Mibuzyo Yabasikubala

Mbuti Munakristo mbwayelede kwaalanga makani aakuvwima akuzuba nswi?

Ibbaibbele talikasyi kuvwima naa kuzuba nswi. (Deuteronomo 14:4, 5, 9, 20; Matayo 17:27; Johane 21:6) Nokuba boobo, aabo Banakristo bajisi mulimo wakuvwima naa wakuzuba nswi beelede kulanga-langa njiisyo zili mbozibede zijanika mu Magwalo.

Leza wakazumizya Nowa aluzubo lwakwe kujaya akulya banyama, pele bakeelede kugwisya bulowa kabatanalya. (Matalikilo 9:3, 4) Mulawo ooyu wakali kutondezya kuti buumi bwabanyama bweelede kulemekwa akaambo kakuti bwakazwa kuli Leza. Aboobo, Banakristo tabajayi banyama kutegwa basobanye naa kulikondelezya nokuba kujaila lunya.—Tusimpi 12:10.

Kuli acimbi ceelede kulangwa-langwa kujatikizya mbuli mbotweelede kuzilanga zintu. Baapostolo bakali kuzuba nswi alimwi kweelede kuti bakali kukkomana nobakali kujaya nswi zinji. Nokuba boobo, taakwe citondezya kuti bakali kulitukumuna akaambo kabusongo bwabo bwakuzuba nswi naa bwakuvwima alimwi taakwe nobakali kuzundana abamwi kutegwa babone ucibwene kumutwe kukujaya nswi naa kuvwima, naa kunonezyegwa buyo ambobakali kwaalabana banyama.—Intembauzyo 11:5; Ba-Galatiya 5:26.

Aboobo, tulakonzya kulibuzya kuti: ‘Sena ndipa cikozyanyo cibotu kwiinda mukulanga buumi mbuli mbwabulanga Jehova? Sena makani aakuzuba nswi naa aakuvwima ngondiyeeya kapati akukanana bunji bwaziindi? Sena buumi mbondipona butondezya kuti ndimuntu uuyandisya kuvwima naa kuzuba nswi naa butondezya kuti ndimubelesi wa Leza? Sena kuzuba nswi naa kuvwima kundipa kuyanzana abantu batasyomi naa kundipa kutabikkila maano kumukwasyi wangu?’—Luka 6:45.

Basikuzuba nswi abasikuvwima bamwi babikka milimo ya Bunakristo ambali ciindi mfwulumende noizumizya kuzuba nswi naa kujaya banyama. Nokuba boobo, kwiinda mukutazumizya cintu cili coonse kunjila abusena bwazintu zyakumuuya, tutondezya kuti tusyoma Leza. (Matayo 6:33) Kunze lyaboobo, Banakristo beelede kutobela milawo yoonse ya “Kaisara” iijatikizya kuvwima akuzuba nswi, kufwumbwa naa mfwulumende ilibabwene naa pe.—Matayo 22:21; Ba-Roma 13:1.

Kutegwa kuyeeya kwabo kweendelane ambwakubona Jehova kuvwima aakuzuba nswi, ibamwi bayandika kucinca mbobayeeya kujatikizya zyeelelo zyakwe. (Ba-Efeso 4:22-24) Alimwi tweelede kulemeka kusala kwabamwi. Mwaapostolo Paulo wakapa lulayo lweelede mumakani aaya naakati: “Tutabetekani limbi, pele amulibetekele aya, aakuti mutabiki cifumpuzyo niciba cilebyo munzila yamunyoko.” (Ba-Roma 14:13) Kuba aluyando lwini-lwini luli boobo abulemu kupa kuti kube luumuno mumbungano alimwi kukkomanisya Mulengi wesu, kasensa kabuumi.—1 Ba-Korinto 8:13. *

Bupanduluzi buyungizidwe