Kana Mu Itukiselize Lizazi la Jehova?

“Lizazi la [Muñ’a] Bupilo le lituna li sutelezi, e, li sutelezi, mane li akufa ka lubilo.”—ZEFANIA 1:14.

1-3. (a) Bibele i bulelañi ka za lizazi la Jehova? (b) Ki lizazi lifi la Jehova le li sutelezi?

LIZAZI le lituna la Jehova hasi lizazi-zazi fela le li tanda lihora ze 24. Lona li ka nga nako mi ka nako yeo Mulimu u ka atula ba ba maswe. Ha ku komokisi ba ba maswe ha ba kona ku ikalelwa lizazi leo, kakuli li ka ba lizazi la lififi, le li tezi buhali ni ku bifa ko kutuna, la maswenyeho ni la ku sinya. (Isaya 13:9; Amosi 5:18-20; Zefania 1:15) Bupolofita bwa Joele bu li: “Mawe! lizazi lani! Kakuli li fakaufi lizazi la Mulimu; li taha sina koto ye zwa ku Ya-Mata-Kaufela.” (Joele 1:15) Kono Mulimu ka nako yeo u ka pilisa “ba lipilu ze lukile.”—Samu 7:10.

² Pulelo ya kuli ‘lizazi la Jehova’ i ama kwa linako zeo Mulimu na fitisize katulo ya hae. Ka mutala, lizazi la Jehova ne li tile ka 607 B.C.E., muta Jehova na fitisize katulo ya hae kwa bayahi ba mwa Jerusalema, ka ku itusisa Mababilona. (Zefania 1:4-7) Ka 70 C.E., Mulimu hape na fitisize katulo ya hae kwa Majuda ba ne ba hanile Mwan’a hae, ka ku itusisa Maroma. (Daniele 9:24-27; Joani 19:15) Bibele hape i bulela za ‘lizazi la Jehova,’ muta Mulimu a ka ‘lwanisa macaba kaufela.’ (Zakaria 14:1-3) Muapositola Paulusi na susumelizwe ki moya wa Mulimu ku talusa kuli lizazi leo li zamaelela ni nako ya ku ba teñi kwa Kreste, ye ne kalisize ka 1914, Jesu ha beiwa fa Bulena kwa lihalimu. (2 Matesalonika 2:1, 2) Lizazi la Jehova li taha li cibilika, kona libaka Lipaki za Jehova ha ba ketile liñolo le li bulela za taba yeo ku ba liñolo la silimo. Liñolo leo li tomile fa Zefania 1:14, mi li li: ‘Lizazi la Jehova le lituna li sutelezi.’

³ Lu swanela ku ba ba ba itukisize bakeñisa kuli lizazi la Mulimu le lituna li sutelezi. Mu kona ku itukiseza cwañi lizazi leo? Ki lifi ze ñwi ze mu swanela ku eza ha mu nze mu itukiseza lizazi la Jehova?

Mu Itukise

4. Jesu na itukiselize tiko mañi ye tuna?

⁴ Ha na bulela za ku fela kwa lifasi, Jesu Kreste na taluselize balutiwa ba hae kuli: “Mu itukise.” (Mateu 24:44) Jesu yena ha na bulela manzwi ao na itukiselize tiko ye tuna, ya ku fa bupilo bwa hae sina sitabelo. (Mateu 20:28) Lu kona ku itutañi ku Jesu ka mwa na itukiselize?

5, 6. (a) Ku lata Mulimu ni batu ku lu tusa cwañi ku itukiseza lizazi la Jehova? (b) Jesu na tomile mutala mañi wa ku lata batu ba bañwi?

⁵ Jesu na lata Jehova luli mi na lata ni likuka za hae. Maheberu 1:9 i bulela cwana ka za Jesu kuli: “U lata se si lukile, mi u toile bumaswe; kihona Mulimu, Mulimu wa hao, u ku tozize oli ya tabo, u fahalimu a balikani ba hao.” Jesu na lata Ndat’ahe wa kwa lihalimu, kona libaka ha na sepahalile ku yena. Haiba ni luna lu lata Mulimu ni ku mamela litaelo za hae, u ka lu sileleza. (Samu 31:23) Mi ku lata Mulimu ni ku mamela litaelo za hae ku ka lu tusa ku itukiseza lizazi la Jehova le lituna.

⁶ Jesu na zibahala ku ba mutu ya na lata batu. Na “ba utwela butuku, kakuli ne ba katezi, ba hasani, inge lingu ze si na mulisana.”  (Mateu 9:36) Kona libaka Jesu ha na kutalize taba ye nde kwa batu, sina fela lilato mo li lu susumeleza ni luna ku kutaza taba ya Mubuso kwa batu ba bañwi. Ku lata Mulimu ni batu ba bañwi ku lu tusa ku ba Bakreste ba ba tukufalezwi ni ku itukiseza lizazi la Jehova le lituna.—Mateu 22:37-39.

7. Ki kabakalañi ha lu kona ku ba ni tabo ha lu nze lu libelela lizazi la Jehova?

⁷ Jesu na tabela ku eza tato ya Jehova. (Samu 40:8) Haiba lu ba ni moya o swana, lu ka ikola ku sebeleza Mulimu. Mi sina Jesu, lu ka ba batu ba ba fana, ili nto ye ka lu tiseza tabo sakata. (Likezo 20:35) Ka niti luli “tabo ya [Muñ a] Bupilo ki ona mata a [luna].” Tabo yeo i ka lu tusa ku itukiseza lizazi le lituna la Mulimu.—Nehemia 8:10.

8. Ki kabakalañi ha lu swanela ku sutelela ku Jehova ka tapelo?

⁸ Ku lapela ka t’ata ku Mulimu ne ku tusize Jesu ku tiyela litiko. Na sweli ku lapela Joani ha na mu kolobeza. Jesu na lapezi busihu kaufela pili a si ka keta kale baapositola ba hae. (Luka 6:12-16) Mi ha ku na puzo kuli tapelo ya Jesu ye zwelela kwa pilu ya na lapezi fa busihu bwa mafelelezo a si ka bulaiwa kale i fita kwa lipilu za babali ba Bibele kaufela! (Mareka 14:32-42; Joani 17:1-26) Kana ni mina mwa lapelanga sina mwa na ezelize Jesu? Mu lapelange ku Jehova kamita, mu sa mata-mati, mu kupe ketelelo ya moya o kenile, mi mu latelele ketelelo ya ona. Ku ba ni silikani se sinde ni Ndat’a luna wa kwa lihalimu ki kwa butokwa kakuli lizazi la Mulimu le lituna li akufa ka lubilo. Kacwalohe, mu zwelepili ku sutelela ku Jehova ka tapelo.—Jakobo 4:8.

9. Ki kabakalañi ha lu swanela ku iyakatwa za ku kanyisa libizo la Jehova?

⁹ Jesu hape na bata ku kanyisa libizo la Jehova le li kenile, mi ona nto yeo ne i mu tusize ku tiyela miliko. Mane na lutile balateleli ba hae ku lapelanga ku Mulimu kuli: “Libizo la hao a li be le li kenile.” (Mateu 6:9) Haiba lu tabela hahulu kuli libizo la Jehova li kanyiswe kamba ku ngiwa ku ba le li kenile, lu ka lika ka t’ata ku sa eza nto ye ka shwaulisa libizo leo. Mi ku eza cwalo ku ka lu tusa ku ba ba ba itukiselize lizazi la Jehova le lituna.

Kana Mu Na Ni Fo Mu Tokwa ku Belekela?

10. Ki kabakalañi ha lu tokwa ku itekula?

¹⁰ Lizazi la Jehova ha ne li ka taha kamuso, kana luli ne mu ka ba ba ba itukisize? Mañi ni mañi wa luna u swanela ku itekula ku bona nji ku na ni mikwa ye miñwi ya swanela ku cinca. Bupilo bwa luna ki bo bu kuswani mi ha lu zibi ze ka lu tela kamuso, kacwalo kaufela luna lu swanela ku tona kwa moya ka zazi ni zazi. (Muekelesia 9:11, 12; Jakobo 4:13-15) Ha lu nyakisiseñi lika ze ñwi ze lu tokwa ku iseza mamelelo.

11. Ki sikonkwani mañi se mu itomezi sa ku bala Bibele?

 ¹¹ Sitopa sa “mutanga ya sepahala” si lu susuezanga ku bala Bibele ka zazi. (Mateu 24:45) Mu like ku itomela sikonkwani sa ku bala Bibele mwa silimo, ku kala kwa Genese ku yo li ti esi Sinulo ni ku yeya ze mu bala. Haiba mu bala likauhanyo ze ne ka zazi, mwa kona ku feza ku bala likauhanyo za Bibele ze 1,189 mwa silimo. Mulena kaufela ya na busa Isilaele na laezwi ku bala Mulao wa Jehova “mwa mazazi kaufela a bupilo bwa hae.” Ku bonahala kuli Joshua ni yena na mamezi taelo yeo. (Deuteronoma 17:14-20; Joshua 1:7, 8) Maeluda kaniti ba swanela ku balanga Linzwi la Mulimu ka zazi, kakuli ku eza cwalo ku ba tusa ku luta “tuto ye pilisa”!—Tite 2:1.

12. Ki lika mañi ze mu swanela ku eza ka ku bona kuli lizazi la Jehova li sutelezi?

¹² Mu swanela ku yanga kwa mikopano ya Sikreste kamita ni ku abana teñi ka mo mu konela kaufela ka ku bona kuli lizazi la Jehova li sutelezi. (Maheberu 10:24, 25) Ku eza cwalo ku ka mi tusa ku ba bashaeli ba Mubuso ba ba yeziseli, ba ba lika ku tusa batu ba ba ketezwi bupilo bo bu sa feli. (Likezo 13:48) Mwendi hape mu lemuhile kuli mu tokwa ku beleka ka t’ata mwa puteho inge cwalo ku tusa basupali ni ku susueza ba banca. Haiba mu eza cwalo mu ka ba ni tabo ye tuna luli!

Mo Mu Pilisanela ni Batu Ba Bañwi

13. Ki lipuzo mañi ze lu kona ku ipuza ka za ku apala mutu yo munca?

¹³ Kana mu swanela ku lika ka t’ata ‘ku apala mutu yo munca ya bupilwe ka siswaniso sa Mulimu mwa ku luka, ni mwa ku kena kwa niti’ ka ku bona kuli lizazi la Jehova li sutelezi? (Maefese 4:20-24) Ha mu nze mu lika ku bonisa tulemeno to tunde, ba bañwi ba ka lemuha kuli mu ‘zamaya ka moya wa Mulimu’ mi mu bonisa muselo wa ona. (Magalata 5:16, 22-25) Kana ku na ni lika ze mu ezize mina ni lubasi lwa mina ze bonisa kuli mu apezi mutu yo munca? (Makolose 3:9, 10) Ka mutala, kana mwa zibahala ku ba batu ba ba sishemo kwa balumeli ni batu ba bañwi? (Magalata 6:10) Ku bala Bibele kamita ku ka mi tusa ku ba ni tulemeno to tunde, mi mu ka ba ba ba itukiselize lizazi la Jehova.

14. Ki kabakalañi mutu ha swanela ku kupa moya o kenile ha nze a lika ku ba ni buiswalo?

¹⁴ Ku cwañi haiba mu lemuha kuli mu ba kacimacima mi mu tokwa hahulu buiswalo? Moya wa Mulimu o kenile wa kona ku mi tusa ku ba ni kalemeno kao. Kacwalo mu kupe moya o kenile, sina mwa na bulelezi Jesu kuli: “Mu kupe, mi mu ka fiwa; mu bate, mi mu ka fumana; mu ngongote, mi mu ka kwalulelwa. . . . Mbali mina ba ba na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.”—Luka 11:9-13.

15. Kiñi se mu swanela ku eza haiba mu shelana ni mulumeli yo muñwi?

¹⁵ Ku cwañi haiba mu shelani ni mulumeli yo muñwi? Haiba ku cwalo mu swanela ku lika ka t’ata kuli mu kutisane, mi nto yeo i ka tisa kozo ni swalisano mwa puteho. (Samu 133:1-3) Mu latelele kelezo ya Jesu ye kwa Mateu 5:23, 24 kamba Mateu 18:15-17. Haiba ne mu likelelwanga ki lizazi inge mu halifile, mu belekele fa bufokoli bo kabubebe-bebe. Hañata se si tokwahalanga fela ki ku itatela ku swalela. Paulusi na ñozi kuli: “Mu ezane ka musa, mu utwelane butuku, mu swalelane, sina Mulimu ni Yena h’a mi swalezi ka Kreste.”—Maefese 4:25, 26, 32.

16. Ba ba nyalani ba kona ku bonisana cwañi musa?

¹⁶ Fokuñwi mu tokwa ku ba ni musa ni ku swalelana mwa linyalo. Haiba mu lemuha kuli mu tokwa ku bonisa hahulu lilato ni musa ku be mu nyalani ni bona, mu belekele fa taba yeo ka ku kupa tuso ku Mulimu ni ku latelela kelezo ye mwa Linzwi la hae. Kana mu tokwa ku belekela fa kelezo ye kwa 1 Makorinte 7:1-5 kuli mu tiise linyalo la mina ni  ku tibela bubuki? Bo munna ni musali ba ba nyalani ba tokwa ku ‘ezana ka musa’ mwa taba ye.

17. Mutu ya ezize sibi se situna u swanela ku nga mihato mañi?

¹⁷ Ku cwañi haiba mu ezize sibi se situna? Mu kondise lika kapili-pili. Mu si liyehi ku kupa tuso kwa maeluda ba Sikreste. Litapelo za bona ni tuso ya bona li ka mi tusa ku tiya kwa moya hape. (Jakobo 5:13-16) Mu kupe swalelo ku Jehova. Haiba mu sa ezi cwalo lizwalo la mina li ka mi sisita mi mu ka ikutwa ku ba ni mulatu luli. Davida na ipumani mwa muinelo o swana wo, mi na angulukezwi luli ha sa ipulezi libi za hae ku Jehova! Davida na ñozi kuli: “U filwe mbuyoti mutu ya swalezwi ku fosa kwa hae, ya kwahelezwi libi za hae. U filwe mbuyoti mutu y’a sa mu bulukeli [Muñ’a] Bupilo bumaswe bwa hae, ya si na bupumi mwa pilu.” (Samu 32:1-5) Jehova u swalelanga libi za batu ba ba bakile ha buniti.—Samu 103:8-14; Liproverbia 28:13.

Mu Zwelepili ku Sa Ba Ba Lifasi

18. Mu swanela ku nga cwañi lifasi?

¹⁸ Kaniti luli mu nyolezwi ku pila mwa lifasi le linca la sepisize Ndat’a luna wa kwa lihalimu. Kono mu nga cwañi lifasi le li maswe la batu ba ba li kwahule ni Mulimu? Satani, yena “mulena wa lifasi,” na si na m’ata fahalimwa Jesu Kreste. (Joani 12:31; 14:30) Kaniti ni mina ha mu tabeli kuli Diabulosi ni lifasi la hae ba mi zamaise, kacwalo mu latelele kelezo ya muapositola Joani ye li: “Mu si ke mwa lata lifasi, nihaiba ze mwateñi mwa lifasi.” Ku eza cwalo ki kwa butokwa bakeñisa kuli “lifasi la fela, ni takazo ya lona; kono ya eza tato ya Mulimu u ina ku ya ku ile.”—1 Joani 2:15-17.

19. Mikulwani ba Sikreste ba susuezwa ku itomela likonkwani ze cwañi?

¹⁹ Kana mu sweli mwa tusa bana ba mina ku ‘ipabalela ku za lifasi ba si na koli’? (Jakobo 1:27) Satani u bata ku swasa bana ba mina sina fela batu mo ba swasezanga litapi. Likopano ze ñata ze li teñi kacenu li lukiselizwe ku kukueza ba banca kuli ba likanyise lifasi la Satani. Kono batanga ba Jehova bona ba mwa kopano i nosi fela ye ka punyuha lifasi le ha li ka fela. Kacwalo mikulwani ba Sikreste ba swanela ku susuezwa ku ba ni ze ñata za ku eza mwa “musebezi wa Mulena.” (1 Makorinte 15:58) Bashemi ba ba saba Mulimu ba swanela ku tusa bana ba bona ku itomela likonkwani ze ka ba tusa ku pila bupilo bo bunde bo bu tabisa Mulimu ni ku ba tusa ku itukiseza lizazi la Jehova.

Ze Mu ka Ikola Hamulaho wa Lizazi la Jehova Le Lituna

20. Ki kabakalañi ha lu swanela ku yeya za bupilo bo bu sa feli?

²⁰ Haiba mu zwelapili ku yeya za bupilo bo bu sa feli, ha mu na ku katala ku libelela lizazi la Jehova. (Juda 20, 21) Mu ka nyolelwa ku pila ku ya ku ile mwa Paradaisi mi nto yeo i ka mi tusa ku ba ni sepo ye tiile, mi mu ka susumezwa ku itomela likonkwani ze nde ni ku ituta ze ñata ka za Jehova. Mane mu ka kona ku zwelapili ku ituta za Jehova bakeñisa kuli batu kacenu ba ziba fela “ze kwatuko a linzila za hae.” (Jobo 26:14) Zeo ki lisepiso ze tabisa luli!

21, 22. Batu ba ba ka zusiwa kwa bafu ba ka mi lutañi, mi ki lifi ze mu ka ba luta ni mina?

²¹ Mwa Paradaisi, ba ba ka zusiwa kwa bafu ba ka lu kandekela lika ze ñata ze ne ezahezi  kwa kale. Enoke u ka lu taluseza ze ne mu tusize ku shaela lushango lwa Jehova kwa batu ba ba maswe ka bundume. (Juda 14, 15) Nuwe kaniti u ka lu taluseza mwa na yahezi aleka. Bo Abrahama ni Sara ba ka lu kandekela mo ne ba ikutwezi ha ne ba taluselizwe ku zwa mwa munzi o fumile wa Ure ni ku yo pila mwa litende. Mi Estere yena u ka lu taluseza mwa na yemezi batu ba hae ni ku palelwisa mulelo wa Hamani. (Estere 7:1-6) Mi mu nahane fela Jonasi ha ka kandeka mwa na tandezi mazazi a malalu mwa mba ya tapi ye tuna, ni Joani Mukolobezi ya ka talusa mwa na ikutwezi ha na kolobeza Jesu. (Luka 3:21, 22; 7:28) Kaniti luli lu ka ituta lika ze ñata ze tabisa!

²² Mwa puso ya Kreste ya Lilimo ze Sikiti, mwendi mu ka ba ni tohonolo ya ku tusa ba ba zusizwe kwa bafu ku “ziba za Mulimu.” (Liproverbia 2:1-6) Kwa tabisa luli kacenu ku bona batu ha ba ituta za Jehova Mulimu ni ku sebelisa ze ba ituta mwa bupilo! Kono mu nahane fela tabo ye mu ka ba ni yona muta Jehova a ka fuyola buikatazo bwa mina bwa ku luta batu ba ne ba pilile mwa linako za ikale ni ku ba bona ba itebuha litaba ze mu ba luta zeo!

23. Lu swanela ku ikatulela ku ezañi?

²³ Luna batu ba Jehova kacenu lu sweli lwa ikola limbuyoti ze ñata ze lu sa koni ku ziba ni palo ya zona. (Samu 40:5) Kono lu itebuha sihulu limbuyoti za kwa moya za sweli ku lu kapweka Mulimu. (Isaya 48:17, 18) Ku si na taba ni miinelo ya luna, haike lu zweleñipili ku sebeleza Mulimu ka pilu ya luna kaufela ha lu nze lu libelela lizazi la Jehova le lituna.

Ne Mu Ka Alaba Cwañi?

• ‘Lizazi la Jehova’ ki nto mañi?

• Mu kona ku itukiseza cwañi lizazi la Jehova?

• Ki licinceho mañi ze lu kana lwa tokwa ku eza ka ku bona kuli lizazi la Jehova le lituna se li li fakaufi luli?

• Mu talimezi ku ezañi kwapili hasamulaho wa lizazi la Jehova?

[Lipuzo za Tuto]

[Siswaniso se si fa likepe 12]

Jesu na itukiselize miliko

[Siswaniso se si fa likepe 15]

Ku tusa ba ba zusizwe kwa bafu ku ituta za Jehova i ka ba tohonolo ye tuna luli!