Pagmalasakit sa Sarong Maringis na Kinaban

AN SARONG lalaki sa Burundi nagkaigwa nin grabeng helang na malaria. Kaipuhan nang marhay na darahon sia sa ospital. Alagad paano? Mayo nin autong madara sa saiya sa ospital. Tinabangan sia kan duwa sa saiyang dayupot na mga amigo. Ilinunad sia ninda sa sarong bisikleta asin pagal-pagal sinda sa pagtulod sa saiya sa laog nin limang oras sa mabukid na lugar. Pinalunad ninda sia sa sarong bus na nagdara sa saiya sa pinakaharaning ospital. Pakalihis nin pira sanang aldaw, mas marahay na nanggad an kamugtakan nia.

Sa ibong na parte kan kinaban, pagkatapos kan Bagyong Katrina, na nandestroso nin grabe sa mga lugar sa may Golpo kan Estados Unidos kan Agosto 2005, sarong grupo nin mga boluntaryo an nakanompong nin harong na nabagsakan nin mga kahoy. An mga boluntaryo, na biyong dai kamidbid kan kagsadiri kan harong, bilog na aldaw na nagtabang sa paghale nin natumbang mga kahoy asin basura paagi sa mga lagading de motor (chain saw). “Labi-labi an pasasalamat ko sa [mga tawong] ini,” an sabi kan kagsadiri.

An nakakabiglang mga bareta sa media may tendensiang idoon an mga karatan asin akto na nagpapaheling nin karingisan. An aroaldaw na mga gibo na nagpapaheling nin pagmalasakit asin kabootan parateng natatahoban kan mga baretang ini. Minsan siring, dai kaini binabago an katunayan na an mga tawo sa gabos na lugar nangangaipong marhay nin pagkamoot, kapadangatan, asin pakikidamay. Nagmamawot kita nin pagmalasakit! An siring na mga saboot tibaad mas lakop sa panahon nin Pasko, na an dakol nagtataram o nag-aawit manongod sa ‘katoninongan asin marahay na boot sa mga tawo.’—Lucas 2:14, King James Version.

 Tibaad bakong pasil an pagpaheling nin pagmalasakit sa sarong kinaban na garo baga an kadaklan daing pakiaram asin indiperente. An lakop na kaisipan iyo na an pagigin daing herak asin daing labot minagiya pasiring sa pag-asenso saka kapangganahan. Minalataw na dakol an namumuhay oyon sa kredo na nagsasabi na mas madonong an pagigin maringis kisa pagigin mapagmalasakit. An kahanaban asin sobrang pagpaimportante sa sadiri madali sanang nakakapugol sa pagpaheling nin pagmalasakit.

Bilang resulta, ineenot nin dakol an saindang sadiri, na dai ngani iniintindi an mga saboot o intereses kan ibang tawo. An mga lalaking bayani sa isport asin aling-alingan parateng ipinepresentar bilang “tunay na mga lalaki” (mga macho) na dai nagpapaheling nin maboot na kapadangatan. An nagkapirang politikal na namamahala minagawe man na kaagid kaiyan.

Kun siring, marahay na ihapot niato: Taano ta maninigo kitang magin maduminamay? An pagmalasakit daw sarong puersa para sa ikakarahay? Asin ano an makakatabang sa sato na magpaheling nin pagmalasakit? Totokaron kan sunod na artikulo an mga hapot na ini.

[Kahon sa pahina 3]

•Kaluyahan daw an pagpaheling nin pagmalasakit?

•May puersa daw an pagpaheling nin pagmalasakit?

•Sa anong praktikal na mga paagi na ikakapaheling nindo an pakikidamay?