Komana Munadiloñeshi Kwinza Kwefuku Dayehova?
Komana Munadiloñeshi Kwinza Kwefuku Dayehova?
‘Ifuku daYehova deneni didi kwakwihi, didi kwakwihi, didi nakunyakala nankashi.’—ZEFWANIYA 1:14.
1-3. (a) Indi Bayibolu yahoshaña nawudi kutalisha hefuku daYehova? (b) ‘Ifukwinyi daYehova’ ditukatalañana nadu?
IFUKU daYehova deneni bayi neyi himaora 24 mukulehaku. Ilaña himpinji yayilehi mwakasompeshelayi antu atama. Antu abulaña kumukalakela Nzambi akafwa mutentu wanidi ifuku damwidima, dandombu, yihuñu, kukabakana nawa damahembi. (Isaya 13:9; Amosa 5:18-20; Zefwaniya 1:15) Wuprofwetu waYoweli wahosha nawu: “Yayo, o difuku! Muloña ifuku daYehova didi kwakwihi; dakenza neyi kujilumuka kukufuma kudi Chinaweji.” (Yoweli 1:15) Hela chochu, hanidi ifuku deneni, Nzambi wakaamwina antu “oloka mumuchima.”—Masamu 7:10.
2 Nhoshelu yakwila nawu “ifuku daYehova” yatalisha kuwunsompeshi waNzambi wahanañayi hampinji yashiyashana. Chakutalilahu, “ifuku daYehova” denjili hampinji yazatishiliyi Yehova eniBabiloni nakubabesha antu amuYerusalema mu 607 B.C.E. (Zefwaniya 1:4-7) Wunsompeshi wukwawu wamwekeni mu 70 C.E. hampinji yayizatishiluwu aRoma kudi Nzambi kubabesha muza wawaYudeya amukaanini Mwanindi. (Danyeli 9:24-27; Yowanu 19:15) Bayibolu niyena yashimuna “ifuku daYehova” ‘hakalwayi njita nanyuza yejima.’ (Zekariya 14:1-3) Kapostolu Pawulu amoneneni hakwesekeja idi ifuku nakumwekana kwaKristu, datachikili mu 1914 hampinji yamuswanyikiluwu Yesu kwikala Mwanta wamwiwulu. (2 Atesalonika 2:1, 2) Kushinshika hayuma yitunakumona yinakumwekesha nawu ifuku daYehova dinakunyakala nankashi, nsona yachaaka yawaYinsahu jaYehova ya 2007 yateleleli chikupu. Nsona yeniyi yashindameneni haZefwaniya 1:14, hahoshaña nawu: “Ifuku daYehova deneni didi kwakwihi.”
3 Chineli ifuku daNzambi deneni didi kwakwihi, ayinu diyi mpinji yakudiloñesha. Munateli kudiloñesha ñahi chineli idi ifuku dinakwinza? Yumanyi yikwawu yimwatela kwila yikuyikwashaku kudiloñesha kwinza kwefuku daYehova?
Diloñeshenu
4. Kwesekanyi kwasweja kwadiloñesheliyi Yesu kumona?
4 Muwuprofwetu windi wahosha hakukuma kwetuña, Yesu Kristu wayilejeli atumbanji twindi nindi: ‘Diloñeshenu.’ (Matewu 24:44) Hakuhosha awa mazu, Yesu yomweni wadiloñesheli kutalañana nakweseka kwasweja, kwakufwa neyi ifutu danyiloña damulambu. (Matewu 20:28) Chumanyi chitukudizilaku kutalisha hakudiloñesha kwaYesu?
5, 6. (a) Indi kumukeña Nzambi niantu kwatukwashaña ñahi kudiloñesha hakutalila ifuku daYehova? (b) Kutalisha hakukeña antuñi netu, chakutalilahwinyi chemikiliyi Yesu?
5 Yesu waswejeli kumukeña Yehova ninshimbi Jindi jaloña. Aheberu 1:9 yahosha hadi Yesu nawu: “Wunakeñi kuloña, wunaheli kuluwa; dichi Nzambi, yowu Nzambi yeyi, nakuwayishi manji akuluña chakubadika akwenu.” Hamuloña wakusweja kumukeña Tata yindi wamwiwulu, Yesu watwalekeluhu kwikala washinshika kudi yena. Ninetu, neyi tukumukeña Nzambi muniyi njila nikulondela nshimbi jindi, wakatupulwisha. (Masamu 31:23) Neyi twikala nakukeña kwamuchidiwu nikwovwahila, chikutukwashaku kudiloñesha kwinza kwefuku daYehova deneni.
6 Chililu cheneni chadiñayi nachu Yesu chadiñi chililu chakukeña antu. Eña, “hakuyitiyila wushona, muloña akabakeni, apalañeni neyi nyikoku yakadi kabiña.” (Matewu 9:36) Dichi, Yesu watachikili kushimwina nsañu yayiwahi kudi antu, neyi kukeña chikwatwileñelaña kushimwina nsañu yaWanta kudi antuñi netu. Kumukeña Nzambi niantuñi netu kwatukoleshaña neyi ankoñi awiniKristu. Ichi dichatukwashaña kudiloñesha hakutalila ifuku daYehova deneni.—Matewu 22:37-39.
7. Chitunakutalila ifuku daYehova, muloñadi chitwatela kwikalila namuzañalu?
7 Yesu watiyileña kuwaha kwila nkeñelu yaYehova. (Masamu 40:8) Neyi tukwikala nayitoñojoka yamuchidiwu, tukwikala namuzañalu hakumuzatila Nzambi mudimu wajila. Kufwana Yesu, tukusweja kuhana, nawa chumichi chikutuletela muzañalu chikupu. (Yililu 20:35) Eña, “muzañalu waYehova diyi ñovu [yetu].” Iwu muzañalu wukutwileñela kudiloñesha chiwahi hakutalila ifuku daNzambi deneni.—Nehemiya 8:10.
8. Muloñadi chitwatela kukundamina kwakwihi naYehova mukulomba?
8 Kulomba kudi Nzambi namukoyi kwamukwashili Yesu kudiloñesha kweseka kwachikuhwelelu chindi. Walombeleña nihampinji yakumupapatisha kudi Yowanu. Henohu kanda yatondi apostolu, Yesu wachishili wufuku wejima nakulomba. (Luka 6:12-16) Komana antu ejima atañaña Bayibolu hiyahizumukaña nakulomba kwakuwahi kwalombeliyi Yesu hawufuku wakukumisha wumi windi wahesekuku? (Maku 14:32-42; Yowanu 17:1-26) Komana mwalombaña mpinji yejima neyi chalombeleñayi Yesu? Lombenuña kudi Yehova, kulomba bayi kwikalaña kwalufuchi-lufuchuku, lombenu spiritu yajila yiyilomboli, nawa nyakalenu kwiteja wunlomboli weniwu neyi wunamwekani. Dichi twatela kwikala nawubwambu wakola naTata yetu wamwiwulu muyinu mpinji yakala chineli ifuku daNzambi deneni dinakunyakala kwinza. Dichi, bayi tushintajala kukundama kwakwihi naYehova mukulombaku.—Yakoba 4:8.
9. Indi kukeña kujilika ijina daYehova kwalema ñahi?
9 Chuma chikwawu chamukwashiluku Yesu kudiloñesha kumona kweseka muloña wakeñeli kujilika ijina daYehova dajila. Dihafumini hakuleja atumbanji twindi nindi hakulomba kudi Nzambi atela kuhosha awa mazu akulembelela akwila nawu: “Ijina deyi dijili.” (Matewu 6:9) Neyi tunakufwila chikupu netu ijina daYehova adijiliki, hela adilemeshi, tukufwila kutondolwela kwila yuma yejima yinateli kuleta kasawuntu hejina dindi. Chikufumamu, tukwikala adiloñesha kumona ifuku daYehova deneni.
Komana Mwatela Kuhimpa Muyuma Yikwawu?
10. Muloñadi chichawahila kushinshika hanshakaminu yetu?
10 Neyi ifuku daYehova dinza kumadiki, komana dikatuwana tunadiloñeshi chikupu? Wonsu wetu twatela kudishinshika hamuntu hamuntu kulonda tumoni neyi twatela kuhimpa muyililu hela muyitoñojoka yetu. Wonsu wetu twatela kusoñama lwakuspiritu mpinji yejima muloña tuneluki netu chihandilu chawantu makonu chakapinji kantesha nawa chakujinoka. (Mukwakutaŋisha 9:11, 12; Yakoba 4:13-15) Dichi twayenu tutali hayuma yimu yitwatela kushaku kashinshi mukuhanda kwetu.
11. Chikonkwanyinyi chimunemiki chakutaña Bayibolu?
11 Chuma cheneni chitwatela kushaku kashinshi hikulondela kufumba kwahanaña ‘nduñu wakashinshi’ kwakutaña Bayibolu ifuku niifuku. (Matewu 24:45) Munateli kwimika chikonkwanyi chakutaña Bayibolu yejima kufuma hamukanda waKutachika ndo-o nikuChimwekeshu kamu hachaaka nikwikala nampinji yakutoñojokahu. Neyi mukutañaña tupetulu tuwaana hefuku, munateli kumanisha tupetulu twamuBayibolu 1,189 muchaaka chimu. Mwanta wejima wamuIsarela amulejeli kutaña Nshimbi jaYehova “mafuku indi ejima akahandayi.” Hekwawu niYoshuwa dicheliliyi. (Kuhituluka 17:14-20; Yoshuwa 1:7, 8) Komana aeluda muchipompelu atela kutañaña Izu daNzambi ifuku niifuku, muloña chikuyikwashaku kushimuna ‘nsañu yakoleshaña’!—Titusa 2:1.
12. Chumanyi chimwatela kwila chineli ifuku daYehova didi kwakwihi?
12 Chineli ifuku daYehova didi kwakwihi datela kutuletesha kuwanikaña kukupompa kwawiniKristu mpinji yejima nikuhoshañahu nankashi. (Aheberu 10:24, 25) Kwila mwenimu kukuyikwashaku kuwahisha ntañishilu yenu hamu neyi mukwakushimwina waWanta wunakufwila kuwana nikukwasha antu afuukwilawu dehi kumona wumi wahaya nyaka. (Yililu 13:48) Hekwawu mukwikala adikita nankashi munyidimu yikwawu yamuchipompelu, yidi neyi kukwashaku atushinakaji nikukolesha atwansi. Nyidimu yeniyi yinateli kuyiletela muzañalu hama!
Chimwatiyashanaña Nawakwenu
13. Malwihwinyi yitwatela kudihula kutalisha hakuvwala muntu wamwiha?
13 Chineli ifuku daYehova didi kwakwihi, komana kwila muzata nañovu kulonda ‘muvwali muntu wamwiha aleñeluwu mwekalilayi Nzambi mukuloña nakujila kwansañu yalala’ nehi? (Aefwesesa 4:20-24) Chimukumwekeshaña yililu yidi neyi yamwekeshañayi Nzambi, antu akwiluka nawu ‘anakuyendesha kudi spiritu yaNzambi’ nawa munakusoña nyikabu yachu. (Aŋalija 5:16, 22-25) Munateli kutenahu yuma yimunakoñi nichisaka chenu yinakumwekesha nawu munavwali muntu wamwiha? (Akolose 3:9, 10) Chakutalilahu, komana ayiluka nawu mwelilaña akwenu eniKristu niantu acheñi kakawahi? (Aŋalija 6:10) Kudiza Bayibolu mpinji yejima kukuyikwashaku kwikala nayililu yamwekeshañayi Nzambi yikuyileñelenu kutalila ifuku daYehova.
14. Muloñadi muntu chinateli kulombelayi spiritu yajila hampinji yinakukeñayi chililu chakudihemba?
14 Indochu neyi mwazuwaña swayi nawa muneluki nenu mwatela kudiyula chikupu? Ichi chililu chidi hakachi kanyikabu yinateli kusoña spiritu yajila yaNzambi mudenu. Dichi, lombenu spiritu yajila, kwesekeja nachahosheliyi Yesu nindi: ‘Lombenuña akuyinka; keñakeñenu mukuwana; dondomwenenu akuyenzulwila. . . . Dichi neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’—Luka 11:9-13.
15. Chumanyi chimwatela kwila neyi hadi kukala hakachi kenu namukwenu mukwakwitiya?
15 Twili netu hadi kukala hakachi keyi namukwenu mukwakwitiya. Neyi chidi mwenimu, zatenu nañovu kulonda mutachiki kutiyañana. Ichi chikuleta kuwunda nikunuñañana muchipompelu. (Masamu 133:1-3) Zatishenu kufumba kwaYesu kwasonekawu haMatewu 5:23, 24 hela Matewu 18:15-17. Neyi mwalekaña itañwa nakuhuma iku saña mwahilila, nyakalenu kumanisha nsañu. Hakwila mwili mwenimu, kakavulu chakeñekaña kudanakena. Pawulu wasonekeli nindi: “Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.”—Aefwesesa 4:25, 26, 32.
16. Munjilanyi wushona muwakeñekelaña mumaluwi?
16 Kukala kwamumaluwi kwakeñekaña eyala namumbanda kwikala namuchima wawushona, mpinji yikwawu nikudanakena. Neyi munakukeña kumwekesha kukeña niwushona kudi mwinikwenu, zatenu nañovu kulonda mwili mumunafuukuli nawukwashu waNzambi Niizu dindi. Komana kudihu chuma chimwatela kwila chikwendela hamu na 1 Akorinda 7:1-5 kulonda mubuli kusweja kuneña nikubula kuluwalala? Eñañi, iyi diyi mbadi yinakukeñeka eyala namumbanda kwikala “namuchima wawushona.”
17. Yumanyi yitwatela kwila neyi muntu navulumuni chikupu?
17 Chumanyi chimwatela kwila neyi munavulumuni nankashi? Mwatela kumanisha nsañu chakadi kulabajala. Lombenu wukwashu kudi aeluda awiniKristu. Kulomba kwawu nikufumba kwawu kukuyikwashaku kwikala nawuspiritu wawuwahi. (Yakoba 5:13-16) Lombenu kudi Yehova namuchima wakudanakena. Neyi himukwila mwenimuku mukwendaña nachikela hohu nawa chinleji chikuyikabishaña. Davidi wamweni kukala kwamuchidiwu, ilaña muchima windi wazañaleli hampinji yadanakeneniyi kudi Yehova! Davidi wasonekeli nindi: “Nakooleki yenowu anaanakenuwu muloña windi, anabutiluwu nshidi yindi. Nakooleki yenowu muntu akabula kwinkawu muloña wakuluwa kudi Yehova, hakweti makasu muspiritu yinduku.” (Masamu 32:1-5) Yehova wanakenaña antu avulumunaña ilaña adanakenaña chikupu.—Masamu 103:8-14; Yishimu 28:13.
Bayi Mwikalaña Ampata yaMunu Mwishinaku
18. Adinu ituña twatela kudimona ñahi?
18 Chakadi kujinoka munakutalila ituña dadiha dadiwahi datukanayi Tata yetu wamwiwulu. Hanu dinu, mwadimonaña ñahi ituña dawantu atama adikañaña naNzambi? Satana, “mwanta wayulaña mpata yamunu mwishina,” hatwesheli kumushinda Yesu Kristuku. (Yowanu 12:31; 14:30) Anenu nawa himunakukeña Diyabolu niituña dindi ayishinduku, dichi tiyililenu mazu akapostolu Yowanu akwila nawu: “Bayi mukeña mpata yamunu mwishina, hela yuma yamunu mwishinaku.” Iku hikufumba kwakuwahi, muloña “mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.”—1 Yowanu 2:15-17.
19. Yikonkwanyi yamuchidinyi yinayikonkomwenuwu atwansi awiniKristu kwimika?
19 Komana munakukwasha anyanenu ‘kudihemba kuchina kusampukila kuyuma yampata yamunu mwishina’? (Yakoba 1:27) Satana nakukeña kulowa anyanenu neyi chalowañayi chibinda chanshi. Kudi makilabu ashiyashana nimazanvu amakwawu atuñawu kulonda kukokola nachu atwansi ekali kabadi kadinu ituña daSatana. Ilaña ambuña aYehova akundama dehi kukuloñesha kumu hohu kukahanuka hakukuma kwadinu ituña datama. Dichi mwatela kuyikolesha atwansi awiniKristu kulonda ‘asweji kukalakala mumudimu waMwanta.’ (1 Akorinda 15:58) Anvwali amwakamaña Nzambi atela kukwasha anyanawu kwimika yikonkwanyi yikuletela anyana muzañalu ninshakaminu yayiwahi yamulemeshaña Nzambi nawa yikuyikwasha kudiloñesha hakutalila ifuku daYehova.
Talenu Yuma Yidi Kumbidi Yefuku daYehova
20. Muloñadi chitwatela kutoñojokelaña hakwikala nawumi wahaya nyaka?
20 Mukutwesha kutalila ifuku daYehova mukuwunda neyi mwikala nachikuhwelelu chakwikala nawumi wahaya nyaka. (Yuda 20, 21) Mwatalilaña kwikala nawumi wahaya nyaka muParadisa, dikwila nawu mwatoñojokaña kwikala cheñi nañovu jakuwukwenzi nikwikala nampinji yeneni yakwila yuma yayiwahi nikwiluka yuma yayivulu hadi Yehova. Mukatwalekahu nakudiza hadi Nzambi haya nyaka muloña chakatataka antu eluka hohu “yuma yakumpumpu yanjila jindi.” (Yoba 26:14) Yenoyu yuma yitunakutalila okuwaha!
21, 22. Mpanji yamuchidinyi yimwakahanjekaña nawantu akasañuka?
21 MuParadisa, antu akasañuka akatachika kutwanukisha nsañu yakunyima yitweluka. Enoki wakatulumbulwila chekaliliyi nawulombu wakushimwina nsañu yaYehova kudi antu atama. (Yuda 14, 15) Nowa wukatulumbulwila yuma yamwekeni hakutuña watu. Abarahama niSara akatuleja chatiyiluwu hakushiya mahetawu muUri nakuya nakushakama mumatenti. Toñojokenu hadi Esita chikatulumbulwilañayi chahakwililuku antaña jindi nichafuñunwiniyi kafuta kaHamani kakuyijilumuna. (Esita 7:1-6) Toñojokenu cheñi hadi Yona hakushimuna mujimbu washakaminiyi mwivumu danshi muneni hadi mafuku asatu hela kutiya chatoñojokeliyi Yowanu Mpapatishu hakumupapatisha Yesu. (Luka 3:21, 22; 7:28) Komana twakeluka yuma yayiwahi yayivulu chikupu!
22 MuChiyulu chaKristu chaYaaka Ikombakaji Dimu, mukekala nakukooleka kwakudizisha antu akasañuka kushika ‘hakumwiluka Nzambi.’ (Yishimu 2:1-6) Makonu, tunakuzañalala hakumona antu anakudiza hadi Yehova Nzambi nikwila munakuyilejayi. Dichi toñojokenu hamuzañalu wumwakatiya kumbidi chikela Yehova nakiswili dehi mudimu wenu wakudizisha antu adiñaku kunyima nawa aneteji chikupu!
23. Chumanyi chitwatela kufwila kwila?
23 Yuma yayiwahi yitunakudiluñisha hamu neyi antu jaYehova hitukutwesha kuyichinda hela kuyesekeja nakubula kuwanina kwetuku. (Masamu 40:5) Twaswejaña kusakilila hayuma yatwinkañayi Nzambi yakuspiritu. (Isaya 48:17, 18) Hichikweti muloña nachidi nshakaminu yetuku, twayenu tukalakali mudimu wajila namuchima wejima hampinji yitunakuhembelela ifuku daYehova deneni.
Mukwakula Nenudi?
• Indi “ifuku daYehova” hichumanyi?
• Mukumwekesha ñahi nenu munadiloñeshi kutalila ifuku daYehova?
• Chineli ifuku daNzambi didi kwakwihi, yumanyi yitwatela kuhimpa?
• Yumanyi yimwakeñaña nenu mwakamoni neyi ifuku daYehova dinahiti dehi?
[Malwihu aKuzatisha haKudiza]
[Mwevulu wudi hefu 14]
Yesu wadiloñesheli chikupu kumona kweseka
[Mwevulu wudi hefu 17]
Kwenoku kukooleka kutukekala naku kwakudizisha antu akasañuka kumwiluka Yehova!