B yaa nimbãan-zoɛtba, dũni-wẽngã pʋgẽ

BURUNDI, rao a ye n da bẽed weoogã tɩ b segd n dɩk-a n kẽng logtor yir tao-tao. La mobill ra ka be ye. A zo-rãmb a yiib wa n sõng-a lame. B rɩk-a-la ne kut weefo, n tus hal lɛɛr a nu tõr n dʋʋg tãense, n yaool n paam biis tɩ b na n dɩk-a n kẽng logtor yiri. Rasem a wãn poore, a bãagã sigame.

Seb-kãseng ning sẽn fug Etazĩni yʋʋmd 2005 sa-sik kiuugã sasa n sãam teed wʋsgã poore, neb sull sẽn da yaa sõngdb yãa roog tɩɩs sẽn lʋɩ n yẽege. La baa ne zakã soab sẽn da pa mi nin-kãensã baa bilfã, b rɩka daar tõr n pas tɩɩsã ne masĩn n wʋk a raadã n serge, la b pɩɩs sagdã fãa. Zakã soab pag yeela woto: “M pa tar noor n pʋʋsd nin-kãensã ye.”

Kiba-kɩtbã sẽn gomd bũmb ning yell n yɩɩd yaa wẽnemã la nen-kɛglmã, la b pa nong n gomd nebã sẽn maand taab neer la b kʋmd taab nimbãanegã ye. La woto pa kɩt tɩ nebã pa le rat tɩ b nong-b la b zoe b nimbãaneg ye. D sɩd ratame tɩ nebã kʋm d nimbãanega! Sẽn mik tɩ Nowellã wakate, neb wʋsg nong n gomda laafɩ la sũ-noog yellã, naoor wʋsgo yaa wakat kãngã la nebã nong n tagsd nimbãan-zoeerã yell n yɩɩda.—Luk 2:14.

Sẽn na yɩl n yɩ nimbãan-zoɛt dũni kãngã neb wʋsg sẽn pa nong taabã sʋka pa nana  ye. Tagsg ning sẽn wɛ rũndã-rũndã yaa tɩ f sã n yaa nin-toaag tɩ f toog ka be ne neda, rẽ n na n kɩt tɩ f yɩɩg f taabã. Yaa wala neb wʋsg tũuda b sẽn yeel tɩ f sẽn na n yɩ nin-toaag n são f sẽn na n yɩ nimbãan-zoɛtã. La f sã n yaa rat-wʋsg soab la ned sẽn nong n get a meng yell bala, kɩtdame tɩ f pa le zoet ned nimbãaneg ye.

Woto kɩtame tɩ neb wʋsg nong n lʋɩɩsd b mens taoore, la b paoogd neb a taabã bɩ n pa tagsd b yell ye. Rapã ɛspoorã la filim dãmbã pʋsẽ, yaa neb nins sẽn yaa nin-toos n pa tar nimbãan-zoeerã la b wilgd wa gãndaad la “rap hakɩka.” Politik nanambs kẽer me maanda woto.

Rẽ n so tɩ d segd n sok d mens woto: Bõe yĩng tɩ d segd n kʋm nebã nimbãanega? Nimbãan-zoeerã yõod la bʋgo? Bõe n tõe n sõng tõnd tɩ d yɩ nimbãan-zoɛtba? Sõsg ning sẽn pʋgdã leokda sogs-kãensã.

[Zĩ-gũbri, seb-​neng a 3]

•Rẽ yĩnga nimbãan-zoeer yaa pãn-komsem bɩ?

•Nimbãan-zoeerã tara nafa bɩ?

•Bõe la d tõe n maan n wilg tɩ d kʋmda nebã nimbãanega?