Kwelobohloko Lefaseng le Sehlogo

MONNA yo mongwe kua Burundi o tsenwa ke bolwetši bjo šoro bja malaria. O swanetše go išwa sepetlele ka pela-pela. Eupša bjang? Ga go na koloi yeo e ka mo išago moo. Bagwera ba gagwe ba babedi ba paale ba a mo thuša. Ba mo nametša paesekela gomme ba mo kgorometša ka yona leetong le le lapišago la diiri tše hlano lefelong la dithaba. Ke moka ba mo nametša pese yeo e mo išago sepetleleng sa kgaufsi. Ka morago ga matšatši a sego kae, o bonagala a kaonafetše.

Nageng e nngwe, sehlopha sa baithapi se hwetša ntlo e pšhatlilwego ke mehlare yeo e ilego ya e wela nakong ya Ledimo la Katrina leo le ilego la senya Kgogometšane ya United States ka August 2005. Baithapi ba, bao mong wa ntlo a sa ba tsebego le gatee, ba fetša letšatši ka moka ba saga mehlare yeo e welego le go tloša ditlakala ka moka. Mong wa ntlo o re: “Ga ke tsebe gore nka leboga [batho] ba bjang.”

Dipego tše di huduago maikwelo tša mekero ya ditaba gantši di bolela ka ditiro tše di šiišago le tše sehlogo. Ditiro tša letšatši le letšatši tša kwelobohloko le botho gantši di bipša ke dipego tše. Lega go le bjalo, se ga se fetoše taba ya gore batho kae le kae ba tloga ba tsoma go ratwa le go kwelwa bohloko. Ruri re hlologela go kwelwa bohloko! Maikwelo a bjalo a bontšhwa kudu sehleng sa Keresemose, ge batho ba bantši ba bolela goba ba opela ka ‘khutšo le kgahlišo bathong.’—Luka 2:14, Beibele ya Sepedi.

Go bontšha kwelobohloko go ka no se be bonolo lefaseng leo le bonagalago le se na bogwera e bile le se na botho. Boemo bja kgopolo bjo bo  apareditšego ke bja gore bošoro le go ba le pelo e mpe go dira gore motho a atlege le gore a be mofenyi. Ba bantši ba bonagala ba phela ka go dumelelana le kgopolo yeo go thwego ke ya Niccolò Machiavelli—go ba sehlogo ke gabohlale kudu go feta go ba le kwelobohloko. Megabaru le boikgantšho di ka dira gore motho a se be le kwelobohloko.

Ka baka leo, batho ba bantši ba etiša dikgahlego tša bona pele e bile ba hlokomologa maikwelo goba dikgahlego tša ba bangwe. Banna bao e lego dinkgwete tša dipapadi le tša boithabišo gantši ba bonagatšwa e le bao go thwego ke banna-nna (bo-ntwa-dumela) bao ba sa bontšhego maikwelo a borutho a bonolo. Babuši ba bangwe ba tša dipolitiki ba itshwara ka tsela e swanago.

Ka gona, re dira gabotse ge re botšiša gore: Ke ka baka la’ng re swanetše go ba le kwelobohloko? Na kwelobohloko ke tutuetšo e botse? Le gore ke’ng seo se ka re thušago go bontšha kwelobohloko? Sehlogo se se latelago se tla ahla-ahla dipotšišo tše.

[Lepokisi go letlakala 3]

•Na go bontšha kwelobohloko ke bofokodi?

•Na kwelobohloko e na le tutuetšo e botse?

•O ka bontšha kwelobohloko ka ditsela dife tše di šomago?