Ukuba ne Nkumbu mu Calo Umwaba Abantu Abankalwe

UMWAUME umo mu Burundi alwala sana malaria. Alekabila ukumutwala ku cipatala mu kwangufyanya. Apo tapali motoka, bushe balamutwala shani ku cipatala? Abanankwe babili e bamwafwilisha. Bamubika pa ncinga no kuya balemukunkulusha pa maawala 5 ukutumbika impili, kabili banaka bafuma na kwi fupa. Bafika pa citesheni apo banina basi iyamutwala ku cipatala caba mupepi. Ilyo papita inshiku shinono, uyu mwaume atendeka ukumfwa bwino.

Mu August 2005, ku Amerika kwalicitike icikuuku ico beta ukuti Hurricane Katrina icaonawile incende iikalamba iyaba mupepi na cibemba. Abantu bamo abaleyafwilisha abali muli kalya kayofi basangile imiti naiwila pa ng’anda kabili yalyonaike icine cine. Balya bantu tabaishibene no mwine wa ng’anda, lelo bawishishe akasuba baleputaula imiti no kufumya fyonse ifyaonaike ku ng’anda. Umwine wa ng’anda atile: “Ala nshishibe ne fyo ningatasha aba [bantu].”

Pa milabasa batemwa fye ukulanda pa bunkalwe no tuyofi ificitika. Tabalanda sana pa fyo abantu baba ne nkumbu ne cililishi. Na lyo line, abantu ukuli konse fye balakabila icitemwishi ne cililishi. Tulafwaya sana abantu aba nkumbu! Abantu baba fye ne yi mibele pa nshita ya Krisimasi, ilyo abengi balanda nelyo ukwimba pa ‘mutende no kutemwana pa bantu.’—Luka 2:14, King James Version.

Limo limo cilafya ukuba ne nkumbu pantu abantu abengi mu calo baliifinya kabili  bankalwe. Abantu abengi bamona kwati nga baba abankalwe kabili abashibika amano ku fyo bambi bakabila e lyo ifintu fingabawamina. Cimoneka kwati abengi bakonka amashiwi ya kuti, cawamapo ukuba umunkalwe ukucila ukuba ne nkumbu. Ubufunushi na matutumuko e mibele iilenga abantu ukufilwa ukuba ne nkumbu.

Iyi mibele yalenga abantu abengi ukulacita fye ifingabawamina, tababika amano ku fyo bambi bakabila. Bakalapashi mu fyangalo fya kucimfyanya na mu fya kusekesha, aba lukaakala, abashaba na citemwishi, e bo ilingi line beta ukuti abaume bene bene. Na bakateka bamo na bo e fyo baba.

E ico kanshi, tufwile ukuyipusha atuti: Mulandu nshi tulingile ukubela ne cililishi? Bushe cisuma ukuba ne nkumbu? Finshi fingalenga ukuti tuleba ne nkumbu? Icipande cikonkelepo calayasuka aya mepusho.

[Akabokoshi pe bula 3]

•Bushe umuntu nga wa nkumbu ninshi aliba no bwafya?

•Bushe mwaliba ubusuma mu kuba ne nkumbu?

•Finshi mwingacita pa kulanga ukuti muli ba cililishi?