Malwihu Kufuma Kudi Antañi

Indi mwiniKristu watela kumona ñahi kuta anshi nikuzomba?

Bayibolu hiyakaanisha kuta anshi hela kuzombaku. (Kuhituluka 14:4, 5, 9, 20; Matewu 17:27; Yowanu 21:6) Hela chochu, eniKristu ataña anshi hela azombaña atela kutoñojoka hanshimbi jajivulu jamuNsona.

Nzambi wamwitejeli Nowa niankakulula jindi kujaha nikudya anyama, neyi chakwila ayiketula hanshiñu nakuvwisha mashi henohu kanda adyi mbiji. (Kutachika 9:3, 4) Iyi nshimbi yakonkomweneni nawu wumi wakanyama atela kuwulemesha muloña wafuma kudi Nzambi. Dichi eniKristu hiyajahaña atunyama hamuloña wakuhema hela chisekiku, chakadi luwi nikubula kulemesha wumiku.—Yishimu 12:10.

Twatela cheñi kushinshika hanjila yikwawu yinabombelumu yililu yetu. Chakubula kujinooka apostolu adiña ayibinda anshi atiyileña kuwaha kukwata inshi yayivulu. Hela chochu, kwosi chinjikijilu chamwekesha nawu adiña nakudisamba hamuloña wakwiluka kukwata inshi hela kuzomba, hela nawu ayili nakukwata anshi hela kuzomba kulonda kudibecha nawakwawu nakumwekesha nawu hiyamayala ashikahuku. Nawa kwosi chamwekeshaña nawu atiyileña kuwaha kudibecha hela kuzuña hela kujaha anyamaku.—Masamu 11:5; Aŋalija 5:26.

Dichi twatela kudihula netu: ‘Komana nekala nachakutalilahu chachiwahi chakulemesha wumi neyi chawimonañayi Yehova? Komana nakuminaña dakutoñojoka nikuhosha hakuta anshi nikuzomba? Komana nshakaminu yami yamwekeshaña nawu nakeñesha kuzomba, kukwata, kujaha anyama hela inshi, indi yamwekeshaña nawu nidi mukwakukalakala waNzambi? Komana kuzomba hela kukwata anshi kwankojejaña kudikunda nawantu abula kwitiya hela kwanleñelaña kudiwula chisaka chami?’—Luka 6:45.

Antu azombaña hela akwataña anshi kulonda kuwaninamu yakudya anateli kudiyiñisha nakudiwula nyidimu yakuspiritu hampinji yakuzomba hela yakukwata anshi. Hela chochu, twamwekeshaña nawu twamukuhwelela Nzambi neyi tubula kwiteja chuma chidi chejima chikañeshi nyidimu yindi. (Matewu 6:33) Cheñi nawa eniKristu ovwahilaña nshimbi jejima ‘jaKesari’ kutalisha hakuzomba hela kukwata anshi, chili nfulumendi yakolesha nshimbi hela nehi.—Matewu 22:21; Aroma 13:1.

Hakwikala nammwenu yoyimu naYehova kutalisha hakuzomba hela kukwata inshi, antu amakwawu atela kuhimpa yitoñojoka yawu kutalisha hanshimbi jindi. (Aefwesesa 4:22-24) Hampinji yoyimu, twatela kulemesha kufuukula kwakashinshi kwawantu amakwawu. Kapostolu Pawulu wahanini kufumba kwakuwahi haniyi nsañu nindi: “Bayi tusompeshaña akwetu nawa cheñuku. Chakala tubabalenu tubuli kushila mana kwetu chuma chakudimbukila hela chakuhukena munjila yindi.” (Aroma 14:13) Kumwekesha kalemesha kamuchidiwu nikukeña kwakadi lwisu kwaletaña kuwunda muchipompelu nawa kwamuzañaleshaña Nleñi yetu, Nsulu yawumi wejima.—1 Akorinda 8:13. *

[Tumazu twaheshina]