Kwoj Bojak Ke Ñan Ran eo An Jehovah
Kwoj Bojak Ke Ñan Ran eo An Jehovah
“Ran eo elab an Iroij ebak, elukkun ebak im emõkajtok!”—ZEPHANIAH 1:14.
1-3. (a) Ta eo Bible ej ba kin ran eo an Jehovah? (b) Ta “ran eo an Jehovah” jenaj jelmaiki?
RAN eo an Jehovah ejjab baj 24 awa aetokin wõt. Ej juõn ien eaetok ñe Anij ej ekajete ri nana ro. Ewõr an ro rejjab karejar ñan Jehovah unin ñan mijak ran eo emarok, illu, illu ebwil, eñtan, im jorrãn. (Aiseia 13:9; Amos 5:18-20; Zephaniah 1:15) “Ran eo an Iroij ebaktok,” kanan eo an Joel ear ba, “Ran eo Anij Ekajur Bõtata enaj bõktok jorrãn. Ejemlam naj lab lelñoñ ilo ran eo!” (Joel 1:15) Bõtab, ilo ran eo, Anij enaj lomoren ro ‘rejime ilo burueir.’—Sam 7:10.
2 Nan in “ran eo an Jehovah” ej jerbal ñan ien ko ke Anij ear kajejjet ekajet eo an ilo jet ien ko. Ñan wanjoñok, “ran eo an Jehovah” ear itok ilo 607 B.C.E ke ear kajerbal Ri Babylon ro ñan kokkure ro rar jokwe ilo Jerusalem. (Zephaniah 1:4-7) Bar juõn ien ekajet eo ear walok ilo 70 C.E. ke Anij ear kajerbal Ri Rome ro ñan ekajete ailiñ an Ri Jew ro me rar karmijete Nejin. (Daniel 9:24-27; Jon 19:15) Bible eo ej bareinwõt kanan kin juõn “ran eo an Jehovah” ñe enaj ‘tarinaik aolep lõl [ailiñ] ko.’ (Zechariah 14:1-3) Iumin kakõrmol an Anij, ekkar ñan ri jilek Paul ran in ear ekkejel ibben bed eo an Christ, me ear jinoe ilo ien eo kar kairoij Jesus einwõt King eo ilañ ilo 1914. (2 Dri Tessalonika 2:1, 2) Kinke menin kamol ko rej bed ibelakid bwe ran eo an Jehovah ebaktok, elap an kar ekkar unin tel in yiõ eo ñan 2007. Ej bedbed ion Zephaniah 1:14, ijo ej ba: “Ran eo elab an Iroij ebak.”
3 Kinke ran eo elap an Anij ebak, kiõ ej ien eo bwe kwon bojak wõt. Ewi wãwen kwomaroñ bojak ñan ran eo? Ebar wõr ke men ko kwoj aikwij in kõmmani bwe kwon bojak wõt ñan ran eo an Jehovah?
Kwon Bojak Wõt
4. Ta melejoñ eo elap Jesus ear bojak kake?
4 Ilo kanan eo an ikijen jemlokin jukjuk im bed eo, Jesus ear ba ñan ri kalor ro an: ‘Komin pojõk.’ (Matu 24:44) Ke Jesus ear ba nan kein, ear make bojak ñan juõn melejoñ elap—mij eo an einwõt katok in binmour eo. (Matu 20:28) Ta eo jemaroñ katak jen wãwen eo Jesus ear keboj e make?
5, 6. (a) Ewi wãwen yokwe Anij im armij ro rej jibañ kij bwe jen bojak wõt ñan ran eo an Jehovah? (b) Ikijen yokwe ri turid, ta joñok eo Jesus ear likiti?
5 Jesus ear yokwe Jehovah im kien ko An rewãnik kin aolepen buruen. Ikijen Jesus, Dri Hibru 1:9 ej ba: “Kw’ar yokwe kwojarjar im Kw’ar drike nana, inem Anij, am Anij, E ar kabit Yuk kin dren in kamõnõnõ im eutiej jen ro ibõm.” Kinke ear yokwe Jemen ilañ, Jesus ear kejbãrok an tiljek wõt ñan e. Elañe ewõr ibbed ejja yokwe eo wõt ñan Anij im mour ekkar ñan kien ko an, enaj kejbãrok kij. (Sam 31:23) Yokwe im bokake rot in enaj jibañ kij bwe jen bojak wõt ñan ran eo an Jehovah.
6 Yokwe armij kar kadkad eo elap kadkadin Jesus Christ. Emol, “ej tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Matu 9:36) Kin men in, Jesus ear kwalok nan kin news eo emõn ñan armij ro, einwõt yokwe ej kamakit kij ñan kwalok ennan eo kin Ailiñ eo ñan ri turid. Yokwe Anij im ri turid ej kõmman bwe jen kijejeto einwõt Christian ri karejar ro im ilo wãwen in ej jibañ kij bwe jen bojak wõt ñan ran eo an Jehovah.—Matu 22:37-39.
7. Ñe jej kõttar kin ran eo an Jehovah, etke jemaroñ lañliñ?
7 Jesus ear lañliñ ñan kõmanman ankil an Jehovah. (Sam 40:8) Elañe ewõr ibbed ejja lemnak in wõt, jenaj lo mõnõnõ in jerbal ñan Anij. Einwõt Jesus, jenaj mõnõnõ in lelok, im men in enaj lukkun kamõnõnõik kij. (Jerbal 20:35) Aet, “lõñliñ in Jeova ej [ad] kajur.” Kin lañliñ rot in, jenaj bojak wõt ñan ran eo an Anij.—Nihimaia 8:10.
8. Etke jej aikwij ruaklok ñan Jehovah ilo jar?
8 Jar jen aolepen buruen ear jibañ keboj Jesus kin melejoñ ko kin tõmak eo an. Ear jar ke John ear baptais e. Jesus ear jar aolepen boñin eo mokta jen an kar kãlet ri jilek ro an. (Luk 6:12-16) Jabdewõt eo ear read Bible enaj bwilõñ kin jar eo an Jesus jen aolepen buruen ilo boñin eo eliktata in an mour ion lal. (Mark 14:32-42; Jon 17:1-26) Ekkã am jar ke einwõt Jesus? En emakijkij am kebak Jehovah, jab ekaiuriur ilo am jar, bukõt tel eo jen jitõb kwojarjar im kwon mõkaj ñan bõk tel in ñe ealikar. Juõn kõtan ebak ibben Jemed ilañ eaorõk ilo ien in ekauwatata, ñe ran eo elap an Anij emõkaj an itok. Inem, ej menin aikwij bwe jen jab rumij ñan ruaklok ñan Jehovah ilo jar.—Jemes 4:8.
9. Ewi aorõkin itoklimo eo ad kin kokwojarjar in ãt eo etan Jehovah?
9 Itoklimo kin kokwojarjar in ãt eo etan Jehovah ear bareinwõt jibañ Jesus bwe en bojak kin melejoñ ko ear jelmaiki. Ilo mol, ear katakin ri kalor ro an bwe jar ko air ñan Anij ej aikwij kobaik nan kein: “En kwojarjar Etõm.” (Matu 6:9) Elañe jej lukkun kõnan bwe ãt eo etan Jehovah en kwojarjar, ak men eo rej watõke einwõt eaorõk, jenaj kate ñan jer jen jabdewõt men me enaj kattone. Tokjen men in, enaj emõnlok ad bojak ñan ran eo an Jehovah.
Kwoj Aikwij ke Kõmman Oktak Ko?
10. Etke ej ekkar ñan etale mour eo ad?
10 Elañe ran eo an Jehovah ej itok ilju, kwonaj bojak ke? Kij kajjojo jej aikwij in etale mour eo ad ñan lale elañe jej aikwij kajimweiki jabdewõt jerbal ak lemnak ko. Kin an kadu mour an armij im jejaje ilju eo ad, kij aolep aikwij ekkõl wõt kajjojo ran kin men ko lor jitõb. (Ekklisiastis 9:11, 12; Jemes 4:13-15) Inem jen etale jet men ko me jemaroñ aikwij in kõmmane ilo mour ko ad.
11. Ta mejenkajjik eo am ñan read Bible?
11 Juõn men eaorõk ej nan in kakkõl eo an “dri korijer e tiljek” ñan read Bible eo kajjojo ran. (Matu 24:45) Kwomaroñ kõmman am mejenkajjik ñan read im kalmenlokjen kake Jeje ko ilo juõn alen kajjojo yiõ jen Jenesis ñan Reveles̃õn. Ilo am read emen chapter kajjojo ran, kwomaroñ read aolep 1,189 chapter ko ilo Bible eo iumin juõn yiõ. Kajjojo king an Israel ear aikwij in read Kien ko an Jehovah “ran otemjej in mour eo an.” Ealikar bwe Joshua ear bar kõmman eindein. (Duteronomi 17:14-20; Joshua 1:7, 8) Ej menin aorõk bwe elder ro ilo congregation eo ren read Nan in Anij kajjojo ran, kinke men in ej jibañ ir ñan lelok “katak eo ejime”!—Taitõs 2:1.
12. Kinke ebak ran eo an Jehovah, men in ej aikwij kamakit yuk ñan kõmman ta?
12 Kinke ebak ran eo an Jehovah, men in ej aikwij kamakit yuk ñan keini am bed ilo kwelok ko an Christian im bõk kunam joñan wõt am maroñ. (Dri Hibru 10:24, 25) Kin am kõmman eindein enaj jibañ yuk ñan kakõmõnmõnlok kabel eo am einwõt juõn ri keañ kin Ailiñ eo me ej bukõt im jibañ armij ro rewãnik ñan bõk mour indio. (Jerbal 13:48) Bõlen kwomaroñ kalaplok am kijejeto ilo congregation eo ilo wãwen ko jet bareinwõt, einwõt ilo am jibañ ritto ro im rejañ jodikdik ro. Jibadbad kein emaroñ lap an kajuburu!
Kõtan eo Am Ibben Ro Jet
13. Ta kajitõk ko jemaroñ kajitõkin kij make kin kõnak armij ekãl?
13 Kinke ran eo an Jehovah ebojak in walok, kwoj ke aikwij kalaplok am kate yuk ñan “kõnõk armij ekal, eo ekar ñõn Anij emwij kõmõne ekal ilo wãnik im kwojarjar in mol”? (Dri Epesõs 4:20-24) Ñe kwoj kaddeklok kadkad ko me Anij ej kwalok kake, ro jet renaj lo bwe kwoj ‘etetal kin Jitõb in Anij’ im kwalok leen ko an. (Dri Galetia 5:16, 22-25) Ewõr ke men ko me emwij am im family eo am kõmmani ñan kõnak armij ekãl? (Dri Kolosse 3:9, 10) Ñan wanjoñok, rej jelã ke kajjiõm einwõt juõn eo ej kõmman men ko rejoij ñan ri tõmak ro mõttam im ro jet? (Dri Galetia 6:10) Elañe ekkeini am katak Jeje ko enaj jibañ yuk kaddek kadkad ko Anij ej kwalok kaki me enaj kõmman bwe kwon bojak ñan ran eo an Jehovah.
14. Etke juõn armij ej aikwij in jar kin jitõb kwojarjar ñe ej kaddeklok jatõr?
14 Ta elañe emõkaj am illu im kwoj kile bwe elaplok am aikwij jatõr? Kadkad in ej mõttan leen ko me jitõb kwojarjar eo an Anij emaroñ kaddek iloam. Inem, jar kin jitõb kwojarjar, ilo errã ibben nan ko an Jesus: “Kajjitõk, im kom naj bõke; kabbukõt, im kom naj loe; kallallal, im aor enaj bellok ñõn kom. . . . Meñe kom ri nana, ak kom jelã lelok men ko remmõn ñõn ro nejimi. Innem enaj kanuij lablok an Jememi ilõñ lelok Jitõb Kwojarjar ñõn ro rej kajjitõk ibben.”—Luk 11:9-13.
15. Ta eo kwoj aikwij in kõmmane elañe illu nae don ej bed ikõtam im juõn ri tõmak mõttam?
15 Ta elañe illu nae don ej bed ikõtam im juõn ri tõmak mõttam. Ñe eindein, kwon kate yuk ñan kamadmõde abañ eo ikõtamiro, ilo wãwen in kwoj kowõnmanlok ainemõn im burukuk eo an congregation. (Sam 133:1-3) Jerbale nan in kakabilek eo an Jesus einwõt an jeje kake ilo Matu 5:23, 24 ak Matu 18:15-17. Elañe kwoj kõtlok bwe al en tulok ion am illu, mõkaj im kajimweiki abañ ko. Ekkã an walok bwe men eo wõt jej aikwiji ej bwe jen mõnõnõ in jolok bwid. Paul ear jeje: “Komin joij im emmõn buruõmi ñõn dron; komin jolok an dron bwid einwõt Anij ear jolok ami bwid ilo Christ.”—Ephesus 4:25, 26, 32.
16. Ilo wãwen et ko joij ej menin aikwij eo ilo mour in belele?
16 Ej aikwij wõr joij ilo kõtan eo an leo im lio ri belele im jen ien ñan ien, jolok an don bwid. Elañe kwoj aikwij kalaplok am yokwe im joij ñan ri belele eo mõttam, kwon kate wõt im bõk jibañ jen Anij im Nan eo an ñan kõtõbrak mejenkajjik in. Ewõr ke juõn menin aikwij ibbam ñan bokake 1 Dri Korint 7:1-5 bwe en kõmõnmõnlok kõtan eo ñan debij wõt am tiljek? Emol bwe ej juõn menin aikwij bwe leo im lio ri belele ren kwalok joij ak ‘emõn burueir.’
17. Ta buñten nee ko juõn ej aikwij in kõmmane elañe ear kõmman juõn jerawiwi elap?
17 Ta elañe kwar kõmman juõn jerawiwi elap ilo jet wãwen ko? Bõk buñten ne ko ñan kajimweiki ilo mõkaj. Aet, bukõt jibañ jen Christian elder ro. Jar ko im nan in kakabilek ko air renaj jibañ yuk ñan bar kejmour mour in jitõb eo am. (Jemes 5:13-16) Jar ñan Jehovah kin juõn lemnak in ukwelok. Likjap in kõmman men in enaj likit ilo buruõm juõn eñjake bwe ewõr ruõm im juõn bõklikit eabõnõnõ. Emwij an David iione eñjake rot in, ak ear lap an emõn kainemõn eo jen Jehovah ke ear kwalok bwid eo an! David ear jeje: “Emõnõnõ eo emwij jolok bwir eo an, im kalibubu an kõmõn nana. Emõnõnõ armij eo Jeova e jab watõk jerawiwi ñõn e, im ilo buruen ejelok mon.” (Sam 32:1-5) Jehovah ej jolok bwid an ro rej jerawiwi ak emol air ukwelok.—Sam 103:8-14; Jabõn Kennan Ko 28:13.
Kejbãrok bwe Kwon Jab Mõttan Lal
18. Ewi wãwen kwoj aikwij watõk lal in?
18 Ejelok bere bwe kwoj reimanlok ñan kallimur eo emõn an Jemed ilañ kin lal eo ekãl. Inem, ewi wãwen kwoj watõk lal in me armij ro rejjab wãnik im rej jenolok jen Anij? Satan, “iroij in lõl in,” ejelok an kar maroñ ion Jesus. (Jon 12:31; 14:30) Ejelok bere bwe kwojjab kõnan bwe Devil im lal eo an ren kajur iom, inem kwon bokake nan ko an ri jilek John: “Komin jab yokwe lõl ak men ko ilo lõl.” Men in ej ial in meletlet, kinke “lõl e jokolok im mõm ko an: a eo ej kõmõnmõn ankil an Anij ej berwõt in drio.”—1 Jon 2:15-17.
19. Christian jodikdik ro rej aikwij kõmman kain rot mejenkajjik ko?
19 Kwoj ke jibañ ajiri ro nejõm bwe ren “drebij e im jab lipjinjin kin lõl in”? (Jemes 1:27) Satan ekõnan kojeke ajiri ro nejõm einwõt juõn emaan ej kojek ek ko. Jet dolul in armij ro rej kõmman bwe jodikdik ro ren lemnak bwe emõn ñan air mõttan lal eo an Satan. Ak ri karejar ro an Jehovah rej mõttan dolul eo wõt me enaj ellã jen jemlokin jukjuk im bed in. Inem rej aikwij rejañ Christian jodikdik ro bwe ren niknik wõt “ien otemjej ilo jerbal an Iroij.” (1 Dri Korint 15:58) Ro jemen im jinen rej karejar ñan Anij rej aikwij in jibañ ajiri ro nejiir ñan kõmman mejenkajjik ko me renaj lelok juõn mour emõnõnõ im jinekjej im ej nebar Anij im jibañ ir ñan bojak wõt ñan ran eo an Jehovah.
Reimanlok ñan Ran ko Elikin Ran eo an Jehovah
20. Etke jej aikwij in lemnak kin mour indio?
20 Kwonaj maroñ kõttar ñan ran eo an Jehovah kin juõn buru eainemõn elañe kwoj lemnak kin mour indio. (Jud 20, 21) Kwoj reimanlok ñan mour indio ilo Paradise, kin men in ewõr am kejatdikdik bwe kwonaj kajur einwõt jodikdik im ien ko ejelok jemlokin ñan jibadõk mejenkajjik ko remõn im kalaplok am katak kin Jehovah. Kwomaroñ wõnmanlok im katak kin Anij ñan indio kinke men ko me armij ro rainin rejelã kake rej “jijidrik in ial ko An.” (Job 26:14) Ej kejatdikdik eo ekairujruj!
21, 22. Ta bwebwenato eo emaroñ walok ikõtam im ro renaj jerkakbiji?
21 Ilo Paradise, ro renaj jerkakbiji remaroñ kamelele kin ien ko remotlok. Enoch enaj bed ijo ñan kamelele kin ewi wãwen ear wõr an beran ñan keañ kin ennan eo an Jehovah ñan armij ro rejjab karejaran Anij. (Jud 14, 15) Ejelok bere bwe Noah enaj bwebwenato kin ewi eñjake eo an ke ear kalek wa eo. Abraham im Sarah remaroñ kamol ewi wãwen air eñjake ke rar illok jen mour eo emõn ilo Ur im jokwe ilo imõn kabbed ko. Lemnak kin Esther ñe ej bwebwenato kin wãwen an kar jojomare armij ro an im kabõjrak karõk eo Haman ear kõmmane nae ir. (Ester 7:1-6) Lemnak kin Jonah ñe ej bwebwenato kin an kar bed iloan lojen ek eo ekilep iumin jilu ran ko ak John ri Baptais eo ñe ej kwalok ewi eñjake eo an ke ear baptaise Jesus. (Luk 3:21, 22; 7:28) Men kein rej kaitoktoklimo ñan katak!
22 Iumin Juõn Thousand Yiõ in Iroij eo an Christ, emaroñ wõr am jerammõn ñan jibañ ro renaj jerkakbiji bwe ren bõk “jelalokjen kin Anij.” (Jabõn Kennan Ko 2:1-6) Rainin, jej mõnõnõ ñan lo an armij ro rej bõk jelãlokjen kin Jehovah Anij im jerbale! Ak lemnak kin lañliñ eo am ilo ien eo ej itok ñe Jehovah ej kajerammõn yuk kin kate eo am ñan katakin armij ro rar mour ien ko remotlok im rej uak kin buru elap an kamolol!
23. Ta eo jej aikwij beek ilo burued?
23 Joñan an lap jerammõn ko jen Jehovah jejjab maroñ bwini. (Sam 40:5) Elaptata, jej kamolol kin menin letok ko ilo jitõb an Anij. (Aiseia 48:17, 18) Jekdon ta bed eo ad, jen jerbal kin aolepen burued ilo jerbal eo an Anij ñe jej kõttar ran eo elap an Jehovah.
Ewi Wãwen Am Naj Uak?
• Ta in “ran eo an Jehovah”?
• Ewi wãwen kwomaroñ bojak wõt ñan ran eo an Jehovah?
• Kinke ran eo elap an Jehovah ebak, ta oktak ko jej aikwij in kõmmane?
• Ta eo kwoj reimanlok kake ñe emwij an itok ran eo an Jehovah?
[Kajitõk ko ñan katak]
[Pija ilo page 14]
Jesus ear bojak kin melejoñ ko
[Pija ilo page 17]
Enaj menin jerammõn ñan jibañ ro renaj jerkakbiji ñan bõk jelãlokjen kin Jehovah!