Kasin Akaparan Ka la Parad Agew nen Jehova?

“Say baleg ya agew nen Jehova asingger, sikato so asingger tan masiglat a maomaong.”​—SOFONIAS 1:14.

1-3. (a) Anto so ibabaga na Biblia nipaakar ed agew nen Jehova? (b) Anton “agew nen Jehova” so aarapen tayo?

 SAY baleg ya agew nen Jehova et aliwan 24-oras a karukey noagta mas andukey ni, tan diad satan a peryodo so pangidapo toy panangukom to ed saray marelmeng. Saramay agmanlilingkor ed Dios et talagan ontakot diad satan ya agew na bilunget, petang, masebeg a sanok, gonigon, tan pankibalatar. (Isaias 13:9; Amos 5:18-20; Sofonias 1:15) “Kawaen la so agew!” kuan na propesiya nen Joel, “ta asingger la so agew nen Jehova, et onsabi naani a singa kabagbag a manlapu ed Makapanyarin-amin.” (Joel 1:15) Balet diad satan a baleg ya agew, say Dios so Mangilaban ed saramay “maptek a puso.”​—Salmo 7:10.

2 Nayarin usaren met so balikas ya “agew nen Jehova” pian tukoyen so panangidapo na panangukom na Dios diad nanduruman panaon. Singa bilang, sinmabi so “agew nen Jehova” ed saray manaayam ed Jerusalem sanen nilusob ira na saray taga-Babilonia nen 607 B.C.E. (Sofonias 1:4-7) Agawa met so mipadparan impangidapo na Dios na panangukom to nen 70 C.E. sanen inusar na Dios iray Romano a mangipaakseb na panangukom to ed Judion nasyon ya angipulisay ed Anak to. (Daniel 9:24-27; Juan 19:15) Impasakbay met na Biblia so sakey ya “agew nen Jehova” sano sikatoy ‘mibakal la sumpa ed amin a nasyon.’ (Zacarias 14:1-3) Si apostol Pablo so pinuyanan a mangisiglaot ed satan ya agew dia ed kiwawala nen Kristo, a ginmapo sanen nitrono si Jesus bilang Ari ed tawen nen 1914. (2 Tesalonica 2:1, 2) Lapud nanenengneng tayo la so amin a tanda na maples ya isasabi na agew nen Jehova, nagkalautlan matukotukoy so teksto ed taon 2007 na saray Tasi nen Jehova. Inaon itan ed Sofonias 1:14, ya oniay nabasa: ‘Say baleg ya agew nen Jehova so asingger la.’

3 Lapud asingger la so baleg ya agew nen Jehova, natan la so panaon pian paneknekan ya akaparaan itayo la. Panon kan makapanparaan parad satan ya agew? Anto niray nakaukolan mon gawaen pian makapanparaan ka parad agew nen Jehova?

Manparaan Ka

4. Anton mairap a subok so namparaanan nen Jesus?

4 Diad propesiya nen Jesu-Kristo nipaakar ed panampot na sistema na bengabengatla, oniay imbaga to ed saray babangatan to: “Manparaan kayo.” (Mateo 24:44) Sanen imbalikas itan nen Jesus, sikaton mismo et akaparaan la parad mairap a subok ed sikato, salanti, say ipatey to bilang bagat a panondon. (Mateo 20:28) Anto so naaralan tayo ed impangiparaan nen Jesus ed inkasikato?

5, 6. (a) Panon a say panangaro ed Dios tan ed totoo so makatulong ed pagmaliw tayon akaparaan parad agew nen Jehova? (b) Anton alimbawa so impanengneng nen Jesus nipaakar ed panangaro ed kaparan too?

5 Interon-puso so panangaro nen Jesus ed si Jehova tan ed matunong iran estandarte To. Nipaakar ed si Jesus, oniay inkuan na Hebreos 1:9: “Sika inarom so katunongan, tan binusol mo so kaugsan; Kanian say Dios, say Dios mo, pinuyokan to ka na larak na liket a nidumaruma nen saray ibam.” Lapud inaro nen Jesus so Ama ton walad tawen, pinansiansia to so katooran to ed Sikato. No ontan met so panangaro tayo ed Dios tan susumpalen tayo iray kakaukolanen to, salimbengan to itayo. (Salmo 31:23) Say ontan a panangaro tan katutulok so ontulong ed sikatayon makapanparaan parad baleg ya agew nen Jehova.

6 Sankapatnagan ed personalidad nen Jesus so panangaro to ed totoo. On, “inabagey to ra, lapud maermen tan abuybuyak ira, a singa saray  karnero ya anggapoy pastol da.” (Mateo 9:36) Lapud satan, impulong nen Jesus so maong a balita ed saray totoo, kanian nepeg a pakiwasen itayo met na aro pian iyabawag so mensahe na Panarian ed kapara tayon totoo. Makapansiansia itayo sirin ya aktibo bilang Kristianon ministro no inaro tayo so Dios tan say kapara tayon too, tan makatulong itan pian makapanparaan itayo parad baleg ya agew nen Jehova.​—Mateo 22:37-39.

7. Akin a nayarian tayoy manliket legan tayon aalagaren so agew nen Jehova?

7 Panliliketan nen Jesus a gawaen so linawa nen Jehova. (Salmo 40:8) No ontan met so awawey tayo, manliket itayo ed sagradon panlilingkor tayo ed Dios. Singa si Jesus, sikatayoy mabunlok a mangiter, tan saya so manggawa ed sikatayon peteg a maliket. (Gawa 20:35) On, “say liket nen Jehova sikato so biskeg [tayo].” Diad ontan et makapanparaan itayon maong parad baleg ya agew nen Jehova.​—Nehemias 8:10.

8. Akin a nepeg a mantultuloy itayon onasingger ed si Jehova diad pikakasi?

8 Say masimoon a pikakasi ed Dios so akatulong ed si Jesus pian makapanparaan ed saray subok ed pananisia to. Sikatoy nampikasi kayarin binautismoan nen Juan. Sanlabin nampikasi si Jesus sakbay ton pinili iray apostol to. (Lucas 6:12-16) Tan wala kasi manbabasa na Biblia ya agmandinayew ed masimoon iran pikakasi nen Jesus diad samay unor lan labi na bilay to diad dalin? (Marcos 14:32-42; Juan 17:1-26) Kasin lanang kan manpipikasi, a singa si Jesus? Mabetbet kan onasingger ed si Jehova, dalepdep mo so ipipikasim, onkerew na panangiwanwan na masanton espiritu, tan sano sankapatnagan lay pangiwawanwan na satan, mabulos mon awaten itan. Importante so mabiskeg a relasyon ed mangatatawen ya Ama tayo diad sayan mapeligron panaon a mapmaples so iyaasingger na baleg ya agew nen Jehova. Ag-itayo sirin masuyat a mantultuloy ya onasingger ed si Jehova diad pikakasi.​—Santiago 4:8.

9. Kaunongan kaimportante so pannodnonot lawas ed pamasantos ed ngaran nen Jehova?

9 Lapud pinonot lawas nen Jesus so pamasantos ed ngaran nen Jehova, tinmulong met itan pian naparaanan to iray subok ya inarap to. Diad tua, imbangat to iray patumbok to a nepeg dan ilaktip met ed pikakasi ra ed Dios so kerew a: “Nagalang [“napasantos,” NW] komon so ngaran mo.” (Mateo 6:9) No pipilaleken tayon maong a napasantos so ngaran nen Jehova, manggunaet itayon agmanggawa na antokaman a mamabanday ed ngaran to. Bilang resulta, sikatayoy makapanparaan a maong parad baleg ya agew nen Jehova.

Kasin Walaray Kaukolan Mon Umanen?

10. Akin a matukoy ya usisaen tayoy bilay tayo?

10 No bilang ta onsabi nabuas so agew nen Jehova, talaga kasin akaparaan ka la? Nepeg ya usisaen na kada sakey ed sikatayo so dilin bilay to pian nanengneng to no kasin walaray kaukolan ton umanen ed kakikiwas odino awawey to. Lapud antiktikey tan anggapoy pakaseguroan ed peles a bilay, kaukolan a magmaliw ya aliing ed espiritual so balang sakey ed sikatayo. (Eclesiastes 9:11, 12; Santiago 4:13-15) Sirin, konsideraen  tayo so pigaran pamaakaran ed bilay a kaukolan tayon imanoen.

11. Anto so kalat mo ed panagbasa ed Biblia?

11 Importantin tuloy so bilin na ‘matoor ya aripen’ a basaen so Biblia ed inagew-agew. (Mateo 24:45) Gawam a kalat so tinaon a pambasay Kasulatan manlapud Genesis anggad Apocalipsis tekep na panagdalepdep. No manbasa ka na manga apatiran kapitulo kada agew, nasumpal mo so amin a 1,189 a kapitulo na Biblia ed loob na sakey taon. Nensaman, kada ari na Israel et nepeg a manbasa ed Ganggan nen Jehova ed “amin ya agew a panbilay to.” Mapatnag ya ontan met so ginawa nen Josue. (Deuteronomio 17:14-20; Josue 1:7, 8) Agaylan importante sirin a saray managpastol ed kongregasyon et basaen da so Salitay Dios ed inagew-agew, lapud ontulong itan pian ninabang da so “maabig a bangat”!​—Tito 2:1.

12. Anto iray nepeg mon gawaen lapud asingsingger la so agew nen Jehova?

12 Lapud asingsingger lay agew nen Jehova, nepeg a napakiwas kan onatendin naynay ed Makristianon pantitipon tan sigpot kan mibiang ed saratan anggad posible. (Hebreos 10:24, 25) Ontulong itan pian napaaligwas iray dunong mo bilang manangipulong na Panarian a manggugunaet a makalmo tan ontulong ed totoon walaan na dugan awawey na puso parad andi-anggaan a bilay. (Gawa 13:48) Nayarian mo met so magmaliw ya aktibo ed kongregasyon diad arum niran paraan, a singa say panulong ed saray maedad la tan pamaseseg ed saray kalangweran. Agaylan makapenek irayan aktibidad!

Say Relasyon Mo ed Arum

13. Antoray nepeg tayon itepet ed inkasikatayo nipaakar ed pangisulong na balon personalidad?

13 Lapud ngalngali la onsabi so agew nen Jehova, kasin baleg nin sagpot so kaukolan mon gawaen pian ‘nikawes mo so too a balo a pinalsa na Dios ed loob na kaptekan tan matuan kasantosan’? (Efeso 4:20-24) Legan mon babayuboan iray maridios a kalidad, nayarin naimano na arum a sikay ‘manaakar unong ed espiritu’ tan mangipapatnag ed saray bunga na satan. (Galacia 5:16, 22-25) Wala tay nibagam ya agawaan mo la tan say pamilyam a mangipatnag a nisulong yo la so balon personalidad? (Colosas 3:9, 10) Singa bilang, kasin kabkabat ka a manggagawa na kaabigan parad saray kapananisiaan mo tan ed arum? (Galacia 6:10) Say regular a panagaral ed Kasulatan so ontulong ed sikan nabayuboan iray maridios a kalidad a mangiparaan ed sika parad agew nen Jehova.

14. Akin a kaukolan a manpikasi so sakey a too parad masanton espiritu legan ton babayuboan so panagdangka?

14 Panon to no main-inomay moy onsanok tan antam a nakaukolan mo nin dangkaan so inkasikan dili? Satan a kalidad et sakey ed saray bunga a nayarin pawalaen ed sika na masanton espiritu na Dios. Kanian manpikasi ka parad masanton espiritu, unong ya ontan so imbaga nen Jesus: “Kerew kayo, et naikdan kayo; mananap kayo, et makaromog kayo; ompato’kayo, et nalukasan ed sikayo. . . . No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”​—Lucas 11:9-13.

15. Anto so kaukolan mon gawaen no akapisiblangan ka ed sakey a kapananisiaan?

15 No bilang ta akapisiblangan ka ed sakey a kapananisiaan, gawam so anggaay nayarian mo a naresolbe so problema. Diad ontan et napansiansia so kareenan tan pankakasakey na kongregasyon. (Salmo 133:1-3) Iyaplikam so simbawa nen Jesus a walad Mateo 5:23, 24 odino Mateo 18:15-17. No aabuloyan mon onselek so agew a walaan ka ni na sanok, kiwas ka lan tampol pian ipetek iray pamaakaran. Mabetbet a say nakaukolan lambengat et say inkamabulos a mamerdona. Oniay insulat nen Pablo: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.”​—Efeso 4:25, 26, 32.

16. Diad antoran paraan a nakaukolan ed loob na panamaley so inkamapangasi?

16 Diad loob na panamaley et kaukolan a mapangasi so sanasawa tan, no maminsan, et kaukolan day mamerdona. No bilang ta kaukolan mo ni so magmaliw a mas maaro tan mapangasi ed asawam, panggunaetan mon gawaen itan diad tulong na Dios tan say Salita to. Kasin wala ni papaaligwasen mo nipaakar ed panangunor ed  1 Corinto 7:1-5 ta pian naparaisetan so problema odino napaliisan so ag-inkamatoor? Segurado a sakey iyan pamaakaran a kaukolan na sanasawa so magmaliw a “mapangasi.”

17. Antoray nepeg a gawaen na sakey sano akagaway ambelat a kasalanan?

17 Panon to no akagawa ka na ambelat a kasalanan? Manggawa kay polaing pian nipetek a tampol so pamaakaran. Patulongan ka ed saray Kristianon mamatatken. Saray pikakasi tan simbawa ra so ontulong ed sikan onabig ed espiritual. (Santiago 5:13-16) Manpikasi ka ed si Jehova, ya ipanengneng mon magbabawi ka. No agmo gawaen so ontan, nagonigon ka lapud kasalanan tan agmandeen so konsiensiam. Ontan so naeksperiensya nen David, balet agaylay impakainawaan to sanen impatua to ed si Jehova so kasalanan to! Oniay insulat nen David: “Mapalar so naperdona so saray insusumlang to, say asakbongan so kasalanan to. Mapalar so too ya agnapakasalanan ed Jehova ed kasulitan, tan dia ed espiritu to anggapo so saol.” (Salmo 32:1-5) Peperdonaen nen Jehova iramay masimoon a nagbabawi ed kasalanan da.​—Salmo 103:8-14; Uliran 28:13.

Mansiansian Agkabiangan na Mundo

18. Panon so nepeg a panmoriam ed mundo?

18 Seguradon tatalaranan mo so alay dakep a balon mundo ya insipan na mangatatawen ya Ama tayo. Balet, panon so pangipapasen mo ed agmatunong a sosyedad na totoon nisian ed Dios? Si Satanas, a “prinsipe na mundo,” so andian na pibibiang ed si Jesu-Kristo. (Juan 12:31; 14:30) Maseguron agmo labay a walay pibibiang ed sika na Diablo tan say mundo to, kanian nepeg mon ipapuso irayan salita nen apostol Juan: “Aleg ya aroen yo so mundo, ni saray bengatla a wala ed mundo.” Makabat itan a kurang, lapud “say mundo mangangga, tan saray penel to: sabalet so mangunor ed linawa na Dios onsiansia lawas.”​—1 Juan 2:15-17.

19. Saray Kristianon kalangweran so papasesegen a nawalaan na antoran klase na kalat?

19 Kasin tutulongan yoy ananak yo a ‘mansiansian andi-mantsa ed mundo’? (Santiago 1:27) Labay nen Satanas a nabanwit so ananak yo a singa pamabanwit na sakey a too ed sira. Saray nanduruman asosasyon odino arum nin ulopan so mangipapalikna ed ananak yo a makanepegan ira ed mundo ya uuleyan nen Satanas. Balet, saray lingkor nen Jehova et kabiangan la na saksakey ya organisasyon a makaliktar ed pangangga na sayan marelmeng a sistema na bengabengatla. Kanian papasesegen iray Kristianon kalangweran a ‘padaaken da so kimey da ed Katawan.’ (1 Corinto 15:58) Saray atateng a matakot ed Dios so kaukolan ya ontulong ed ananak da a mangiletneg na saray kalat a mamaliket ed sikara tan mangitonton ed makapatumang a bilay a mamagalang ed Dios tan ontulong ed sikaran makapanparaan parad agew nen Jehova.

Manilalo ed Panaon Kayari na Baleg ya Agew nen Jehova

20. Akin a nepeg tayon iteen so nonot tayo ed bilay ya andi-anggaan?

20 Sika so kalmadon makapan-alagar ed agew nen Jehova no iteen moy nonot mo ed bilay ya andi-anggaan. (Judas 20, 21) Talaranan mo so maandon bilay ed Paraiso, a diad satan et ilaloan mon nipawil so datin biskeg na kaugawan mo tan agla nalimitaan so panaon mon manggegemtan ed maabig iran kalat tan sika so makaaral nin nagkalalo nipaakar ed si Jehova. Diad tua et lawas kan makaaral na nipaakar ed Dios lapud say kabat labat na totoo natan et say “kabiangan a mapaway na saray dalan to.” (Job 26:14) Agaylan makapalikliket ya ilalo!

21, 22. Anto so ninabang mo tan saramay napaoli a parehon pakagunggonaan yo?

21 Diad Paraiso, saramay napaoli so makapangiter na kaaruman nin detalye nipaakar ed amta tayo la diad apalabas. Wadman si Enoc a mangipaliwawa  no panon a sikatoy akapampakpel a maong pian niyabawag to so mensahe nen Jehova ed saray mauges a totoo. (Judas 14, 15) Seguradon isalaysay ed sikatayo nen Noe no panon so impangipaalagey to na biong. Nayarian nen Abraham tan si Sara ya ipaliwawa ed sikatayo so alikna ra sanen tinaynan da so mainawan bilay da ed Ur tan nanayam ed saray tolda. Isipen pa si Ester a mangidedetalyi ed no panon ton inyagel iray kapara ton Israelita tan inamper so pakana nen Haman sumpad sikara. (Ester 7:1-6) Isipen pa met si Jonas a mangiistorya nipaakar ed taloy agew ya impanayam to ed eges na baleg a sira odino si Juan a Managbautismo a mangidedeskribe ed liknaan to sanen binautismoan toy Jesus. (Lucas 3:21, 22; 7:28) Agaylan makapainteres a naaralan irayan bengatla!

22 Legan na Sanlibon Taon ya Uley nen Kristo, nayarin napribilehyoan kan ontulong ed saray napaoli pian nawalaan ira na “pikakabat ed Dios.” (Uliran 2:1-6) Natan ni labat et naliliketan itayo lan makanengneng ed saray totoo ya onggagamor na pikakabat nipaakar ed si Jehova a Dios tan onkikiwas unong ed satan! Balet isipen pa so liket a naliknam diad arapen sano bendisyonan nen Jehova iray sagpot mon mangibangat ed saray totoon nambilay ed abaybayag lan panaon ed ­apalabas tan sikaray maapresyan mangawat ed satan!

23. Anto so determinado tayon gawaen?

23 Saray bendisyon a panggagayagaan la natan na saray ag-ayadyarin lingkor nen Jehova et agla nasabaan. (Salmo 40:5) Nagkalautlan pisalsalamatan tayo iray espiritual a bengatla ya itatarya na Dios. (Isaias 48:17, 18) Antokaman so kipapasen tayo, komon ta sigpot-puso itayon manggawa na sagradon panaglingkor legan tayon tatalaranan so baleg ya agew nen Jehova.

Panon Mon Ebatan?

• Anto so “agew nen Jehova”?

• Panon mon napaneknekan ya akaparaan ka la parad agew nen Jehova?

• Lapud asingsingger la so baleg ya agew na Dios, antoran pananguman so nakaukolan tayon gawaen?

• Anto so nailaloan mo sano linmabas lay agew nen Jehova?

[Tepetepet Parad Panagaral]

[Litrato ed pahina 12]

Pinaneknekan nen Jesus a sikatoy akaparaan ed saray subok

[Litrato ed pahina 15]

Agaylan pribilehyo tayo so ontulong ed saray apaoli a makagamor na pikakabat nipaakar ed si Jehova!