Au Uianga a te Aronga Tatau

Akapeea tetai Kerititiano i te akamanakoanga i te arumaki manu e te tautai?

Kare te Pipiria e akaapa ana i te arumaki manu me kore te tautai. (Deuteronomi 14:4, 5, 9, 20; Mataio 17:27; Ioane 21:6) Inara, ka anoanoia te au Kerititiano e arumaki manu ana me kore e tautai ana kia akamanako i te au kaveinga Tuatua Tapu e manganui.

Kua akatika te Atua ia Noa e tana uanga kia ta e kia kai i te au animara, inara kia akatae ratou i te toto o te au animara i mua ake i te kai anga i te reira. (Genese 9:3, 4) Te akaketaketa maira teia akauenga e kia akangateiteiia te oraanga animara no te mea na te Atua i anga mai i te reira. No reira, kare te au Kerititiano e ta ua ana i te au animara ei tamataoraanga me kore ei tarekarekaanga ma te tu manako akangateitei kore no te oraanga.​—Maseli 12:10.

Kia akamanako katoa tatou i tetai tuanga akaou te o maira to tatou tu akamanakoanga. I te akaraanga e mataora ana te au apotetoro e e aronga tautai ratou, me rauka maata mai ta ratou ika. Inara, kare oki e akakiteanga e kua akatietie ratou i to ratou tu kite karape i te tautai me kore i te arumaki manu me kore ra kua aere ratou i te tautai me kore i te arumaki manu ei taemoemo anga ki etai ke, i te akapapuanga i to ratou tu tangata pakari, me kore kia rauka te mataora i te arumakianga, te taanga, me kore te tamateanga.​—Salamo 11:5; Galatia 5:26.

No reira, penei ka ui tatou kia tatou uaorai e: ‘E akaraanga meitaki ainei au i te akaarianga i te akangateitei no to Iehova manako no runga i te oraanga? E maata atu ainei toku manako e taku pukapukaanga ki runga i te arumaki manu e te tautai? Te akaata ra ainei toku tu oraanga i te peu arumaki manu ei mea mataora anga, me te akaari maira te reira e e orometua au no te Atua? Te akapiri vaitata atura ainei te arumaki manu me kore te tautai iaku ki te au taeake irinaki kore me kore te akakeu ra teia iaku kia kopae i toku pamiri?’​—Luka 6:45

Tetai aronga e arumaki manu ana me kore e tautai ana ei kai na ratou, e kotoe ana e te meitaki ua ra i te akatau i te au angaanga Kerititiano i te au tuatau o te arumaki manu e te tautai. Inara, te akaari ra tatou i te akarongo e te irinaki ki roto i te Atua me kore tatou e tuku i tetai apinga ei mea puapinga rava atu i rungao i tona au inangaro. (Mataio 6:33) Pera katoa, e aru ana te au Kerititiano i te au ture katoatoa a “Kaisara” no runga i te arumaki manu e te tautai, noatu me ka maro mai te mana akaaere i te reira me kare.​—Mataio 22:21; Roma 13:1.

Kia aru i ta Iehova akamanakoanga no te arumaki manu e te tautai, penei ka anoanoia tetai pae kia akatanotano i to ratou manako no runga i tona au turanga. (Ephesia 4:22-24) I tetai tua ra, ka anoanoia tatou kia akangateitei i te au ikianga akava ngakau o etai ke. No runga i teia turanga, te tau ra te akoanga a te apotetoro ko Paulo e: “Oti ra ua tatou i te akaapa tetai ki tetai: teia ra ta tatou e akono e, auraka ei turorianga e tukuia mai ki mua i tetai taeake.” (Roma 14:13) I te akaarianga i te aroa karapii kore e te akangateitei, te akamaroiroi ra i te au i roto i te putuputuanga e te akamareka ra i Tei Anga mai ia tatou, te Tumu o te au ora katoatoa.​—1 Korinetia 8:13. *

[Tataanga Rikiriki i Raro]