?Yu Yu Rere From Dei Blong Jeova?
?Yu Yu Rere From Dei Blong Jeova?
“Bigfala dei blong Jeova i klosap. Hem i klosap, mo hem i hareap tumas.”—Sefanaea 1:14, NW.
1-3. (a) ?Baebol i talem wanem long saed blong dei blong Jeova? (b) ?Weswan “dei blong Jeova” we bambae i kasem yumi?
BIGFALA dei blong Jeova i no olsem wan dei blong 24 aoa. Hem i wan longfala taem, we insaed long taem ya, God i mekem jajmen blong hem i kamtru long ol rabis man. Ol man we oli no laekem God, i stret nomo we oli fraet long dei ya from we bambae hem i wan dei we i tudak olgeta, hem i dei we God bambae i kros we i kros, i dei blong man i trabol mo i harem nogud, mo i dei we God bambae i spolem olgeta samting. (Aesea 13:9; Amos 5:18-20; Sefanaea 1:15) Profet tok blong Joel i talem se: “!Dei blong Jeova i klosap! !Hem i wan dei we i nogud we i nogud! !God ya we i gat Olgeta Paoa bambae i mekem dei ya i kamtru blong spolem evri samting!” (Joel 1:15, NW) Be long bigfala dei ya, God bambae i sevem olgeta we “oli stap obei long hem.”—Ol Sam 7:10.
2 Baebol i yusum tok ya “dei blong Jeova” long ol defdefren taem we God i bin mekem ol jajmen blong hem i kamtru. Olsem taem we ol man Babilon oli spolem Jerusalem long yia 607 B.K.T., Baebol i kolem taem ya se ‘dei blong Jeova.’ (Sefanaea 1:4-7) Sem samting i hapen bakegen long yia 70 K.T., taem God i yusum ol man Rom blong mekem jajmen blong hem i kamtru long neson blong ol man Jiu we oli kilim Pikinini blong hem i ded. (Daniel 9:24-27; Jon 19:15) Mo Baebol i tokbaot wan narafala taem se hem i ‘dei blong Jeova,’ hemia taem we God bambae i ‘faet agens long olgeta kantri.’ (Sekaraea 14:1-3) Tabu spirit i pulum aposol Pol blong talem se dei ya bambae i kamtru long taem ya we Kraes i stap, hemia i stat long 1914 taem hem i kam King long heven. (2 Tesalonaeka 2:1, 2) Plante samting oli soemaot i klia nomo se dei blong Jeova bambae i kamtru i no longtaem. Taswe i stret nomo we long yia 2007 yumi bin jusum vas blong yia long Sefanaea 1:14 se: ‘Bigfala dei blong Jeova i kam klosap finis.’
3 From we bigfala dei blong God i kam klosap, naoia i taem blong rere. ?Olsem wanem yu save rere from dei ya? ?I gat sam samting we yu yu nidim blong mekem yet blong yu rere from dei blong Jeova?
Yufala i Mas Rere
4. ?Jisas i rerem hem wan from wanem bigfala traem we bambae hem i kasem?
4 Taem Jisas Kraes i talem profet tok long saed blong taem we rabis fasin blong wol ya bambae i lus, hem i talem long ol disaepol blong hem se: “Oltaem yufala i mas rere.” (Matiu 24:44) Taem Jisas i talem samting ya, hem tu i stap rere from wan bigfala traem we bambae i kasem hem, hemia taem ya we bambae hem i mas ded blong givim laef blong hem olsem wan ransom sakrefaes. (Matiu 20:28) ?Fasin blong Jisas we hem i rere blong fesem traem blong hem, i save halpem yumi olsem wanem?
5, 6. (a) ?Olsem wanem lav we yumi gat long God mo ol man i halpem yumi blong rere from dei blong Jeova? (b) ?Wanem eksampol we Jisas i soem long yumi long saed blong fasin blong lavem ol man?
5 Jisas i lavem Jeova wetem fulhat blong hem mo i laekem tumas ol rul blong Papa blong hem we oli stretgud. Hibrus 1:9 i tokbaot Jisas i se: “Yu yu laekem ol fasin we i stret, be ol fasin we i nogud yu agens long olgeta. Nao from samting ya, mi we mi God blong yu, mi mi jusumaot yu, mo mi mekem yu yu harem gud, from we mi leftemap nem blong yu i go antap moa i winim we mi mekem long ol fren blong yu.” Jisas i lavem tumas Papa blong hem long heven, mo from samting ya nao Jisas i no lego Hem. Sipos yumi rili lavem God long sem fasin ya we Jisas i lavem Hem, mo yumi mekem laef blong yumi i laenap wetem wanem we Hem i wantem, ale Hem i save lukaotgud long yumi. (Ol Sam 31:23) Sipos yumi gat sem kaen lav mo fasin obei olsem, samting ya i save halpem yumi blong yumi rere from bigfala dei blong Jeova.
6 Long evri fasin blong Jisas, wan we yumi makem se i bigwan moa, hemia lav we hem i gat long ol man. Yes, “hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) Taswe, Jisas i talemaot gud nius long ol man, olsem we lav tu i pusum yumi blong talemaot gud nius blong Kingdom long ol man raonabaot long yumi. Lav we yumi gat long God mo ol man raonabaot i mekem we yumi stap bisi oltaem long ol Kristin wok blong yumi, ale samting ya nao i mekem se yumi stap rere oltaem from bigfala dei blong Jeova.—Matiu 22:37-39.
7. ?Taem yumi stap wet long dei blong Jeova, from wanem yumi save glad?
7 Jisas i wantem tumas blong mekem wok blong Jeova. (Ol Sam 40:8) Sipos yumi gat sem tingting olsem Jisas, bambae yumi harem gud tu blong mekem tabu wok blong God. Olsem Jisas, bambae yumi no tingbaot yumi nomo, be bambae yumi glad blong givim samting long narafala, mo fasin olsem i save mekem yumi rili hapi. (Ol Wok 20:35) Yes, “glad blong Jeova i olsem strong haos, i stap givim paoa long [yumi].” Sipos yumi holem glad ya, bambae yumi rere moa blong fesem bigfala dei blong God.—Nehemaea 8:10, NW.
8. ?From wanem yumi mas kam klosap long Jeova tru long prea?
8 Jisas i prea plante long God mo samting ya i halpem hem blong rere from ol traem we oli kam agensem bilif blong hem. Taem Jon i stap baptaesem hem, hem i stap prea. Bifo we hem i jusum ol aposol blong hem, hem i spenem wan ful naet blong prea. (Luk 6:12-16) Mo i sua se evri man we oli ridim Baebol bambae oli sapraes long ol tok we Jisas i talem long papa blong hem wetem fulhat blong hem long laswan naet blong laef blong hem long wol. (Mak 14:32-42; Jon 17:1-26) ?Yu yu wan man blong prea olsem Jisas? I gud yu toktok oltaem long Jeova, no hareap tumas long ol prea blong yu, askem hem blong lidim yu wetem tabu spirit, mo taem yu luksave rod we God i wantem yu blong folem, i gud yu kwik blong folem rod ya. Dei blong Jeova i stap kam hareap, taswe taem we yumi laef long hem i wan denja taem. I impoten we i impoten tumas blong stap gud fren wetem Papa blong yumi long heven. From samting ya, i gud yumi traem bes blong yumi blong kam klosap moa long Jeova tru long prea.—Jemes 4:8.
9. ?From wanem i impoten tumas blong holem nem blong Jeova i stap tabu?
9 Wan nara samting we i rerem tingting blong Jisas blong i fesem ol traem we bambae oli kasem hem, hemia se hem i wantem tumas blong leftemap nem blong Jeova. Yes, hem i tijim ol man blong hem tu se, taem oli prea long God oli mas askem long hem se ‘plis mekem we ol man oli holem nem blong yu i stap tabu.’ (Matiu 6:9, NW) Sipos yumi rili wantem holem nem blong Jeova i stap tabu, bambae yumi no mekem eni samting we i save sakem doti long nem ya. Ale long rod ya bambae yumi rere moa from bigfala dei blong Jeova.
?Yu Yu Nidim Blong Jenisim Sam Samting?
10. ?From wanem i stret blong jekemap laef blong yumi?
10 ?Sipos dei blong Jeova i kam tumora, bambae yu yu rere? I gud yumi wanwan i jekemap laef blong yumi blong luk sipos i gat sam fasin no sam tingting we yumi nidim blong stretem. From we laef blong yumi tede i sot mo yumi neva save samting we bambae i hapen, yumi mas stap wekap long saed blong spirit evri dei. (Prija 9:11, 12, NW; Jemes 4:13-15) I gud we naoia yumi tingbaot sam samting we yumi mas jekemap long laef blong yumi wanwan.
11. ?Wanem mak we yu wantem kasem taem yu ridim Baebol?
11 Wan impoten samting blong mekem evri dei, hemia blong ridim Baebol olsem we “slef” i talem long yumi. (Matiu 24:45, NW) Maet yu save putum mak ya se evri yia bambae yu ridim mo tingting dip long ful Baebol, stat long Jenesis i go kasem Revelesen. Sipos yu ridim 4 japta evri dei, yu save ridim olgeta 1,189 japta blong Baebol long wan yia. Olgeta king blong Isrel oli mas ridim Loa blong Jeova “oltaem long laef blong [olgeta].” I klia se Josua i mekem samting ya. (Dutronome 17:14-20; Josua 1:7, 8) I impoten tumas we ol man blong lukaot long ol sipsip blong Jeova oli mas ridim Baebol evri dei from we samting ya i save halpem olgeta blong oli “tijim ol man long ol tok we i folem ol tijing we i stret gud.”—Taetas 2:1.
12. ?Taem yu tingbaot se dei blong Jeova i klosap, samting ya i mas pusum yu blong mekem wanem?
12 Taem yu tingbaot se dei blong Jeova i klosap, samting ya i mas pusum yu blong no mestem ol Kristin miting mo blong tekpat long ol miting ya olsem we yu naf blong mekem. (Hibrus 10:24, 25) Taem yu mekem olsem, yu stap trenem yu wan long wok blong talemaot Kingdom, nao yu save kamgud moa long wok ya blong faenem mo givhan long ol man we oli stret blong kasem laef we i no save finis. (Ol Wok 13:48, NW) Maet i gat sam narafala samting we yu yu save mekem blong stap bisi insaed long kongregesen, olsem maet yu save halpem ol olfala no talem ol gudfala toktok blong leftemap tingting blong ol yangfala. !Ol traehad we yu mekem long saed ya bambae oli mekem yu yu harem gud tumas!
Fasin We Yu Mekem Long Ol Narafala
13. ?Wanem sam kwestin we yu save tingbaot long saed blong yu wan mo niufala fasin blong laef?
13 ?From we dei blong Jeova i klosap, yu yu luk se yu nidim blong traehad moa blong ‘kam niufala man, we God i mekem laef blong yu i folem trutok blong hem, i stret gud, i blong hem nomo’? (Efesas 4:20-24) Taem yu traehad blong folem ol fasin blong God, ol narafala bambae oli luk se ‘tabu spirit i stap lidim yu’ mo bambae yu stap soemaot frut blong tabu spirit ya long laef blong yu. (Galesia 5:16, 22-25) ?Yu yu save tingbaot sam samting we oli soem se yu mo famle blong yu, yufala i putum niufala fasin blong laef finis? (Kolosi 3:9, 10) ?Fasin we yu mekem long ol Kristin brata sista blong yu i olsem wanem? ?Oli tingbaot yu olsem man we i laekem mekem i gud long narafala? (Galesia 6:10) Sipos yu stadi oltaem long Baebol, samting ya i save halpem yu blong wokem ol gudfala fasin olsem God, ol fasin ya bambae oli rerem yu from dei blong Jeova.
14. ?From wanem wan man i mas prea blong kasem tabu spirit taem hem i stap traem blong bos long tingting?
14 ?Olsem wanem sipos yu yu stap kros kwik mo yu luk se yu nidim blong bos moa long tingting blong yu? Fasin blong bos long tingting, hem i wan frut we tabu spirit i save wokem insaed long yu. Taswe i gud yu prea oltaem blong kasem tabu spirit, mo tingbaot oltaem ol tok ya we Jisas i talem se: ‘Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala. . . . Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim tabu spirit long ol man we oli askem long hem.’—Luk 11:9-13.
15. ?Yu mas mekem wanem sipos yu gat problem wetem Kristin brata no sista blong yu?
15 ?Olsem wanem sipos i gat filing ya i stap we yu yu no laekem wan Kristin brata no sista blong yu, no maet narafala nao i gat filing ya long yu? Long taem olsem, yu mas traem bes blong yu blong stretem trabol ya, blong traem leftemap pis mo fasin joengud insaed long kongregesen. (Ol Sam 133:1-3) I gud yu folem ol advaes blong Jisas long Matiu 5:23, 24 no Matiu 18:15-17. Sipos yu gat fasin ya blong stap holem kros longtaem, i gud yu traem jenisim fasin ya mo stretem trabol kwiktaem. Plante taem i nidim wan samting nomo, hemia fasin we yumi rere blong fogif. Pol i raetem se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.”—Efesas 4:25, 26, 32.
16. ?Long wanem rod i nidim fasin kaen gud insaed long mared?
16 Insaed long mared i nidim kaen gud fasin mo, samtaem, fasin fogif. Sipos yu nidim moa blong soemaot lav mo kaen fasin long hasban no waef blong yu, i gud yu wokem ol fasin ya mo letem God mo Baebol i halpem yu blong mekem olsem. ?I gat sam samting we yu nidim blong jenisim blong folem ol tok blong 1 Korin 7:1-5 mo mekem we yutufala i no kroskros oltaem long yutufala, mo blokem fasin blong laekem wan narafala man no woman? Hemia wan impoten samting blong tingbaot insaed long mared, we i minim se hasban mo waef tufala i rili nidim fasin blong “kaen gud.”
17. ?Wanem step we wan man i mas tekem sipos hem i mekem wan bigfala sin?
17 ?Olsem wanem sipos yu bin mekem wan bigfala sin? I gud yu hareap blong stretem rong ya. Plis, yu mas go lukaot help blong ol Kristin elda. Prea mo advaes blong olgeta ya i save halpem yu blong yu harem gud bakegen long saed blong spirit. (Jemes 5:13-16) I gud yu prea long Jeova we tingting blong yu i rili sore from rong blong yu. Sipos yu no mekem olsem, bambae yu stap harem nogud nomo mo tingting blong yu bambae i stap stikim yu. Hemia nao samting we i bin hapen long Deved. Taem hem i talemaot sin blong hem long Jeova, hem i harem i gud tumas. Hem i raetem se: “Man we Hae God i fogivim hem, mo i tekemaot ol sin blong hem, hem i save harem gud. Man we Hae God i no moa jajem hem from ol samting nogud we hem i mekem, mo we i no moa giaman long laef blong hem, hem i save harem gud.” (Ol Sam 32:1-5) Jeova i fogivim olgeta we oli mekem sin be biaen oli rili tanem tingting blong olgeta from sin ya.—Ol Sam 103:8-14; Ol Proveb 28:13.
Yu No Mas Joen Long Wol Ya
18. ?Wanem tingting we yu yu mas gat long saed blong wol?
18 I sua se yu yu wantem tumas blong stap long niufala wol we Papa blong yumi long heven i promes blong mekem. ?Ale, wanem tingting blong yu long saed blong wol blong naoia, hemia ol rabis man we oli no wantem God? Setan, “we i stap rulum wol ya,” hem i no gat paoa long Jisas Kraes. (Jon 12:31; 14:30) I sua se yu yu no wantem nating se Setan wetem wol ya oli bos long yu. Taswe i gud yu tinghevi long ol tok ya blong aposol Jon se: “Yufala i no mas laekem ol fasin blong wol mo ol samting we oli stap long hem.” Hemia nao waes rod blong folem from we “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:15-17.
19. ?Wanem mak we i gud ol yangfala Kristin oli traem kasem?
19 ?Yu yu stap halpem ol pikinini blong yu blong oli ‘lukaot gud long laef blong olgeta, blong i stap klin oltaem, we ol rabis fasin blong wol i no spolem olgeta’? (Jemes 1:27) Setan i wantem pulum ol pikinini blong yu olsem we man i pulum fis long string. Ol man oli wokem plante samting, olsem ol klab no grup blong pulum ol yangfala blong fasin blong olgeta i jenis mo i fit wetem wol blong Setan. Be ol man blong Jeova oli joen finis blong wan ogenaesesen, mo ogenaesesen ya nomo bambae i laef afta we rabis fasin blong wol ya i lus. Taswe yumi mas pulum ol yangfala Kristin blong oli “gat plante wok blong mekem long wok blong Masta.” (1 Korin 15:58, NW) Ol papa mama we oli obei long God, oli mas halpem ol pikinini blong olgeta blong oli traem kasem ol mak we bambae i mekem laef blong olgeta i hapi mo i karem gudfala frut. Samting ya i save givim ona long God mo i save rerem olgeta from dei blong Jeova.
Tingbaot Wanem Bambae i Hapen Afta Long Bigfala Dei Blong Jeova
20. ?From wanem yumi mas putum tingting blong yumi i stap oltaem long laef we i no save finis?
20 Bambae yu yu naf blong wet long dei blong Jeova we tingting blong yu i no wari tumas, sipos yu tingbaot oltaem se bambae yu save laef blong olwe. (Jud 20, 21) I gud yu tingbaot se laef olwe long Paradaes i min se bambae yu gat paoa olsem yangfala bakegen, mo bambae yu gat taem blong mekem plante plante samting mo blong lanem moa long saed blong Jeova. Ating bambae yu save gohed olwe blong lanem sam samting long saed blong God from we, tede, ol man oli save “smosmol” samting nomo long saed blong God. (Job 26:14) !Taem yumi tingbaot ol samting we bambae yumi gat janis blong mekem, yumi harem glad tumas!
21, 22. ?Wanem sam save we bambae yu mo olgeta we oli laef bakegen, yufala i save serem?
21 Long Paradaes, ol dedman we oli laef bakegen bambae oli save talem stori blong ol samting we i hapen bifo, nao maet bambae yumi save klia moa long sam samting we naoia yumi no savegud long olgeta. Inok bambae i save talem long yumi olsem wanem hem i naf blong no fraet taem hem i talemaot tok blong Jeova long ol man we oli no wantem God nating. (Jud 14, 15) Noa bambae i tokbaot se i olsem wanem blong bildim bigfala sip. Ebraham mo Sera bambae tufala i talemaot filing blong tufala se i olsem wanem taem tufala i lego gudfala laef we tufala i gat long taon blong Uru blong go laef long haos tapolen. Esta bambae i storebaot olsem wanem hem i tok blong sevem ol manples blong hem mo blokem rabis plan blong Haman. (Esta 7:1-6) Tingbaot se Jona bambae i save storebaot trifala dei ya we hem i spenem long bel blong bigfala fis. Jon Baptaes tu, bambae i serem filing blong hem wetem yumi, se hem i harem olsem wanem taem i baptaesem Jisas. (Luk 3:21, 22; 7:28) !Tru ya, bambae yumi save lanem fulap samting!
22 Long Taosen Yia Rul blong Kraes, maet bambae yu gat janis blong halpem sam long olgeta we oli laef bakegen long ded blong oli “savegud [God].” (Ol Proveb 2:1-6) Tede, yumi glad bigwan blong luk we ol man oli stap kasem save blong Jeova God mo oli stap folem save ya long laef blong olgeta. Be tingbaot long fiuja, taem Jeova i blesem wok we yu mekem blong tijim olgeta we oli ded longtaem bifo, nao hat blong olgeta i laekem tijing we oli kasem. Ating bambae yu glad we yu glad.
23. ?Yumi mas gat strong tingting blong mekem wanem?
23 Yumi ol sinman, yumi no naf blong kaontem mo talemaot olgeta blesing we yumi kasem naoia from we yumi ol man blong Jeova. (Ol Sam 40:5) Yumi mas talem bigfala tangkiu long God from ol samting we hem i givim blong halpem yumi long saed blong spirit. (Aesea 48:17, 18) Nomata se laef blong yumi i olsem wanem, yumi mas wosipim God wetem fulhat blong yumi taem yumi stap wet long bigfala dei blong Jeova.
?Bambae Yu Ansa Olsem Wanem?
• ?Wanem ya “dei blong Jeova”?
• ?Olsem wanem yu save rere from dei blong Jeova?
• ?From we bigfala dei blong God i klosap, wanem sam jenis we maet yumi mas mekem?
• ?Wanem samting we yu yu wantem tumas blong luk taem dei blong Jeova i finis?
[Kwestin]
[Tok blong pija long pej 14]
Taem ol traem oli kam, Jisas i rere finis
[Tok blong pija long pej 17]
!Bambae yumi gat nambawan blesing ya blong halpem olgeta we oli laef bakegen blong oli kasem save long Jeova!