Jehovap ullussaanut piareersimavit?
Jehovap ullussaanut piareersimavit?
„Qanillivoq [Jehovap] ullussarsua; qanilliartulertoqaaq!“ — SEFANIA 1:14.
1-3. (a) Jehovap ullussaa pillugu Biibilimi qanoq allassimasoqarpa? (b) ’Jehovap ullussaa’ sorleq siuninnguatsinniippa?
JEHOVAP ullussarsua tassaanngilaq ulloq nalunaaquttap-akunnerinik 24-nik sivisussusilik. Piffissaavoq sivisunerusoq Guutip ajortunut eqqartuussutaata naammassineqarfissaa. Iluaatsut pissutissaqarluarput ullup tamatuma taggarissuusussap kamangaarnermik, naalliunnermik aserugaanermillu ilisarnaateqartussap siooraginissaanut. (Esaja 13:9; Amosi 5:18-20; Sefania 1:15) Joelip siulittuutaani ima allassimasoqarpoq: „Alianaq ullussaq taanna! [Jehovap] ullussaa qanillivoq, nalliukkumaarpoq nungutitsineq Ajugaqanngitsumit pisoq nassataralugu.“ (Joeli 1:15) Ullussarsuarmili tamatumani Guutip ’uummatimikkut peqqusersuitsut’ annaatissavai. — Tussiaat 7:11, 1900.
2 Oqariartaaseq ’Jehovap ullussaa’ atorneqartarpoq piffissat assigiinngitsut Guutip eqqartuussutaasa naammassineqarfigisartagaat pillugit. Assersuutigalugu 607-imi u.n.s. ’Jehovap ulluisa’ ilaat Jerusalemimiunut nalliuppoq Babylonimiut aqqutigalugit. (Sefania 1:4-7) Guutip eqqartuussutaanik naammassinninneq tamatumunnga assingusoq ukiumi 70-imi u.n.k. nalliuppoq Guutip inuiaqatigiinnut juutiusunut ernerminik ajattuisimasunut eqqartuussutini Romamiut atorlugit naammassimmagu. (Danieli 9:24-27; Johannesi 19:15) Biibilimi oqariartaaseq ’Jehovap ullussaa’ aamma piffissamut Jehovap ’inuiaqatigiinnut tamanut sorsuffissaanut’ atorneqarpoq. (Zakaria 14:1-3) Isumassarsisitaalluni apustilip Paulusip ullussaq tamanna Kristusip najuunneranut, 1914-imi Jiisusi qilammi kunnginngortinneqarmat aallartittumut, atassuserpaa. (2 Thessalonikamiut 2:1, 2) Jehovap ullussaata qanilliartupallannera eqqarsaatigigaanni oqaatsit uku Sefania 1:14-imeersut Jehovap Nalunaajaasuisa ukiumut 2007-imut allassimaffittut atugaat naleqqulluinnarput: „Qanillivoq [Jehovap] ullussarsua.“
3 Guutip ullussarsua qanillimmat maanna illit piareersimasariaqarnissannut piffissanngorpoq. Ullussamut tamatumunnga qanoq piareersarsinnaavit? Jehovap ullussaanut piareersimaniarlutit suli allamik iliuuseqartariaqarpit?
Piareersimagit
4. Misilinneqangaarnissaq suna Jiisusip piareersarfigaa?
4 Pissutsit aaqqissuussaanerata naggatissaa pillugu siulittuutimini Jiisusi Kristusi ajoqersukkaminut ima oqarpoq: „Piareersimassaasi.“ (Matthæusi 24:44) Jiisusi taama oqarami misilinneqangaarnissaminut — utertitsissutitut pilliutaalluni toqunissaminut — piareersimavoq. (Matthæusi 20:28) Misilinneqarnissamut tamatumunnga piareersarniarluni Jiisusip iliuuserisai qanoq ilinniarfigisinnaavavut?
5, 6. (a) Guutimut tullermullu asanninneq Jehovap ullussaanut piareersimanissatsinnut qanoq iluaqutigaarput? (b) Tullermut asanninneq eqqarsaatigalugu Jiisusi qanoq maligassiuiva?
5 Uummammigut iluunngarluni Jiisusip Jehova asavaa taassumalu najoqqutassiai naapertuilluartut nuannaringaarlugit. Hebræerinut allakkat 1:9-mi Jiisusi pillugu ima allassimasoqarpoq: „Eqqortumik iliorneq nuannaraat eqqunngitsuliornerlu uumigalugu, tamanna pillugu Guutip, Guutivit, tanissimavaatit uuliamik nuannaarnerup pianik, naligisannit salliutillutit.“ Jiisusip Ataatani qilammiusoq asagamiuk taassumunnga assuarnaatsumik attaveqarnini attattuarpaa. Guuti taamatut asagutsigu piumasaqaataalu eqqortillugit, taassuma sernissorumaarpaatigut. (Tussiaat 31:24) Asanninneq naalannerlu taamaattut Jehovap ullussarsuata nalliunnissaanut piareersimanissatsinnut iluaqutigissavavut.
6 Inunnut asanninneq Jiisusip pissusiisa malunnartut ilagaat. Taassuma inuit ’nalligingaarpai paarinerlugaallutillu naakkinarsisimangaarmata savatut paarsisoqanngitsutut’. (Matthæusi 9:36) Tamatuma kingunerisaanik Jiisusip nutaarsiassaq nuannersoq inunnut oqaluussissutigisarpaa, taamatuttaaq uagut Guutip naalagaaffianik tusarliussamik inoqatitsinnut oqaluussissutiginninnissatsinnut asanninneq kajumississutigaarput. Guutimut tullermullu asanninneq kristumiutut oqaluussisartuujuarnissatsinnut Jehovallu ullussarsuanut piareersimanissatsinnut iluaqutigaarput. — Matthæusi 22:37-39.
7. Jehovap ullussaata nalliunnissaa utaqqitillugu suna nuannaarutigisinnaavarput?
7 Jiisusi piumassutsiminik Jehovap piumasaatut iliorpoq. (Tussiaat 40:9) Uagut aamma taamatut isiginnittaaseqarutta Guutimut illernartumik kiffartornerput nuannaarutigissavarput. Jiisusitut namminissarsiornata tunisiumatuujussaagut, tamannalu pillualivissutigissavarput. (Apustilit Suliaat 20:35) Ilumut, ’Jehovami nuannaarneq uagut nakuussutigaarput’. Nuannaarneq tamanna Jehovap ullussarsuanut piareersimalluarnerunissatsinnut iluaqutigissavarput. — Nehemia 8:10.
8. Sooq qinunikkut Jehovamut qaninneruleriartortuartariaqarpugut?
8 Jiisusip uppernikkut misilinneqarnissaminut piareersarnermini aamma Guutimut qamannga pisumik qinnutini iluaqutigai. Johannesimit kuineqarami qinuvoq. Apustiliminillu toqqaannginnermini unnuaq naallugu qinuvoq. (Lukasi 6:12-16) Jiisusillu nunarsuarmi inuunermini unnummi kingullermi qamannga pisumik qinnutai Biibilimik atuartartut amerlanersaasa killinneqaatiginnginnerpaat? (Markusi 14:32-42; Johannesi 17:1-26) Jiisusitut illit qinukulasuuit? Jehova saaffigikulasaruk, qinunissannut piffissaqarluartarit, anersaamit illernartumit siulersorneqarnissat qinnutigisaruk, anersaallu kajumissaarutai erseqqissut maleruarnasuartakkit. Ulluni artornartuni makkunani, Guutip ullussarsua qanilliartorasuartillugu, Ataatatsinnut qilammiusumut qanimut attaveqarneq inuunitsinnut pingaaruteqarluinnarpoq. Taamaattumik qinunikkut Jehovamut qaninneruleriartortuarniarlutit sapinngisat tamaat iliorit. — Jaaku 4:8.
9. Jehovap aqqata illernartitaanissaanik soqutiginningaarneq qanoq pingaaruteqartigaa?
9 Jehovap aqqata illernartitaanissaa Jiisusip pingaartittupilussuuaa, tamannattaaq misilinneqarnissaminut piareersimanissamut iluaqutigaa. Allaammi ajoqersukkani ilinniartippai qinnutigineqartoq una Guutimut qinnutaannut ilaasariaqartoq: „Aqqit illernartitaali.“ (Matthæusi 6:9) Jehovap aqqata illernartitaanissaa, imaluunniit illernartutut isigineqarnissaa, qamuuna kissaatigigutsigu, atermut tamatumunnga kanngunarsaataasinnaasumik iliuuseqarnaveersaassaagut. Tamatuma kingunerisaanik Jehovap ullussarsuanut piareersimalluarnerussaagut.
Allannguisariaqarpit?
10. Sooq imminut misissoqqissaarnissaq naleqquppa?
10 Jehovap ullussaa aqagu nalliuttuuppat ilumut piareersimassavit? Silatusaassaagut tamatta immikkut inooriaaserput misissoqqissaarutsigu paasiniarlugu allanngortinneqartariaqartumik iliuuseqarnerluta isumaqarnerlutaluunniit. Ullumikkut inuunerup qanoq sivikitsiginera nalorninartigineralu eqqarsaatigigaanni tamatta ullut tamarluinnaasa anersaakkut eqqumalluartariaqarpugut. (Oqaluussisartup oqaasii 9:11, 12, 1990; Jaaku 4:13-15) Taamaattumik inuunitsinnut tunngasut ilaannik sianigisariaqakkatsinnik sammisaqariarta.
11. Illit Biibilimik atuartarnerit eqqarsaatigalugu suna anguniagaraajuk?
11 ’Inussiap aalajaallunilu silatuup’ uagutsinnut ullut tamaasa Biibilimik atuartarnissamik eqqaasitsissutaa pingaaruteqangaarpoq. (Matthæusi 24:45, NV) Immaqa ukiut tamaasa Biibilip tamakkerlugu atuarnissaa, tassa Mosesimik allakkannit siullerniit Saqqummersitanut, atuakkavillu eqqarsaatigeqqissaarnissaat anguniagarisinnaavatit. Ullormut kapitalit sisamat missaat atuartarukkit ukiup ataatsip ingerlanerani Biibilimi kapitalit 1189-it tamaasa atuarsinnaassavatit. Israelimi kunngit ’ullut nungullugit inuutillutik’ (1900) Jehovap inatsisaanik atuartartussaapput. Erseqqipporlu Josva aamma taamaaliortartoq. (5 Mosesi 17:14-20; Josva 1:7, 8) Pingaaruteqartupilussuuvoq anersaakkut ittumik paarsisut ullut tamaasa Guutip oqaasianik atuartarnerat, tamannami ’ajoqersuummik peqqissinartumik’ allanut ingerlatitseqqinnissaminnut iluaqutigaat. — Titusi 2:1.
12. Jehovap ullussaata qanillinera qanoq iliuuseqarnissamut kajumississutigisariaqarpiuk?
12 Jehovap ullussaata qanillinera kristumiut ataatsimiinnerinut najuuttuartarnissannut sapinngisannillu tamakkunani peqataasarnissannut kajumississutigisariaqarpat. (Hebræerit 10:24, 25) Taamaaliortarneq Guutip naalagaaffianik oqaluussissutiginnittutut, inunnik ’inuunermik naassaanngitsumik eqqortumik isumaqarfiginnittunik’ ujarlersutut ikiuiniartutullu, piginnaanivit ineriartortinnerunissaannut iluaqutigissavat. (Apustilit Suliaat 13:48, NV) Immaqa aamma ilagiinni allatigut iliuuseqarnerusinnaavutit, assersuutigalugu utoqqarnik ikiuinikkut aamma meeqqanik inuusuttunillu isumassuinikkut. Taamaaliortarneq nuannaangaalersitsisinnaavoq!
Illit allanut attaveqarnerit
13. Inuttut pissuseq nutaaq eqqarsaatigalugu imminut qanoq aperisinnaavugut?
13 Jehovap ullussaa nalliutingajalermat, ’inuttut pissutsip nutaap Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitap atinissaa’ (NV) sulissutiginerusariaqarpiuk? (Efesosimiut 4:20-24) Guutip pissusiinik ilaarsinerujartortillutit allat maluginiassavaat ’anersaami inuusutit’ anersaallu inerititaanik ersersitsisutit. (Galatiamiut 5:16, 22-25) Iliuutsinik illit ilaquttavillu inuttut pissutsimik nutaamik atisisimanissinnut ersiutaasunik tikkuaasinnaavit? (Kolossemiut 3:9, 10) Assersuutigalugu uppeqatissinnut allanullu ajunngitsuliortartutut ilisimaneqarpisi? (Galatiamiut 6:10) Biibilimik aalajangersimasumik atuaqqissaartarneq Jehovap ullussaanut piareersimanissannut iluaqutaasussanik pissutsit anersaakkut ittut ineriartortinnissaannut iluaqutigissavat.
14. Sooq inuup imminut naalakkersinnaanerup ineriartortinnissaanik sulissutiginnittup anersaaq illernartoq qinnutigisariaqarpaa?
14 Taavami kamajasuuguit paasilerlugulu imminut naalakkersinnaanerulernissat ineriartortittariaqarlugu? Imminut naalakkersinnaaneq inerititat Guutip anersaavata illernartup ilinni ineriartortissinnaasaasa ilagaat. Taamaattumik anersaaq illernartoq qinnutigisaruk, soorlu Jiisusip taamaalioqqulluta imatut kajumissaaraatigut: „Qinugitsi, tunineqassaasi taava; ujarleritsi, nanisissaasi taava; kasuttoritsi, mappiunneqassaasi taava. . . . Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ — Lukasi 11:9-13.
15. Qanoq iliortariaqarpit illit uppeqativillu ilaata akornassinni najummassimanartoqalersimappat?
15 Takorlooriaruk illit uppeqativillu ilaata akornassinni najummassimanartoqalersimasoq. Pissutsini taama ittuni taassumunnga attaveqarluaqqilerniarlutit sapinngisat tamaat iliornissat pisariaqarpoq, ilagiinni eqqissineq ataasiussuseqarnerlu siuarsarneqarniassammata. (Tussiaat 133:1-3, 1990) Jiisusip siunnersuutai Matthæusi 5:23, 24-mi aamma Matthæusi 18:15-17-imi allassimasut malikkit. Suli narrutsassimatillutit seqineq tarrisissimagukku taassumunnga attaveqarluaqqilerniarlutit piaartumik iliuuseqarit. Amerlanertigut isumakkeerfiginnikkumanissaq kisimi pisariaqartarpoq. Paulusi ima allappoq: „Immissinnut ajunngitsuliorfigigitsi nallittuillusilu [qamanngalu pisumik misiginneqatiginnillusi, NV], isumakkeerfigeqatigiittaritsilu soorlu Guutip Kristusimi isumakkeerfigigaasi.“ — Efesosimiut 4:25, 26, 32.
16. Aappariinnermi sutigut misiginneqatiginninneq pisariaqarpa?
16 Qamannga pisumik misiginneqatiginninneq ilaanneeriarlunilu isumakkeerfiginnikkumasarneq aappariinnermi pisariaqarpoq. Illit aappannut asanninnerulertariaqaruit misiginneqatiginninnerulertariaqarlutillu, taava Guutimit taassumalu oqaasia atorlugu ikiorneqarnissannik ilassinnillutit anguniakkap tamatuma angunissaa sulissutigiuk. Korinthimiunut allakkat siulliit 7:1-5-imi allassimasoq malissinnaajumallugu sulissutissaqarpit, najummassimanartut najummassimanarpallaarunnaarniassammata allasiornissarlu pinngitsoortinneqarniassammat? Qularnanngilluinnartumik inuunermut tunngasumi tamatumani uiusoq nuliaasorlu ’qamannga pisumik misiginneqatiginnittuusariaqarput’.
17. Ingasattumik ajortuliorsimasut qanoq iliuuseqartariaqarpat?
17 Qanoq iliussavit ingasattumik ajortuliorsimaguit? Pissutsit aaqqinniarlugit piaarnerpaamik iliuuseqarit. Pingaarnerpaamik utoqqaanertanut kristumiunut ikiortissarsiorit. Taakkua qinnutaat siunnersuutaallu anersaakkut peqqisseqqinnissannut iluaqutigissavatit. (Jaaku 5:13-16) Peqqissimissuseqarlutit Jehovamut qinugit. Taamaaliunngikkuit pisuusutut misigisimanermik ilerasuuteqarnermillu erloqissuteqalissaatit. Daavip tamanna misigaa, aammali misigaa ajortuliaminik Jehovamut nassuerutiginninneq qanoq iluaallaatigitigalugu. Ima allappoq: „Pilluarpoq unioqqutitsinerminik isumakkeerfigineqartoq, ajortuliaminillu matooriffigineqartoq. Pilluarpoq inuk [Jehovap] ajorteqartinngisaa, peqqusersiornermillu ilumiugisaqanngitsoq.“ (Tussiaat 32:1-5) Ajortuliaminnik ilumoorlutik peqqissimissutiginnillutik allamik isumataartut Jehovap isumakkeerfigisarpai. — Tussiaat 103:8-14; Ussatit 28:13.
Silarsuarmut ilaaqinak
18. Silarsuaq qanoq isigisariaqarpiuk?
18 Qularnanngitsumik silarsuassaq nutaaq Ataatatta qilammiusup uagutsinnut neriorsuutigisimasaa illit qilanaaraat. Silarsuarli inuiannik naapertuilluanngitsunik inulik Guutimit ungasillisimasoq qanoq isigaajuk? Saatanip, ’silarsuup naalagaanerata’, Jiisusi Kristusi ’tigunngilaa’ (NV). (Johannesi 12:31; 14:30) Soorunami aamma illit Diaavulumit taassumalu silarsuaanit tiguneqarusunngilatit, taamaattumillu apustilip Johannesip oqaasii uku uummammiuliuttariaqarpatit: „Silarsuaq taassumaluunniit pii asaniaqinasigit.“ Siunnersuutip tamatuma maleruarnissaa silatusaarnerussaaq, tassami „silarsuaq piumatussusialu nungussapput, Guutilli piumasaanik iliortoq naassaanngitsumik atassaaq“. — 1 Johannesi 2:15-17.
19. Inuusuttut kristumiut sunik anguniagaqaqqullugit kajumissaarneqarpat?
19 Meeqqatit ’imminnik silarsuarmit mingutsinneqatsaalinissaannut’ ikiortarpigit? (Jaaku 1:27) Aliikkutaralugu aalisartup pisarneratut Saatanip meeqqatit pisariniarsarai. Kattuffiit peqatigiiffiillu assigiinngitsut meeqqanik inuusuttunillu Saatanip silarsuaanut tulluartunngortitsillaqqissuupput. Peqatigiiffiilli pissutsit aaqqissuussaanerata ajortup matuma naggaserneqarnissaata kingorna ingerlaannarumaartutuaq tassaavoq peqatigiiffik Jehovap kiffaasa maannangaaq ilaaffigisaat. Taamaattumik inuusuttut kristumiut ’tamaviaarlutik Naalakkamik kiffartuussinissaminnut’ kajumissaarneqartariaqarput. (1 Korinthimiut 15:58) Angajoqqaat Guutimik mianerinnittut meeqqatik pilluarnartumik nalerisimaarnartumillu Guutimut ataqqinaataasumik Jehovallu ullussaata nalliunnissaanut piareersimanissaannut iluaqutaasumik inuulissutigisinnaasaminnik imminut anguniagassinissaannut ikiortariaqarpaat.
Jehovap ullussarsuata kingorna pisussat aamma eqqarsaatigisakkit
20. Sooq naassaanngitsumik inuunissamik neriuuterput eqqaamajuartariaqarparput?
20 Naassaanngitsumik inuunissamik neriuutit eqqaamajuarukku, isumakkut eqqissisimallutit Jehovap ullussaata nalliunnissaa utaqqisinnaassavat. (Judasi 20, 21) Paratiisissamimi naassaanngitsumik inuulernissat qilanaaraat neriuuteqarlutillu inuusuttuunittut nukittoruttoqqinnissannik aamma anguniakkanik iluaqutaasunik angusiniarnissannut Jehovalu pillugu ilinniarnerunissannut killeqanngitsumik piffissaqarnissannik. Ilumummi naassaanngilluinnartumut Guuti pillugu ilinniartuarsinnaassaatit, ullumikkummi inuit taassuma „suliaasa ilaminiinnaat“ ilisimavaat. (Jobi 26:14) Siunissamut neriuut pissanganangaarami!
21, 22. Illit makititaasullu paasissutissanik sunik avitseqatigiissinnaavisi?
21 Toqungasut Paratiisissami makitinneqarpata itsaq pisimasut pillugit ullumikkut nalusatsinnik paasitinneqarsinnaassaagut. Enoki tassaniissaaq oqaluttuarisinnaassallugulu Jehovap tusarliussaata inunnut guutiitsunut oqaluussissutiginissaanut qanoq ililluni pisariaqartumik sapiissuseqalersimanerluni. (Judasi 14, 15) Noap qularnanngilluinnartumik oqaluttuarissavaa umiarsualiorneq qanoq innersoq. Aperaap Sarallu oqaluttuarisinnaassavaat tuperni ineqalerniarlutik illoqarfik Uri ilorrisimaarnartuilu qimassagamikkit qanoq misiginerlutik. Esterillu sukumiisumik oqaluttuarisinnaassavaa qanoq ililluni inuiaqatiminik illersuinerluni Hamanillu juutinut pilersaarutipilui akornusernerlugit. (Esteri 7:1-6) Aamma takorlooriaruk Jona ullut pingasut aalisagarujussuup naavaniiffigisani pillugit oqaluttuartoq imaluunniit Johannesi Kuisisoq Jiisusimik kuisinermini qanoq misigisimanerminik oqaluttuartoq. (Lukasi 3:21, 22; 7:28) Tusarnaarnissaat pissanganangaarami, ilaa?
22 Kristusip ukiuni tusindini naalakkersuinissaani makititaasut ilaannik ’Guuti pillugu ilisimasaqalernissaannut’ (NV) ikiuineq immaqa immikkut pisinnaatitaaffigissavat. (Ussatit 2:1-6) Maannangaaq nuannaarutigingaartarparput inuit Jehova Guuti pillugu ilisimasaqalernerat ilisimasaqalernertillu naapertorlugu iliuuseqartalernerat takugaangatsigu! Taavali takorlooriaruk siunissami, inuit itsaq inuusimasut ilinniartinniarlugit iliuutsitit Jehovap pilluaqquppagit taakkualu ilikkakkatik qujamasullutik pigiliuppatigit, qanoq nuannaartigissanersutit!
23. Suna iliuuseriniarlugu aalajangiusimasariaqarparput?
23 Ullumikkut iluaqutit Jehovamut innuttaagatta nuannaarutigisavut piginnaassutsivut naammalluinnanngitsut atorlugit taagorsinnaanagillu kisissinnaanngilavut. (Tussiaat 40:6) Ingammik Guutip uagutsinnut tunniuttagai anersaakkut ittut qujamasuutigaavut. (Esaja 48:17, 18) Qanorluunniit atugaqaraluarutta, Jehovap ullussaata nalliunnissaa utaqqitillugu uummatikkut iluunngarluta kiffartorta.
Qanoq akissavit?
• ’Jehovap ullussaa’ suua?
• Jehovap ullussaanut qanoq piareersimasinnaavit?
• Jehovap ullussarsuata taama qanitsiginera eqqarsaatigalugu immaqa sunik allannguisariaqarpugut?
• Jehovap ullussaa qaangiuppat qanoq misigisaqarnissat qilanaaraajuk?
[Atuaqqissaarnermi apeqqutit]
[Qupp. 19-mi assiliartaq]
Jiisusi misilinneqartarnissaminut piareersimavoq
[Qupp. 22-mi assiliartaq]
Makititaasut Jehova pillugu ilisimasaqalernissaannut ikiornissaat immikkut pisinnaatitaaffiussaaq nuanningaartoq