Panangabagey Dia ed Maruksan Mundo

WALAY lakin taga Burundi a grabe lay sakit ton malaria. Kakkaukolan to lay nibatik ed ospital. Balet panon kasi, ta anggapoy luganan a pangibatik ed sikato? Natan et walay duaran maapit a kaaro to a tinmulong ed sikato. Inlugan da ed bisekleta insan da intalikarkar ya intutulak ed loob na limay oras dia ed kapalandeyan. Insan da inlugan ed bus ya angiyakar ed sikato diad sankaasinggeran ya ospital. Kayari na pigaran agew et baleg lay inabigan to.

Dia met ed sananey nin parte na dalin, kalabas na makmaksil a Bagyon Katrina, ya aneral ed saray lugar ed Estados Unidos ya asingger ed Gulpo na Mexico nen Agosto 2005, et walay anengneng na sakey a grupo na boluntaryo ya abung ya atapil-tapilan na kiew. Anggaman agda kabat imay makan-abung, sanagew dan nilalagari iramay kiew tan antokaman niran akatapiltapil pian naekal iratan. “Agko amta no panon kon pisalamatan irayan [totoo],” so inkuan na samay makan-abung.

Kaslakan lan say pi-balita na media et saray agaylan karuksaan tan inkabrutal. Kanian mabetbet lan agnaiimano iray inagew-agew a panangipanengneng na panangabagey tan panangasi. Anggaman ontan, siansia nin agnauman so katuaan a saray totoo ed amin a pasen et mankakkaukolan na panangaro, lugor, tan simpatya. On, pampirpirawatan tayoy naabagey! Nayarin mas nalikna na totoon kaukolan da itan sano Krismas, no kapigan say pisalita tan pikansion na totoo et nipaakar ed ‘deen tan maong a linawa ed kaparan too.’​—Lucas 2:14, King James Version.

Diad mundon saray totoo et anggapoy pibabali  ra tan agmakaaro, nayarin alay irap so pangipatnag na panangabagey. Say prinsipyo na karaklan et pian onaligwas tan ontalona ka, kaukolan a sikay maruksa tan anawet so pusom. Dakdakel so ompatnag a manbibilay unong ed samay kukuan na karaklan a say mangasi naperdi. Saray totoo et naaamperan a mangabagey lapud inka-masamel tan inka-makasarili.

Kanian, dakel so mangiyuuna ed inkasikara, anggano pakasakitan odino pakaagarabiadoan lay arum. Diad saray palabas tan isport et papawayen dan saray “tuan lalaki” ­(macho) et agmangipapatnag na matamoy a panangaro. Ontan met so kagagawa na arum a politiko.

Kanian, nepeg tayon tepetan so inkasikatayo: Akin a nepeg itayon magmaliw a masimpatya? Wala kasi pankaabigan na pagmaliw a maabagey? Tan anto so makatulong ed sikatayo a mangipatnag na panangabagey? Saraya so ebatan na onsublay ya artikulo.

[Kahon ed Pahina 3]

•Kakapuyan kasi so pangabagey?

•Wala tay maong a nagawaan na pangabagey?

•Diad antoran praktikal a paraan a nipanengneng yo so simpatya?