâna remna a tiamna a ni a, “sipaihote LALPA chuan heti hian a ti,” tih hian a hmakhalh ṭhîn a ni. Hêng thu puanchhuah zînga ṭhenkhat chu B.C.E. kum zabi ruknaah a thleng famkim a; mahse, thu puanchhuah zawng zawng chu C.E. 1919 aṭangin a thleng famkim tawh emaw, a thleng famkim mêk emaw a ni. *

8:3​—⁠Engvângin nge Jerusalem chu “thudik khawpui” tia koh a nih? Jerusalem chu B.C.E. 607-a tihchhiat a nih hma khân, “hnehchhiah hmang khawpui,” zâwlnei leh puithiam derte leh mi rinawm lote awm khâwmna a ni a. (Zephania 3:1; Jeremia 6:13; 7:​29-34) Amaherawhchu, biak in sak ṭhat a han nih a, mite’n Jehova biak an tum tlat tâkah chuan biakna thianghlim thu dik chu chu mi hmunah chuan sawi chhuah a ni tawh ang a, Jerusalem chu “thudik khawpui” tia koh a lo ni ang.

11:​7-14​—⁠Zakaria’n “Duhsak” tih leh “Pumkhatna” tia koh tiangte a tan bunna chuan eng nge a entîr? Zakaria chu “ran rual thah tûr ang mi te . . . enkawl” tûra tirhchhuah ang chu a ni a, anni chu hruaitute’n an tihkhaw loh berâm ang mite an ni. Berâm vêngtu lema Zakaria channa chuan Isua Krista, Pathian thuthlunpuite hnêna tirh leh an lo hnâwl tâka chu a entîr a ni. “Duhsak” tia koh tiang tan bunna chuan Pathianin Judate nêna Dân thuthlunga an indâwrna chu a titâwp ang a, anni chu a duhsak tawh lo vang tih a entîr a. “Pumkhatna” tia koh tiang a tan chhumna chu Jehova an biakna avânga Juda leh Israelte inkâra inunauna awm chu tihchhiat a ni tawh tihna a ni.

12:11​—⁠Eng nge “Megido ruama Hadadrimmon hmuna sûnna” chu? Judai Lal Josia chu Aigupta mi Pharoa-Neko nêna “Megido ruama” an indonaah thah a ni a, a thihna chu kum tam tak chhûng ‘sûn’ a ni. (2 Chronicles 35:25) Chuvângin, “Hadadrimmon hmuna sûnna” tih chu Josia thihna sûnna chungchâng sawina a ni thei ang.

Kan Zir Tûrte:

1:​2-6; 7:​11-14. Jehova chuan inchhîr tak chunga zilhna pawmtute leh thinlung zawng zawnga amah biaa a hnêna kîr lehte chu a lâwm a, a pawm leh a ni. Kawng lehlamah chuan, a thuchah ‘ngaithla duh lova, an tukhum chhah chhawntu leh an hriat loh nâna an beng chhu chhêttute’ dîlna chu a ngaihsak lo.

 4:​6, 7. Biak in sakna hna hlawhtling taka zawh a nih loh nâna Jehova thlarau dang thei tûr harsatna a awm thei lo. Pathian rawng kan bâwlnaa harsatna kan tawh apiang chu Jehova laka rinna lantîrna hmangin kan hneh thei a ni.​—⁠Matthaia 17:⁠20.

4:10. Ngun taka Jehova endikna hnuaiah Zerubabela leh a mite chuan Pathian tehna sâng takte milin biak in sak hna chu an thawk zo va. Jehova beisei anga nun hi mi ṭha famkim lote tân thil harsa lutuk a ni lo.

7:​8-10; 8:​16, 17. Jehova duhsakna dawng tûr chuan, rorêl dikna, zahngaihna, leh khawngaihna kan lantîrin, thudik tak kan inhrilh tawn ṭheuh tûr a ni.

8:​9-13. Jehova chuan a hna thawh tûr min pêkte thawk tûra ‘kan kutte a khauh’ hian mal sâwmnain min vûr ṭhîn. Hêng malsâwmnaahte hian remna te, muanna te, leh thlarau lama hmasâwnna te a tel a ni.

12:⁠6. Jehova mite zînga hotu dinhmun chelhtute chu ‘meichher ang’ an ni tûr a ni​—⁠chu chu nasa takin ṭhahnem an ngai tûr a ni tihna a ni.

13:⁠3. Mihring tute pawh ni sela, eng ang pawhin inchhûngkhat mah ila, anni ai chuan Pathian dik leh a inawpna pâwl lakah chuan kan rinawm zâwk tûr a ni.

13:​8, 9. Jehova hnâwl kalpêngte chu an tam tham hle a, ram hmun thuma ṭhena hmun hnih lai an ni. Hmun thuma ṭhena hmun khat chauh chu meia tihthianghlim a ni a. Kan hun laia Kristiana inchhâl Kristianna ram chu Jehova’n a hnâwl a ni. Hriak thih Kristian tlêm tê chauh chuan ‘Jehova hming an lam a,’ chu tihthianghlimnaah chuan an intulût a ni. Anni leh an rinpuite chu a hming maia Jehova Thuhretute an ni lo.

Ṭhahnemngai Taka Thawk Tûra Chêttîr

Hagaia leh Zakaria thu puanchhuah chuan engtin nge tûn laiah min nghawng? An thuchah kenin biak in sa ṭha leh tûra Judate a chawh thawh dân kan ngaihtuah hian, chu chuan Lalram thu hrilhna leh zirtîr siamnaa ṭhahnemngai tûrin min chêttîr nasa hle a ni lâwm ni?

Zakaria chuan Messia chu ‘sabengtung chunga chuanga’ lo kal a, ‘chêng sawmthuma’ phatsan a, vuak a nih tûr thu leh “berâm rual an darh” tûr thu a sawi lâwk a. (Zakaria 9:9; 11:12; 13:⁠7) Chutiang chi Messia chungchâng Zakaria hrilh lâwkna thlen famkimna ngun taka ngaihtuahna chuan kan rinna a va tichak tak êm! (Matthaia 21:​1-9; 26:​31, 56; 27:​3-10) Chu chuan Jehova Thu leh chhandam kan nih nâna ruahmanna min pêk kan rinna chu a tinghet lehzual a ni.​—⁠Hebrai 4:12. (w07 12/1)

[Footnote]

[Phêk 15-naa bâwm]

Zakaria Hmuh Entirnei Inlarna Pariatte

1:​8-17: Biak in sak zawh a nih tûr leh Jerusalem leh Judai rama khawpui dangte malsâwm a nih tûr thu a nemnghet a ni.

1:​18-21: ‘Juda tidarhtu ki pali’ tâwpna, Jehova biakna dodâltu sawrkâr zawng zawngte tâwpna chu a tiam a ni.

2:​1-13: Jerusalem zauh a nih tûr thu leh Jehova chu a ‘vêla mei kulh’​—⁠vênhimna​—⁠a nih tûr thu a târ lang.

3:​1-10: Biak in sakna dodâlnaah chuan Setana a tel a, Puithiam Lalber Josua chu chhan chhuah leh a khawlohnate lâk bosak a ni tih a târ lang.

4:​1-14: Tlâng lian ang maia sawi theih harsatnate chu sut kian a ni ang a, Ram Awptu Zerubabela chuan biak in chu a sa zo vang tih a tiam.

5:​1-4: Thil sual titute ânchhe lawh thu puan chhuah a ni.

5:​5-11: Suahsualna tâwpna thu a hrilh lâwk.

6:​1-8: Vântirhkohte enkawlna leh vênhimna a tiam.

[Phêk 12-naa milem]

Hagaia leh Zakaria thuchah kente’n a tum ber chu eng nge ni?

[Phêk 14-naa milem]

Engtin nge hotute chu “meichher ang” an nih?