Karemdbã sogsgo

Wãn to la kiris-ned segd n ges we-rũmsã kʋʋbo, la zĩmã yõgbo?

Biiblã pa gɩdg we-rũmsã kʋʋb bɩ zĩmã yõgb ye. (Tõodo 14:4, 5, 9, 20; Matɩe 17:27; Zã 21:6) La kiris-neb nins sẽn maand woto wã segd n tũu Biiblã noy kẽere.

Wẽnnaam kõo a Nowe ne a kambã la a yagensã sor tɩ b kʋʋd rũmsã n wãbdẽ. La nand tɩ b wãbe, b segd n kodgd-b lame. (Sɩngre 9:3, 4) No-kãngã ra wilgda vẽeneg tɩ yaa Wẽnnaam n naan rũmsã, la tɩ b vɩɩmã tara yõodo. Woto yĩnga, kiris-nebã pa kʋʋd rũmsã n wilgd b nug noom bɩ reem yĩng bal n pa zoet b nimbãanega, wall b get tɩ b pa tar yõod ye.—Yelbũna 12:10.

Zĩig a to me la d segd n tall manesem sẽn yaa sõma. A Zezi tʋm-tʋmdb nins sẽn da yaa zĩm-yõgdbã sã n da paam zĩm wʋsg n yõg daare, b sũur da yaa noogo. La bũmb pa wilgd tɩ b ra wukda b mens b sẽn da tar minim zĩmã yõgb pʋgẽ wã ye. Kaset ka be me n wilgdẽ tɩ b ra yõgda zĩmã la b kʋʋd we-rũms n na n wags taaba, bɩ n wilg b raood ye. B sã n da maandẽ me, pa rigbã la kʋʋbã noom yĩng ye.—Yɩɩl Sõamyã 11:5; Galat rãmba 5:26.

Rẽnd d segd n soka d mens woto: ‘Rẽ yĩnga mam wilgdame tɩ m waoogda vɩɩmã wa a Zeova sẽn yeel tɩ d waoog-a to-to wã bɩ? Rẽ yĩnga we-rũmsã kʋʋb la zĩmã yõgb yell n pak maam, tɩ m gomd rẽ yell wakat fãa bɩ? Rẽ yĩnga mam vɩɩmã wilgdame tɩ we-rũmsã kʋʋb la zĩmã yõgb n noom maam n yɩɩd Wẽnnaam tʋʋmdã bɩ? Rẽ yĩnga we-rũmsã kʋʋb la zĩmã yõgb kɩtame tɩ m tar lagem-n-taar ne neb sẽn pa kiris-neb hakɩka, bɩ kɩtame tɩ m pa le get m zakã rãmb yell sõma?’—Luk 6:45.

Sẽn kʋʋd-b we-rũmsã la b yõgd zĩmã sẽn na yɩl n bao n kõ noorã sʋkã kẽer tõe n tagsdame tɩ b sã n bas tigissã kẽnd la koɛɛgã mooneg we-rũmsã kʋʋb la zĩmã yõgb sasa, pa wẽng ye. La yaa d sẽn na n lʋɩɩsd Wẽnnaam daabã maaneg taoor d vɩɩmã pʋgẽ la d wilgd tɩ d tara tẽeb la bas-yard ne-a. (Matɩe 6:33) Sẽn paase, kiris-nebã tũuda noy nins tẽngã taoor dãmb sẽn gãneg rũmsã kʋʋb la zĩmã yõgb wɛɛngẽ wã baa tɩ b pa modg-ba.—Matɩe 22:21; Rom dãmba 13:1.

Ne neb kẽere, sẽn na yɩl tɩ b sẽn kʋʋd rũmsã la b sẽn yõgd zĩmã to-to wã zems wa a Zeova sẽn datã, yaa tɩlae tɩ b rems b tagsa wã n tũ noy nins a sẽn kõtã. (Efɛɛz rãmba 4:22-24) La d pa segd n yeel tɩ yam-yãkr nins neb a taabã sẽn maandã pa sõma ye. Woto zemsa ne tʋm-tʋmd a Poll sẽn yeel bũmb ningã. A yeela woto: “Bɩ tõnd da leb n kao taab bʋʋd ye. La bɩ y paam yam kãngã, la y ra kɩt tɩ y ba-biig lʋɩ walla y maan bũmb sẽn wat ne a lʋɩɩs ye.” (Rom dãmba 14:13) D sã n nong nebã la d waoogd-ba, wata ne laafɩ tigingã pʋgẽ. Sẽn paas me tata a Zeova sẽn yaa d Naandã yam.—1 Korẽnt dãmba 8:13. *

[Tẽngr note]