Kua Mautauteute Nakai a Koe ma e Aho a Iehova?
Kua Mautauteute Nakai a Koe ma e Aho a Iehova?
“Kua tata mai e aho lahi a Iehova, kua tata mai ni, kua fakaave mai ni.”—SEFANAIA 1:14.
1-3. (a) Ko e heigoa ne talahau he Tohi Tapu hagaao ke he aho a Iehova? (e) Ha e fe e “aho a Iehova” ka fehagai mo tautolu?
KO E aho lahi a Iehova kua nakai 24 e matahola he loa. Ka ko e magahala ka fakahoko ai e fakafiliaga he Atua ke he tau tagata kelea. Kua ha ha he tau tagata nakai mahani Atua e kakano ke matakutaku ke he aho ia he pouligia, ita lahi, matematekelea, mo e mamahi. (Isaia 13:9; Amosa 5:18-20; Sefanaia 1:15) “Oi te fakaalofa ke he aho!” he talahau he perofetaaga a Ioelu, “ha kua tata mai e aho a Iehova, to hoko mai tuga e malaia mai ia Ia hana e malolo oti kana.” (Ioelu 1:15) Ka e he aho lahi ia, to eke e Atua mo Fakamoui ha lautolu “kua tonu e tau loto.”—Salamo 7:10.
2 Ko e talahauaga “aho a Iehova” kua hagaao ke he fakahoko he fakafiliaga he Atua ke he tau magaaho kehekehe. Ke tuga anei, ne hoko mai e “aho a Iehova” ke he tau tagata ne nonofo i Ierusalema he tau lima he tau Papelonia he 607 F.V.N. (Sefanaia 1:4-7) Ne hoko foki e fakafiliaga pihia he Atua he 70 V.N. magaaho ne fakaaoga he Atua e tau Roma ke fakahoko e fakafiliaga haana ke he motu ko Iutaia ne fakaheu e Tama haana. (Tanielu 9:24-27; Ioane 19:15) Ne talahau tuai foki he Tohi Tapu e “aho a Iehova” he magaaho ka ‘tau a ia ke he tau motu oti.’ (Sakaria 14:1-3) I lalo he omoomoi he agaaga, ne matutaki he aposetolo ko Paulo e aho ia ke he ha ha hinei he Keriso, ne kamata he faka-Patuiki a Iesu he lagi he 1914. (2 Tesalonia 2:1, 2) Ha kua tata mai e aho a Iehova i tutavaha, nukua latatonu lahi e lauga he tau he Tau Fakamoli a Iehova ma e 2007. Ne totou ia Sefanaia 1:14: “Kua tata mai e aho lahi a Iehova.”
3 Ha kua tata mai e aho lahi he Atua, ko e magaaho ainei ke nofo tauteute a koe. Nofo tauteute fēfē a koe ma e aho ia? Lata nakai ia koe ke taute foki falu lakaaga ke tauteute ma e aho a Iehova?
Nonofo Tauteute a Mutolu
4. Ne nofo tauteute a Iesu ma e kamatamata fe?
4 I loto he perofetaaga haana hagaao ke he fakaotiaga he fakatokaaga nei, ne pehē e Iesu Keriso ke he tau tutaki haana: “Kia nonofo tauteute ai a mutolu.” (Mataio 24:44) He magaaho ne talahau e Iesu e tau kupu ia, nukua mautauteute tuai a ia ma e kamatamata lahi—ko e mate haana mo poa lukutoto. (Mataio 20:28) Ko e heigoa ka ako e tautolu mai he puhala ne nofo tauteute a Iesu?
5, 6. (a) Lagomatai fēfē he fakaalofa ma e Atua mo e tau tagata a tautolu he nonofo tauteute ma e aho a Iehova? (e) Hagaao ke he fakaalofa ke he katofia, ko e heigoa e fifitakiaga ne fakatoka e Iesu?
5 Ne ha ha ia Iesu e fakaalofa loto katoa ma Iehova mo e ma e tau tutūaga tututonu Haana. Hagaao ki a Iesu, ne pehē e Heperu 1:9: “Kua fiafia a koe ke he mahani tututonu, ka e vihiatia e mahani hepehepe; ko e mena ia, kua fakauku ai a koe he Atua, ko e hau a Atua ni, ke he lolo he fiafia ke mua ke he tau kapitiga hau.” Ha kua fakaalofa a ia ke he haana Matua he lagi, ne fakatumau a Iesu ke fakamooli ki a Ia. Kaeke ke fakaalofa pihia a tautolu ma e Atua mo e omaoma ke he tau poakiaga haana, to leveki e ia a tautolu. (Salamo 31:23) Ko e fakaalofa mo e omaoma pihia ka lagomatai a tautolu ke mautauteute ma e aho lahi a Iehova.
6 Ko e fakaalofa ma e tau tagata ko e vala ne mua he aga fakatagata ha Iesu. Mooli, ne “fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:36) Ko e fua, ne fakamatala e Iesu e tala mitaki ke he tau tagata, tuga ni he omoi he fakaalofa a tautolu ke fakapuloa e fekau he Kautu ke he tau katofia ha tautolu. Ko e fakaalofa ma e Atua mo e katofia ka taute a tautolu ke gahua tumau mo tau fekafekau Kerisiano ti lagomatai foki a tautolu ke nonofo tauteute ma e aho lahi a Iehova.—Mataio 22:37-39.
7. He fakatali a tautolu ma e aho a Iehova, ko e ha kua maeke ia tautolu ke fiafia?
7 Ne fiafia lahi a Iesu ke taute e finagalo a Iehova. (Salamo 40:8) Kaeke kua pihia foki e mahani ha tautolu, to fiafia a tautolu he foaki e fekafekau tapu ke he Atua. Ke tatai mo Iesu, to nakai fulukovi a tautolu he foaki atu, mo e to taute he mena nei a tautolu ke fiafia mooli. (Gahua 20:35) E, ko e “fiafia ki a Iehova ko e malolo ha [ta]utolu haia.” Mo e fiafia ia, to mautauteute mitaki a tautolu ma e aho lahi he Atua.—Nehemia 8:10.
8. Ko e ha kua lata ia tautolu ke fakatata fakalahi atu ki a Iehova he liogi?
8 Ko e liogi fakamakai ke he Atua ne lagomatai a Iesu ke nofo tauteute ma e tau kamatamata he tua. Ne liogi a ia he magaaho ne papatiso e Ioane a ia. Ti liogi a Iesu ke he pō katoa he magaaho ne fifili e ia e tau aposetolo haana. (Luka 6:12-16) Ko e tagata totou Tohi Tapu fe ka nakai nava ke he tau liogi ha Iesu mai he loto he pō fakahiku he moui haana he lalolagi? (Mareko 14:32-42; Ioane 17:1-26) Ko e tagata fa liogi nakai a koe, tuga a Iesu? Tutala tumau ki a Iehova, fakaloaloa e liogi, kumi e takitakiaga he agaaga tapu, mo e mafiti ke talia e takitakiaga he magaaho ka mailoga ai. Ko e fakafetuiaga malolō mo e ha tautolu a Matua he lagi kua aoga lahi he vahā uka nei he magaaho hane hoko mafiti mai e aho lahi he Atua. Ti ko e mena ia, kia fakatata fakalahi atu ki a Iehova he liogi.—Iakopo 4:8.
9. Aoga fēfē e manamanatu hagaao ke he fakatapuaga he higoa a Iehova?
9 He manamanatu hagaao ke he fakatapuaga he higoa tapu a Iehova ne lagomatai foki a Iesu ke nofo tauteute ma e tau kamatamata ne fehagai mo ia. Ti fakaako foki e ia e tau tutaki haana kua lata ke lafi ke he ha lautolu a tau liogi ke he Atua e ole nei: “Kia tapu hau a higoa.” (Mataio 6:9) Kaeke kua manako lahi a tautolu ke fakatapu e higoa a Iehova, to eketaha a tautolu ke kalo mai neke taute ha mena ne nakai fakalilifu ki ai. Ko e fua, to mautauteute mitaki a tautolu ma e aho lahi a Iehova.
Lata Nakai a Koe ke Taute e Falu Hikihikiaga?
10. Ko e ha kua latatonu ke filifilia e tau momoui ha tautolu?
10 Kaeke ke hoko mai e aho a Iehova a pogi, to mautauteute mooli nakai a koe? Lata ia tautolu takitokotaha ke filifilia e moui haana ke kitia kua fai matagahua po ke ha ha ai nakai ha mahani ne lata ke hiki. He mailoga e kū mo e tehatehaua he moui he tagata he mogonei, kua lata ia tautolu oti ke igatia ke mataala fakaagaaga ke he tau aho takitaha. (Fakamatalaaga 9:11, 12; Iakopo 4:13-15) Ti kia manamanatu a tautolu ke he falu a puhala kua liga lata ke matakite ki ai he tau momoui ha tautolu.
11. Ko e heigoa e foliaga haau ke he totouaga he Tohi Tapu?
11 Ko e taha puhala aoga lahi ko e tomatomaaga he “fekafekau fakamoli” ke totou e Tohi Tapu he tau aho oti. (Mataio 24:45) Liga eke mo foliaga haau ke totou mo e manamanatu hokulo ke he tau Tohiaga Tapu mai he Kenese ke he Fakakiteaga ke lagataha he tau tau oti. He totou kavi ke fā e veveheaga he aho, maeke ia koe ke totou e tau veveheaga he Tohi Tapu ne 1,189 he taha e tau. Ne igatia e patuiki a Isaraela ke totou e Fakatufono a Iehova “ke he tau aho oti he hana moui.” Mooli foki ne taute e Iosua e taha mena pihia. (Teutaronome 17:14-20; Iosua 1:7, 8) Kua aoga lahi ha ia ke totou he tau leveki fakaagaaga e Kupu he Atua he tau aho oti, ha ko e mena lagomatai he mena nei a lautolu ke foaki e tau “kupu fakaako kua tonu”!—Tito 2:1.
12. Ko e tata lahi mai he aho a Iehova ka omoi a koe ke taute e heigoa?
12 Ko e tata lahi mai he aho a Iehova kua lata ke omoi aki a koe ke fano tumau he tau feleveiaaga Kerisiano mo e fakalataha katoatoa ki ai ke he mena kua maeke. (Heperu 10:24, 25) He taute pihia ka lagomatai a koe ke fakamatila e lotomatala haau ko e tagata fakapuloa he Kautu ne lali ke moua mo e lagomatai a lautolu ne kotofa ke he moui tukulagi. (Gahua 13:48) Liga kua maeke ia koe ke fakatolomaki e gahua haau ke he fakapotopotoaga ke he falu puhala foki, tuga e lagomatai a lautolu ne momotua mo e he fakamafana e tau fuata. Ko e fakamakona ha ia he tau laliaga nei!
Ko e Fakafetuiaga Haau mo e Falu
13. Ko e heigoa e tau hūhū kua lata ia tautolu ke hūhū hifo hagaao ke he tapulu ke he tagata foou?
13 Ha kua tata lahi mai e aho a Iehova, kua lata nakai a koe ke taute e laliaga kua mua atu ke ‘fakatapulu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai’? (Efeso 4:20-24) He feaki e koe e tau mahani Atua, to liga kitia he falu kua ‘mahani a koe ke lata mo e agaaga Haana’ ti kua fakakite e tau fua he agaaga ia. (Kalatia 5:16, 22-25) Maeke nakai a koe ke tuhi ke he falu matagahua pauaki ne fakakite kua fitā e fakatapulu a koe mo e magafaoa haau ke he tagata foou? (Kolose 3:9, 10) Ke tuga anei, kua talahaua nakai a koe ha ko e tau gahua totonu haau ke he tau matakainaga talitonu mo e ke he falu foki? (Kalatia 6:10) Ko e fakaako tumau ke he tau Tohiaga Tapu ka lagomatai a koe ke fakatupu e tau mahani Atua mo e ke nofo tauteute ma e aho a Iehova.
14. Ko e ha kua lata he tagata ke liogi ma e agaaga tapu he lali a ia ke feaki e mahani fakauka?
14 Ka e kua kaeke ke ita vave a koe ti mailoga kua lata ia koe ke fakauka fakalahi? Ko e mahani ia ko e vala he fua ne kua maeke he agaaga tapu he Atua ke fakatupu ia koe. Ko e mena ia, kia liogi ma e agaaga tapu he fakatatai mo e tau kupu a Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu. . . . Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia.”—Luka 11:9-13.
15. Ko e heigoa kua lata ke taute kaeke kua fai vahāloto e tau fakafetuiaga haau mo e matakainaga talitonu?
15 Liga kua fai vahāloto e tau fakafetuiaga haau mo e taha matakainaga talitonu. Ko e mena ia, kia lali fakalahi ke fakamafola e vahāloto ha mua, ati fakalagalaga e mafola mo e kaufakalataha he fakapotopotoaga. (Salamo 133:1-3) Fakagahuahua e fakatonuaga ha Iesu ne fakamau ia Mataio 5:23, 24 po ke Mataio 18:15-17. Kaeke kua mahani a koe ke toka e laā ke tō ka e ita agaia, kia mafiti ke fakamafola e tau lekua. Ke he tau magaaho loga, ko e mena ni kua lata ko e fakamakai ke fakamagalo atu. Ne tohia e Paulo: “Kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu; tuga e Atua ha ia Keriso ne fakamagalo e ia a mutolu.”—Efeso 4:25, 26, 32.
16. Ko e heigoa e tau puhala ne kua lata ke fakaalofa hofihofi noa i loto he fakamauaga?
16 Kua lata e fakafetuiaga he fakamauaga ke hofihofi e fakaalofa mo e fakamagalo he falu magaaho. Kaeke kua lata ia koe ke fakakite fakalahi e fakaalofa mo e fakaalofa hofihofi noa ke he hoa mau haau, kia fakamalolō ke moua e foliaga nei mo e lagomatai he Atua mo e haana Kupu. Kua fai mena kia ne kua lata ia koe ke taute ke fakatatai mo e 1 Korinito 7:1-5 ke maeke ke fakatote hifo e tupetupe mo e kalo mai he nakai fakamooli? Haia ni, ko e faahi ainei he moui ne kua lata mooli he taane po ke hoana ke ‘hofihofi e fakaalofa.’
17. Ko e heigoa e tau lakaaga kua lata ke taute kaeke ke agahala kelea muitui e taha?
17 Ka e kua kaeke ke agahala kelea muitui a koe ke he falu a puhala? Kia taute fakamafiti e tau lakaaga ke fakahako aki. Kia fakamakai ke kumi e lagomatai he tau motua Kerisiano. Ko e tau liogi mo e fakatonuaga ha lautolu ka lagomatai a koe ke liu malolō fakaagaaga. (Iakopo 5:13-16) Liogi ki a Iehova mo e aga fakatokihala. He kaumahala ke taute pihia ka toka a koe ke logona tumau e agahala mo e ke tupetupe e loto manamanatu. Ne pihia e mena ne tupu ki a Tavita, ka kua mitaki ha a ia he moua e totokaaga he magaaho ne talahau e agahala haana ki a Iehova! Ne tohia e Tavita: “Uhoaki e tagata kua fakamagalo hana tau holifono, kua tanumia hana tau hala. Uhoaki e tagata kua nakai talahaua e Iehova kua hala, nakai fakai foki ha fakavai ke he hana loto.” (Salamo 32:1-5) Ne fakamagalo e Iehova a lautolu ne hala ka kua fakatokihala mooli.—Salamo 103:8-14; Tau Fakatai 28:13.
Fakatumau ke Nakai Fai Vala he Lalolagi
18. Lata ke fēfē e onoonoaga haau ke he lalolagi?
18 Kua onoono atu mooli a koe ke he lalolagi foou homo ue atu ne mavehe mai he ha tautolu a Matua he lagi. Ka e fēfē mogoia e onoonoaga haau ke he kaufakalataha he tau tagata nakai tututonu he lalolagi ne fakamamao mai he Atua? Ko Satani, ko e “iki he lalolagi” kua nakai maeke ke moua taha mena ia Iesu Keriso. (Ioane 12:31; 14:30) Kua nakai manako a koe ke moua he Tiapolo mo e lalolagi haana a koe, ti omaoma ā ke he tau kupu he aposetolo ko Ioane: “Aua neke fakaalofa a mutolu ke he lalolagi, po ke tau mena ha ha he lalolagi.” Ko e puhala pulotu haia, ha kua “ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:15-17.
19. Ko e heigoa e tau foliaga kua fakamafana ke he tau fuata Kerisiano ke moua?
19 Hane lagomatai nakai e koe e fanau haau ke ‘leveki e lautolu a lautolu neke ilaila he lalolagi’? (Iakopo 1:27) Kua manako a Satani ke futia e fanau haau ke tuga e tagata ne futi hake e ika. Ko e tau kalapu mo e falu fakatokatokaaga kehekehe kua talaga pauaki ke tataki e tau fuata ke putoia ke he lalolagi a Satani. Ka ko e tau fekafekau ha Iehova kua fitā he ha ha he fakatokatokaaga hokoia ka hao mai he fakaotiaga he fakatokaaga kelea nei. Ti kua lata ke fakamalolō e tau fuata Kerisiano ke “fakamakai nakai noa ke he gahua he Iki.” (1 Korinito 15:58) Kua lata he tau matua ne mahani Atua ke lagomatai e fanau ha lautolu ke fakatoka e tau foliaga ka foaki ki a lautolu e moui fiafia mo e palepale mitaki ne fakaheke e Atua mo e lagomatai a lautolu ke mautauteute ma e aho a Iehova.
Ono Muatua Atu ke he Aho Lahi a Iehova
20. Ko e ha kua lata ia tautolu ke tuku tumau e moui tukulagi i mua ha tautolu?
20 To maeke ia koe ke fakatali ke he aho a Iehova mo e loto totoka kaeke ke tuku tumau e koe e moui tukulagi i mua haau. (Iuta 20, 21) He hagaaki atu ke he moui tukumuitea he Parataiso, to moua e koe e amaamanakiaga ke liu fakafoou ke he malolō fuata haau mo e nakai fakakaupā e magaaho ke tutuli e tau foliaga atihake mo e ako fakalahi hagaao ki a Iehova. Kua maeke mooli ia koe ke ako tukulagi hagaao ke he Atua ha ko e mena ne iloa hokoia he tau tagata he mogonei ko e ‘tau mena ne hiku mai hana tau puhala.’ (Iopu 26:14) Ko e tau amaamanakiaga fiafia lahi ha ia!
21, 22. Ko e heigoa mogoia e tau mena ka fakatutala a koe mo lautolu ka fakaliu tu mai?
21 He Parataiso, to maeke ia lautolu ka fakaliu tu mai ke talahau falu vala tala ne nakai iloa e tautolu ke he vahā i tuai. To ha ha ai a Enoka ke fakamaama e puhala ne moua e ia e malolō ke fakapuloa e fekau a Iehova ke he tau tagata nakai mahani Atua. (Iuta 14, 15) To talamai mooli e Noa ko e fēfē la e tā he vaka. To maeke ia Aperahamo mo Sara ke talahau e tau logonaaga ha laua he toka hifo e moui monuina i Uro ke nonofo he tau fale ie. Manamanatu ki a Eseta he talamai fakamatafeiga hagaao ke he mogo ne tū hake a ia ke lalago e tau tagata haana mo e fakakaumahala e lagatau kelea ha Hamanu ki a lautolu. (Eseta 7:1-6) Manamanatu ki a Iona ka tala hagaao ke he tolu e aho i loto he manava he ika lahi po ko Ioane ko e Papatiso ka fakamaama e tau logonaaga haana he magaaho ne papatiso e ia a Iesu. (Luka 3:21, 22; 7:28) Ko e tau mena ofoofogia ha ia ke iloa!
22 He vahā he Pule Afe Tau he Keriso, liga to monuina a koe ke lagomatai a lautolu ka fakaliu tu mai ke moua “e iloilo ke he Atua.” (Tau Fakatai 2:1-6) He vahā nei, ko e fiafia ha ia ke kitia e tau tagata hane uta e iloilo ki a Iehova ko e Atua mo e fakagahuahua ai! Ka e manatu la ke he fiafia haau he vahā anoiha he magaaho ka fakamonuina e Iehova e tau laliaga haau ke fakaako e tau tagata mai he vahā i tuai ti fanogonogo a lautolu mo e loto fakaaue!
23. Ko e heigoa ha tautolu kua lata ke fakamalolō ke taute?
23 Ko e tau mena aoga hane olioli e tautolu mogonei ko e tau tagata ha Iehova kua mua atu ke he tau laliaga nakai katoatoa ha tautolu ke maeke ke totou po ke fatifati. (Salamo 40:5) Ka kua mahomo atu e loto fakaaue ha tautolu ma e tau foakiaga fakaagaaga he Atua. (Isaia 48:17, 18) Pete ko e tau tutūaga ha tautolu, kia foaki loto katoa e tautolu e fekafekau tapu he fakatali a tautolu ke he aho lahi a Iehova.
To Tali Fefe a Koe?
• Ko e heigoa e “aho a Iehova”?
• Nofo mautauteute fēfē a koe ma e aho a Iehova?
• Ha kua tata mai e aho lahi a Iehova, ko e heigoa e tau hikihikiaga kua liga lata ia tautolu ke taute?
• Ko e heigoa ka hagaaki atu a koe ki ai ka mole e aho a Iehova?
[Tau Hūhū he Fakaakoaga]
[Fakatino he lau 14]
Ne mautauteute a Iesu ma e tau kamatamata
[Fakatino he lau 17]
Ko e monuina ha ia ke lagomatai a lautolu ka fakaliu tu mai ke moua e iloilo ki a Iehova!