Nunrâwnna Khawvêla Khawngaihna

BURUNDI rama pa pakhat chu malaria-in nasa takin a nâ a. Damdawi ina hruai vat chu a ngai a ni. Mahse engtin nge ni ang? Motor a awm si lo. A ṭhian ṭha pahnihte chuan an rawn ṭanpui a. Anni chuan tlâng kawng hahthlâk takah thîrsakawra nawrin, dârkâr nga aia tam an kalpui a ni. Tichuan, bus-in damdawi in hnai ber an panpui ta a. Ni rei lo tê hnuah chuan, hmuh theih khawpin a lo ziaawm ta a ni.

Khawvêl hmun dang, United States-a Gulf hmun nuaichhe nektu August 2005-a Hurricane Katrina thlipui a tleh hnu chuan, mi tlâwmngaite chuan thingkûng tluin a delh chhiat in pakhat chu an hmu a. In neitu pawh hre miah lo mah se, chûng mi tlâwmngai takte chuan ni lêngin thingzainate nên thingtlu leh thil chhe dangte chu an thenfaisak a ni. In neitu chuan: “Hêng [mite] chungah hian ka lâwm êm êm a ni,” tiin a sawi.

Chanchin thehdarhna lamte chuan thil râpthlâkte leh nunrâwng taka thiltihte chu mi rilru khawih thei tûr zâwngin an tichhuak uar thiam hle a. Chuvângin, nî tina lantîr khawngaihna leh lainatna thiltihte chu a hliahkhuh fo a ni. Mahse, hei hian hmun tina mite’n hmangaihna te, ngainatna te, leh intawrhpuina te an mamawhna chu a thlâkthleng chuang lo. Khawngaihna kan va mamawh tak êm! Chutiang khawngaihna chu mi tam takin ‘mihringte hnênah rem thu leh duhsakna lêng rawh se’ tia an sawi emaw, hlaa an sak emaw hun Kristmas lai vêlah chuan a lâr zual thei a ni.​—⁠Lk. 2:​14, King James Version.

 Nêlawm lohna leh hawihhâwm lohnain a luah khah khawvêlah hian, khawngaihna lantîr chu a awlsam lo mai thei. Rilru put hmang lâr tak chu lainatna neih lohna leh intawrhpui lohna chuan hlawhtlinna leh hnehna a thlen tih hi a ni. Mi tam tak chu Niccolò Machiavelli thurin nia an sawi​—⁠khawngaihna neih ai chuan nunrâwn a finthlâk zâwk​—⁠tih milin an nung niin a lang. Duhâmna leh inngaihhlutna chuan khawngaihna kaltluang lai chu awlsam takin a dang thei a ni.

Chuvâng chuan, mi tam takin mi dangte rilru leh duhzâwng hnâwl ṭhak khawpin mahni an indah pawimawh a. Infiamna leh intihhlimna lama a changtupa berte chu “pa tak” (mi rothap tak) ngainatna lantîr lo anga târ lan an ni fo a ni. Politics lama rorêltu ṭhenkhat pawh chuan chutiang nungchang chu an nei bawk.

Chuvâng chuan: Engvângin nge mite kan tawrhpui ang? Khawngaihna chuan thil ṭha a thlen em? Tin, engin nge khawngaihna lantîr tûrin min ṭanpui ang? A dawta thuziak chuan hêng zawhnate hi a rawn sawi ang. (w07 12/15)

[Phêk 3-naa bâwm]

•Khawngaihna lantîr chu chak lohna a ni em?

•Khawngaihna lantîrtu chuan thil ṭha a thlen em?

•Eng kawng ṭangkaitein nge khawngaihna i lantîr theih?